“Ẹsan̄a Ẹkpere Abasi, Ndien Enye Ayasan̄a Ekpere Mbufo”
Mbemiso ye ke Ẹma Ẹkekpep Bible—Ikọ Abasi ke Anam Utom
EDIEKE afo okpokokụtde Tony ke ntọn̄ọ ntọn̄ọ isua uyen esie, afo okpokokụt ke enye ekedi eyeneren emi ekesisọn̄de ido onyụn̄ etiede afai afai, emi ekesiwakde ndika ndusụk ikpehe Sydney, Australia oro ẹwọrọde idiọk etop. Mme andibuana ke otu mme abiatibet ẹma ẹsịne ke otu mme ufan esie. Mmọ ẹma ẹsiwak ndibuana ke ndibụn̄ ufọk ndụk nyịp n̄kpọ, en̄wan otu mme abiatibet ye en̄wan utop ikan̄ ke efak.
Tony ọkọtọn̄ọ ndin̄wọn̄ sika ke edide isua usụkkiet. Etisịm isua 14, enye ama esin̄wọn̄ ikọn̄ekpo kpukpru ini onyụn̄ odu oburobụt uwem. Etisịm ini emi enye ekedide isua 16, enye ama enyene mbumehe uda heroin, ndien emi ama osụn̄ọ ke enye ndisida cocaine, LSD—“ke nditịm ntịn̄, n̄kpọ ekededi oro ekekemede ndinen̄ede nnam mi,” ntre ke Tony ọdọhọ. Ekem enye ama ọtọn̄ọ mbubehe unyam n̄kpọsọn̄ ibọk ye n̄ka iba oro ẹkewọrọde etop ke otu mme abiatibet. Ikebịghike ẹma ẹdidiọn̄ọ Tony nte kiet ke otu mme anyam n̄kpọsọn̄ ibọk oro ẹkekemede ndidep n̄kpọsọn̄ ibọk nto ini ekededi ke mbenesụk edem usiahautịn Australia.
Mbumehe uda heroin ye ikọn̄ekpo ekesitak Tony n̄kpọ nte $160 esịm $320 (U.S.) kpukpru usen. Edi ubon esie ama osobo se ikande oro. Enye ọdọhọ ete: “Mme abiatibet oro ẹkesidụn̄ọrede ẹyom n̄kpọsọn̄ ibọk ye okụk oro nnyịn inịmde ke okụre nnyịn, ẹma ẹsinyan mi ye n̄wan mi ikan̄ ye ikwa ke iso ke ediwak idaha.” Ke ẹma ẹkesịn enye ke ufọk-n̄kpọkọbi utịm ikata, ama ọdọn̄ Tony ndidụn̄ọde usụn̄ uwem esie.
Okposụkedi enye ekesikade ufọkabasi, Tony ikekemeke ndisan̄a n̄kpere Abasi oro ẹdọhọde nte esifọpde mme anamidiọk ke hell ke nsinsi nte usụn̄ ndinọ ufen. Nte ededi, ke ini owo iba ke otu Mme Ntiense Jehovah ẹkewahade ẹkese enye, idem ama akpa Tony ndifiọk nte ke Abasi itiehe ntre. Ndien Tony ama okop idatesịt nte ke imọ ke akpanikọ imekeme ndikpụhọde usụn̄ uwem imọ nnyụn̄ mbọ edidiọn̄ Abasi. Ikọ Jesus Christ emi ama onụk Tony ndinam n̄kpọ: “Abasi emekeme ndinam kpukpru n̄kpọ.” (Mark 10:27) Ikọ nsịnudọn̄ emi: “Ẹsan̄a ẹkpere Abasi, ndien Enye ayasan̄a ekpere mbufo,” ama enen̄ede otụk Tony.—James 4:8.
Idahaemi Tony ama osobo n̄kpọ-ata edinam uwem esie odu ke n̄kemuyo ye mme idaha Bible. Enye ọdọhọ ete: “Akpa n̄kpọ oro n̄ketrede ekedi edin̄wọn̄ sika, n̄kpọ oro mmen̄kekemeke nditre ke mbemiso, okposụkedi n̄kodomode ediwak ini. Ye odudu oro otode Jehovah, mma n̄keme nditre edida heroin ye ikọn̄ekpo, kpa mbumehe uda n̄kpọsọn̄ ibọk oro akakarade mi ke isua 15 emi ẹkebede. Akananam n̄kekereke ke nyekeme nditre mbumehe emi.”
Utu ke ndifehe Abasi emi esitụhọrede mme owo ke hell ke nsinsi—ukpepn̄kpọ emi mîdụhe ke itie ndomokiet ke Bible—Tony ye n̄wan esie ẹma ẹdi ẹdinyene idotenyịn edidu uwem nsinsi ke paradise isọn̄. (Psalm 37:10, 11; Mme N̄ke 2:21) Tony enyịme ete: “Ama ada ekese ini ye ọkpọsọn̄ utom ndinam uwem mi odu ke n̄kemuyo ye mme idaha Abasi, edi ye un̄wam Jehovah mmokụt unen.”
Ih, akani enyene-mbumehe uda n̄kpọsọn̄ ibọk emi ama akabade edi Christian. Enye ye n̄wan esie ẹnọ ini ye inyene mmọ ke ndisịn ediwak tọsịn hour ke utom unọ ukpep Bible. Mmọ n̄ko ke ẹnam utom ọkpọsọn̄ ndibọk nditọ iba oro ẹbakde Abasi. Odudu Ikọ Abasi oro n̄kpọ mîkemeke ndibiọn̄ọ, kpa Bible, akanam mmọ ẹnam akwa ukpụhọde emi. Ke akpanikọ, nte apostle Paul ọdọhọde, “ikọ Abasi enyene uwem onyụn̄ enyene odudu.”—Mme Hebrew 4:12, NW.
Kpa ye utọ nti uwụtn̄kpọ emi, ndusụk owo ẹtịn̄ nte mîdotke ẹte ke utom unọ ukpep Mme Ntiense Jehovah oro ọkọn̄ọde ke Bible mi abiat mme ubon onyụn̄ abiat nti edu ke idem n̄kparawa owo. Se itịbede inọ Tony owụt ke ikọ mmọ inenke.
Ukem nte Tony, ediwak owo ẹkụt nte ke ẹkeme ndikan akama-n̄kpa mbumehe. Didie? Ebe ke ndinyene mbuọtidem ke Abasi ndinyụn̄ mberi edem ke enye ye Ikọ esie, ọkọrọ ye un̄wam otode ekemmọ mme Christian oro ẹwụtde ima ye edikere mban̄a. Tony ke inemesịt eberi ete: “Mmokụt nte mme edumbet Bible ẹkpemede nditọ mi. Mme ukpepn̄kpọ Bible ẹnyan̄a ndọ mi. Ndien mme mbọhọidụn̄ mi ẹnen̄ede ẹkop inem idap idahaemi koro ami mmendịghe aba n̄kpọndịk nnọ mmọ.”
[Se Ẹwetde ke Ikpọ Abisi ke page 9]
‘Ke odudu Jehovah, mma n̄keme nditre mbumehe uda n̄kpọsọn̄ ibọk oro akakarade mi ke isua 15’
[Ekebe ke page 9]
Mme Edumbet Bible ke Ẹnam Utom
Nsio nsio edumbet Bible ẹn̄wam ediwak mme enyene-mbumehe uda n̄kpọsọn̄ ibọk nditre mbumehe oro abiatde nsọn̄idem mi. Ndusụk edumbet emi ẹdi emi:
“Ẹyak nnyịn iyet kpukpru se isabarede obụkidem ye spirit ifep ke idem nnyịn, inam nti ido nnyịn ẹfọn ẹma ke edibak Abasi.” (2 Corinth 7:1) Ndida n̄kpọsọn̄ ibọk atuaha ye ibet Abasi.
“Editọn̄ọ eti ibuot edi uten̄e Jehovah: ndien ndifiọk Ata Edisana onyụn̄ edi asian.” (Mme N̄ke 9:10) Uten̄e Jehovah emi ọkọn̄ọde ke nnennen ifiọk aban̄ade enye ye mme usụn̄ esie aman̄wam ediwak owo ndikịbe mbọhọ odudu n̄kpọsọn̄ ibọk.
“Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:5, 6) Ẹkeme nditre akama-nsobo mbumehe ebe ke ndinyene ọkpọsọn̄ mbuọtidem ke Abasi ye ọyọhọ ibetedem ke enye.