Ndinịm ke Abasi Oro Nnyịn Mîfiọkke Odu
IBA ke otu owo ita ke Germany ẹnịm ke Abasi odu. Edi, ke ini ẹkedọhọde se ibede owo tọsịn kiet ẹtịn̄ n̄kpọ ẹban̄a Abasi oro mmọ ẹnịmde ke akpanikọ, ekpere ndidi kpukpru owo ẹkenọ nsio nsio ibọrọ. N̄wedmbụk n̄kpọntịbe oro FOCUS ọtọt ete: “Ekikere oro mme owo ke Germany ẹnyenede ẹban̄a Abasi ẹdi nsio nsio ukem nte mme owo oro ke idemmọ.” Ke adan̄aemi ẹtorode edinịm ke akpanikọ oro nte ke Abasi odu, nte idịghe n̄kpọ mbọm ndinịm ke enye odu ye unana edifiọk utọ Abasi emi enye edide?
Eyịghe aban̄ade utọ owo emi Abasi edide idụhe ke Germany kpọt; enye odu ke mme ebiet en̄wen ke Europe. Ndụn̄ọde oro ẹkenamde ke Austria, Britain, ye Netherlands ama owụt ke ẹnyịme ntatara ntatara nte ke Abasi edi “n̄kokon̄ m̀mê ndedịbe odudu oro owo mîkemeke ndinam an̄wan̄a.” Enye edi se n̄kparawa owo akpan akpan, ye idem mbon oro ẹnịmde ke enye odu, mîkemeke ndinam an̄wan̄a.
Ndi Afo ke Idemfo Ọmọfiọk Abasi?
Akamba ukpụhọde odu ke ndifiọk n̄kpọ mban̄a owo ye ndidiọn̄ọ owo oro ke idemfo. Ndifiọk n̄kpọ mban̄a owo—edidem emi odude oyom usụn̄, ata ebre mbre mbuba, m̀mê ata ebre mbre senima—edi ndikam mfiọk nte ke enye odu. Nte ededi, ndidiọn̄ọ owo ke idemfo esịne se ikande oro. Enye abuana ndimehe ye edu, ido, usụn̄ ukere n̄kpọ, se owo oro amade ye se enye asuade, ye mme uduak esie kaban̄a ini iso. Ndidiọn̄ọ owo ke idemfo eberede usụn̄ ọnọ edinyene n̄kpet n̄kpet itie ebuana ye enye.
Ediwak tọsịn owo ẹbiere ẹte ke ndinyene esisịt ifiọk mban̄a Abasi—m̀mê ikpîkpu edifiọk ke enye odu—ikemke. Mmọ ẹsịn ukeme ndifiọk Abasi ọfọn. Ndi mmọ ẹbọ ufọn ẹto emi? Eren kiet emi ekerede Paul, emi odụn̄de ke edem edere Germany, emi ini kiet ko ekenyenede ekikere oro ediwak owo ẹnyenede ẹban̄a Abasi, ama ebiere nditịm mmehe ye Enye ke idemesie. Paul anam an̄wan̄a ete: “Ndifiọk Abasi ọfọn ada ini ye ukeme, edi mme ufọn ẹnen̄ede ẹwak. Ndinyene n̄kpet n̄kpet itie ebuana ye Andibot anam uwem eke usen ke usen ọfọn akan.”
Ndi ini ye ukeme oro ẹyomde man ẹfiọk Abasi ọfọn, ẹnyene ufọn? Mbọk kot ibuotikọ oro etienede.
[Se Ẹwetde ke Ikpọ Abisi ke page 3]
Akamba ukpụhọde odu ke ndifiọk n̄kpọ mban̄a owo ye ndidiọn̄ọ enye ke idemfo