Nte Afo Emeti?
Nte afo omokụt nte mme nsiondi Enyọn̄-Ukpeme eke ndondo emi ẹnyenede ata ufọn ẹnọ fi? Do ntak mûdaha mme mbụme ẹtienede mi udomo ibuot uti n̄kpọ fo use?
◻ Nso idi ukpụhọde ke ufọt “usen Ọbọn̄” ye “usen Jehovah”? (Ediyarade 1:10; Joel 2:11)
“Usen Ọbọn̄” esịne edisu mme n̄kukụt 16 oro ẹtịn̄de ẹban̄a ke Ediyarade ibuot 1 esịm 22 ye mme akpan n̄kpọntịbe oro Jesus ekebemde iso etịn̄ aban̄a ke ibọrọ mbụme oro mme mbet esie ẹkebụpde ẹban̄a idiọn̄ọ edidu esie. Nte akpatre n̄kpọ ke usen Ọbọn̄, enyene-ndịk usen Jehovah ọtọn̄ọ ke ini emi enye edibierede ikpe ọnọ idiọk ererimbot Satan. (Matthew 24:3-14; Luke 21:11)—12/15, page 11.
◻ Nso idi ndusụk n̄wọrọnda ikpehe ke Bible Makarios?
Enyịn̄ oro Jehovah odu awak akan utịm ike 3,500 ke Bible Makarios. Eyen ukpepn̄kpọ kiet ke n̄wed ido ukpono usem Russian ọkọdọhọ ete: “Edikabade [oro] ọsọn̄ọ eyịre ke uwetn̄kpọ usem Hebrew, ndien usem ẹdade ẹkabade enen onyụn̄ odot ye se ẹnemede.”—12/15, page 27.
◻ Nso idi “akpanikọ” oro Jesus ọkọdọhọde ke ayanam nnyịn iwọrọ ufụn? (John 8:32)
Ke ndidọhọ “akpanikọ,” Jesus eketịn̄ aban̄a ntọt eke odudu spirit Abasi—akpan akpan ntọt aban̄ade uduak Abasi—oro ẹtịmde ẹnịm ke Bible.—1/1, page 3.
◻ Mmanie ẹdi Jehu ye Jehonadab eyomfịn?
Jehu ada aban̄a Jesus Christ, emi “Israel Abasi,” kpa mme Christian oro ẹyetde aran, ẹdade ke ibuot esie ke isọn̄. (Galatia 6:16; Ediyarade 12:17) Kpa nte Jehonadab ọkọwọrọde okosobo ye Jehu, “akwa otuowo” ẹtode mme idụt ẹwọrọ ẹdi ndinọ mme andida ke ibuot Jesus ke isọn̄ ibetedem. (Ediyarade 7:9, 10; 2 Ndidem 10:15)—1/1, page 13.
◻ ‘Ndisan̄a ye Abasi’ ọwọrọ nso? (Genesis 5:24; 6:9)
Emi ọwọrọ ete ke mbon oro ẹnamde ntre, utọ nte Enoch ye Noah, ẹkekama idemmọ ke usụn̄ oro ọnọde uyarade ọkpọsọn̄ mbuọtidem ke Abasi. Mmọ ẹma ẹnam se Jehovah eketemede mmọ ẹnyụn̄ ẹnam uwem mmọ odu ke n̄kemuyo ye se mmọ ẹkefiọkde ẹban̄a enye oto ke mme edinam esie ye ubonowo.—1/15, page 13.
◻ Ntak emi owo akpanamde ndutịm mbak ndusụk enye akpa?
Ke usụn̄ifiọk kiet, ndinam utọ ndutịm oro edi enọ emi owo ọnọde ubon esie. Enye owụt ima. Enye owụt udọn̄ owo ‘nditịm n̄kpọ nnọ mbon ufọk esie’ idem ke ini enye mîdụhe aba ye mmọ. (1 Timothy 5:8)—1/15, page 22.
◻ Nso ke “akani ediomi” ọkọyọhọ? (2 Corinth 3:14)
Enye ama ebem iso owụt nte obufa ediomi editiede ndien, ye n̄kaiso uwa esie, owụt ediyom emi owo ke mbrenyịn oyomde edifak nsio ke idiọkn̄kpọ ye n̄kpa. Enye ekedi “andikpeme nnyịn, emi adade nnyịn ọsọk Christ.” (Galatia 3:24)—2/1, page 14.
◻ Ke nso mme usụn̄ ke obufa ediomi edi nsinsi? (Mme Hebrew 13:20)
Akpa, ke mîbietke Ibet ediomi, owo idikpụhọke enye tutu amama. Udiana, mme utịp edinam esie ẹdi ke nsinsi. Ndien ọyọhọ ita, mme andidu ke idak Obio Ubọn̄ Abasi ke isọn̄ ẹyeka iso ndibọ ufọn nto ndutịm obufa ediomi ẹbe ẹdụk Tọsịn Isua.—2/1, page 22.
◻ Nso ufọn isụn̄ọ ito ediwụt esịtekọm?
Ufiop emi owo okopde ke ndiwụt esịtekọm ke esịt etịp esịn ke inemesịt ye emem esie. (Men Mme N̄ke 15:13, 15 domo.) Sia edide in̄wan̄în̄wan̄ edu, esịtekọm ekpeme owo osio ke utọ etikwo etikwo ntụk nte iyatesịt, ufụp, ye utọk.—2/15, page 4.
◻ Ẹda mbon oro ẹbonde ke spirit ẹsịn ke ewe ediomi?
Obufa ediomi, emi Jehovah anamde ye mme andibuana ke Israel eke spirit, ye ediomi Obio Ubọn̄, emi Jesus anamde ye mme anditiene nde-ikpat esie ẹmi ẹyetde aran. (Luke 22:20, 28-30)—2/15, page 16.
◻ Ewe ikpọ usọrọ ita ke ẹketeme nditọ Israel ndidụk?
Usọrọ Uyo eke Leaven Mîdụhe, oro ẹkesinịmde ke ndondo oro Passover eke Nisan 14 okụrede; Usọrọ Mme Urua, ke ọyọhọ usen 50 ọtọn̄ọde ke Nisan 16; ye Usọrọ Ukpen̄e, m̀mê Usọrọ Mme Ataya, ke ọyọhọ ọfiọn̄ itiaba. (Deuteronomy 16:1-15)—3/1, page 8, 9.
◻ Ntak edide ifet ndidu ke mme mboho Christian?
Jesus ọkọdọhọ ete: “Ọtọ nte owo iba m̀mê ita ẹsopde idem ke enyịn̄ Mi, do ke ndodu ke ufọt mmọ.” (Matthew 18:20; 28:20) N̄ko, akpan usụn̄ kiet oro ẹdiade udia eke spirit edi ke mme mbono esop ye ke ikpọ mboho. (Matthew 24:45)—3/1, page 14.
◻ Nso idi ntọn̄ọ enyịn̄ oro Nimrod?
Ediwak nditọ ukpepn̄kpọ ẹnyene ekikere oro nte ke owo ikọnọhọ enyịn̄ oro Nimrod toto ke emana. Utu ke oro, mmọ ẹkere ke edi enyịn̄ oro ẹkenọde ke ukperedem man odot ye edu nsọn̄ibuot esie ke enye ama ọkọwọrọ owụt idem.—3/15, page 25.
◻ Ubon edi akpan n̄kpọ adan̄a didie ọnọ ekpụk n̄kaowo?
Ubon edi n̄kpọ oro owo oyomde. Mbụk owụt ete ke adan̄a nte ndutịm ubon ataharede, odudu obio ye mme idụt emem. Ntre ubon enyene nnennen utịp ke nsọn̄ọnda n̄kaowo ye mfọnọn̄kpọ nditọ ye mme emana ini iso.—4/1, page 6.
◻ Nso idi udịm nsọn̄ọ ita ndiwụt nte ke Bible edi Ikọ Abasi?
(1) Enye enen ke n̄kan̄ ifiọk ntaifiọk; (2) enye ọdọn̄ọ mme nsinsi edumbet oro ẹnyenede ufọn kaban̄a udu uwem eyomfịn; (3) enye ọdọn̄ọ mme akpan prọfesi oro ẹsude, nte mme akpanikọ eke mbụk ẹsọn̄ọde.—4/1, page 15.