Ifịn Owo m̀mê Mme Asan̄autom Abasi?

“MME NTIENSE JEHOVAH ẹdi se ẹmade ke ndusụk udomo.” Ntre ke n̄wed usem German oro Seher, Grübler, Enthusiasten (Mme Okụt N̄kukụt, Mme Ekere N̄kpọ Owo, Mbon Ifiopesịt) etịn̄. Okposụkedi okụtde ndudue ọnọ Mme Ntiense ke ndusụk udomo, enye enyịme ete: “Ke ofụri ofụri, mmọ ẹdu ukeuke uwem unana nduduọhọ. Mmọ ẹsịn ifịk ẹnyụn̄ ẹnam utom mmọ ke ofụri esịt, ẹdi sụn̄sụn̄ nditọisọn̄ ye mme ekpe tax ẹmi ẹnamde akpanikọ. Mmọ ẹfep idem ke idat idat edibịne inyene. . . . Mfara ke idem mmọ ke mme ikpọ mbono edi n̄kpọ emi odotde itoro. Edu n̄waidem mmọ edi ukem ye eke mme otu ido ukpono eken; ama edi utom ukwọrọikọ mmọ ẹnam ẹkan kpukpru mbon eken. Edi se inamde mmọ ẹdi n̄wọrọnda ẹkan kpukpru ufọkabasi Christian ye mme otu eken ke eyo nnyịn edi ọyọhọ ubiere oro n̄kpọ mîkemeke ndibiat emi ediwak mmọ ẹnyenede ke nditan̄a mme ukpepn̄kpọ mmọ ke kpukpru idaha kpa ye kpukpru n̄kpọndịk.”a

Kpa ye utọ in̄wan̄în̄wan̄ ndụn̄ọde oro, ndusụk ikọ ẹmi ẹtịn̄de ẹdomo ndiwụt Mme Ntiense Jehovah ke ata isio isio usụn̄. Ke ata ediwak idụt ke ofụri ererimbot, Mme Ntiense ẹnam mme edinam ido ukpono mmọ an̄wan̄wa ke mme iduọk isua duop ye unana ubiọn̄ọ. Ediwak miliọn owo ẹdiọn̄ọ mmọ, ẹkpono mmọ, ẹnyụn̄ ẹnyịme ẹte ke mmọ ẹnyene unen ndinam ido ukpono mmọ. Ntak, ndien, eyịghe ekededi odude aban̄a mbon ẹmi Mme Ntiense Jehovah ẹdide?

Ekeme ndidi ntak kiet kaban̄a eyịghe emi edi nte ke mme ini eke ndondo emi ediwak otu ido ukpono ẹsịn idem ke edisabade nditọwọn̄, akpakịp uwotidem, ye mme en̄wan mbon edinam oyomonsia. Edi akpanikọ, ukwan̄ edu uwem nte mmọ ẹmi ẹdu ke kpukpru ebiet, idịghe n̄kukụre ke otu mbon oro ẹdide mbon ido ukpono. Nte ededi, kaban̄a ido ukpono ediwak owo ẹnyene eyịghe, ndusụk owo ẹkam ẹsasua.

Mme N̄kpọndịk eke Editiene Owo

Ẹkabade “isio n̄ka” nte “otu emi ọsọn̄ọde eyịre ke san̄asan̄a ukpepn̄kpọ m̀mê adausụn̄.” Ukem ntre, mbon oro ẹbuanade ke “ndedịbe n̄ka” ẹyak idem “ntotụn̄ọ ntotụn̄ọ ẹnọ owo, ekikere, m̀mê n̄kpọ.” Ke nditịm ntịn̄, mme andibuana ke otu ido ukpono ekededi ẹmi ẹsọn̄ọde ẹyịre ye adausụn̄ edide owo ye mme ekikere mmọ ẹdu ke itiendịk edikabade ndi ifịn owo. Ọkpọsọn̄ udọn̄ edinyene adausụn̄ ekeme ndida n̄kesịm edinyene ibetedem oro mîfọnke ke n̄kan̄ eke ntụk ye eke spirit. N̄kpọndịk emi ekeme nditetịm ndiọk ke ini ẹkebọkde owo ke n̄kann̄kụk isio n̄ka toto ke uyen.

Mbon oro ẹnyenede utọ udọn̄ oro ẹban̄a ido ukpono ẹyom ntọt oro ẹkemede ndiberi edem. Ẹkeme ndidi ẹma ẹsian ndusụk owo ẹte ke Mme Ntiense ẹbuana ke esop ido ukpono oro ẹsịnde mme andibuana ke enye ke ufụn, adade odudu akara mmọ, ọbiọn̄ọde ifụre mmọ nte mîdotke, onyụn̄ anamde mmọ ẹkûdu uwem ẹkekem ye n̄kaowo ke ofụri ofụri.

Mme Ntiense Jehovah ẹfiọk ẹte ke mme utọ udọn̄ ẹmi inyeneke nsọn̄ọ. Ke ntre, mmọ ẹnọ fi ikot ndidụn̄ọde nse ke idemfo. Ke ama eketịn̄ enyịn odụn̄ọde, nam ubiere idemfo. Nte Mme Ntiense ẹdi mme asan̄autom Abasi, nte mmọ ẹdọhọde, m̀mê ẹnen̄ede ẹdi ifịn owo? Ukeme mmọ oto m̀mọ̀n̄? Ibuotikọ iba oro ẹdude ke page 12-23 ẹyenọ mme ibọrọ oro ẹnọde uyụhọ ke mme utọ mbụme ẹmi.

[Mme Ikọ idakisọn̄]