“Ẹsan̄a Ẹkpere Abasi, Ndien Enye Ayasan̄a Ekpere Mbufo”
Mbemiso ye Ke Ama Ekekpep Bible—Uwem Esie Ama Okpụhọde
UWEM Matsepang ọkọdiọk onyụn̄ anana uduak didie ntem! Enye ekedi ekpri n̄kaiferi ke Lesotho, idụt oro odude ke ufọt ufọt Edem Usụk Africa. Ẹkebọk Matsepang nte owo Catholic. Utu ke ndinam enye asan̄a ekpere Abasi, nte ededi, mme nun ẹma ẹsabade enye ke ediwak isua ebe ndida okụk ntap enye nsịn ke mme oburobụt edinam.
Nte utịp, Matsepang ikenyeneke udọn̄ ke ido ukpono ikonyụn̄ ikemeke ndinịm ke akpanikọ nte ke ima ima Andibot emi enen̄erede ekere aban̄a edibotn̄kpọ esie edide owo, odu. Ke ntak ẹkefụmide ẹnyụn̄ ẹsabarede enye, Matsepang ama enyene akamba unan eke ntụk onyụn̄ ekere ke imọ iwọrọke n̄kpọ. Enye ama akabade etie afai afai ye ibak ibak. Emi ama osụn̄ọ ke enye ndidu uwem ubiat ibet.
Ke akpatre, Matsepang ama odụk n̄ka inọ oro ẹkesiwode mme owo ke tren. Ẹma ẹmụm enye ẹnyụn̄ ẹbiere n̄kpọkọbi ẹnọ enye ke South Africa. Ke ukperedem, ẹma ẹnọ enye afiak ọnyọn̄ Lesotho, obio emana esie, emi enye akakade iso ke uwem ubiatibet, ukpammịn, afai ye oburobụt ido esie.
Ke ini Matsepang ekenen̄erede okop mfụhọ, enye ama ọbọn̄ akam ke mbrenyịn ọnọ Abasi oyom un̄wam. Enye ama ọn̄wọn̄ọ ete, “Abasi, edieke mbọhọde, nyanam se n̄kemede man nnam n̄kpọ fo.”
Ikebịghike, mme isụn̄utom ẹdide Mme Ntiense Jehovah ẹma ẹsobo ye Matsepang. Mmọ ẹma ẹnyịme nditọn̄ọ ukpepn̄kpọ Bible ye enye. Ebede ke ukpepn̄kpọ esie, enye ama edifiọk nte ke Abasi enyene udọn̄ onyụn̄ ekere aban̄a mme owo. Ke akpanikọ, enye ama edifiọk ke Satan, “ete nsu,” esida n̄kari n̄kari ye abian̄a abian̄a usụn̄ unam n̄kpọ ndinam ndusụk owo ẹkere nte ke mmimọ iwọrọke n̄kpọ ndinyụn̄ nnam mmọ ẹnịm nte ke Jehovah ikemeke ndima mmimọ tutu amama.—John 8:44; Ephesus 6:11.
Ke edide isio, Matsepang okokop ndọn̄esịt didie ntem ke ini enye ekedide edifiọk ke nnyịn imekeme ndinyene ukpono idemowo edieke nnyịn ikabarede esịt ikpọn̄ idiọkn̄kpọ oro ikanamde, iyomde Abasi efen ọnọ nnyịn, inyụn̄ idomode ndinem enye esịt! Ẹma ẹn̄wam enye ọfiọk nte ke “Abasi okpon akan esịt nnyịn” esinyụn̄ ese nnyịn ke usụn̄ oro enen̄erede okpụhọde ye nte nnyịn isede idem nnyịn.—1 John 3: 19, 20.
Matsepang ama okop nduaidem ndikot mme ikọ David andiwet psalm: “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.” (Psalm 34:18) Nte kiet ke otu mbon oro “esịt ọduọde,” enye ama edifiọk ke Jehovah isikpọn̄ke ikọt esie, idem ọkpọkọm ndusụk mmọ ẹkop mfụhọ mîdịghe ẹkere ke mmimọ iwọrọke n̄kpọ. Enye ama okop ndọn̄esịt ndifiọk nte ke Abasi ekere aban̄a kpukpru erọn̄ esie esinyụn̄ omụm mmọ akama ke ini nsọn̄ọn̄kpọ. (Psalm 55:22; 1 Peter 5:6, 7) Mme ikọ emi ẹma ẹnen̄ede ẹtụk enye: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.
Ẹma ẹsọp ẹkụt odudu Ikọ Abasi kpa Bible ke uwem Matsepang. Enye ama ọtọn̄ọ ndidụk mme mbono esop Christian kpukpru ini onyụn̄ ọkpọn̄ mme edinam esie oro mîkekemke ye N̄wed Abasi. Nso ikedi utịp? Enye ikereke aba ke imọ idotke ndibọ ima ye mfọn Abasi. Ọtọn̄ọde ke ini oro enye akanade baptism nte kiet ke otu Mme Ntiense Jehovah, enye emesịn ediwak tọsịn hour ke utom ukwọrọikọ Christian nte anditan̄a eti mbụk Obio Ubọn̄. Kpa ye unan eke ntụk oro enye akadade oto akani usụn̄ uwem esie, idahaemi Matsepang odu inem uwem oro enyenede uduak. Nso odudu ke Bible enyene ntem ndifori uwem mme owo!—Mme Hebrew 4:12.
[Se Ẹwetde ke Ikpọ Abisi ke page 9]
“Abasi, edieke mbọhọde, nyanam se n̄kemede man nnam n̄kpọ fo”
[Ekebe ke page 9]
Mme Edumbet Bible ke Ẹnam Utom
Mme edumbet Bible oro ẹkamade ndọn̄esịt ẹnọ mbon oro ẹnamde n̄kpọ ye mmọ ke idiọk usụn̄ ẹsịne se itienede mi:
“Ke uwak ekikere emi odude mi ke esịt ndọn̄esịt [Abasi] enem mi esịt.” (Psalm 94:19) “Ndọn̄esịt” Jehovah oro ẹkụtde ke Ikọ esie enyene akwa ufọn. Nditie n̄kere mban̄a mmọ ke akam an̄wam ndisụhọde uwak ekikere onyụn̄ anam nnyịn inyene mbuọtidem ke Abasi nte Ufan oro ekerede aban̄a nnyịn.
“[Jehovah] ọkọk mmọ eke esịt mmọ anuahade, onyụn̄ ofụk mmọ unan.” (Psalm 147:3) Edieke nnyịn iwụtde esịtekọm inọ mbọm ye ndutịm oro Jehovah anamde ndida uwa ufak Jesus mfụk mme idiọkn̄kpọ nnyịn, nnyịn imekeme ndibọn̄ akam nnọ Jehovah ye mbuọtidem ye unana edika iso mbiom esịt nnyịn ikpe. Emi ekeme ndida anana-mbiet ndọn̄esịt ye ifụre ekikere ndi.
“Baba owo kiet ikemeke nditiene Mi [Jesus Christ], ibọhọke Ete emi ọkọdọn̄de Mi odụri enye edi: ndien nyanam enye eset ke akpatre usen.” (John 6:44) Ebede ke edisana spirit esie ye utom ukwọrọikọ Obio Ubọn̄, Jehovah ke idemesie odụri nnyịn ọsọk Eyen esie onyụn̄ ọnọ nnyịn idotenyịn nsinsi uwem.