Edidiọn̄ Jehovah Ke “Isọn̄” Nnyịn

“Kpukpru orụk n̄kpọ eke akpa mmọn̄ oro edisịmde ẹyedu uwem.”—EZEKIEL 47:9.

1, 2. (a) Mmọn̄ edi akpan n̄kpọ adan̄a didie? (b) Nso ke mmọn̄ oro ke akpa eke n̄kukụt Ezekiel ada aban̄a?

MMỌN̄ edi n̄wọrọnda n̄kpọ. Kpukpru odu-uwem n̄kpọ ẹberi edem ke enye. Idụhe owo nnyịn ndomokiet emi ekemede ndidu uwem mbịghi ke enye mîdụhe. Nnyịn iberi edem ke enye n̄ko kaban̄a edinam asana, sia mmọn̄ ekemede ndinam ndek emem nnyụn̄ nyet enye mfep. Ntre nnyịn imesiyet idem nnyịn, ọfọn̄ nnyịn, idem udia nnyịn ke enye. Ndinam ntre ekeme ndinyan̄a uwem nnyịn.

² Bible ada mmọn̄ nditịn̄ mban̄a mme ndutịm Jehovah eke spirit kaban̄a uwem. (Jeremiah 2:13; John 4:7-15) Mme ndutịm ẹmi ẹsịne edinam ikọt esie ẹsana ebe ke uwa ufak Christ ye ifiọk Abasi oro ẹkụtde ke Ikọ esie. (Ephesus 5:25-27) Ke n̄kukụt temple eke Ezekiel, utịbe utịbe akpa oro ọfiọrọde oto temple ada aban̄a mme utọ ọnọ-uwem edidiọn̄ oro. Edi ini ewe ke akpa oro ọfiọrọ, ndien nso ke enye ọwọrọ ọnọ nnyịn mfịn?

Akpa Ọfiọrọ ke Isọn̄ Oro Ẹfiakde Ẹwụk

3. Nso ke Ezekiel okokụt, nte ẹtọtde ke Ezekiel 47:2-12?

³ Nte mbon ntan̄mfep ke Babylon, ikọt Ezekiel ẹma ẹnen̄ede ẹyom mme ndutịm Jehovah. Do, ekedi n̄kpọ nsịnudọn̄ didie ntem ọnọ Ezekiel ndikụt mmọn̄ ọtọide ke edisana ebiet onyụn̄ ọfiọrọde ọwọrọ ke temple eke n̄kukụt! Angel odomo idịm oro ke kpukpru ibio idomo okụk 1,000. Utụn̄ọ esie oto ke se ifụkde owo ikpat esịm edọn̄ esịm isịn esịm mmọn̄ oro oyomde ẹwọwọk. Akpa oro ada uwem ye mbun̄wụm edi. (Ezekiel 47:2-11) Ẹsian Ezekiel ẹte: “Kpukpru orụk eto udia ẹyekọri ke mben akpa ke edem mbiba.” (Ezekiel 47:12a) Nte mmọn̄ oro odụkde Inyan̄ Inụn̄—anana-uwem akpa mmọn̄—uwem ọtọn̄ọ! Iyak ẹwak. Mbubehe ukọiyak ọkọri.

4, 5. Didie ke ntịn̄nnịm ikọ Joel aban̄ade akpa ebiet eke Ezekiel, ndien ntak emi edide akpan n̄kpọ?

⁴ Eyedi ediye ntịn̄nnịm ikọ emi ama eti mme Jew ẹdide mbon ntan̄mfep aban̄a ntịn̄nnịm ikọ en̄wen oro ẹkewetde ke se iwakde ibe isua ikie iba ke mbemiso: “Idịm oyonyụn̄ oto ke ufọk Jehovah ekebịt itịghede Shittim.”a (Joel 3:18) Ntịn̄nnịm ikọ Joel, ukem nte eke Ezekiel, ekebem iso etịn̄ ete ke akpa ọyọfiọrọ oto ufọk Abasi, kpa temple, onyụn̄ ada uwem ọsọk nsat isọn̄.

⁵ Enyọn̄-Ukpeme ama etịn̄ ke anyan ini ete ke ntịn̄nnịm ikọ Joel osu ke eyo nnyịn.b Do, ke akpanikọ, kpa ntre ke edi ye ukem n̄kukụt Ezekiel oro. Ke isọn̄ ikọt Abasi oro ẹfiakde ẹwụk mfịn, kpa nte ekedide ke Israel eset, mme ndutịm Jehovah ye mme edidiọn̄ esie ẹmenen̄ede ẹfiọrọ.

Akwa Edifiọrọ eke Mme Edidiọn̄

6. Ndisịme iyịp ke itieuwa eke n̄kukụt ẹkpekenyene nditi mme Jew mban̄a nso?

⁶ M̀mọ̀n̄ edi Ebiet emi mme edidiọn̄ ikọt Abasi oro ẹfiakde ẹwụk ẹtode? Ọfọn, tịm fiọk ete ke mmọn̄ oro ọfiọrọ oto temple Abasi. Kpasụk ntre mfịn, mme edidiọn̄ oro ẹto Jehovah ebe ke akwa temple esie eke spirit—ndutịm edisana utuakibuot. N̄kukụt Ezekiel adian akpan ọyọhọ ntọt. Ke esịt okụre, idịm ọfiọrọ ebe itieuwa, ke edem usụk esie. (Ezekiel 47:1) Itieuwa odu ke ata ufọt ufọt temple eke n̄kukụt oro. Jehovah etịn̄ enye ke nde ke nde ọnọ Ezekiel onyụn̄ owụk ete yak ẹsịme iyịp uwa ke enye. (Ezekiel 43:13-18, 20) Itieuwa oro ama enen̄ede enyene se ọwọrọde ọnọ kpukpru nditọ Israel. Ẹma ẹsọsọn̄ọ ediomi mmọ ye Jehovah anyan ini ko ke ini Moses ekesịmede iyịp ke itieuwa ke mben Obot Sinai. (Exodus 24:4-8) Ekpenyene ndidi edisịme iyịp ke itieuwa eke n̄kukụt oro ama eti mmọ ete ke ndondo oro mmọ ẹfiakde ẹnyọn̄ọ idụt mmọ oro ẹfiakde ẹwụk, mme edidiọn̄ Jehovah ẹyefiọrọ ke adan̄a nte mmọ ẹkponode ediomi mmọ ye enye.—Deuteronomy 28:1-14.

7. Nso ke mme Christian ẹkụt nte ndamban̄a itieuwa oro ọwọrọde mfịn?

⁷ Ukem ntre, ẹdiọn̄ ikọt Abasi mfịn ebe ke ediomi—kiet oro ọfọnde akan, kpa obufa ediomi. (Jeremiah 31:31-34) Ẹma ẹda iyịp, eke Jesus Christ, ẹsọn̄ọ enye n̄ko anyan ini ko. (Mme Hebrew 9:15-20) Mfịn, edide nnyịn isịne ke otu mbon oro ẹyetde aran, ẹmi ẹdide mme andibuana ke ediomi oro, m̀mê isịne ke otu “mme erọn̄ en̄wen,” ẹmi ẹdide mme andibọ ufọn nto enye, ndamban̄a itieuwa oro enen̄ede enyene se ọwọrọde ọnọ nnyịn. Enye ada aban̄a uduak Abasi ke ebuana ye uwa Christ. (John 10:16; Mme Hebrew 10:10) Kpa nte ndamban̄a itieuwa odude ke ata ufọt temple eke spirit, uwa Christ edi ata akpan n̄kpọ ọnọ edisana utuakibuot. Enye edi isọn̄ kaban̄a edifen mme idiọkn̄kpọ nnyịn ndien ke ntem edi isọn̄ ọnọ ofụri idotenyịn nnyịn kaban̄a ini iso. (1 John 2:2) Nnyịn ke ntem idomo ndidu uwem ekekem ye ibet oro enyenede ebuana ye obufa ediomi emi, “ibet Christ.” (Galatia 6:2) Adan̄a nte nnyịn inamde oro, nnyịn iyọbọ ufọn ito mme ndutịm Jehovah kaban̄a uwem.

8. (a) Nso n̄kpọ mîkodụhe ke esịt okụre temple eke n̄kukụt oro? (b) Mme oku ke temple eke n̄kukụt oro ẹkekeme ndida nso nnam idem mmọ asana?

⁸ Kiet ke otu utọ ufọn oro edi edisana idaha ke iso Jehovah. Ke temple eke n̄kukụt oro, esịt okụre inyeneke n̄kpọ oro ekedide ata n̄wọrọnda ke okụre ataya ye ke temple Solomon—akpan̄kpan̄, emi ke ukperedem ẹkekotde n̄kpọdiọhọ mmọn̄, man mme oku ẹda ẹyere mmọn̄. (Exodus 30:18-21; 2 Chronicles 4:2-6) Nso ke mme oku ke temple eke n̄kukụt Ezekiel ẹda ẹnam idem asana? Kamse, utịbe utịbe idịm oro ọfiọrọ oto esịt okụre! Ih, Jehovah ayanam usụn̄ odu ọnọ mmọ ndinyene edisana m̀mê ediden̄i idaha.

9. Didie ke mbon oro ẹdude ke otu mbon oro ẹyetde aran ye mbon oro ẹdude ke akwa otuowo ẹkeme ndinyene edisana idaha mfịn?

⁹ Kpasụk ntre mfịn, ẹmeda edisana idaha ke iso Jehovah ẹdiọn̄ mbon oro ẹyetde aran. Jehovah ada mmọ nte mbon oro ẹsanade, abatde mmọ ke ndinen. (Rome 5:1, 2) Nso kaban̄a “akwa otuowo,” emi mme esien oro mîdịghe eke oku ẹdade ẹban̄a? Mmọ ẹtuak ibuot ke an̄wa okụre, ndien ukem idịm oro ọfiọrọ ebe ikpehe oro ke temple eke n̄kukụt oro. Do, odot didie ntem apostle John ndikokụt akwa otuowo ẹmi ẹsịnede mfia ndisana ọfọn̄idem nte mmọ ẹtuakde ibuot ke okụre temple eke spirit! (Ediyarade 7:9-14) Inamke n̄kpọ m̀mê ẹnam n̄kpọ didie ye mmọ ke esuene esuene ererimbot emi, mmọ ẹkeme nditịm nnịm nte ke adan̄a nte mmimọ iwụtde mbuọtidem ke uwa ufak Christ, Jehovah ese mmimọ nte ndisana ye ediden̄i. Didie ke mmọ ẹwụt mbuọtidem? Ebe ke nditiene nde-ikpat Jesus, ẹnyenede ọyọhọ mbuọtidem ke uwa ufak.—1 Peter 2:21.

10, 11. Nso idi akpan ikpehe kiet eke ndamban̄a mmọn̄ oro, ndien didie ke emi enyene ebuana ye akwa akpa oro nditara?

¹⁰ Nte ima iketetịn̄, akpan ikpehe efen odu ke ndamban̄a mmọn̄ emi—ifiọk. Ke Israel oro ẹkefiakde ẹtan̄ ẹbok, Jehovah ama ada item N̄wed Abasi ọdiọn̄ ikọt esie ebe ke mme oku. (Ezekiel 44:23) Ke ukem usụn̄ oro, Jehovah amada ekese ukpepn̄kpọ aban̄ade Ikọ akpanikọ esie ọdiọn̄ ikọt esie mfịn, ebe ke “mme oku edidem.” (1 Peter 2:9) Ifiọk aban̄ade Jehovah Abasi, aban̄ade mme uduak esie kaban̄a ubonowo, ye akpan akpan aban̄ade Jesus Christ ye Obio Ubọn̄ Messiah ọmọfiọrọ barasuene ke ukperedem ini emi. Edi utịbe utịbe n̄kpọ didie ntem ndibọ ọkpọmiọk ọkpọmiọk udia eke spirit emi!—Daniel 12:4.

¹¹ Kpa nte akpa oro angel okodomode akakade iso otụn̄ọ nte ewetde aka, kpa ntre ke mme ọnọ-uwem edidiọn̄ ẹtode Jehovah ẹkọri ke ndyọ ndyọ usụn̄ man ekem akpakịp owo oro ẹdụkde ẹdi isọn̄ nnyịn eke spirit oro ẹdiọn̄de. Ntịn̄nnịm ikọ edifiak n̄wụk efen ama ebem iso etịn̄ ete: “Ekpri ayakabade edi tọsịn, esisịt oyonyụn̄ akabade edi ọkpọsọn̄ idụt: ami Jehovah nyanam enye awara ke ekem ini esie.” (Isaiah 60:22) Mme ikọ ẹmi ẹmesu—ediwak miliọn owo ẹbụn̄ọ ẹdụk ẹdidiana ye nnyịn ke edisana utuakibuot! Jehovah amanam akpakịp “mmọn̄” odu ọnọ kpukpru mbon oro ẹwọn̄ọrede ẹtiene enye. (Ediyarade 22:17) Enye okụt ete ke esop esie eke isọn̄ asuan mme Bible ye mme n̄wed Bible ke ofụri ererimbot, ke ediwak usem ke mme itie ikie. Ukem ntre, ẹmediomi mme mbono esop Christian ye ikpọ mbono ke ofụri ererimbot man otodo ẹkpekeme ndinọ kpukpru owo ata edisana mmọn̄ akpanikọ. Didie ke mme utọ ndutịm oro ẹtụk mme owo?

Mmọn̄ Ọnọ Uwem!

12. (a) Ntak emi eto oro ke n̄kukụt Ezekiel ekemede ndin̄wụm ntre? (b) Nso ke eto on̄wụmde mbun̄wụm mi ada aban̄a ke ukperedem ini emi?

¹² Akpa oro ke n̄kukụt Ezekiel ada uwem ye nsọn̄idem edi. Ke ini Ezekiel okopde aban̄a eto oro edikọride ke mben akpa oro, ẹsian enye ẹte: “Ikọn̄ esie idiken̄eke, mfri esie idinyụn̄ ikụreke. . . . Ndien mfri esie ẹyedi udia, ikọn̄ esie ẹyenyụn̄ ẹdi ibọk.” Ntak emi eto emi on̄wụmde ke ndyọ ndyọ usụn̄ emi? “Koro mmọn̄ esie editode ke edisana ebiet.” (Ezekiel 47:12b) Ndamban̄a eto emi ada aban̄a kpukpru ndutịm Abasi ndinam ubonowo afiak edi mfọnmma ke isọn̄ uwa ufak Jesus. Idahaemi ke isọn̄, nsụhọ oro ẹyetde aran ẹda usụn̄ ke ndinọ udia ye ukọkudọn̄ọ eke spirit. Ke kpukpru owo 144,000 ẹma ẹkebọ utịp mmọ eke heaven, mme ufọn ẹtode utom itie oku mmọ nte mme ekemmọ andikara ye Christ ayaka iso ke ini iso, ke akpatre adade ekesịm ọyọhọ ọyọhọ edikan n̄kpa Adam.—Ediyarade 5:9, 10; 21:2-4.

13. Nso udọn̄ọ ke ẹkọk ke eyo nnyịn?

¹³ Akpa eke n̄kukụt oro ewet okodụk anana-uwem Inyan̄ Inụn̄ onyụn̄ ọkọk kpukpru n̄kpọ oro enye otụkde. Inyan̄ emi ada aban̄a n̄kann̄kụk oro akpade ke n̄kan̄ eke spirit. Edi uwem ọyọhọ “ke ebiet ekededi eke akpa esịmde.” (Ezekiel 47:9) Kpasụk ntre, ke ukperedem ini, ebiet ekededi eke mmọn̄ uwem esịmde, mme owo ẹtọn̄ọ ntak ẹdu uwem ke n̄kan̄ eke spirit. Akpa mbon oro ẹkefiakde ẹnyene uwem ntre ekedi mbon oro ẹyetde aran ke 1919. Mmọ ẹma ẹkọri ẹto idaha unana edinam ebietde n̄kpa ẹfiak ẹnyene uwem. (Ezekiel 37:1-14; Ediyarade 11:3, 7-12) Toto ko akpan mmọn̄ oro ama esịm mbon eken oro ẹkekpan̄ade ke n̄kan̄ eke spirit, ndien mmọ ẹmi ẹfiak ẹdidu uwem ẹnyụn̄ ẹnam akwa otuowo eke mme erọn̄ en̄wen oro akade-ka iso ọkọri, ẹmi ẹmade ẹnyụn̄ ẹnamde n̄kpọ Jehovah. Ke mîbịghike, ndutịm emi ayatara esịm akwa udịm owo oro ẹnamde ẹset.

14. Nso ke mbubehe ukọiyak ndikọri ke mben inyan̄ eke Inyan̄ Inụn̄ enen̄ede owụt mfịn?

¹⁴ Nsọn̄idem eke spirit ada ekesịm edision̄o mbun̄wụm. Mbubehe ukọiyak oro ọkọride ke mben inyan̄ oro akakpade ke mbemiso anam emi an̄wan̄a. Jesus ọkọdọhọ mme anditiene enye ete: “Nyanam mbufo ẹdi mme ọkọ-owo.” (Matthew 4:19) Ke ukperedem ini, utom ukọ owo ọkọtọn̄ọ ye editan̄ nsụhọ ke otu mbon oro ẹyetde aran mbok, edi iketreke do. Ọnọ-uwem mmọn̄ oro otode temple Jehovah eke spirit, esịnede edidiọn̄ eke edinyene nnennen ifiọk, emesịm mme owo ke kpukpru idụt. Ebiet ekededi oro akpa mmọn̄ emi esịmde, ada ekesịm edinyene uwem eke spirit.

15. Nso iwụt nte ke idịghe kpukpru owo ẹdinyịme ndutịm Abasi kaban̄a uwem, ndien nso idi utịt utọ mbon oro?

¹⁵ Nte ededi, idịghe kpukpru owo ẹnam n̄kpọ ẹban̄a etop uwem idahaemi; inyụn̄ idịghe kpukpru mbon oro ẹdinamde ẹset ke Tọsịn Isua Ukara Christ ẹdinam ntre. (Isaiah 65:20; Ediyarade 21:8) Angel oro ọdọhọ ete ke ndusụk ikpehe inyan̄ oro ifọnke. Ẹyak mme mbat mbat ikpehe oro mînyeneke uwem mi “ẹnọ inụn̄.” (Ezekiel 47:11) Kaban̄a mbon eyo nnyịn, idịghe kpukpru owo oro ẹnọde ọnọ-uwem mmọn̄ Jehovah ẹbọ enye. (Isaiah 6:10) Ke Armageddon, ẹyeyak kpukpru mbon oro ẹmekde ndika iso ndu ke anana-uwem ye udọn̄ọ udọn̄ọ idaha eke spirit ẹnọ inụn̄, oro edi, ẹyesobo ke nsinsi. (Ediyarade 19:11-21) Nte ededi, mbon oro ẹkade iso ẹn̄wọn̄ mmọn̄ emi ke edinam akpanikọ ẹkeme ndidori enyịn ndibọhọ nnyụn̄ n̄kụt akpatre edisu eke ntịn̄nnịm ikọ emi.

Akpa Oro Ọfiọrọ ke Paradise

16. Ini ewe ndien didie ke n̄kukụt temple eke Ezekiel edinyene akpatre edisu?

¹⁶ Ukem nte mme ntịn̄nnịm ikọ edifiak n̄wụk eken, n̄kukụt temple eke Ezekiel edinyene akpatre edisu ke Tọsịn Isua. Adan̄aoro otu oku ididụhe aba mi ke isọn̄. “Mmọ ẹyedi mme oku Abasi ye Christ, mmọ ẹyenyụn̄ ẹda ubọn̄ ye Enye [ke heaven] ke thousand isua.” (Ediyarade 20:6) Mme oku eke heaven ẹmi ẹdidiana ye Christ ke ndinọ ọyọhọ ufọn uwa ufak Christ. Ntem ẹyenyan̄a edinen ubonowo, ẹnamde afiak edi mfọnmma!—John 3:17.

17, 18. (a) Didie ke ẹtịn̄ ẹban̄a akpa oro ọnọde uwem ke Ediyarade 22:1, 2, ndien ini ewe ke ẹda n̄kukụt oro ẹnam n̄kpọ ke akpa ini? (b) Ke Paradise, ntak emi ini akwa n̄kọri edidude ọnọ akpa mmọn̄ uwem oro?

¹⁷ Ke nditịm ntịn̄, akpa oro Ezekiel okokụtde ọyọfiọrọ adan̄aoro ye mmọn̄ uwem enyenede ata ọkpọsọn̄ odudu. Emi edi akpa ini ndibuan ntịn̄nnịm ikọ oro ẹwetde ke Ediyarade 22:1, 2: “Angel owụt mi akpa mmọn̄ uwem, emi asakde nte crystal, emi otode ke ebekpo Abasi ye eke Eyen-erọn̄, asan̄a ebe ke ufọt efak obio. Eto uwem ada ke n̄kan̄ akpa emi ye ke n̄kan̄ oko, on̄wụm orụk mfri duopeba, on̄wụm mfri esie ke ọfiọn̄ ke ọfiọn̄; ẹnyụn̄ ẹda ikọn̄ eto oro ẹkọk mme idụt udọn̄ọ.”

¹⁸ Ke Tọsịn Isua oro, ẹyekọk kpukpru udọn̄ọ—eke ikpọkidem, eke ekikere, ye eke ntụk. Emi edi se edida ndamban̄a eto oro ‘n̄kọk mme idụt udọn̄ọ’ enen̄erede ada aban̄a. Ke ntak mme ndutịm oro Christ ye 144,000 ẹnamde, “andidụn̄ ididọhọke ite, Ndọdọn̄ọ.” (Isaiah 33:24) Ndien akpa emi eyesịm ini emi enye atarade ke n̄kponn̄kan udomo. Enye edinyene nditara nnyụn̄ ntụn̄ọ man ekem ediwak miliọn, iso-ọfọn biliọn, owo oro ẹdisetde ẹmi ẹdin̄wọn̄de edisana mmọn̄ uwem emi. Akpa eke n̄kukụt oro ama anam Inyan̄ Inụn̄ ọfọn, anamde uwem odu ke ebiet ekededi oro mmọn̄ esie ọkọfiọrọde esịm. Ke Paradise, iren ye iban ẹyenyene uwem ke ọyọhọ ọyọhọ usụn̄ifiọk, ẹdide se ẹkọkde ndammana n̄kpa Adam edieke mmọ ẹwụtde mbuọtidem ke ufọn ufak oro ẹnamde atara esịm mmọ. Ediyarade 20:12 ebem iso etịn̄ ete ke ẹyekụbọde “mme n̄wed” ke mme usen oro, ẹnọde un̄wana ye ifiọk efen efen emi mbon oro ẹnamde ẹset ẹdibọde ufọn. Ke mfụhọ, ndusụk owo ẹyesịn ndidi se ẹkọkde, idem ke Paradise. Mbon nsọn̄ibuot ẹmi ẹdi mmọ ẹmi ẹdiyakde “ẹnọ inụn̄” nsinsi nsobo.—Ediyarade 20:15.

19. (a) Didie ke edideme isọn̄ edisu ke Paradise? (b) Ewe ikpehe ke Paradise ke obio oro ada aban̄a? (c) Nso ke obio oro ndidu nsannsan n̄kpọn̄ temple ada aban̄a?

¹⁹ Ke ini oro n̄ko, edideme isọn̄ eke n̄kukụt Ezekiel eyenyene akpatre edisu esie. Ezekiel ama okụt nte ẹdemede isọn̄ nte ọfọnde; kpasụk ntre, Christian kiet kiet oro anamde akpanikọ ekeme nditịm nnịm nte ke imọ iyenyene itie, inyene, ke Paradise. Eyedi ẹyeyụhọ udọn̄ owo ndinyene ufọk esiemmọ ndidụn̄ nnyụn̄ nse mban̄a ke usụn̄ oro asan̄ade ke ndutịm. (Isaiah 65:21; 1 Corinth 14:33) Nte odotde, obio oro Ezekiel okokụtde ada aban̄a ndutịm utịm utom oro Jehovah aduakde ọnọ obufa isọn̄. Otu oku oro ẹyetde aran ididụhe aba ke ikpọkidem ke otu ubonowo. N̄kukụt oro ọnọ ekikere aban̄a oro ke ndiwụt nte ke obio oro odu ke isọn̄ emi “mîsanake” oro adade nsannsan ọkpọn̄ temple. (Ezekiel 48:15, NW) Ke adan̄aemi 144,000 ẹkarade ye Christ ke heaven, Edidem idinanake mme andida ke ibuot esie ke isọn̄. Mme andidu ke idak esie ẹdide owo ẹyebọ ufọn akamba akamba ẹto ima ima ukpeme ye ndausụn̄ otu mbọn̄. Nte ededi, ata ifụm ukara ididụhe ke isọn̄, edi ke heaven. Kpukpru owo ke isọn̄, esịnede otu mbọn̄, ẹdisụk ibuot inọ Obio Ubọn̄ Messiah.—Daniel 2:44; 7:14, 18, 22.

20, 21. (a) Ntak emi enyịn̄ obio oro odotde? (b) Mme mbụme ewe ke n̄kukụt Ezekiel ndin̄wan̄a nnyịn akpanam nnyịn ibụp idem nnyịn?

²⁰ Tịm fiọk mme akpatre ikọ ntịn̄nnịm ikọ Ezekiel: “Toto ke usen oro enyịn̄ obio eyekere, ete, Jehovah-Shammah (Jehovah Odu Do).” (Ezekiel 48:35) Obio emi ididụhe man ọnọ mme owo odudu m̀mê ukeme ndikara mbon en̄wen; enye idinyụn̄ idụhe do man anam ẹnam uduak owo ekededi. Enye edi obio Jehovah, emi kpukpru ini ediwụtde ekikere ye ima ima usụn̄ unam n̄kpọ esie oro owụtde eti ibuot. (James 3:17) Emi ọnọ nnyịn inem inem nsọn̄ọ nte ke Jehovah ọyọdiọn̄ ndutịm “obufa isọn̄” n̄ka ubonowo esie ke nsinsi nsinsi.—2 Peter 3:13.

²¹ Nte nnyịn ikopke nduaidem iban̄a idotenyịn emi anade ke iso ebet nnyịn? Nte odotde, ndien, owo nnyịn kiet kiet ayanam ọfọn ndibụp: ‘Ami nnam n̄kpọ didie mban̄a mme utịbe utịbe edidiọn̄ oro ẹyararede ke n̄kukụt Ezekiel? Ndi ami ke akpanikọ mman̄wam utom oro mme ima ima esenyịn ẹnamde, esịnede eke nsụhọ oro ẹyetde aran ye eke mme andibuana ke otu mbọn̄ ini iso? Ndi ami mmanam edisana utuakibuot edi ata akpan n̄kpọ ke uwem mi? Ndi ami mmọbọ ufọn ọyọhọ ọyọhọ nto akwa akpa mmọn̄ uwem oro ọfiọrọde mfịn?’ Nnyịn owo kiet kiet ikpakam ika iso ndinam oro nnyụn̄ ndat esịt ke mme ndutịm Jehovah ke nsinsi nsinsi!

[Mme Ikọ idakisọn̄]

Didie ke Afo Ọkpọbọrọ?

◻ Nso ke mmọn̄ oro ọfiọrọde oto temple ada aban̄a?

◻ Nso udọn̄ọ ke Jehovah ada ndamban̄a akpa oro ọkọk, ndien ntak emi akpa oro akade-ka iso otụn̄ọ?

◻ Nso ke eto oro odude ke mben akpa oro ada aban̄a?

◻ Nso ke obio oro edida aban̄a ke ini Ukara Tọsịn Isua, ndien ntak emi enyịn̄ obio oro odotde?

[Mme ndise ke page 23]

Akpa mmọn̄ uwem oro ada aban̄a ndutịm Abasi kaban̄a edinyan̄a