Kûyak Iyatesịt Anam Fi Atuak Ukot Ọduọ

“DUỌK ibifịk!” “Mụm idem kama!” “Dop uyo!” Ndi afo ememehe ye mme ikọ ẹmi? Ndusụk afo emesitịn̄ mmọ ọnọ idemfo man anam ifụtesịt eke esịt esịt idemfo osụhọde. Ndusụk owo, ke ukeme ndibiọn̄ọ ibụmede ibụmede iyatesịt, ẹsinam isan̄. Mmọ ẹmi ẹdi mme mmemmem usụn̄ ndikpeme iyatesịt nnyụn̄ mmụm itie ebuana ye mbon efen n̄kama.

Nte ededi, ke mme isua ndondo ẹmi, mme item oro mîdụhe ke n̄kemuyo ẹtode nta mme ọfiọkn̄wed kaban̄a m̀mê ẹkpeyayat m̀mê ẹkpetetre ndiyat esịt ẹtịmede ediwak owo. Ke uwụtn̄kpọ, ndusụk mme ekpepn̄kpọ mban̄a ekikere ẹnọ ekikere ẹte “edieke enye anamde fi okop inem,” yat esịt. Mmọ efen ẹdụri owo utọn̄ ẹte ke ibụmede ibụmede iyatesịt ofụri ini ẹdi “akpan ntak n̄kpa nsek akan mme akama-ndịk ntak efen utọ nte edin̄wọn̄ sika, udọn̄ọ n̄kon̄kon̄ iyịp, ye ediwak isek.” Ikọ Abasi ọdọhọ in̄wan̄în̄wan̄ ete: “Tre ifụtesịt, nyụn̄ kpọn̄ ifiopesịt: kûyat esịt kûnyụn̄ unam idiọk baba.” (Psalm 37:8) Ntak emi Bible ọnọde utọ san̄asan̄a item emi-e?

Ntụk emi owo mîkarake esida esịm mme edinam unana mfara ke idem. Emi ama enen̄ede abak owụt idem ke mbụk owo. Nnyịn ikot ite: “Cain ofụt esịt eti eti, iso onyụn̄ okpụhọde enye.” M̀mọ̀n̄ ke emi akada enye ekesịm? Iyatesịt esie ama ọsọn̄ọ omụm enye onyụn̄ akara enye, tutu anam esịt esie ọsọn̄ kaban̄a item oro Jehovah ọkọnọde ete akabade anam se ifọnde. Cain nditre ndikara iyatesịt ama ada enye esịm akwa idiọkn̄kpọ—ediwot eyeneka esie.—Genesis 4:3-8.

Ukem ntre, iyatesịt ama akara Saul, akpa edidem Israel, ke ini enye okokopde nte David ọbọde akwa itoro. “Nte iban ẹnekde, mmọ ẹbọrọ kiet eken, ẹte, Saul ama owot mme tọsịn esie, David ama onyụn̄ owot mme tọsịn esie duop. Ndien Saul ayat esịt eti-eti, ikọ ẹmi inyụn̄ inemke enye.” Iyatesịt ama akara ekikere Saul tutu onụk enye ndinam ediwak usio-ukot ndiwot David. Okposụkedi David okoyomde itieufan, Saul ikenyịmeke ndibịne emem nnyụn̄ nnam enye. Ke akpatre, enye ama ataba mfọn Jehovah ofụri ofụri.—1 Samuel 18:6-11; 19:9, 10; 24:1-21; Mme N̄ke 6:34, 35.

Nte owo mîkemeke ndifep, ke ini owo ayakde idem ọnọ iyatesịt emi owo mîkarake, enye eyetịn̄ onyụn̄ anam mme n̄kpọ oro ẹdiyatde kpukpru mmọ ẹmi ẹbuanade esịt. (Mme N̄ke 29:22) Cain ye Saul ẹma ẹyat esịt koro owo mmọ kiet kiet, ke usụn̄ idemesie, ama efịbe ufụp onyụn̄ esịn owo enyịn. Nte ededi, mme edinam iyatesịt ẹkeme nditịbe nto nsio nsio ntak. Edikụt ndudue nnọ nte mîdotke, usọn̄enyịn, ndutan̄uyo, m̀mê edinam n̄kpọ ye owo nte mîdotke ẹkeme ndidi ebuaikan̄ oro obụberede ibụmede ibụmede iyatesịt.

Mme uwụtn̄kpọ Cain ye Saul ẹnọ ekikere ẹban̄a akwa mmeme oro mmọ ẹkenyenede. Etie nte idịghe mbuọtidem okonụk Cain ndiwa uwa. (Mme Hebrew 11:4) Saul ndikpu ndinịm mme ibet oro Jehovah ọkọnọde ye enye ndidomo ndikụt unen nnọ idem ke ukperedem ama ada esịm enye nditaba mfọn ye spirit Abasi. Nte an̄wan̄ade, mmọ mbiba ẹma ẹbiat itie ebuana mmọ ye Jehovah.

Se nte mme utọ edu oro ẹkpụhọrede ye eke David, emi ekenyenede ntak ndiyat esịt mban̄a nte Saul akanamde n̄kpọ ye enye. David ama omụm spirit esie akama. Ntak-a? Enye ọkọdọhọ ete: “Nsa mi, ma Jehovah, ndinamke n̄kpọ emi ye ete mi emi Jehovah ekeyetde aran.” David ama ekere in̄wan̄în̄wan̄ aban̄a itie ebuana esie ye Jehovah, ndien emi ama otụk nte enye akanamde n̄kpọ ye Saul. Enye ke nsụhọdeidem ama ọkpọn̄ mme n̄kpọ ke ubọk Jehovah.—1 Samuel 24:6, 15.

Ke akpanikọ, se unana edikara iyatesịt adade edi ẹnen̄ede ẹkponi. Apostle Paul ọkọtọt ete: “Ẹyat esịt, ndien ẹkûdue.” (Ephesus 4:26) Ke adan̄aemi edinen iyatesịt enyenede itie esie, n̄kpọndịk odu kpukpru ini nte ke iyatesịt ekeme ndikabade ndi n̄kpọ iduọ nnọ nnyịn. Eyịghe idụhe, ndien, nte ke ana nnyịn isak iso ise n̄kpọ-ata eke edikara iyatesịt nnyịn. Didie ke nnyịn ikeme ndinam ntre?

Akpan usụn̄ kiet edi ndikọri okopodudu itie ebuana ye Jehovah. Enye esịn udọn̄ ọnọ fi ndiberede esịt ye ekikere fo nnọ imọ. Tịn̄ nọ enye ban̄a se afo amade onyụn̄ oyomde, nyụn̄ ben̄e sụn̄sụn̄ esịt ndida n̄kan iyatesịt. (Mme N̄ke 14:30) Nịm ete ke “enyịn Jehovah ke esese ndinen owo, utọn̄ esie onyụn̄ ọbiọn̄ọ eseme mmọ.”—1 Peter 3:12.

Akam ekeme ndikara nnyụn̄ nda fi usụn̄. Ke nso usụn̄? Enye ekeme ndinyene akamba odudu ke usụn̄ nte afo anamde n̄kpọ ye mbon efen. Ti nte Jehovah anamde n̄kpọ ye afo. Nte N̄wed Abasi ọdọhọde, Jehovah “inamke nnyịn nte mme idiọk ido nnyịn ẹsan̄ade.” (Psalm 103:10) Edu edifen nnọ edi akpan n̄kpọ “mbak Satan edikan” fi. (2 Corinth 2:10, 11) N̄ko-n̄ko, akam eberede esịt fo ọnọ ndausụn̄ edisana spirit, emi ekemede ndiwụri n̄kpọsọn̄ ido ke uwem. Jehovah enem esịt ndinọ ‘emem emi ayan̄ade ifiọk owo,’ emi ekemede ndisio fi ke odudu ọkpọsọn̄ iyatesịt.—Philippi 4:7.

Nte ededi, akam enyene ndisan̄a ye edidụn̄ọde N̄wed Abasi ofụri ini man nnyịn ‘itịm ifiọk se Ọbọn̄ amade.’ (Ephesus 5:17; James 3:17) Edieke ọsọn̄de fi ke idemfo ndikara iyatesịt fo, domo ndinyene ekikere Jehovah ke n̄kpọ emi. Dụn̄ọde mme itien̄wed Abasi oro ẹtịmde ẹnyene n̄kpọ ndinam ye edikara iyatesịt.

Apostle Paul ama ọnọ akpan n̄kpọ editi emi: “Ẹyak nnyịn ifọn ido ye kpukpru owo, akpan-akpan ye mmọ ẹmi ẹtode ke ufọk mme andinịm ke akpanikọ.” (Galatia 6:10) Wụk ekikere ye mme edinam fo ke ndinam nti n̄kpọ nnọ mbon en̄wen. Utọ nti ye in̄wan̄în̄wan̄ edinam oro ẹyesịn udọn̄ ẹnọ edinịm idem ke itie owo en̄wen ye mbuọtidem ẹyenyụn̄ ẹsụhọde ndutan̄uyo emi ekemede ndida nsịm iyatesịt mmemmem mmemmem.

Andiwet psalm ọkọdọhọ ete: “Da ikọ fo nam ikpat mi ọsọn̄ ada: kûnyụn̄ uyak baba idiọk ido kiet akan mi. Mmọ eke ẹmade ido fo ẹnyene ediwak ifụre, mmọ inyụn̄ ikwe n̄kpọ iduọ baba kiet.” (Psalm 119:133, 165) Emi ekeme ndidi ntre ye afo n̄ko.

[Ekebe/Ndise ke page 9]

MME USỤN̄ NDIKARA IYATESỊT

□ Bọn̄ akam nọ Jehovah.—Psalm 145:18.

□ Dụn̄ọde N̄wed Abasi ke usen ke usen.—Psalm 119:133, 165.

□ Ka iso sịn idem ke mme edinam oro ẹnyenede ufọn.—Galatia 6:9, 10.