‘Akpanikọ Ayanam Mbufo Ẹwọrọ Ufụn’
“Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” Ntre ke Jesus ọkọdọhọ nte enye ekekpepde akwa udịm owo n̄kpọ ke temple ke Jerusalem. (John 8:32) Mme apostle Jesus ẹma ẹsọsọp ẹfiọk ke mme ukpepn̄kpọ Jesus ẹkedi akpanikọ. Mmọ ẹma ẹkụt akpakịp uyarade nte ke andikpep mmimọ okoto Abasi.
NTE ededi, mfịn, ekeme ndidi ọkpọsọn̄ n̄kpọ ọnọ ndusụk owo ndifiọk akpanikọ oro Jesus eketịn̄de aban̄a. Nte ekedide ke eyo prọfet Isaiah, mfịn odu “mmọ eke ẹdọhọde ẹban̄a idiọk, ẹte, Eti, ẹban̄a eti, ẹte, Idiọk: eke ẹnịmde ekịm ke un̄wana, ẹnịm un̄wana ke ekịm; eke ẹnịmde idot ke inịn̄e, ẹnịm inịn̄e ke idot!” (Isaiah 5:20) Ye ediwak ekikere, ukpepn̄kpọ akwaifiọk, ye usụn̄ uwem oro ẹsịnde udọn̄ ẹnọ idahaemi, ediwak owo ẹkere ke kpukpru n̄kpọ ẹnyenyene adan̄a ye nte ke utọ n̄kpọ nte akpanikọ idụhe.
Ke ini Jesus ọkọdọhọde mme andikpan̄ utọn̄ nnọ enye ete ke akpanikọ ayanam mmọ ẹwọrọ ufụn, mmọ ẹma ẹbọrọ ke ndidọhọ: “Nnyịn idi nditọ Abraham; akanam nnyịn idụkke ufụn inọ baba owo kiet. Nsinam ọdọhọde ndien ete, Mbufo ẹyewọrọ ufụn?” (John 8:33) Mmọ ikekereke ke oyom owo ekededi m̀mê n̄kpọ ekededi ndinam mmọ ẹwọrọ ufụn. Kpa ye oro Jesus ama anam an̄wan̄a ete: “Ke akpanikọ ke ndọhọ mbufo, kpukpru owo eke anamde idiọk-n̄kpọ edi ofụn idiọk-n̄kpọ.” (John 8:34) Akpanikọ oro Jesus eketịn̄de aban̄a ekeme ndiberede usụn̄ nnọ ediwọrọ ufụn idiọkn̄kpọ. Jesus ọkọdọhọ ete: “Edieke Eyen edinamde mbufo ndien ẹwọrọ ufụn, mbufo ẹyewọrọ ufụn ke akpanikọ.” (John 8:36) Ntre akpanikọ oro anamde owo ọwọrọ ufụn edi akpanikọ aban̄ade Jesus Christ, kpa Eyen Abasi. Ebe n̄kukụre ke ndinyene mbuọtidem ke uwa mfọnmma uwem Jesus eke owo ke owo ekededi ekeme ndiwọrọ ke ufụn idiọkn̄kpọ ye n̄kpa.
Ke idaha en̄wen Jesus ọkọdọhọ ete: “Da akpanikọ Fo dianade mmọ nịm nọ Idem Fo: ikọ Fo edi akpanikọ.” (John 17:17) Ikọ Abasi oro ẹwetde ke Bible edi akpanikọ oro ekemede ndinam ẹwọrọ ufụn nsunsu ekikere ye nsunsu utuakibuot. Bible esịne akpanikọ aban̄ade Jesus Christ, emi anamde mme owo ẹnyene mbuọtidem ke enye onyụn̄ ebererede usụn̄ ọnọ nyayama idotenyịn kaban̄a ini iso. Edi ata eti n̄kpọ ndidi ndifiọk akpanikọ Ikọ Abasi!
Ndifiọk akpanikọ edi akpan n̄kpọ adan̄a didie? Ke adan̄aemi ediwak ido ukpono mfịn ẹdọhọde ke itiene Bible, mme akwaifiọk owo ye mme ido edinam ẹkara mmọ. Ediwak ini, etie nte mme adaiso ido ukpono isikereke iban̄a m̀mê etop mmọ enen nte mmọ ẹkerede ẹban̄a m̀mê mme owo ẹnyịme enye. Ndusụk owo ẹkere ẹte ke Abasi enem esịt aban̄a orụk utuakibuot ekededi, ama akam edi enye edi ke ofụri esịt. Edi Jesus Christ ama anam an̄wan̄a ete: “Ini ke edi, omonyụn̄ ededi ama, eke ata mme andituak ibuot ẹdituakde ibuot ẹnọ Ete ke spirit ye ke akpanikọ: koro edi mmọ eke ẹtiede ntem ke Ete oyom ete ẹtuak ibuot ẹnọ Imọ.”—John 4:23.
Edieke nnyịn iyomde ndituak ibuot nnọ Abasi nte enye enyịmede, ana nnyịn ifiọk akpanikọ. Emi edi akpan n̄kpọ. Nsinsi inemesịt nnyịn ọkọn̄ọ ke oro. Ke ntre, owo kiet kiet ekpenyene ndibụp idemesie ete: ‘Nte Abasi enyịme usụn̄ utuakibuot mi? Nte ami mmenen̄ede nnyene udọn̄ ke ndikpep akpanikọ Ikọ Abasi? Mîdịghe nte ami mmokop ndịk mban̄a se ndụn̄ọde ntịn̄enyịn ekemede ndiyarade?’