Enye Ama An̄wam Ndinọ Un̄wana “Tutu Esịm ke Utịt Ererimbot”
ẸMA ẹda apostle Paul ẹnọ un̄wana eke spirit “tutu esịm ke utịt ererimbot.” Nte utịp, ediwak “mmọ ẹmi ẹkenịmde ẹnọ nsinsi uwem ẹbuọt idem.”—Utom 13:47, 48; Isaiah 49:6.
Ẹma ẹkụt ọkpọsọn̄ udọn̄ ndinọ un̄wana eke spirit n̄ko ke uwem uyakidem nnọ ye ọkpọsọn̄ ukeme Christian oro William Lloyd Barry, owo Otu Ukara eke Mme Ntiense Jehovah. Brọda Barry ama akpa ke July 2, 1999, ke adan̄aemi ọkọnọde utịn̄ikọ ke mbono district oro enye ekenịmde ke Hawaii.
Lloyd Barry akamana ke New Zealand ke December 20, 1916. Eka ye ete esie ẹma ẹbabak ẹnyene ọkpọsọn̄ udọn̄ ke akpanikọ Bible oro ẹkenemede ke mme n̄wed C. T. Russell, ẹmi Watch Tower Bible and Tract Society akasuande. Ntem, Brọda Barry ọkọkọri okpon ke ubon Christian oro ekenyenede ifịk.
Okposụkedi ekenyenede udọn̄ ke mbre mbuba ye ubọ ukpep, idem enyenede n̄weditoro ufọkn̄wed ntaifiọk ke ukpepn̄kpọ ifiọk ntaifiọk, Brọda Barry ọkọsọn̄ọ owụk ntịn̄enyịn esie ke mme n̄kpọ eke spirit. Ntem, ke January 1, 1939, enye ama odụk utom uyọhọ ini, akabarede edi owo ufọk Bethel ke ọfis N̄ka ke Australia. Ke ukara ama okodori N̄ka ukpan ke 1941, Brọda Barry ama aka iso esịn ifịk ke utom ọfis, ndusụk ini ẹkesinọ enye utom ndiwet n̄kpọ man ẹda ẹsịn udọn̄ ẹnọ mme ekemmọ andinịm ke akpanikọ. Enye n̄ko ama enịm eti uwụtn̄kpọ ndausụn̄ ke an̄wan̄wa utom ukwọrọikọ.
Ke February 1942, Brọda Barry ama ọdọ asan̄autom uyọhọ ini efen. Edima n̄wan esie, Melba, amanam utom ke edinam akpanikọ ye enye ke ediwak isua ke ediwak ikpehe isọn̄. Mmọ ẹma ẹnam akpan usio-ukot ndika utom ke an̄wautom esenidụt ebe ke ndidụk Ufọkn̄wed Enyọn̄-Ukpeme Ukpep Bible eke Gilead ọyọhọ otu 11 ke United States. Efakutom mmọ ekedi se ediwak owo ẹkpedade nte “utịt ererimbot”—Japan. Ke ẹma ẹkebehe ke November 1949, mmọ ẹma ẹtọn̄ọ ndinam utom nte mme isụn̄utom ke Kobe edide obio esụkmbehe. Ke ini oro, owo 12 kpọt ẹkekwọrọ eti mbụk ke Japan. Brọda Barry ama ekpep usem ye ido obufa ebietidụn̄ esie onyụn̄ ọkọri ntotụn̄ọ ima ọnọ mbon Japan, emi enye akanamde utom ọtọkiet ke isua 25 oro ẹketienede. Ima esie kaban̄a mbon oro “ẹkenịmde ẹnọ nsinsi uwem” ekedi in̄wan̄în̄wan̄ ọnọ itie nditọete Christian oro okosụk ọkọride ke Japan, an̄wamde enye ndinyene uforo ke ndise enyịn ke n̄kọk itieutom oro ke ediwak iduọk isua.
Ke ufọt ufọt 1975, ke ini n̄kpọ nte Mme Ntiense 30,000 ẹkedude ke Japan, ẹma ẹnọ Barry ye n̄wan esie ẹka Brooklyn, New York. Nte Christian oro ẹyetde aran ke spirit, ẹma ẹkot Brọda Barry edinam utom nte owo Otu Ukara eke Mme Ntiense Jehovah. (Rome 8:16, 17) Mbufiọk uwetn̄wed esie ama enen̄ede enyene ufọn ke obufa utom esie ke Itieutom Uwetn̄wed. Ndien ntatara ifiọkutom aban̄ade n̄kọk itieutom ye eke mme idụt ama etịm enye idem nditịp n̄kpọ akamba akamba nsịn nte owo Kọmiti Usio N̄wed eke Otu Ukara.
Ke ediwak isua, Brọda Barry ama aka iso enyene ima ọnọ Edem Usiahautịn ye mme andito do. Nditọ ukpepn̄kpọ ke Ufọkn̄wed Gilead ọkọrọ ye mbonubon Bethel ẹma ẹkụt ẹte ke mme utịn̄ikọ ye mme ikọ esie ẹma ẹsisịne mme inem inem mbụk ẹban̄ade ediwak owo oro ẹkenamde utom ke utom isụn̄utom. Ẹma ẹsikụt in̄wan̄în̄wan̄ nte utom edikwọrọ Obio Ubọn̄ ke “utịt ererimbot” eketiede ke ini Brọda Barry okobụkde mme ifiọkutom esie ye nduaidem. Ẹbụk ndusụk ke otu ẹmi ke ọkpọkpọ mbụkutom esie ke Enyọn̄-Ukpeme (Ikọmbakara) eke September 15, 1960.
Nnyịn imodori enyịn ite ke nte ‘nsan̄a ada udeme ye Christ nnyene,’ Brọda Barry ayaka iso enyene udọn̄ ke idem mbon oro “ẹkenịmde ẹnọ nsinsi uwem.” Edi akpanikọ, kpukpru mbon oro ẹkediọn̄ọde ẹnyụn̄ ẹmade enye nte owo oro amade n̄kpọ eke spirit, emi ayakde idem ọnọ Jehovah ọyọhọ ọyọhọ onyụn̄ enyenede ufiop ufiop ima ọnọ ikọt Abasi ẹyetaba enye. Edi, nnyịn imadat esịt nte ke Brọda Barry ama ọyọ ke edinam akpanikọ tutu esịm utịt utom esie ke isọn̄.—Ediyarade 2:10.
[Ndise ke page 16]
Lloyd Barry ye John Barr ke ini ẹkesiode “Insight on the Scriptures” ke 1988
[Ndise ke page 16]
Mme andikụre ukpep ke ọyọhọ otu 11 eke Gilead, ẹsopde idem ke Japan ke isua 40 ẹma ẹkebe