Jehovah Osu Mme Un̄wọn̄ọ Esie Ọnọ Mme Anam-akpanikọ
“Enye emi ọnọde nnyịn un̄wọn̄ọ edi Abasi akpanikọ.”—MME HEBREW 10:23.
1, 2. Ntak emi nnyịn ikemede ndinyene ọyọhọ mbuọtidem ke mme un̄wọn̄ọ Jehovah?
JEHOVAH oyom ete mme asan̄autom esie ẹkọri ẹnyụn̄ ẹmụm ọsọn̄idem mbuọtidem ẹkama ke enye ye mme un̄wọn̄ọ esie. Ye utọ mbuọtidem oro owo ekeme ndiberi edem ofụri ofụri ke Jehovah ndinam se enye ọkọn̄wọn̄ọde ndinam. Ikọ esie eke odudu spirit ọdọhọ ete: “Jehovah mme udịm ọmọn̄wọn̄ọ, ete, Iditreke ndiwọrọ kpa nte n̄kekerede; onyụn̄ osu kpa nte n̄kaduakde.”—Isaiah 14:24.
2 Ikọ oro, “Jehovah mme udịm ọmọn̄wọn̄ọ,” owụt ete ke enye ọnọ akamba nsọn̄ọ esie ndisu mme un̄wọn̄ọ esie. Ntak edi oro Ikọ esie ekemede ndidọhọ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:5, 6) Ke ini nnyịn iberide edem ke Jehovah inyụn̄ iyakde ọniọn̄ esie ada nnyịn usụn̄, usụn̄ nnyịn ye unana edikpu ayada nnyịn ekesịm nsinsi uwem, koro ọniọn̄ Abasi edide “eto uwem mmọ eke ẹmụmde enye ẹkama.”—Mme N̄ke 3:18; John 17:3.
Ata Mbuọtidem ke Mme Ini Eset
3. Didie ke Noah okowụt mbuọtidem ke Jehovah?
3 N̄wetnnịm n̄kpọ ẹban̄ade mme edinam Jehovah ye mbon oro ẹnyenede ata mbuọtidem ọnọ nsọn̄ọ aban̄a nte enye edide se ẹberide edem. Ke uwụtn̄kpọ, ke se ibede isua 4,400 ẹmi ẹkebede, Abasi ama asian Noah ete ke ẹyesobo ererimbot eyo esie ke Ukwọ ofụri ererimbot. Enye ama eteme Noah ete ọkọn̄ ata akamba ubom ndida nnịm uwem owo ye eke unam. Nso ke Noah akanam? Mme Hebrew 11:7 asian nnyịn ete: “Oto mbuọtidem Noah, sia Abasi ọnọde enye ntọt aban̄a se enyịn mîkwe kan̄a, ke uten̄e Abasi, ọkọn̄ ubom ndida nnyan̄a ufọk esie.” Ntak emi Noah ekenyenede mbuọtidem ke n̄kpọ oro akananam mîtịbeke, n̄kpọ oro “enyịn mîkwe kan̄a”? Koro enye ama enen̄ede ọdiọn̄ọ aban̄a mme edinam Abasi eke mme ini edem ye ubon owo ndifiọk nte ke se ededi oro Abasi etịn̄de esisu. Ntre Noah ama enyene mbuọtidem nte ke Ukwọ oro n̄ko ayada itie.—Genesis 6:9-22.
4, 5. Ntak emi Abraham ọkọbuọtde idem ọyọhọ ọyọhọ ke Jehovah?
4 Uwụtn̄kpọ ata mbuọtidem efen edi Abraham. Ke se ikperede isua 3,900 ẹmi ẹkebede, Abasi ama ọdọhọ enye ete awa Isaac, n̄kukụre eyeneren oro enye ekenyenede oto n̄wan esie, Sarah. (Genesis 22:1-10) Didie ke Abraham akanam n̄kpọ? Mme Hebrew 11:17 ọdọhọ ete: “Oto mbuọtidem Abraham awa Isaac ke uwa, ke ini Abasi odomode enye ese.” Nte ededi, ke akpatre idaha, angel Jehovah ama akpan Abraham. (Genesis 22:11, 12) Edi, ntak emi Abraham akakam ekerede ndinam orụk n̄kpọ oro? Koro, nte Mme Hebrew 11:19 ọdọhọde, “[enye] ekenịm ete, Abasi ekeme ndisio [Isaac] ke otu mme akpan̄kpa nnam enye eset.” Edi didie ke Abraham ekekeme ndinyene mbuọtidem ke ediset ke n̄kpa ke ini akanam enye mîkekwe ndomokiet ndien akani n̄wetnnịm n̄kpọ ndomokiet aban̄ade oro mîkodụhe?
5 Ti ete, Sarah ekedi isua 89 ke ini Abasi ọkọn̄wọn̄ọde ndinọ mmọ eyeneren. Idịbi Sarah ama ọsọn̄ ebe ndiman eyen—ama akpa, yak idọhọ ntre. (Genesis 18:9-14) Abasi ama anam idịbi Sarah afiak enyene uwem, ndien enye ama aman Isaac. (Genesis 21:1-3) Abraham ama ọfiọk ete ke sia Abasi ama akanam idịbi Sarah afiak enyene uwem, do enye ekeme n̄ko ndifiak nnọ Isaac uwem edieke oyomde. Rome 4:20, 21 etịn̄ aban̄a Abraham ete: “Mbuọtidem ibọhọke enye: enye owụk enyịn ese un̄wọn̄ọ Abasi, inyụn̄ iyịkke ke unana mbuọtidem, edi akabade enyene odudu oto ke mbuọtidem, ọnọ Abasi ubọn̄: onyụn̄ etịm obụre ọfiọk ete, Abasi ekeme n̄ko ndinam se Enye ọkọn̄wọn̄ọde.”
6. Didie ke Joshua okowụt mbuọtidem ke Jehovah?
6 Ke se iwakde ikan isua 3,400 ẹmi ẹkebede ke ini Joshua ama ekebe isua ikie ke emana ndien ke ama okodu ke ofụri eyouwem okụt nte Abasi edide se ẹkemede ndiberi edem, enye ama ọnọ ntak emi kaban̄a mbuọtidem esie: “Mbufo ẹmefiọk ke ofụri esịt mbufo, ye ke ofụri ukpọn̄ mbufo, ẹte ke baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.”—Joshua 23:14.
7, 8. Ewe usụn̄ edinam edinyan̄a ke mme anam-akpanikọ Christian ẹketiene ke akpa isua ikie, ndien ntak-a?
7 Ke n̄kpọ nte isua 1,900 ẹmi ẹkebede, ediwak mbon nsụhọdeidem ẹma ẹwụt ata mbuọtidem. Mmọ ẹma ẹfiọk ẹto edisu prọfesi Bible nte ke Jesus ekedi Messiah ẹnyụn̄ ẹnyịme mme ukpepn̄kpọ esie. Ke ẹnyenede eti isọn̄ ke mme akpanikọ ye ke N̄wed Abasi Usem Hebrew, mmọ ẹma ẹkọn̄ mbuọtidem ke se Jesus ekekpepde. Ntem, ke ini Jesus ọkọdọhọde ete ke ubiomikpe Abasi ke ekedi ebịne Judea ye Jerusalem ke ntak unana mbuọtidem, mmọ ẹma ẹnịm enye ke akpanikọ. Ndien ke ini enye akasiande mmọ se mmọ ẹkenyenede ndinam man ẹnyan̄a uwem mmọ, mmọ ẹma ẹnam.
8 Jesus ama asian mme andinịm ke akpanikọ ete ke ini udịmekọn̄ ẹkande Jerusalem ẹkụk, yak mmọ ẹfen̄e. Udịmekọn̄ Rome ẹma ẹdi en̄wan ye Jerusalem ke isua 66 E.N. Edi ekem mbon Rome ẹma ẹnyọn̄ọ kaban̄a ntak oro owo mîkanamke an̄wan̄a. Oro ekedi idiọn̄ọ ọnọ mme Christian ndikpọn̄ obio oro, koro Jesus ama etịn̄ ete: “Ke adan̄aemi mbufo ẹdikụtde nte mbonekọn̄ ẹkande Jerusalem ẹkụk, ẹfiọk ndien ẹte, n̄wụre esie ke ekpere. Ke ini oro yak mmọ eke ẹdude ke Judea ẹfen̄e ẹka ikpọ obot; yak mmọ eke ẹdude ke esịt obio ẹwọn̄ọ ẹnyọn̄; yak mmọ eke ẹdude ke in̄wan̄ ẹkûnyụn̄ ẹdụk obio.” (Luke 21:20, 21) Mbon oro ẹkenyenede ata mbuọtidem ẹma ẹkpọn̄ Jerusalem ye n̄kann̄kụk ikpehe oro ẹnyụn̄ ẹfehe ẹka ebiet ubọhọ.
Mme Utịp Unana Mbuọtidem
9, 10. (a) Didie ke mme adaiso ido ukpono ẹkewụt unana mbuọtidem mmọ ke Jesus? (b) Nso ikedi mme utịp unana mbuọtidem oro?
9 Nso ke mbon oro mîkenyeneke ata mbuọtidem ẹkenam? Mmọ ikefeheke ke ini mmọ ẹkenyenede ifet. Mmọ ẹkekere ke mme adausụn̄ mmimọ ẹkeme ndinyan̄a mmimọ. Edi, mme adausụn̄ oro ye mme anditiene mmọ n̄ko ẹma ẹnyene uyarade aban̄ade itie Messiah Jesus. Ntre ntak emi mmọ mîkenyịmeke se enye eketịn̄de? Ke ntak idiọk idaha esịt mmọ. Ẹma ẹbem iso ẹyarade emi ke ini mmọ ẹkekụtde ediwak mme usụhọde owo ẹkade ẹbịne Jesus ọkwọkudịm ke enye ama akanam Lazarus eset. John 11:47, 48 obụk ete: “Ikpọ oku ye mme Pharisee ẹkot akwa esop [esop enyọn̄ mme Jew] ẹbono, ẹnyụn̄ ẹdọhọ ẹte, Inam didie? koro owo emi [Jesus] ke ananam ediwak idiọn̄ọ. Edieke iyakde Enye osụk aka iso ntem, kpukpru owo ẹyebuọt idem ye Enye: ndien mbon Rome ẹyedi ẹdibọ nnyịn itie nnyịn ye ubọn̄ nnyịn.” Joh 11 Ufan̄ikọ 53 ọdọhọ ete: “Ntre toto ke usen oro mmọ ẹsop ibuot, ẹte iwot Enye.”
10 Nso enyene-ndyọ utịben̄kpọ ke Jesus akanam ntem—anamde Lazarus afiak edidu uwem! Edi mme adaiso ido ukpono ẹma ẹyom ẹwot Jesus ke ndinam oro. Akwa idiọkn̄kpọ mmọ ama aka iso ayarade ke ini “ikpọ oku [ẹkedụkde] odu, ẹte iwot Lazarus n̄ko, koro oto ke ntak esie ediwak mme Jew ẹdaha ẹbuọt idem ye Jesus.” (John 12:10, 11) Ndisụk nnam Lazarus eset ke n̄kpa ekedi oro, ndien mme oku oro ẹkeyom ndikụt nte enye afiak akpa! Mmọ ikekereke iban̄a uduak Abasi m̀mê mfọnọn̄kpọ mme owo. Mmọ ẹkedi ibụk, ẹkerede ẹban̄a mme idaha ye mme ufọn mmọ. “Mmọ [ẹkema] ubọn̄ eke otode owo ẹkan ubọn̄ eke otode Abasi.” (John 12:43) Edi mmọ ẹma ẹkpe utịp unana mbuọtidem mmọ. Ke isua 70 E.N., udịmekọn̄ mbon Rome ẹma ẹfiak ẹdi ẹnyụn̄ ẹdisobo itie mmọ ye idụt mmọ, ọkọrọ ye ediwak mmọ.
Mbuọtidem Ẹnamde Ẹwụt ke Eyo Nnyịn
11. Ke ntọn̄ọ ntọn̄ọ isua ikie emi, didie ke ẹkewụt ata mbuọtidem?
11 Ke isua ikie emi, ediwak iren ye iban mbuọtidem ẹdu n̄ko. Ke uwụtn̄kpọ, ke ntọn̄ọ ntọn̄ọ iduọk isua 1900 ko ke edem, mme owo ke ofụri ofụri ẹma ẹdori enyịn ndinyene emem emem ini iso oro enyenede uforo. Ke ukem ini oro, mbon oro ẹkebuọtde idem ke Jehovah ke ẹketọt nte ke ubonowo ọmọn̄ odụk ndiọkn̄kan ini afanikọn̄ esie. Se ẹkebemde iso ẹtịn̄ ẹban̄a ke Ikọ Abasi edi oro ke Matthew ibuot 24, 2 Timothy ibuot 3, ye mme itie en̄wen. Se mbon mbuọtidem oro ẹketịn̄de ama enen̄ede etịbe, ọtọn̄ọde ke 1914 ye Ekọn̄ Ererimbot I. Ererimbot ke akpanikọ ama odụk “ukperedem ini” ye “ndiọkeyo” oro ẹkebemde iso ẹtịn̄ ẹban̄a. (2 Timothy 3:1) Ntak emi mme asan̄autom Jehovah ẹkefiọkde akpanikọ aban̄ade mme idaha ererimbot adan̄aoro ke ini mbon efen mîkọdiọn̄ọke? Koro, ukem nte Joshua, mmọ ẹma ẹnyene mbuọtidem nte ke baba ikọ Jehovah kiet idikpụhu.
12. Mfịn, ewe un̄wọn̄ọ Jehovah ke mme asan̄autom esie ẹnyene ọyọhọ mbuọtidem?
12 Mfịn, mme asan̄autom Jehovah, ẹmi ẹberide edem ke enye, ẹwak ẹkpere ndisịm miliọn itiokiet ke ofụri ererimbot. Mmọ ẹfiọk oto uyarade edisu oro ntịn̄nnịm ikọ Abasi osude nte ke ibịghike enye ayada afai afai, mbiara editịm n̄kpọ emi ekesịm utịt. Ntre mmọ ẹnyene mbuọtidem nte ke ini ekpere oro mmimọ idikụtde edisu 1 John 2:17, emi ọdọhọde ete: “Ererimbot ke ebebe efep ye mbumek esie; edi owo eke anamde se Abasi amade ododu ke nsinsi.” Mme asan̄autom esie ẹnịm ọyọhọ ọyọhọ nte ke Jehovah oyosu un̄wọn̄ọ emi.
13. Adan̄a didie ke afo ekeme ndiberi edem ke Jehovah?
13 Adan̄a didie ke afo ekeme ndiberi edem ke Jehovah? Afo emekeme ndisịn uwem fo ke itiendịk ke ntak esie! Idem edieke afo atabade uwem fo idahaemi ke ndinam n̄kpọ esie, enye ayafiak ọnọ fi uwem oro etịmde ọfọn akan ke ediset ke n̄kpa. Jesus ọnọ nnyịn nsọn̄ọ ete: “Ini ke edi eke kpukpru mme andidu ke udi [oro edi, ke ibuot uti n̄kpọ Abasi] ẹdikopde Enye uyo ẹwọn̄ọ ẹdi.” (John 5:28, 29) Ndi afo ọmọfiọk dọkta, akara ukaraidem, ataifiọk, anam mbubehe ndomokiet, m̀mê owo efen ekededi emi ekemede ndinam oro? Edinam mmọ eke ini edem owụt ete ke mmọ ikemeke. Jehovah ekeme, ndien enye oyonyụn̄ anam!
Utịbe Utịbe Ini Iso Enyenede Mme Anam-Akpanikọ
14. Nso utịbe utịbe ini iso ke Ikọ Abasi ọn̄wọn̄ọ ọnọ mme anam-akpanikọ?
14 Jesus ama owụt nte ke obufa ererimbot ke idak Obio Ubọn̄ Abasi eke heaven iditreke ndidi, ọdọhọde ete: “Ọfọfọn ọnọ mmọ eke ẹnyenede ifụre ifụre ido: koro mmọ ẹyeda isọn̄ ẹnyene.” (Matthew 5:5) Oro ama ọsọn̄ọ un̄wọn̄ọ Abasi oro ẹkụtde ke Psalm 37:29: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” Ndien esisịt ini mbemiso Jesus akakpade ke ini anamidiọk kiet okowụtde mbuọtidem ke enye, Jesus ama ọdọhọ owo oro ete: “Afo oyodu ye Ami ke Paradise.” (Luke 23:43) Ih, nte Edidem Obio Ubọn̄ Abasi, Jesus oyokụt ete ke ẹnam eren emi eset edidu uwem ke isọn̄ ye ifet edidu uwem ke nsinsi ke Paradise oro. Mfịn, mbon oro ẹkọn̄de mbuọtidem ke Obio Ubọn̄ Jehovah ẹkeme n̄ko ndidori enyịn ndidu uwem ke Paradise ke ini “[Abasi edikwọhọrede] kpukpru mmọn̄eyet ke enyịn mmọ efep. N̄kpa [mîdinyụn̄] idụhe aba; eseme ye ntuan̄a ye ubiak [mîdinyụn̄] idụhe aba; koro ebeiso n̄kpọ ẹma ẹbe ẹfep.”—Ediyarade 21:4.
15, 16. Ntak emi uwem editiede emem emem ntre ke obufa ererimbot?
15 Ẹyak nnyịn ida ekikere nnyịn ika obufa ererimbot oro. Da nte ke nnyịn imododụn̄ ke enye. Inikiet inikiet, nnyịn imokụt mbon inemesịt ke kpukpru itie ẹmi ẹdụn̄de ọtọkiet ke ọyọhọ emem. Mmọ ke ẹdara mme idaha ẹbietde mbon oro ẹtịn̄de ke Isaiah 14:7: “Ofụri ekondo ke ana sụn̄, ọduọk odudu; mmọ ẹsio n̄kpo idara.” Ntak emi mmọ ẹnamde ntre? N̄kpọ kiet edi, tịm fiọk ete ke mme usụn̄ ufọk mmọ inyeneke ukpọhọde. Owo iyomke mmọ, sia ubiatibet m̀mê afai mîdụhe. Enye etie ukem ukem nte Ikọ Abasi ọkọdọhọde nte editiede: “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—Micah 4:4.
16 Ekọn̄ idụhe aba n̄ko, koro ẹwụk ekọn̄ ke obufa ererimbot emi. Ẹda kpukpru n̄kpọekọn̄ ẹnam mme n̄kpọutom emem. Ke ọyọhọ ọyọhọ usụn̄ifiọk, Isaiah 2:4 omosu: “Mmọ ẹyeda ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.” Edi, ndien, oro edi se nnyịn ikodoride enyịn iban̄a! Ntak-a? Koro ediwak mme andidụn̄ obufa ererimbot ẹma ẹkpep ndinam oro ke adan̄aemi ẹkenamde n̄kpọ Abasi ke akani ererimbot.
17. Nso mme idaha udu uwem ẹdidu ke idak Obio Ubọn̄ Abasi?
17 N̄kpọ efen n̄ko emi afo okụtde edi nte ke ubuene idụhe. Idụhe owo emi odụn̄de ke ndedehe ntaha ufọk m̀mê esịnede ntaha ọfọn̄ m̀mê ananade ufọk. Kpukpru owo ẹnyene eti ufọk ye ediye n̄kann̄kụk emi enyenede ndiye eto ye flawa. (Isaiah 35:1, 2; 65:21, 22; Ezekiel 34:27) Ndien biọn̄ idụhe koro Abasi omosu un̄wọn̄ọ esie nte ke akpakịp udia oyodu ọnọ kpukpru owo: “Uwak ibokpot ẹyedu ke isọn̄ ke nsom ikpọ obot.” (Psalm 72:16) Ke akpanikọ, ke idak ndausụn̄ Obio Ubọn̄ Abasi, ubọn̄ ubọn̄ paradise atara ke ofụri isọn̄, kpa nte Abasi akaduakde ko ke Eden.—Genesis 2:8.
18. Ke obufa ererimbot, nso mme n̄kpọ mîdidịgheke mme owo aba?
18 Afo n̄ko omokop n̄kpaidem aban̄a ọkpọsọn̄ odudu oro kpukpru owo ẹnyenede. Emi edi koro mmọ ke emi ẹnyenede mfọnmma idem ye ekikere. Udọn̄ọ, ubiak, m̀mê n̄kpa idụhe aba. Owo ndomokiet itiehe ke n̄kpọitie mbon n̄kpọnnam m̀mê ndina ke bed ufọkibọk. Kpukpru oro ẹbe ẹfep ke nsinsi. (Isaiah 33:24; 35:5, 6) Kamse, unam ndomokiet idịghe n̄kpọndịk n̄ko, koro odudu Abasi anamde mmọ ẹtie emem emem!—Isaiah 11:6-8; 65:25; Ezekiel 34:25.
19. Ntak emi ‘inemesịt’ edidude kpukpru usen ke obufa ererimbot?
19 Nso utịbe utịbe ntatenyịn ke mbon mbuọtidem oro ẹdụn̄de ke obufa ererimbot ẹnam ntem! Ẹyak mme ukeme ye usọ mmọ ye inyene isọn̄ ẹsịn ke nti edinam, idịghe ke mbon oro ẹnọde unan; ke ndidiana kiet ye mbon en̄wen, idịghe ndimia mbuba ye mmọ. Ndien kpukpru owo oro afo osobode ẹdi owo ẹmi afo ekemede ndiberi edem koro, nte Abasi ọkọn̄wọn̄ọde, kpukpru mmọ ẹdi ‘mbon oro Jehovah etemede.’ (Isaiah 54:13) Sia mme ibet Abasi ẹkarade kpukpru owo, “ifiọk Jehovah [ọyọhọ] ke ererimbot, kpa nte mmọn̄ ofụkde inyan̄.” (Isaiah 11:9) Ke akpanikọ, kpukpru usen ke obufa ererimbot emi edi se Psalm 37:11 ọkọdọhọde nte enye edidide, kiet oro akamade ‘inemesịt.’
Ẹnọ Nsọn̄ọ Kaban̄a Ini Iso Oro Akamade Inemesịt
20. Nso ke ana nnyịn inam man idara emem emem ini iso?
20 Nso ke ana nnyịn inam man idi ubak ini iso oro akamade inemesịt do? Isaiah 55:6 asian nnyịn ete: “Mbufo ẹyom Jehovah, ke ini mbufo ẹkemede ndikụt enye, ẹseme ẹkot enye, ke ini enye ekperede.” Ndien nte nnyịn iyomde, edu nnyịn ekpenyene nditie nte ẹtịn̄de ke Psalm 143:10: “Teme mi ndinam se afo amade: koro afo edide Abasi mi.” Mbon oro ẹnamde emi ẹkeme ndisan̄a nte ọfọnde ama ke iso Jehovah ke mme akpatre usen ẹmi ẹnyụn̄ ẹkeme ndidori enyịn ke eti ini iso. “Tịn̄ enyịn ke owo eke ọfọnde ama, nyụn̄ se edinen owo: koro eti utịt anade ọnọ owo emem. Ẹyenyụn̄ ẹsobo mme idiọkowo ọtọkiet: ẹyesịbe eti utịt mme idiọkowo ẹfep.”—Psalm 37:37, 38.
21, 22. Nso ke Abasi anam mfịn, ndien didie ke ẹnọ ukpep emi?
21 Idahaemi Jehovah ke okot mbon oro ẹyomde ndinam uduak esie osion̄o ke kpukpru idụt. Enye ke anam mmọ ẹdi itiat idakisọn̄ obufa n̄kaowo esie eke isọn̄, nte prọfesi Bible ekebemde iso etịn̄ ete: “Ke utịt eyo [ini emi nnyịn idude uwem ke emi] . . . , ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah [utuakibuot akpanikọ esie oro ẹmenerede ke enyọn̄] . . . enye eyekpep nnyịn ido esiemmọ, nnyịn iyonyụn̄ isan̄a ke usụn̄ esie.”—Isaiah 2:2, 3.
22 Ediyarade 7:9 etịn̄ aban̄a mmọ ẹmi nte “akwa otuowo . . . ẹtode ke kpukpru obio ye esien ye idụt ye usem.” Edi 7 Ufan̄ikọ 14 ọdọhọ ete: “Mmọ oro ẹdi mmọ ẹmi ẹketode ke akwa ukụt ẹwọn̄ọ,” ẹbọhọde utịt editịm n̄kpọ emi odude ke emi. Itiat idakisọn̄ obufa ererimbot emi ekpere ndisịm owo miliọn itiokiet idahaemi ke ibat, ye ediwak mbufa owo ẹkabarede ẹdi ubak esie ke isua kiet kiet. Ke ẹnọ kpukpru mme anam-akpanikọ asan̄autom Jehovah ẹmi ukpep kaban̄a uwem ke obufa ererimbot esie. Mmọ ke ẹkpep mme usọ eke spirit ye mme usọ en̄wen oro ẹyomde man ẹnam isọn̄ emi akabade edi paradise. Ndien mmọ ẹnyene ọyọhọ mbuọtidem nte ke Paradise oro ayakabade edi ata idem n̄kpọ koro “Enye emi ọnọde nnyịn un̄wọn̄ọ edi Abasi akpanikọ.”—Mme Hebrew 10:23.
Mme Akpan N̄kpọ Ndida Nnam Ndụn̄ọde
◻ Nso mme utịp ke unana mbuọtidem akada edi ke akpa isua ikie?
◻ Adan̄a didie ke mme asan̄autom Abasi ẹkeme ndiberi edem ke enye?
◻ Nso orụk ini iso odu ebet mme anam-akpanikọ?
◻ Nso ke ana nnyịn inam man inyene ini iso oro akamade inemesịt inọ idem nnyịn ke obufa ererimbot Abasi?
[Mme ndise ke page 18]
Idahaemi Jehovah ke esịn itiat idakisọn̄ obufa n̄kaowo eke isọn̄