Ntak Enịmde Jesus Christ ke Akpanikọ?
“IDEM ediwak owo oro mîdịghe Christian ẹnịm ke akpanikọ ẹte ke Enye ekedi akwa ye enyene-ọniọn̄ andikpep. Enye ke akpanikọ ekedi kiet ke otu mme owo oro ẹnyenede odudu ẹkan oro akanam ẹdude uwem.” (The World Book Encyclopedia) Anie ke “Enye” edi? Jesus Christ, anditọn̄ọ Ido Ukpono Christ.
Nte ededi, kpa ye se n̄wed ofụri orụk ifiọk oro ọdọhọde, ye ediwak miliọn owo ke mme itie ikie ke Edem Usiahautịn ye ke mme ebiet en̄wen, Jesus Christ edi esenowo, sụk enyịn̄ oro mmọ ẹkemede nditi ke mme n̄wed ukpepn̄kpọ ufọkn̄wed sekọndri. Idem ke mme ufọkabasi Christendom, odu mme ekpep ukpepn̄kpọ ido ukpono ye mme ọkwọrọ ederi ẹmi ẹdọhọde ke nnyịn inen̄ekede ifiọk Jesus ẹnyụn̄ ẹyịkde nte ata ata mbụk inan̄ ẹban̄ade uwem esie (mme Gospel) ẹmi ẹkụtde ke Bible ẹdide akpanikọ.
Ndi mme andiwet Gospel ẹketetịbi mbụk aban̄ade Jesus? N̄wan̄ansa-o! Ewetmbụk oro ẹtịmde ẹfiọk, Will Durant, ke ama okodụn̄ọde mme mbụk Gospel oro, ekewet ete: “Nte ke ibat ibat usụhọde owo ke emana kiet ẹkpeketịbi okopodudu ye ediye owo ntre ẹdi, emi enyenede ata n̄kokon̄ ido uwem ye ata okopodudu eti itie ebuana nditọete eke owo, ekpedi utịben̄kpọ oro enen̄erede ọsọn̄ ndinịm akan ekededi oro ẹwetde ke mme Gospel. Ke isua ikie iba eke Ikpọ Mbon Nsụkuyo ẹma ẹkebe, ediwet mban̄a uwem, edu uwem, ye ukpepn̄kpọ Christ, osụk edi ata in̄wan̄în̄wan̄, onyụn̄ ada aban̄a enyene-ndyọ n̄kpọ ke mbụk owo Edem Usoputịn.”
Kpa ye oro, odu mbon oro mîdidaha ke odot mmimọ ikere iban̄a Jesus Christ ke ntak se mme andidọhọ nte itienede enye ẹnamde. ‘Mmọ ẹma ẹduọk bọmb atọm ke Nagasaki,’ nte ndusụk owo ke Japan ẹsidọhọde. ‘Ndien mme Christian ẹma ẹwak ke Nagasaki ẹkan ata ediwak obio en̄wen ke Japan.’ Edi ndi afo emekeme ndiduọhọ abiausọbọ kaban̄a udọn̄ọ owo udọn̄ọ edieke owo udọn̄ọ oro okpude nditiene ndausụn̄ abiaibọk? Ata ediwak owo oro ẹdọhọde ke idi mme Christian ke anyan ini ko ẹma ẹfụmi ndausụn̄ Jesus kaban̄a edikan mme udọn̄ọ ubonowo. Edi, Jesus ama ọnọ usọbọ kaban̄a mme mfịna nnyịn eke usen ke usen, ọkọrọ ye mme ukụt ubonowo ke ofụri ererimbot. Oro edi ntak emi nnyịn inọde fi ikot ite okot ibuotikọ oro etienede onyụn̄ okụt orụk owo emi enye ekedide ke idemfo.