N̄wo Oro Ẹkekpande Ndida Itie ke Edem Usoputịn Africa
Nte Eunice Ebuh obụkde
“Mbon n̄wo oro ẹkamade ikan̄ ẹma ẹdiomi ndidi ke usen oro nnyịn isinịmde Ukpepn̄kpọ N̄wed Esop ke ufọk nnyịn. Nnyịn imesiberede usụn̄ inuaotop nnyịn inịm inọ nditọete iren ye iban ye mbon oro ẹnyenede udọn̄. Eyedi mbon n̄wo oro ẹma ẹdiọn̄ọ ido nnyịn ye ini mbono esop. Nnyịn ima inen̄ede idiọn̄ọ ke mmọ ẹma ẹyịp ubomisọn̄ ke ebiet en̄wen ẹnyụn̄ ẹdibet ke inuaotop nnyịn ke usen ye ini ukpepn̄kpọ n̄wed.
“Ke mfọniso, urua oro mmọ ẹkedide ekedi urua edidi esenyịn circuit. Utu ke ndisop idem ke ufọk nnyịn, nnyịn ikosobo ke Ufọkmbono Obio Ubọn̄. Ke mbono esop ama akasuana, mbiowo ẹma ẹnyene mbono. Nte ido edide, ami ye nditọ ikpọkọnyọn̄ ufọk, edi ebe mi, emi edide ebiowo, ama ọdọhọ nnyịn ete ibet imọ. Enye ọkọdọhọ ke imọ idibịghike. Ntre nnyịn ima ibet.
“Ekem nnyịn ima ikụt ite ke ubomisọn̄ imaha ndisioro uyo. Ebe mi ye esenyịn circuit ikekemeke ndidiọn̄ enye. Ọdiọn̄ ubomisọn̄ oro nnyịn ikokotde ikekemeke n̄ko ndidiọn̄ enye.
“Nditọ ẹkenyene ndisasan̄a nnyọn̄ ufọk. Ke esisịt ini ebede, ami n̄ko mma nnyọn̄ ufọk. N̄kesịm ke n̄kpọ nte n̄kanika duop. Ami m̀mê idem nditọ mi ikasan̄ake ke ubomisọn̄ idụk okụre, emi okpokoyomde ẹbererede akamba inuaotop.
“Ke ini n̄kodụkde ubetnna mi, mma n̄kop uyo ikan̄, emi uyo ekenen̄erede ọsọn̄. Mma n̄kere m̀mê nso iketịbe. Mma ndomo ndikot mme bodisi, edi urụk ukopikọ ikọfọnke. Mma mfehe nsụhọde n̄ka ufọk isọn̄ n̄kọkọbi usụn̄ ukwak, ndien ekem mfehe n̄kọkọbi esịne-ufọt usụn̄. Mma nnịme mme ikan̄. Nditọ mi ẹma ẹnyek idem, ntre mma ndọhọ mmọ ẹmụm idem ẹkama. Nnyịn ima ibọn̄ akam ọtọkiet iyom ukpeme Jehovah. Kan̄a ke emi, ebe mi okosụk odu ke Ufọkmbono Obio Ubọn̄ odomode ndinam ubomisọn̄ osioro uyo.
“Mma ntop enyịn ke window nse nnyụn̄ nda n̄kụt eren kiet anade ke efak ke edem inuaotop. Eketie nte ke mbon n̄wo oro ẹma ẹnyọn̄ọ, ntre mma nsịn eren oro ẹkenọde unan do ke ubomisọn̄ mi nda enye iwiwa n̄ka ufọkibọk. Ekedi edisịn idem ke itiendịk, edi n̄kenyene ndinam n̄kpọ. Nte ededi, ke mfụhọ, enye ama akpa ke ndan̄nsiere.
“Kpa ye n̄kpọ mmọn̄eyet oro, n̄kpọ ẹkpekediọk ẹbe nde. Edidi esenyịn circuit ama anam nnyịn inịmke ukpepn̄kpọ n̄wed ke ufọk nnyịn. Ubomisọn̄ ndibiara ama anam nnyịn iwatke ọtọkiet nte ubon inyọn̄ ufọk. Ebe mi, emi mbon n̄wo oro ke akpanikọ ẹkpekemụmde, ọkọnyọn̄ edi ke ata idiọk ini. Mmọ ẹmi ye mme n̄kpọ eken ẹkedi ke ufọn nnyịn okoneyo oro.
“Jehovah edi ọkpọsọn̄ ebiet nnyịn ye ebiet ubọhọ nnyịn. Edi kpa nte N̄wed Abasi ọdọhọde ete: ‘Ke mîbọhọke Jehovah ekpeme obio, andikpeme ataba idap ikpîkpu.’”—Psalm 127:1.