Jehovah Ọdiọn̄ Usụn̄

“Ẹyenyụn̄ ẹkwọrọ gospel Ubọn̄ Abasi emi.”—MATTHEW 24:14.

1. Nso ke ẹkenam ke utom ukwọrọikọ ke akpa isua ikie ye ọyọhọ isua ikie 20?

SIA Jehovah edide Abasi ima, edi uduak esie nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:4) Emi oyom ubịnikọt ukwọrọikọ ye ukpepn̄kpọ ofụri ererimbot. Ke akpa isua ikie, ukwọrọikọ emi ama anam esop Christian edi “adaha ye isọn̄ eke akpanikọ Abasi odorode ke esịt.” (1 Timothy 3:15) Ke oro ebede anyan ini nsọn̄ibuot ama odu emi un̄wana akpanikọ ekekịmde. Ke mme ini ndondo emi, ke “utịt ini,” “ifiọk akpanikọ” (NW) amafiak okpon aka iso, adade idotenyịn nsinsi edinyan̄a oro ọkọn̄ọde ke Bible ọsọk ediwak miliọn owo.—Daniel 12:4.

2. Nso ke Jehovah anam ke ebuana ye utom ukwọrọikọ?

² Kpa ye ofụri ukeme Satan ndibiọn̄ọ uduak Abasi, utom ukwọrọikọ ke akpa isua ikie ye ọyọhọ isua ikie 20 okụt ndyọ ndyọ unen. Enye anam ẹti ntịn̄nnịm ikọ Isaiah. Kaban̄a mme Jew ndito ntan̄mfep ndi Judah ke ọyọhọ isua ikie itiokiet M.E.N., Isaiah ekewet ete: “Kpukpru itịghede ebiet ẹyemenede ke enyọn̄, kpukpru ikpọ ye n̄kpri obot ẹyenyụn̄ ẹsụhọde: se ikwan̄ade oyonyụn̄ akabade enen, ibombom oyonyụn̄ akabade edi una-isọn̄.” (Isaiah 40:4) Jehovah n̄ko ama ọdiọn̄ onyụn̄ anam usụn̄ ọfọn kaban̄a ikpọ ubịnikọt utom ukwọrọikọ eke akpa isua ikie ye eke ọyọhọ isua ikie 20.

3. Ke mme usụn̄ ewe ke Jehovah ekeme ndinam mme uduak esie?

³ Emi iwọrọke ite ke Jehovah akara kpukpru edinam ke isọn̄ nnennen nnennen man atat edikwọrọ eti mbụk; inyụn̄ iwọrọke ite ke Jehovah ada ukeme edibem iso nda n̄kụt n̄kpọ anam n̄kpọ man ọfiọk kpukpru n̄kpọ oro ẹdidade itie ketket. Edi akpanikọ, enye ekeme ndibem iso nda n̄kụt n̄kpọ nnyụn̄ ndiomi mme n̄kpọntịbe ini iso. (Isaiah 46:9-11) Edi enye enyene ukeme n̄ko ndinam n̄kpọ mban̄a mme n̄kpọ nte mmọ ẹdade itie. Ukem nte enyene-mbufiọk ekpemerọn̄ emi ọfiọkde nte ọkpọnọde ndausụn̄ ye nte ekpekpemede otuerọn̄ esie, Jehovah ada ikọt esie usụn̄. Enye ada mmọ usụn̄ aka edinyan̄a, ekpemede idaha eke spirit mmọ onyụn̄ onụkde mmọ ndida mme idaha ye mme n̄kpọ oro ẹtịbede nsịn udọn̄ nnọ edikwọrọ eti mbụk oro okụtde unen ke ofụri ererimbot.—Psalm 23:1-4.

Ọkpọsọn̄ Utom

4, 5. Ntak emi edikwọrọ eti mbụk edide utom emi akamade n̄kpọ-ata?

⁴ Kpa nte ekedide ye edikọn̄ ubom ke eyo Noah, utom edikwọrọ Obio Ubọn̄ edi akamba utom—ke akpa isua ikie ye ke eyomfịn. Utom edida etop ekededi nsịm kpukpru owo edi ata ọkpọsọn̄ utom, edi utom enye emi ama enen̄ede akama n̄kpọ-ata. Ke akpa isua ikie, mme mbet iketịmke iwak. Ẹma ẹwot Adausụn̄ mmọ, Jesus, nte owo emi ẹkedọhọde ke ọsọn̄ ibuot ye ukara. Ido ukpono mme Jew ama enen̄ede enyene iwụk. Akwa temple ama owụhọ ke Jerusalem. Mme ido ukpono oro mîkedịghe eke mme Jew ke mme ikpehe Mediterranean ẹma ẹnen̄ede ẹnyene iwụk n̄ko, ẹnyenede mme temple ye mme oku. Ukem ntre, nte “utịt ini” ọkọtọn̄ọde ke 1914, mme Christian oro ẹyetde aran ikawakke, ndien mbon oro ẹkesọn̄ọde ẹyịre ke mme ido ukpono en̄wen oro ẹkedọhọde ke ikpono Abasi ẹma ẹwak.—Daniel 12:9.

⁵ Jesus ama odụri mme anditiene enye utọn̄ ete ke ẹyekọbọ mmọ. Enye ọkọdọhọ ete: “Ẹyeda mbufo ẹyak ẹnọ ukụt, ẹnyụn̄ ẹwot mbufo: kpukpru mme idụt ẹyenyụn̄ ẹsua mbufo kaban̄a enyịn̄ Mi.” (Matthew 24:9) Ke adianade ye mme utọ mfịna oro, akpan akpan ke “ukperedem ini,” mme Christian ẹdidu ke “ndiọk eyo.” (2 Timothy 3:1) Nte utom oro okponde, nte ukọbọ enen̄erede ada itie, ye nte n̄kpọ ẹsọn̄de ẹmenam utom ukwọrọikọ edi n̄kpọ-ata ye ọkpọsọn̄ n̄kpọ. Omoyom akwa mbuọtidem.

6. Nso nsọn̄ọ kaban̄a edikụt unen ke Jehovah ọnọ ikọt esie?

⁶ Ke adan̄aemi Jehovah ọkọfiọkde ete ke mme mfịna ẹyedu, enye ama ọfiọk n̄ko ete ke n̄kpọ ndomokiet idikpanke utom oro. Ẹma ẹbem iso ẹtịn̄ ẹban̄a unen ẹdikụtde ke ntịn̄nnịm ikọ oro ẹtịmde ẹfiọk emi ekenyenede n̄wọrọnda edisu ke akpa isua ikie ye ọyọhọ isua ikie 20: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo.” (Sịghisịghi ubọkn̄wed edi eke nnyịn.)—Matthew 24:14.

7. Utom ukwọrọikọ akatara adan̄a didie ke akpa isua ikie?

⁷ Ke ẹyọhọde ye mbuọtidem ye edisana spirit, mme asan̄autom Abasi ke akpa isua ikie ẹma ẹka iso ndinam utom mmọ. Sia Jehovah okodude ye mmọ, mmọ ẹma ẹnen̄ede ẹkụt unen ẹkan se ekemede ndidi mmọ ẹma ẹdori enyịn ndikụt. Etisịm ini oro Paul ekewetde n̄wed ọnọ ẹsọk mbon Colossae, n̄kpọ nte isua 27 tọn̄ọ Jesus akakpa, enye ama ekeme nditịn̄ mban̄a eti mbụk nte ke ẹma ‘ẹkwọrọ ẹnọ kpukpru owo ke idak ikpa-enyọn̄.’ (Colossae 1:23) Kpasụk ntre, ke utịt ọyọhọ isua ikie 20, ke ẹkwọrọ eti mbụk ke idụt 233.

8. Ke mme orụk idaha ewe ke ediwak owo ẹnyịme eti mbụk? Nọ mme uwụtn̄kpọ.

⁸ Ediwak miliọn owo ẹmenyịme eti mbụk ke mme iduọk isua duop eke ndondo emi. Ediwak owo ẹnam ntre ke idak ndiọi idaha—ke mme ini ekọn̄, ukpan, ye ọkpọsọn̄ ukọbọ. Oro ekedi ntre n̄ko ke akpa isua ikie. Ke idaha kiet ẹma ẹmia Paul ye Silas ata idiọk idiọk ke eto ẹnyụn̄ ẹtomo ẹdọn̄ ke ufọk-n̄kpọkọbi. Nso idiọk idaha emi eketiede nte owo ikemeke ndinam mme mbet ke emi ekedi ntem! Kpa ye oro, Jehovah ama ada idaha oro ndinam mme mbet. Ẹma ẹsion̄o Paul ye Silas ke ufọk-n̄kpọkọbi, ndien ekpeme ufọk-n̄kpọkọbi oro ye ubon esie ẹma ẹkabade ẹdi mme andinịm ke akpanikọ. (Utom 16:19-33) Mme utọ ifiọkutom oro ẹwụt ẹte ke mbon oro ẹbiọn̄ọde ikemeke ndikpan eti mbụk. (Isaiah 54:17) Kpa ye oro, mbụk Ido Ukpono Christ ọyọhọ ye usua ye ukọbọ. Ẹyak nnyịn idahaemi iwụk ntịn̄enyịn ke mme n̄kpọntịbe oro ẹken̄wamde ndidiọn̄ usụn̄ nnọ edikwọrọ eti mbụk nte okụtde unen ke akpa isua ikie ye ọyọhọ isua ikie 20.

N̄kann̄kụk Ido Ukpono

9, 10. Didie ke Jehovah ekedemerede idotenyịn kaban̄a edikwọrọ eti mbụk ke akpa isua ikie ye ọyọhọ isua ikie 20?

⁹ Kere ban̄a mme ini ubịnikọt ukwọrọikọ ofụri ekondo. Kaban̄a idaha eke akpa isua ikie, ntịn̄nnịm ikọ aban̄ade urua 70 ẹdide isua, oro ẹkụtde ke Daniel 9:24-27, ama anyan ubọk owụt isua emi akanade Messiah ọwọrọ owụt idem—29 E.N. Okposụkedi mme Jew akpa isua ikie mîkọfiọkke nnennen ini oro mme n̄kpọ ẹkenyenede ndida itie, mmọ ẹma ẹdori enyịn, ẹbetde Messiah. (Luke 3:15) Manuel Biblique usem French ọdọhọ ete: “Mme owo ẹma ẹfiọk ẹte ke urua ata-ye-duop eke isua oro Daniel akasiakde ke ẹkesan̄a ẹkpere utịt; owo ndomokiet ikodụhe ke n̄kpaidem ndikop John Baptist ọtọtde nte ke obio ubọn̄ Abasi emekpere.”

¹⁰ Nso kaban̄a idaha eke eyomfịn? Ọfọn, n̄kpọntịbe oro owo mîfreke ekedi edidori Jesus ke ebekpo ke heaven, emi okowụtde ntọn̄ọ edidu esie ke odudu Obio Ubọn̄. Ntịn̄nnịm ikọ Bible owụt ete ke emi akada itie ke 1914. (Daniel 4:13-17) Udọn̄ kaban̄a n̄kpọntịbe emi ama anam ndusụk mbon ido ukpono ke eyomfịn ẹyọhọ ye idotenyịn. Idotenyịn ama odu n̄ko ke otu Nditọ Ukpepn̄kpọ Bible ofụri esịt ẹmi ẹketọn̄ọde ndisio magazine emi (ke Ikọmbakara) ke 1879 nte Zion’s Watch Tower and Herald of Christ’s Presence. Ntem, ke akpa isua ikie ye ke eyomfịn, mme idotenyịn eke ido ukpono ẹma ẹtịm mme n̄kann̄kụk kaban̄a edikwọrọ eti mbụk.a

11. Mme itiat idakisọn̄ eke ido ukpono ewe ke ẹkesịn man an̄wam ke edikwọrọ eti mbụk?

¹¹ N̄kpọ en̄wen oro akan̄wamde utom mme Christian ke eyo mbiba ẹmi ekedi nte ke ediwak owo ẹma ẹmehe ye Edisana N̄wed Abasi. Ke akpa isua ikie, otu mme Jew ẹma ẹsuana ẹyọhọ ofụri idụt mme Gentile. Mme otu ẹmi ẹma ẹnyene mme synagogue ẹmi mme owo ẹkesisopde idem kpukpru ini ndikop nte ẹkotde ẹnyụn̄ ẹnemede N̄wed Abasi. Ntem, mme akpa Christian ẹma ẹkeme ndifori ifiọk eke ido ukpono oro mme owo ẹma ẹkenyenyene. (Utom 8:28-36; 17:1, 2) Ke ntọn̄ọ ntọn̄ọ eyo nnyịn, ikọt Jehovah ẹma ẹnyene mme ukem n̄kann̄kụk oro ke ediwak idụt. Bible ama odu ntatara ntatara ke ofụri ikpehe Christendom, akpan akpan ke mme idụt Protestant. Ẹma ẹsikot enye ke ediwak ufọkabasi; ediwak miliọn owo ẹma ẹnyene eke mmọ. Mme owo ẹma ẹnyenyene Bible, edi mmọ ẹma ẹyom un̄wam man ẹfiọk se mmọ ẹkenyenede.

Mme Ufọn Ibet

12. Didie ke ibet Rome nte ido edide ekedi n̄kpọ ukpeme ke akpa isua ikie?

¹² Ukwọrọikọ Christian esiwak ndibọ ufọn nto ibet ukara. Obio Ukara Rome akakara ererimbot akpa isua ikie, ndien mme ibet esie oro ẹwetde-wet ẹma ẹnyene akwa odudu ke uwem eke usen ke usen. Mme ibet ẹmi ẹma ẹnọ ukpeme, ndien mme akpa Christian ẹma ẹbọ ufọn ẹto enye. Ke uwụtn̄kpọ, Paul ndisịn eben̄e ke ibet Rome ama ada ekesịm edisio enye ke ufọk-n̄kpọkọbi onyụn̄ anam enye ọbọhọ umia. (Utom 16:37-39; 22:25, 29) Nditịn̄ mban̄a ndutịm ibet Rome ama an̄wam ndisụk otu mbon ntịme esịt ke Ephesus. (Utom 19:35-41) Ini kiet, ẹma ẹnyan̄a Paul ẹsio ke ubọk mbon afai koro enye ekedide eyenisọn̄ Rome. (Utom 23:27) Nte ini akakade, ibet Rome ama ayak enye ekeme ndida ibet nneni mban̄a mbuọtidem esie ke iso Caesar. (Utom 25:11) Okposụkedi ndusụk ke otu mme Caesar ẹkekarade nte mme akara-ukara ufịk, mme ibet ke akpa isua ikie ẹma ẹsiwak ndiyak ‘ẹkpeme ẹnyụn̄ ẹsọn̄ọ ẹwụk eti mbụk nte ekemde ye ibet.’—Philippi 1:7, NW.

13. Didie ke utom ukwọrọikọ ke eyo nnyịn esiwak ndibọ ufọn nto ibet?

¹³ Ukem oro ke edi ke ediwak idụt mfịn. Okposụkedi odude mbon oro ‘ẹbotde ibak ke ewụhọ,’ mme ibet oro ẹwetde-wet ke ata ediwak idụt ẹnyịme ifụre ido ukpono nte akpan unen. (Psalm 94:20) Ke ẹfiọkde ẹte ke Mme Ntiense Jehovah idịghe n̄kpọndịk ndomokiet inọ ndutịm n̄kaowo, ediwak ukara ẹmenọ nnyịn unyịme nte ekemde ye ibet. Ke United States, emi ẹmịn̄de ekese ke otu n̄wed Mme Ntiense, mme ibet oro ẹdude ẹmenam ẹkeme ndimịn̄ magazine Enyọn̄-Ukpeme ke isua 120 nnyụn̄ ndi se ẹkotde ke ofụri ererimbot.

Mme Ini Emem ye Ediyọ

14, 15. Didie ke ukeuke eti idaha n̄kaowo akada ufọn ọsọk utom ukwọrọikọ ke akpa isua ikie?

¹⁴ Utom ukwọrọikọ ama ọbọ ufọn n̄ko oto mme ini ukeuke emem. Okposụkedi Jesus ekebemde iso etịn̄ nte enende ete ke ini mbiba ẹmi “idụt ayadaha an̄wana ye idụt,” mme ikpehe ini ẹmi mfịna mîkodụhe ẹma ẹdu emi akanamde ẹkeme ndinen̄ede n̄kwọrọ Obio Ubọn̄. (Matthew 24:7) Mme Christian akpa isua ikie ẹkedu ke idak Pax Romana, m̀mê Emem Rome. Ewetmbụk kiet ekewet ete: “Rome ama akan mbon Mediterranean ofụri ofụri tutu enye etre se ikekperede ndidi eyo ekọn̄ ofụri ini.” Idaha unana mfịna emi ama eberede usụn̄ ọnọ mme akpa Christian ndika isan̄ ke ukeuke emem ke ofụri Rome.

¹⁵ Obio Ukara Rome ama odomo ndidian mme owo ọtọkiet ke idak ọkpọsọn̄ ukara esie. Ikụreke ke ido emi ndikesịn udọn̄ nnọ ukaisan̄, ediyọ, ye edikpụhọ mme ekikere kpọt edi ama esịn udọn̄ n̄ko ọnọ ekikere itie nditọete ofụri ererimbot. N̄wed oro On the Road to Civilization ọdọhọ ete: “Edidianakiet eke Obio Ukara [Rome] ama anam an̄wautom [ukwọrọikọ Christian] ọfọn. Ẹma ẹmen mme adan̄a eke idụt ẹfep. Eyenisọn̄ Rome ekedi eyenisọn̄ ererimbot. . . . Akan oro, ido ukpono emi ekekpepde ke mme owo ẹdi nditọete ama ekeme ndin̄wan̄a owo ke idụt emi okosiode ekikere itie eyenisọn̄ ofụri ererimbot edi.”—Men Utom 10:34, 35; 1 Peter 2:17 domo.

16, 17. Nso inam ẹsịn ukeme ndisịn udọn̄ nnọ emem ke eyomfịn, ndien nso ubiere ke ediwak owo ẹsịm?

¹⁶ Nso kaban̄a eyo nnyịn? Ọyọhọ isua ikie 20 omokụt mme ekọn̄ oro ẹkamade nsobo ẹkan ke mbụk, ndien mme ekọn̄ eke ikpehe ke ikpehe ke aka iso ndin̄wana ke ndusụk idụt. (Ediyarade 6:4) Kpa ye oro, mme ikpehe ukeuke emem ẹmedu n̄ko. Mme akpan odudu ukara ererimbot in̄wanake ọyọhọ ọyọhọ ekọn̄ ye kiet eken ke se ibede isua 50. Idaha emi emenen̄ede an̄wam ke edikwọrọ eti mbụk ke mme idụt oro.

¹⁷ Ọkpọsọn̄ ndịk ekọn̄ ọyọhọ isua ikie 20 amanam ediwak owo ẹfiọk ufọn ukara ererimbot. Ndịk ekọn̄ ererimbot akada ekesịm editọn̄ọ Esop Ediomi Mme Idụt ye Edidiana Mme Idụt. (Ediyarade 13:14) Uduak oro esop mbiba ẹmi ẹtan̄ade edi edisịn udọn̄ nnọ edidianakiet ye emem ofụri ererimbot. Mme owo ẹmi ẹfiọkde utọ udọn̄ oro ẹsiwak ndinam n̄kpọ nte ọfọnde mban̄a eti mbụk ukara ererimbot oro edidade ata emem oro ebịghide edi—kpa Obio Ubọn̄ Abasi.

18. Nso edu aban̄ade ido ukpono ọfọn ye utom ukwọrọikọ?

¹⁸ Okposụkedi ẹkọbọde mme Christian ke enyene-ndịk usụn̄ ndusụk ini, akpa isua ikie ye ọyọhọ isua ikie 20 ẹma ẹnyene mme ini ẹkeyọde ido ukpono. (John 15:20; Utom 9:31) Mbon Rome ẹma ẹsida mme abasi mbon oro mmọ ẹkekande ẹnyene ẹnyụn̄ ẹkpụhọde ẹda ẹkekem ye mmọ. Prọfesọ Rodney Stark ekewet ete: “Ke ediwak ikpehe, Rome ama ọnọ akamba ifụre ido ukpono akan se ẹkefiakde ẹkụt ke Edinam Ukpụhọde ke America ama akada itie.” Ke eyomfịn, mme owo ke ediwak idụt ẹmenen̄ede ẹnyene in̄wan̄în̄wan̄ esịt ẹban̄a mme ekikere en̄wen, ye utịp edide nte ke mmọ ẹnyịme ndikpan̄ utọn̄ nnọ etop Bible oro Mme Ntiense Jehovah ẹdade ẹdi.

Udeme Ifiọk Ubotn̄kpọ

19. Didie ke mme akpa Christian ẹkeda n̄wed ẹnam n̄kpọ?

¹⁹ Ke akpatre, kere ban̄a nte Jehovah anamde ikọt esie ẹbọ ufọn ẹto mme n̄kọri ifiọk ubotn̄kpọ. Okposụkedi mme akpa Christian mîkodụhe uwem ke emana usọp usọp n̄kọri ifiọk ubotn̄kpọ, n̄kpọ kiet oro ẹkesiode ẹdi emi mmọ ẹkedade ẹnam n̄kpọ ekedi n̄wed, m̀mê n̄wed oro enyenede ikọn̄. N̄wed ama ada itie ndodobi ikpan̄wed. N̄wed oro The Birth of the Codex ọdọhọ ete: “Ke edide isio ye nte n̄wed akadade itie ikpan̄wed ke mme n̄wed ererimbot ata sụn̄sụn̄, etie nte mme Christian ndida n̄wed akada itie inikiet inikiet ye ke ofụri ererimbot.” N̄wed ndụn̄ọde emi ọdọhọ n̄ko ete: “Mme Christian ẹma ẹkama n̄wed ke ofụri ererimbot ke ọyọhọ isua ikie iba tutu anaedi ẹma ẹtọn̄ọ ndikama enye mbemiso 100 E.N.” N̄wed ama emem utom ndikama akan ikpan̄wed. Ẹma ẹkeme ndisọp n̄kụt itien̄wed Abasi. Emi ama enen̄ede an̄wam mme akpa Christian ẹmi, ukem nte Paul, mîkanamke N̄wed Abasi an̄wan̄a kpọt edi n̄ko ẹsọn̄ọde mme n̄kpọ oro mmọ ẹkekpepde ebe ke ‘ndibuen ikọ.’—Utom 17:2, 3.

20. Didie ke ikọt Abasi ẹda ifiọk ubotn̄kpọ eyomfịn ẹnam n̄kpọ ke utom ukwọrọikọ ofụri ererimbot, ndien ntak-a?

²⁰ N̄kọri ubotn̄kpọ ke isua ikie nnyịn ẹdi n̄wọrọnda. Mme edisọp ukwakutom umịn̄n̄wed ẹmen̄wam ẹkeme ndision̄o mme n̄wed Bible ke ukem ini ke ediwak usem. Ifiọk ubotn̄kpọ eyomfịn amanam utom edikabade Bible ọsọp. Moto mbiomo, tren, nsụn̄ikan̄, ye ubom ofụm ẹnam ẹkeme ndida mme n̄wed Bible n̄ka ofụri isọn̄ usọp usọp. Urụk ukopikọ ye mme ukwak unọ etop ẹmenam ẹkeme ndinyene nneme ke ebe oro. Ebede ke spirit esie, Jehovah omonụk mme asan̄autom esie ndida mme utọ ifiọk ubotn̄kpọ oro nsịn ke edinam man ẹsịn udọn̄ ẹnọ edisuan eti mbụk ke ofụri ererimbot. Mmọ idaha mme utọ n̄kpọ oro ẹsion̄ode ẹdi do inam n̄kpọ ke ntak udọn̄ ndifiọk nnyụn̄ nda se ededi oro edide ata obufa n̄kpọ ke ererimbot emi nnam n̄kpọ. Utu ke oro, akpa ye ata akpan udọn̄ mmọ edi se idin̄wamde mmọ ndinam utom ukwọrọikọ mmọ ata uforo uforo.

21. Nnyịn ikeme ndinyene mbuọtidem ke nso?

²¹ “Ẹyenyụn̄ ẹkwọrọ gospel Ubọn̄ Abasi emi ke ofụri ekondo,” ntre ke Jesus ekebem iso etịn̄. (Matthew 24:14) Kpa nte mme akpa Christian ẹkekụtde nte ntịn̄nnịm ikọ oro osude, nnyịn imokụt enye ke akwa udomo mfịn. Kpa ye oro utom oro okponde onyụn̄ ọsọn̄de, ke ini mfọnọn̄kpọ ye ke ini ndiọhọn̄kpọ, ke ufọt nsio nsio ibet ye edu, ke ini ekọn̄ ye emem, ye ke ufọt kpukpru orụk n̄kọri ifiọk ubotn̄kpọ, ẹma ẹkwọrọ ndien ke ẹkwọrọ eti mbụk. Ndi emi inamke uten̄e odoro fi kaban̄a ọniọn̄ ye ndyọ ndyọ edibem iso nda n̄kụt n̄kpọ eke Jehovah? Nnyịn imekeme nditịm nnịm nte ke ẹyekụre utom ukwọrọikọ nte ekemde ye ndutịm ini Jehovah ye nte ke ẹyenam ima ima uduak esie ẹma man ada edidiọn̄ ọsọk ndinen owo. Mmọ ẹyedi ẹdida isọn̄ ẹnyene ẹnyụn̄ ẹdụn̄ ke esịt ke nsinsi. (Psalm 37:29; Habakkuk 2:3) Edieke nnyịn idude uwem ke n̄kemuyo ye uduak Jehovah, nnyịn iyodu ke otu mmọ.—1 Timothy 4:16.

[Ikọ idakisọn̄]

Mme Akpan N̄kpọ Ndidụn̄ọde

◻ Ntak emi edikwọrọ eti mbụk edide utom emi akamade n̄kpọ-ata?

◻ Ke mme usụn̄ ewe ke utom Christian ọbọ ufọn oto mme ndutịm ukara ye ukeuke eti idaha n̄kaowo?

◻ Edidiọn̄ Jehovah ke utom ukwọrọikọ ọsọn̄ọ nso ọnọ nnyịn kaban̄a mme n̄kpọntịbe ini iso?