Nte Afo Emenyene Angel Ukpeme?
NTE afo emenịm ke akpanikọ ke afo emenyene angel ukpeme? Ediwak owo ẹkere ke mmimọ imenyene. Ke ntak oro, ẹdọhọ ke n̄wan kiet ke n̄kan̄ edem usoputịn Canada enyene san̄asan̄a enọ abuanade mme angel. Edieke afo ọnọde enye ọyọhọ enyịn̄ fo ye $200, enye ọdọhọ ete ke imọ iyanam fi enyene nneme ye angel ukpeme fo. Akpa, enye etie ekere ebe ke ndiwụk enyịn nse edemeikan̄ tiande. Ekem, enye okụt n̄kukụt emi angel fo ọnọde enye etop ete otobo fi. Nte enọ, n̄wan oro ewet ndise nte angel fo etiede.
Ye ndusụk owo, emi ekeme ndidi ukem ye mbụk aban̄ade Edidem Louis IX eke France. Nte mbụk ọdọhọde, enye ama edep ata ọsọn̄urua ntan̄ ẹmi ẹkedọhọde nte ẹkewọn̄ọde ke mba Akwa Angel Michael. Ke adan̄aemi ẹnyenede eyịghe ẹban̄a mbụk oro, ediwak owo idehede iyịk se n̄wan Canada oro ọdọhọde.
Ọkpọsọn̄ Udọn̄ ke Mme Angel
Ke mme isua ndondo emi ẹmenyene akwa udọn̄ ke idem mme angel. Ke ekebe ndise ye ke mme senima, mme n̄wed, mme magazine, ye mme n̄wedmbụk, ẹmesian nnyịn ẹban̄a mme angel ẹmi ẹdọn̄de mbon oro ẹdọn̄ọde n̄kpa n̄kpa esịt, ẹdọn̄de owo emi owo esie akpade esịt, ẹnọde ọniọn̄, ẹnyụn̄ ẹwamade mme owo ẹsio ke n̄kpa. Ke United States, n̄kpọ nte mme andise miliọn 20 ẹsise mme udịm udịm edinam ekebe ndise eke urua ke urua oro owụtde nte mme angel ẹsịbede ẹdụk mme edinam eke owo. Ufọkurua unyam n̄wed kiet asiak se ibede enyịn̄ n̄wed 400 ẹmi ẹwụkde ekikere ke mme angel.
N̄wed ndondo emi obụk mme ifiọk n̄kpọntịbe ẹban̄ade nte mme angel ukpeme ẹkenyan̄ade uwem mbonekọn̄ ẹmi ẹn̄wanade ekọn̄. N̄kpri babru etop ẹdiande ke moto ẹdọhọ ẹte ke mme angel ukpeme ẹkpeme mme awat o-moto. Mme esop, mme mboho, ye mme mbono nneme ẹsịn udọn̄ ẹnọ edikpep n̄kpọ mban̄a mme angel ẹnyụn̄ ẹdọhọ ke ẹn̄wam mme owo ndinyene nneme ye mmọ.
Eileen Freeman edi andiwet n̄wed ita ẹban̄ade mme angel ye andisio n̄wedmbụk emi etịn̄de n̄kpọ aban̄a mmọ kpọt. Enye ọdọhọ ete: “Mmenịm ke akpanikọ nte ke angel kiet kiet oro odude ke heaven enyene enye oro edide angel ukpeme ke Isọn̄, odu uwem n̄kpọ emi mme utom esie mîdịghe sụk editoro Abasi ke ikpehe eke heaven edi ata ata edikpeme mme owo ye mme orụk uwem efen ke Isọn̄. Ẹnọ owo nnyịn kiet kiet angel ukpeme ke ini ẹyomode nnyịn ndien enye ekpeme nnyịn ke ini ikọride ke idịbi, ke ini emana nnyịn, ke ini uwem nnyịn ke ererimbot emi, tutu angel oro ekpeme nnyịn ke ikpehe isọn̄ emi ebe esịm ubọn̄ eke heaven.” Emi enen̄ede anam ọsọ ekikere aban̄ade mme angel ukpeme an̄wan̄a.
Ke mfịghe mfịghe n̄kpọsọn̄ idaha ẹmi, edi inem inem n̄kpọ ndinịm ke akpanikọ nte ke nnyịn imenyene angel ukpeme nnyịn, emi utom esie edide ndikpeme nnyịn. Nso ke Ikọ Abasi, kpa Bible, etịn̄ aban̄a emi? Ndi akpana nnyịn idomo ndisobo ye mme angel? Ndi mme idaha ido uwem ye mme edinịm ke akpanikọ ido ukpono nnyịn ẹbehe mmọ? Nso un̄wam ke nnyịn ikeme ndidori enyịn ndinyene nto mmọ? Ẹyebọrọ mme mbụme ẹmi ke ibuotikọ oro etienede.