Didie ke Jesus Ekeme Ndikpụhọde Uwem Fo?
JESUS CHRIST ekedi Akwa Andikpep emi okodụn̄de ke Palestine ke se ikperede isua 2,000 ẹmi ẹkebede. Ẹdiọn̄ọ esisịt n̄kpọ ẹban̄a ini uyen esie. Nte ededi, ẹtịm ẹsọn̄ọ nte ke ini enye ekedide n̄kpọ nte isua 30 ke emana, enye ama ọtọn̄ọ utom esie ‘ndidi ntiense nnọ akpanikọ.’ (John 18:37; Luke 3:21-23) Mbet inan̄ oro ẹkewetde mme mbụk uwem esie ẹkewụk ntịn̄enyịn ke isua ita ye ubak oro ẹketienede.
Ke ini utom ukwọrọikọ esie, Jesus Christ ama ọnọ mme mbet esie ewụhọ oro ekpedide nsụk ọnọ ediwak mfịna ererimbot. Nso ikedi oro? Jesus ọkọdọhọ ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo.” (John 13:34) Ih, usọbọ ediwak mfịna ubonowo edi ima. Isan̄ efen, ke ini ẹkebụpde Jesus m̀mê ewe edi akamba item ke mbet, enye ọkọbọrọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo. Emi edi akamba ye ebe-iso item. Udiana onyụn̄ ebiet enye, ete, Ma mbọhọidụn̄ fo nte idem fo.”—Matthew 22:37-40.
Jesus ama owụt nnyịn ke ikọ ye edinam nte ikpamade Abasi ye ekemmọ owo. Ẹyak nnyịn idụn̄ọde uwụtn̄kpọ ifan̄ inyụn̄ ise se nnyịn ikemede ndikpep nto enye.
Mme Ukpepn̄kpọ Esie
Ke kiet ke otu ukwọrọikọ oro ẹtịmde ẹfiọk ke mbụk, Jesus Christ ama asian mme anditiene enye ete: “Baba owo kiet ikemeke ndisan̄a utom mme ete iba: koro enye ayasua kiet, ama eken; mîdịghe ntre, enye ọyọsọn̄ọ ada ye kiet, esịn enye eken ke ndek. Mbufo ikemeke ndisan̄a utom Abasi ye eke mammon.” (Matthew 6:24) Ndi ukpepn̄kpọ Jesus aban̄ade edinịm Abasi akpa osụk enyenyene ufọn mfịn, emi ata ediwak owo ẹnịmde ẹte ke okụk ọkọk kpukpru mfịna? Edi akpanikọ, nnyịn imoyom okụk man inyene se iyomde. (Ecclesiastes 7:12) Edi, edieke nnyịn iyakde “mammon” edi eteufọk nnyịn, “itọn̄ inyene” ayakara nnyịn, akarade ofụri uwem nnyịn. (1 Timothy 6:9, 10) Ediwak owo ẹmi ẹduọde ẹdụk afia emi ẹma ẹtaba ubon mmọ, nsọn̄idem mmọ, ye idem uwem mmọ.
Ke n̄kan̄ eken, ndida Abasi nte Eteufọk nnyịn anam uwem enyene se ọwọrọde. Nte Andibot, enye edi Ntọn̄ọ uwem, ndien ke ntem, enye ikpọn̄ odot utuakibuot nnyịn. (Psalm 36:9; Ediyarade 4:10b) Onụk mbon oro ẹkpepde ẹban̄a mme edu esie ẹnyụn̄ ẹdide ẹdima enye ndinịm mme ewụhọ esie. (Ecclesiastes 12:13; 1 John 5:3) Ke ndinam ntre, nnyịn inọ idem nnyịn udori.—Isaiah 48:17.
Ke Ukwọrọikọ oro ke Obot, Jesus ama ekpep mme mbet esie n̄ko nte ẹkpewụtde ekemmọ owo ima. Enye ọkọdọhọ ete: “Sededi mbufo ẹyomde owo ẹnam ye mbufo, ẹnam kpa ntre ye mmọ.” (Matthew 7:12) Ikọ oro “owo” oro Jesus akadade mi esịne idem mme asua owo. Kpasụk ke ukwọrọikọ oro, enye ama ọdọhọ ete: “Ẹma mme asua mbufo, ẹnyụn̄ ẹbọn̄ akam ẹyom ufọn mmọ eke ẹnamde mbufo isịn-enyịn.” (Matthew 5:43, 44) Ndi utọ ima oro ikpọkọkke ediwak mfịna oro nnyịn isobode mfịn? Adausụn̄ Hindu oro Mohandas Gandhi ekekere ntre. Ẹdọhọ ke enye ọkọdọhọ ete: “Ke ini idụt fo ye okịm ẹdidianade kiet ẹnam mme ukpepn̄kpọ oro Christ ekekpepde ke Ukwọrọikọ oro ke Obot, nnyịn iyọkọk mme mfịna . . . ofụri ererimbot.” Edieke ẹdade mme ukpepn̄kpọ Jesus ẹban̄ade ima ẹsịn ke edinam, ẹkeme ndikọk ediwak mfịna ubonowo.
Mme Edinam Esie
Jesus ikekpepke ntotụn̄ọ akpanikọ kpọt iban̄a nte ẹkpewụtde ima edi enye ama ananam se enye ekekpepde n̄ko. Ke uwụtn̄kpọ, enye ekenịm udọn̄ mbon en̄wen nte ebeiso ọnọ esiemmọ. Usen kiet Jesus ye mme mbet esie ẹma ẹsịn idem eti eti ẹn̄wam mme owo tutu mmọ ikam inyeneke ifet ndidia udia. Jesus ama okụt ke oyom mme mbet esie ẹduọk odudu esisịt, ndien enye ama ada mmọ aka ndobo ndobo ebiet. Edi ke ini mmọ ẹsịmde do, mmọ ẹma ẹkụt otuowo ẹbetde mmọ. Afo akpakanam n̄kpọ didie ke ama okokụt otuowo ẹmi ẹkedoride enyịn afo ndinam utom ke ini eketiede fi ke idem nte ke omoyom esisịt nduọkodudu? Nte ededi, Jesus ama “atua mmọ mbọm” onyụn̄ “ọtọn̄ọ ndikpep mmọ ediwak n̄kpọ.” (Mark 6:34) Edikere mban̄a mbon en̄wen emi ekesinụk Jesus kpukpru ini ndin̄wam mmọ.
Jesus ama anam n̄kpọ efen efen ọnọ mme owo akan ndikpep mmọ n̄kpọ. Enye ama ọnọ mmọ ata ata un̄wam n̄ko. Ke uwụtn̄kpọ, ke idaha kiet enye ama anam udia ọnọ se iwakde ibe owo 5,000 ẹmi ẹkekpan̄de utọn̄ ẹnọ enye tutu ke mbubịteyo. Esisịt ini ke oro ebede, enye ama ọnọ akwa otuowo en̄wen udia—isan̄ emi se ibede owo 4,000—ẹmi ẹkekpan̄de utọn̄ ẹnọ enye ke usen ita ndien mînyeneke n̄kpọ ndomokiet ndidia. Ke akpa idaha oro, enye akada uyo ition ye iyak iba, ndien ke eke ukperedem, akada uyo itiaba ye n̄kpri iyak ifan̄. (Matthew 14:14-22; 15:32-38) Ndi ẹkedi mme utịben̄kpọ? Ih, enye ekedi anam-utịben̄kpọ.
Jesus ama ọkọk ediwak mbon udọn̄ọ n̄ko. Enye ama ọkọk mme nnan, mbon mbụn̄ọ, akpamfia, ye inan. Kamse, enye ama akam anam mme akpan̄kpa ẹset! (Luke 7:22; John 11:30-45) Ini kiet owo akpamfia kiet ama ekpe enye ubọk ete: “Ke Afo enyịmede, emekeme ndinam mi nsana.” Jesus ọkọbọrọ didie? “Ndien mbọm anam Jesus, Enye onyụn̄ anyanade ubọk otụk enye ete, Mmenyịme, sana.” (Mark 1:40, 41) Ebede ke mme utọ utịben̄kpọ oro, Jesus ama owụt ima oro enye ekenyenede ọnọ mbon ukụt.
Ndi ọsọn̄ fi ndinịm mme utịben̄kpọ Jesus ke akpanikọ? Ọsọn̄ ndusụk owo. Nte ededi, ti ete ke Jesus akanam mme utịben̄kpọ esie ke eferife. Idem mme andibiọn̄ọ enye, ẹmi ẹkedomode ndikụt ndudue nnọ enye ke kpukpru idaha, ikekemeke ndifan̄a nte ke enye ekedi anam-utịben̄kpọ. (John 9:1-34) Ke adianade do, mme utịben̄kpọ esie ẹma ẹnyene uduak. Mmọ ẹma ẹn̄wam mme owo ndifiọk enye nte Enye Emi Abasi okosiode ọdọn̄.—John 6:14.
Jesus ikodụrike ntịn̄enyịn inọ idemesie ke ndinam mme utịben̄kpọ. Utu ke oro, enye ọkọnọ Abasi ubọn̄, kpa Enye Emi odudu esie okotode. Isan̄ kiet enye ama odu ke ufọk oro mme owo ẹkeyọhọde ke Capernaum. Owo akpauben̄ kiet ama oyom ẹkọk imọ edi ikekemeke ndibe ndụk. Ntre mme ufan esie ẹma ẹsịn enye ke n̄kpana ẹsụhọde ke ọkọm. Ke ama okokụt mbuọtidem mmọ, Jesus ama ọkọk owo akpauben̄ oro. Nte utịp, mme owo oro “ẹtoro Abasi” ẹnyụn̄ ẹdọhọ ẹte: “Akananam nnyịn ikwe orụk n̄kpọ emi.” (Mark 2:1-4, 11, 12) Mme utịben̄kpọ Jesus ẹma ẹda itoro ẹsọk Jehovah, kpa Abasi esie, ẹnyụn̄ ẹn̄wam mbon oro ẹkeyomde mmọ.
Nte ededi, idịghe utịbe utịbe edikọk mbon udọn̄ọ ekedi akpan utom Jesus. Owo kiet emi ekewetde mbụk aban̄a uwem Jesus akanam an̄wan̄a ete: “Ẹwet mmọ ẹmi, man mbufo ẹnịm ke akpanikọ ẹte Jesus edi Christ, Eyen Abasi; man, ke edinịm ke akpanikọ, mbufo ẹkpenyene uwem ke enyịn̄ Esie.” (John 20:31) Ih, Jesus ekedi isọn̄ man mme owo oro ẹnịmde ke akpanikọ ẹkpenyene uwem.
Uwa Esie
Afo emekeme ndibụp, ‘Ndi Jesus ama edi isọn̄? Enye okoto m̀mọ̀n̄?’ Jesus ke idemesie ọkọdọhọ ete: “Nto ke heaven nsụhọde ndi, idịghe man nnam uduak Idem Mi, edi man nnam uduak Andidọn̄ Mi.” (John 6:38) Enye ama ododu uwem nte ikpọn̄îkpọn̄ edibon Eyen Abasi mbemiso edide owo. Nso ndien ikedi uduak Andikọdọn̄ enye edi isọn̄? “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem,” ntem ke John, kiet ke otu mme andiwet Gospel, ọdọhọ. (John 3:16) Didie ke emi ekekeme nditịbe?
Bible ayarade nte n̄kpa akasan̄ade edi idaha oro ubonowo mîkemeke ndifep. Akpa ebe ye n̄wan ẹkebọ Abasi uwem ye idotenyịn edidu uwem ke nsinsi. Nte ededi, mmọ ẹma ẹmek ndisọn̄ ibuot ye Andinam mmọ. (Genesis 3:1-19) Nte utịp edinam emi, akpa idiọkn̄kpọ owo, nditọ Adam ye Eve ẹma ẹda n̄kpọ akpa oro owo mîmaha edide n̄kpa ẹmana. (Rome 5:12) Man ẹnọ ubonowo ata uwem, ana ẹbiat idiọkn̄kpọ ye n̄kpa ẹfep.
Ataifiọk ndomokiet ikemeke ndisio n̄kpa mfep ebe ke ndusụk orụk ndudiọn̄ nsen ubon. Edi, Andibot ubonowo enyene usụn̄ ndinam okopitem ubonowo edi mfọnmma man otodo mmọ ẹkpekeme ndidu uwem ke nsinsi. Ke Bible ẹkot ndutịm emi ufak. Akpa ebe ye n̄wan ẹma ẹnyam idemmọ ye nditọ mmọ ẹsịn ke itie ufụn idiọkn̄kpọ ye n̄kpa. Mmọ ẹma ẹda uwem nte mme mfọnmma owo ẹkopde item ẹnọ Abasi ẹkpụhọ ye uwem nda-ke-idem n̄kpọn̄ Abasi, ẹnamde mme ubiere idemmọ kaban̄a se inende ye se ikwan̄ade. Man ẹfiak ẹdep mfọnmma uwem eke owo, ẹkenyene ndikpe ekọmurua oro ekedide ukem ye mfọnmma uwem eke owo oro akpa ete ye eka nnyịn ẹkeduọkde. Sia ẹkedade-da unana mfọnmma ẹmana, mme owo ikodotke ndinọ ekọmurua oro.—Psalm 49:7.
Ntre Jehovah Abasi ama esịbe odụk ndin̄wam. Enye ama osio uwem mfọnmma ikpọn̄îkpọn̄ edibon Eyen esie esịn ke idịbi n̄wan emi mîfiọkke eren, emi akamande Jesus. Ke mme iduọkisua ẹmi ẹkebede, ekeme ndidi afo ukenịmke edimana nto n̄wan emi mîfiọkke eren ke akpanikọ. Nte ededi, mfịn, ntaifiọk ẹmenam unam kiet akabade iba ẹnyụn̄ ẹda nsen ubon ke unam kiet ẹsịn ke en̄wen. Do, anie ekeme ndifan̄a nte enende mban̄a ukeme Andibot ndibe ọsọ usụn̄ edision̄o nditọ ndi?
Sia mfọnmma uwem eke owo odude, ekọmurua edifak ubonowo nsio ke idiọkn̄kpọ ye n̄kpa ama odu. Edi, nsekeyen oro ẹkemande ke isọn̄ nte Jesus ekenyene ndikọri n̄kabade ndi “abiausọbọ” emi ekemede ndinọ “usọbọ” ndikọk mme mfịna ubonowo. Enye ama anam emi ebe ke ndidu mfọnmma uwem unana idiọkn̄kpọ. Jesus ikekwe sụk ndutụhọ ubonowo emi odude ke idak idiọkn̄kpọ edi ama okụt mme unana ukeme ikpọkidem eke edidi owo. Emi ama anam enye akam edi abiausọbọ emi enen̄ede okop mbọm. (Mme Hebrew 4:15) Mme utịbe utịbe ukọkudọn̄ọ oro enye akanamde ke ini uwem esie ke isọn̄ ẹma ẹsọn̄ọ ẹte ke enye enyene udọn̄ ye odudu ndikọk mbon udọn̄ọ.—Matthew 4:23.
Ke ama okokụre utom ukwọrọikọ isua ita ye ubak ke isọn̄, mme andibiọn̄ọ ẹma ẹwot Jesus. Enye ama owụt ete ke mfọnmma owo ekeme ndikop uyo nnọ Andibot idem kpa ye mme n̄kponn̄kan idomo. (1 Peter 2:22) Mfọnmma uwem eke owo esie oro akawade ama akabade edi ekọmurua ufak, ekemede ndifak ubonowo nsio ke idiọkn̄kpọ ye n̄kpa. Jesus Christ ọkọdọhọ ete: “Baba owo kiet inyeneke ima eke okponde akan enye emi, owo ndikpayak uwem esie nduọk kaban̄a mme ufan esie.” (John 15:13) Ke ọyọhọ usen ita ke enye ama akakpa, ẹma ẹnam Jesus eset odụk uwem eke spirit, ndien ndusụk urua ke ukperedem enye ama ọdọk ke heaven man ọkọnọ Jehovah Abasi ekọmurua ufak. (1 Corinth 15:3, 4; Mme Hebrew 9:11-14) Ke ndinam ntre, Jesus ama ekeme ndida ufọn ekọmurua uwa ufak esie nnam n̄kpọ nnọ mbon oro ẹtienede enye.
Nte afo eyenyịme ndibọ ufọn nto usụn̄ edikọk mme udọn̄ọ eke spirit, eke ntụk, ye eke ikpọkidem ẹmi? Man anam ntre oyom mbuọtidem ke Jesus Christ. Ntak mûdịghe ubịne Abiausọbọ oro ke idemfo? Afo emekeme ndinam oro ebe ke ndikpep mban̄a Jesus Christ ye udeme esie ke ndinyan̄a anam-akpanikọ ubonowo. Mme Ntiense Jehovah ẹyenem esịt ndin̄wam fi.
[Ndise ke page 5]
Jesus enyene udọn̄ ye odudu ndikọk mbon udọn̄ọ
[Ndise ke page 7]
Didie ke n̄kpa Jesus otụk fi?