Mme Mbụme Ẹtode Mme Andikot
Didie ke Mme Ntiense Jehovah ẹse edisịn n̄wed nnọ owo?
Ẹnọ mme in̄wan̄în̄wan̄ edumbet ẹwụtde ke Bible oro ẹn̄wamde mme asan̄autom Abasi ndinyene nnennen ekikere mban̄a n̄kpọ emi. Nte ededi, etie nte edumbet ndomokiet idụhe oro akpande edisịn n̄wed nnọ owo. Ke uwụtn̄kpọ, ntak ndomokiet idụhe emi otu mme eseutom mîkpanamke umenede ubọk man ẹsịm ubiere oro otụkde itieutom mmọ. Esop Mme Ntiense Jehovah ẹsiwak ndinam mme ubiere ẹban̄ade mme ini mbono esop ye nte ẹkpedade okụk esop ẹnam n̄kpọ ebe ke ndimenede ubọk.
Nte ededi, nso kaban̄a edisịn n̄wed nnọ owo ke umekowo eke ukaraidem? Edi akpanikọ, ke mme idụt oro ẹnyenede ukara mbio obio, se iwakde isịm mbahade 50 eke ikie ke otu ibatowo isiwọrọke ika ndisịn n̄wed nnọ owo ke usen umekowo. Amaedi Mme Ntiense Jehovah, mmọ inọhọke ke unen mbon en̄wen ndisịn n̄wed nnọ owo; mmọ inyụn̄ inamke ubịnikọt ke usụn̄ ekededi ibiọn̄ọ umekowo eke ukaraidem. Mmọ ẹkpono ẹnyụn̄ ẹbere ye ukara emi ẹmekde nte odotde ke mme utọ umekowo oro. (Rome 13:1-7) Amaedi se iban̄ade m̀mê mmọ ke idemmọ ẹyesịn n̄wed ẹnọ owo emi oyomde ẹmek imọ m̀mê idisịnke, owo kiet kiet ke otu Mme Ntiense Jehovah enyene ndinam ubiere esie ọkọn̄ọde ke ubieresịt oro ẹdade Bible ẹnọ ukpep ye ifiọk esie kaban̄a mbiomo oro enye enyenede ke iso Abasi ye Ukara. (Matthew 22:21; 1 Peter 3:16) Ke ndinam ọkpọkpọ ubiere emi, Mme Ntiense ẹsikere ẹban̄a ediwak n̄kpọ.
Akpa, Jesus Christ ama etịn̄ aban̄a mme anditiene enye ete: “Mmọ [idịghe] eke ererimbot, kpa nte Ami mmendịghe eke ererimbot.” (John 17:14) Mme Ntiense Jehovah ẹda edumbet emi ke ata akpan n̄kpọ. Sia “mîdịghe eke ererimbot,” mmọ ẹda san̄asan̄a ke mme mbubehe ukaraidem eke ererimbot emi.—John 18:36.
Udiana, apostle Paul ama etịn̄ aban̄a idemesie nte idide “isụn̄” emi adade ke ibuot Christ ọnọ mbon eyo esie. (Ephesus 6:20; 2 Corinth 5:20) Mme Ntiense Jehovah ẹnịm ke akpanikọ ẹte ke Christ Jesus idahaemi edi Edidem Obio Ubọn̄ Abasi eke heaven oro ẹma ẹkedori ke ebekpo, ndien ana mmọ, nte mme isụn̄utom, ẹtọt emi ẹnọ mme idụt. (Matthew 24:14; Ediyarade 11:15) Ẹsidori enyịn mme isụn̄utom ndida san̄asan̄a nnyụn̄ ntre ndinọhọ ke mme mbubehe idụt oro ẹnọde mmọ ẹka. Nte mme andida ke ibuot Obio Ubọn̄ Abasi eke heaven, Mme Ntiense Jehovah ẹkere ke inyene ukem mbiomo oro nditre ndinọhọ ke mbre ukara eke mme idụt ẹmi mmimọ idụn̄de ke esịt.
Ọyọhọ n̄kpọ ita ndikere mban̄a edi nte ke mbon oro ẹtienede ẹmek owo ẹsịn ke ọfis ẹkeme ndinyene nduduọhọ ke se enye anamde. (Men 1 Timothy 5:22, The New English Bible, domo.) Mme Christian ẹnyene nditịm n̄kere m̀mê mmimọ imoyom ndinyene nduduọhọ oro.
Ọyọhọ inan̄, Mme Ntiense Jehovah ẹda edidianakiet Christian mmọ ke ata ọsọn̄urua n̄kpọ. (Colossae 3:14) Ke ini mme ido ukpono ẹsịnde idem ke mbre ukara, utịp esiwak ndidi ubahade ke otu mme andibuana ke mmọ. Ke ndikpebe Jesus Christ, Mme Ntiense Jehovah ẹfep ndisịn idem ke mbre ukara ndien ke ntem ẹsọn̄ọde ẹmụm edidianakiet Christian mmọ ẹkama.—Matthew 12:25; John 6:15; 18:36, 37.
Ọyọhọ ition ye akpatre, ndifep ndisịn idem ke mbre ukara ọnọ Mme Ntiense Jehovah ifụre utịn̄ikọ ndida akpan etop Obio Ubọn̄ emi nsọk mme owo ẹdude ke kpukpru ndutịm ukaraidem.—Mme Hebrew 10:35.
Ke ẹkerede ẹban̄a mme edumbet N̄wed Abasi oro ẹwụtde ke enyọn̄ emi, ke ediwak idụt, Mme Ntiense Jehovah ẹsinam ọkpọkpọ ubiere nditre ndisịn n̄wed nnọ owo ke mme umekowo mbre ukara, ndien ibet idụt ọnọ ifụre oro mmọ ẹnyenede ndinam ubiere oro ibetedem. Nte ededi, nso edieke ibet oyomde mbio obio ẹsịn n̄wed ẹnọ owo? Ke utọ idaha oro, Ntiense kiet kiet enyene mbiomo ndinam ubiere ofụri esịt oro ọkọn̄ọde ke Bible kaban̄a nte ẹkpenamde n̄kpọ ke utọ idaha oro. Edieke owo ebierede ndika efe usịn n̄wed nnọ owo, oro edi ubiere esie. Se enye anamde ke efe usịn n̄wed nnọ owo edi ke ufọt esie ye Andibot enye.
Nsiondi Enyọn̄-Ukpeme (Ikọmbakara) eke November 15, 1950, ọkọdọhọ ke page 445 ye 446 ete: “Ke ebiet emi Caesar enyịkde-nyịk mbio obio ndisịn n̄wed nnọ owo . . . [Mme Ntiense] ẹkeme ndika itie usịn n̄wed nnọ owo ẹnyụn̄ ẹbe ẹdụk efe usịn n̄wed nnọ owo. Edi mi ke ẹyom mmọ ẹsịn idiọn̄ọ ke babru umekowo m̀mê ẹwet n̄kpọ ke se mmọ ẹdade ẹnọ. Mme andisịn n̄wed nnọ owo ẹsinam se mmọ ẹmade ye babru umekowo mmọ. Ntre edi mi ke iso Abasi ke ana mme ntiense esie ẹnam n̄kpọ ke n̄kemuyo ye mme ewụhọ esie ye nte ekemde ye mbuọtidem mmọ. Idịghe utom nnyịn nditeme mmọ se ẹkpenamde ye babru umekowo.”
Nso edieke ebe emi mînịmke ke akpanikọ eyịrede ete n̄wan imọ emi edide Christian ọwọrọ aka ekesịn n̄wed? Nte ededi, enye enyene ndisụk idem nnọ ebe esie, kpa nte mme Christian ẹsụkde idem ẹnọ mme ẹnyene-odudu ẹmi ẹkarade. (Ephesus 5:22; 1 Peter 2:13-17) Edieke enye okopde uyo ebe esie onyụn̄ akade efe usịn n̄wed nnọ owo, oro edi ọkpọkpọ ubiere esie. Owo ndomokiet ikpenyeneke ndikụt ndudue nnọ enye.—Men Rome 14:4 domo.
Nso kaban̄a idụt emi ibet mînyịkke-nyịk mme owo ndisịn n̄wed edi ẹsuade mbon ẹmi mîwọrọke ika efe usịn n̄wed nnọ owo—eyedi ẹsiode mmọ ẹnyan ẹnọ ata ata n̄kpọndịk? Mîdịghe nso edieke ẹnọde ọkpọsọn̄ ufen ke ndusụk usụn̄ ke edieke owo mîkaha efe usịn n̄wed nnọ owo ke adan̄aemi ibet mînyịkke mme owo ndisịn n̄wed nnọ owo? Ke mmọ ẹmi ye mme ukem idaha oro, Christian enyene ndinam ubiere idemesie. “Owo kiet kiet enyene ndibiom mbiomo idem esie.”—Galatia 6:5.
Odu mme owo ẹmi ẹkemede ndituak ukot nduọn̄ọ ke ini mmọ ẹkụtde ẹte ke ini umekowo ke idụt mmọ, ndusụk Mme Ntiense Jehovah ẹka efe usịn n̄wed nnọ owo ndien mbon eken ikaha. Mmọ ẹkeme ndidọhọ, ‘Mme Ntiense Jehovah inyeneke iwụk.’ Nte ededi, mme owo ẹkpenyene ndifiọk nte ke n̄kpọ aban̄ade ọkpọkpọ ubieresịt, utọ nte enye emi, Christian kiet kiet enyene ndinam ọkpọkpọ ubiere esie ke iso Jehovah Abasi.—Rome 14:12.
Se ededi ọkpọkpọ ubiere oro Mme Ntiense Jehovah ẹnamde ke ini ẹsobode nsio nsio idaha, mmọ ẹdu ke ukpeme man ẹmụm edida san̄asan̄a Christian ye ifụre utịn̄ikọ mmọ ẹkama. Ke kpukpru n̄kpọ, mmọ ẹberi edem ke Jehovah Abasi man ọsọn̄ọ mmọ idem, ọnọ mmọ eti ibuot, onyụn̄ an̄wam mmọ ẹfep ndikan̄ mbuọtidem mmọ ke usụn̄ ekededi. Ntem mmọ ẹwụt mbuọtidem ke mme ikọ andiwet psalm: “Afo [edi] akwa itiat mi ye edikon̄ ufọk mi; teme mi nsan̄a ke usụn̄, ndien, ban̄a enyịn̄ fo.”—Psalm 31:3.