Ntak Emi Ndusụk Owo Ẹkpụhọde Ido Ukpono Mmọ

Ye ediwak owo, ido ukpono idịghe n̄kpọ ndomokiet ikan idiọn̄ọ. Enye ekeme ndiwụt ebiet emi owo esikade ndusụk ini ke Sunday, ebiet emi enye ọdọde ndọ, ye ebiet emi ẹdibụkde enye. Edi enye itịn̄ke orụk owo emi enye edide m̀mê se enye ọfiọkde onyụn̄ enịmde ke akpanikọ. Ke uwụtn̄kpọ, ndụn̄ọde kiet ama ayarade ete ke mbahade 50 eke ikie ke otu mbon oro ẹdọhọde ke idi mme Christian ikọfiọkke owo emi ọkọkwọrọde Ukwọrọikọ oro ke Obot. Kamse, idem ọwọrọetop adausụn̄ owo India oro Mohandas Gandhi, owo Hindu, ama ọfiọk oro!

NTE edi n̄kpọ n̄kpaidem nte ke mme owo ẹfiọrọ ẹkpọn̄ ido ukpono ke ini ata ediwak ke otu mmọ ẹnyenede ata esisịt ifiọk ẹban̄a ido ukpono mmọ? Baba, idịghe. Nte ededi, enye n̄ko idịghe n̄kpọ oro owo mîkemeke ndifep. Mbon oro ẹnyịmede un̄wam ndikpep Bible ẹsiwak ndidu ke n̄kpaidem ndikụt adan̄a nte enye ọnọde mmọ ufọn. Bible ke idemesie ọdọhọ ete: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.” (Sịghisịghi ubọkn̄wed edi eke nnyịn.)—Isaiah 48:17.

Nso ke mbon oro mîyụhọke biọn̄ eke spirit mmọ ẹkpenam? Mmọ ikpenyeneke ndikpa mba ke ndinam n̄kpọ Abasi! Utu ke oro, mmọ ẹkpenyene ndidụn̄ọde Bible nse se Abasi ke idemesie anamde odu ọnọ mmọ.

Ibọrọ ke N̄kpọsọn̄ Mbụme

Ke edide isua itiaba ke emana, Bernd ama okụt eka esie akpade.a Ke ofụri isua ini uyen esie, enye ama esikere ete, ‘Eka mi odu ke m̀mọ̀n̄? Ntak emi ami nnyenede ndikọri n̄kpon ye unana eka?’ Nte uyen, Bernd ekedi ifịk ifịk andibuana ke ufọkabasi. Ke ekerede aban̄a ndutụhọ ubonowo, enye okodori enyịn ndikabade nnam utom nte ọnọ-un̄wam ke esenidụt. Edi, mme mbụme oro ufọkabasi esie mîkenyeneke ibọrọ oro ẹnọde uyụhọ ẹma ẹfịna enye.

Ekem Bernd ama enyene nneme ye nsan̄a ufọkn̄wed oro ekedide kiet ke otu Mme Ntiense Jehovah. Uyen emi ama owụt Bernd ke Bible nte ke eka esie ikọfiọkke n̄kpọ, ke ekedede ke n̄kpa. Bernd ama ekpep ediwak ufan̄ikọ Bible oro ẹnamde emi an̄wan̄a, utọ nte Ecclesiastes 9:5: “Ama edi mme akpa-n̄kpa, mmọ ifiọkke baba n̄kpọ kiet.” Ntre Bernd ikenyeneke ntak ndomokiet nditịmede esịt mban̄a m̀mê eka imọ ke ọkọbọ ufen ke se itiede nte purgatory—m̀mê se idiọkde ikan oro. Okposụkedi ẹkpepde ukpepn̄kpọ ukpọn̄ ikpaha ke nsinsi ke ata ediwak ido ukpono, Bernd ama okụt ke Bible ete ke ukpọn̄ owo akam edi owo. Ke ini owo oro akpade, ukpọn̄ oro akpa. “Ukpọn̄ eke anamde idiọk ayakpa n̄kpa.”—Ezekiel 18:4.

Bernd n̄ko ama ekpep aban̄a utịbe utịbe idotenyịn oro odude ọnọ mme akpan̄kpa. Enye ama okot n̄wed Utom eke Bible ke idemesie: “Nti owo ye mme idiọk owo ẹyeset ke n̄kpa.” (Utom 24:15) Enye okokop nduaidem didie ntem ndifiọk nte ke ediset ke n̄kpa emi edida itie mi ke isọn̄, emi Abasi edinamde akabade edi paradise!—Psalm 37:29; Ediyarade 21:3, 4.

Ikebịghike ata ifiọk Bible ama oyụhọ mme udọn̄ n̄kpọ eke spirit Bernd. Bernd ikakpaha mba iban̄a ido ukpono. Utu ke oro, enye ama ọkpọn̄ ufọkabasi oro mîkekemeke ndiyụhọ biọn̄ esie onyụn̄ emek orụk utuakibuot oro enen̄erede ọkọn̄ọ ke Bible. Enye ọdọhọ ete: “Oro ekedi ke isua 14 ẹmi ẹkebede, ndien akananam n̄katuaha n̄kpọfiọk mban̄a usio-ukot oro. Idahaemi mmọfiọk nte ke idịghe Andibot anam ndutụhọ odu. Satan edi abasi eyo emi, ndien enye enyene nduduọhọ kaban̄a mme idaha oro ẹkande nnyịn ẹkụk. Edi ibịghike Abasi ọyọkọk kpukpru unan oro ererimbot Satan ọnọde. Eka mi n̄ko ayafiak edi ke ediset ke n̄kpa. Nso idara ke oro edidi ntem!”

Adianade do, Bernd esịm utịtmbuba esie eke edinam utom ke esenidụt man an̄wam mbon efen. Enye anam utom ke esenidụt, an̄wamde mbon efen ndikpep mban̄a Obio Ubọn̄ Abasi, kpa ata usọbọ ke unana inemesịt mmọ. Ukem nte Bernd, ediwak miliọn owo ẹkpep ẹte ke ibịghike Abasi ayada utịt ọsọk ndutụhọ owo. Mmọ ẹkop nduaidem ndikụt nte ke odu ido ukpono oro oyụhọde udọn̄ n̄kpọ eke spirit mmọ.—Matthew 5:3.

Nso Idi Uduak Uwem?

Nte ererimbot Edem Usoputịn etịmde-tịm esịn idem ke mbubehe ererimbot, ediwak owo ẹbụp ẹte, ‘Nso idi uduak uwem?’ Ẹkụt ibọrọ ke Bible, nte Michael okokụtde. Ke ufọt ufọt iduọk isua 1970, Michael okoyom ndidiana ye otu mbon edinam oyomonsia. Enye ekenyene uduak kiet kpọt ke uwem—ndisiak en̄wan ye mme owo oro enye ekekerede nte ẹdide ntak ukwan̄ikpe ke ndutịm ukara uforo. Enye ọdọhọ ete: “Akananam n̄kọkpọn̄ke ufọk ntre ndikama ikan̄ mi. Uduak mi ekedi ndiwot adan̄a ikpọ mbon mbre ukara ye mbon ukara uforo nte n̄kekeme. N̄kpọkọduọk uwem mi kaban̄a emi.”

Michael ekedi aka ufọkabasi, edi owo ndomokiet ke ufọkabasi esie ikekemeke ndinam an̄wan̄a se inen̄erede idi uduak uwem. Ntre ke ini Mme Ntiense Jehovah ẹkewahade ufọk esie ẹnyụn̄ ẹwụtde enye mme ibọrọ Bible ke mme mbụme esie, Michael ama enen̄ede akpan̄ utọn̄. Enye ama ọtọn̄ọ ndidụk mme mbono esop utuakibuot ke Ufọkmbono Obio Ubọn̄ eke Mme Ntiense Jehovah ke n̄kann̄kụk oro.

Mme ufan Michael ẹma ẹyom ndidiọn̄ọ mban̄a obufa udọn̄ esie ke Bible. Michael ama akpak mmọ ete: “Ẹdi mbono esop ke Sunday emi. Ẹtie esisịt. Edieke mbufo mîmaha se mbufo ẹkopde, ẹnyọn̄ ufọk.” Ke ata akpanikọ, ke utịn̄ikọ minit 45 oro ọkọkọn̄ọde ke Bible ama okokụre, ata ediwak ke otu mme ufan esie ẹma ẹkpọn̄ ufọkmbono oro. Edi owo kiet—Susan—ama osụhọ. Se n̄kaiferi emi okokopde ama aduai enye idem. Ke ukperedem Michael ye Susan ẹma ẹdọ ndọ ẹnyụn̄ ẹna baptism nte Mme Ntiense Jehovah. “Idahaemi mmọfiọk ntak emi nnyịn idude mi ke isọn̄,” ntre ke Michael ọdọhọ. “Jehovah okobot nnyịn. Ata uduak nnyịn ke uwem edi ndifiọk enye nnyụn̄ nnam uduak esie. Se idade ata uyụhọ idi edi oro!”

Ediwak miliọn owo ẹbuana se Michael enịmde ke akpanikọ. Mmọ ẹnyịme ye mme ikọ Bible ẹmi: “Yak nnyịn ikop utịt ofụri n̄kpọ emi: bak Abasi, nyụn̄ nịm mbet esie: koro emi edi eke kpukpru owo.”—Ecclesiastes 12:13.

Ndiyọ Mme Mfịna Uwem

Kpukpru nnyịn imokụt edisu prọfesi oro ẹkụtde ke 2 Timothy 3:1: “Ndiọk eyo oyodu ke ukperedem ini.” Baba owo kiet ikemeke ndibọhọ mme mfịna eke “ndiọk eyo” emi. Edi Bible an̄wam nnyịn ndiyọ mmọ.

Kere ban̄a Steven ye Olive, n̄wan ye ebe. Ke ini mmọ ẹketọn̄ọde ndikpep Bible ye Mme Ntiense Jehovah, mmọ, ukem nte ediwak mbon efen, ẹma ẹnyene mfịna ndọ. “Nnyịn ikedi enyene afan̄ asiak odụk,” ntem ke Steven anam an̄wan̄a. “Nnyịn ikenyene nsio nsio utịtmbuba ye mme udọn̄.” Nso ikan̄wam mmọ ndidu ọtọkiet? “Mme Ntiense Jehovah ẹma ẹwụt nnyịn nte nnyịn ikemede ndida mme edumbet Bible nsịn ke edinam ke uwem nnyịn,” Steven aka iso. “Ke akpa ini, nnyịn ima ikpep se unana ibụk ye edikere mban̄a ẹwọrọde. Edida mme edumbet Bible nsịn ke edinam ama ọbọp nnyịn adian kiet. Idahaemi nnyịn imadara inem inem ndọ oro enyenede iwụk.”

N̄kpet N̄kpet Itie Ebuana ye Abasi

Nte ekemde ye ndụn̄ọde edifiọk ekikere mme owo eke ndondo emi, mbahade 96 eke ikie ke otu mbon America ẹnịm Abasi ke akpanikọ, ndien ata ediwak ke otu emi ẹsibọn̄ akam ẹnọ enye. Kpa ye oro, ndụn̄ọde efen owụt ete ke ibat mme aka ufọkabasi ye synagogue idahaemi ẹmesụhọde ẹkan ke ubak isua ikie. N̄kpọ nte mbahade 58 eke ikie ke otu mbon America ẹdọhọ ke mmimọ isika ufọkabasi ini kiet ke ọfiọn̄ m̀mê osụhọrede akan oro. Nte an̄wan̄ade, ido ukpono idụrike mmọ inen̄ede isan̄a ikpere Abasi. Ndien mfịna emi itreke ke United States.

Linda ọkọkọri okpon ke Bavaria. Enye ekedi owo Catholic ama onyụn̄ esibọn̄ akam kpukpru ini. Ke ukem ini oro, enye ama okop ndịk aban̄a ini iso. Enye ikọfiọkke n̄kpọ ndomokiet iban̄a uduak Abasi kaban̄a ubonowo. Ke ini ekedide isua 14 kpọt ke emana, Linda ama osobo ye Mme Ntiense Jehovah, ndien enye ọtọt ete: “Se mmọ ẹketịn̄de ama edemede udọn̄, ntre ami mma mbọ mme n̄wed un̄wam ukpep Bible iba nnyụn̄ n̄kot mmọ ke ndondo oro.” Isua iba ke ukperedem, Linda ama ọtọn̄ọ ndikpep Bible ye Mme Ntiense Jehovah. Enye ọdọhọ ete: “Kpukpru se n̄kekpepde mban̄a Abasi nto Bible ẹma ẹsịne ifiọk.” Linda ama esịn n̄wed ọkpọn̄ ufọkabasi esie onyụn̄ ana baptism nte owo Ntiense Jehovah ke edide isua 18 ke emana.

Nso ikonụk Linda ndikpụhọde ido ukpono esie? Enye anam an̄wan̄a ete: “Ufọkabasi mi ama an̄wam mi ndikụt nte ke Abasi odu, ndien mma n̄kpep ndinịm enye ke akpanikọ. Edi enye ikedịghe ata owo okonyụn̄ odu nsannsan. Ami ndikpep Bible ikọsọn̄ọke edinịm oro n̄kenịmde Abasi ke akpanikọ kpọt edi n̄ko ama an̄wam mi ndidi ndifiọk enye nnyụn̄ mma enye. Idahaemi ami mmenyene ọsọn̄urua ọkpọkpọ itie ebuana ye Abasi, n̄kpọ oro edide akpan n̄kpọ akan n̄kpọ efen ekededi.”

Ata Ido Ukpono Odot Ukeme Oro Ẹsịnde!

Nte ido ukpono fo ọnọ fi ndausụn̄ eke spirit onyụn̄ owụt fi nte Bible ekemede ndin̄wam fi ọyọ mme mfịna uwem? Nte enye ekpep idotenyịn Bible kaban̄a ini iso? Nte enye ada fi edisịn ke n̄kpet n̄kpet, ọkpọkpọ itie ebuana ye Andibot, ọkọn̄ọde ke nnennen ifiọk Bible? Edieke mîdịghe ntre, kûkpa mba. Utu ke ndision̄o idem n̄kpọn̄ ido ukpono, dụn̄ọde yom orụk utuakibuot oro enen̄erede ọkọn̄ọ ke Bible. Ndien afo eyetie nte mbon oro ẹketịn̄de prọfesi ẹban̄a ke n̄wed Isaiah eke Bible ẹte: “Ntem ke Ọbọn̄ Jehovah ọdọhọ, ete, Sese, ikọt mi ẹyedia n̄kpọ . . . ikọt mi ẹyen̄wọn̄ . . . ikọt mi ẹyedat esịt . . . ikọt mi ẹyekwọ ke idatesịt.”—Isaiah 65:13, 14.

[Mme Ikọ idakisọn̄]

[Mme ndise ke page 4, 5]

Bible an̄wam nnyịn ndidi ndifiọk nnyụn̄ mma Abasi