Mme Uyen—Jehovah Idifreke Utom Mbufo!
“Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.”—MME HEBREW 6:10.
1. Didie ke n̄wed Mme Hebrew ye Malachi eke Bible ẹwụt ke Jehovah owụt esịtekọm aban̄a utom fo?
NTE akanam afo ọmọfọn ufan fo kiet mfọn ndien ekem enye etre ndiwụt esịtekọm? Ekeme ndinen̄ede mbiak owo ke ini ẹdade edinam mfọnido esie mfefere mfefere, mîdịghe ke ọdiọkde akan, ẹfrede ẹban̄a enye ofụri ofụri. Nte ededi, emi okpụhọde didie ntem ke ini inamde utom ofụri esịt inọ Jehovah! Bible ọdọhọ ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.” (Mme Hebrew 6:10) Kere se oro ọwọrọde. Ke akpanikọ, Jehovah akpabat ke imọ imanam ukwan̄n̄kpọ—idiọkn̄kpọ—edieke imọ ifrede se afo akanamde ye se afo osụk anamde ke utom esie. Nso utọ owụt-esịtekọm Abasi ke enye edi ntem!—Malachi 3:10.
2. Nso inam edinam n̄kpọ Jehovah enen̄ede edi san̄asan̄a ifet?
2 Afo ndituak ibuot nnyụn̄ nnam n̄kpọ Abasi oro owụtde esịtekọm mi edi san̄asan̄a ifet. Sia edide n̄kpọ nte ekemmọ mme andinịm ke akpanikọ miliọn itiokiet kpọt ẹdu ke ẹmende ẹdomo ye n̄kpọ nte owo biliọn itiokiet oro ẹdude ke ofụri ererimbot, ifet oro afo enyenede edi ọsọn̄urua ifet. N̄ko-n̄ko, afo ndikpan̄ utọn̄ nnyụn̄ nnam n̄kpọ mban̄a etop eti mbụk edi uyarade nte ke Jehovah enyene ọkpọkpọ udọn̄ ke idem fo. Kamse, Jesus ọkọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Ih, Jehovah esin̄wam owo kiet kiet ndibọ ufọn nto uwa Christ.
Ndiwụt Esịtekọm Mban̄a Akwa Ifet Fo
3. Didie ke nditọ Korah ẹkewụt esịtekọm ẹban̄a akwa ifet oro mmọ ẹkenyenede ndinam n̄kpọ Jehovah?
3 Nte ẹkenemede ke ibuotikọ oro ekebemde iso, afo odu ke n̄wọrọnda idaha ndinam esịt Jehovah adat. (Mme N̄ke 27:11) Emi edi n̄kpọ oro afo mûkpudaha mfefere mfefere. Ke kiet ke otu mme psalm mmọ eke odudu spirit, nditọ Korah ẹma ẹwụt esịtekọm ẹban̄a akwa ifet oro mmọ ẹkenyenede ndinam n̄kpọ Jehovah. Nnyịn ikot ite: “Usen kiet ke okụre fo ọmọfọn akan tọsịn. Mmemek ndida ke asan̄udọk ke ufọk Abasi mi, akan ndidụn̄ ke mme tent mme oburobụt owo.”—Psalm 84:10.
4. (a) Nso ikeme ndinam ndusụk owo ẹbat ke ndituak ibuot nnọ Jehovah etie ukpan ukpan? (b) Ke nso usụn̄ ke Jehovah owụt ke imọ imenyene ọkpọsọn̄ udọn̄ ndise nnyụn̄ nnọ mme asan̄autom imọ utịp?
4 Nte oro edi usụn̄ emi afo adade akwa ifet oro afo enyenede ndinam n̄kpọ Ete fo eke heaven? Nte ẹnyịmede, ke ndusụk idaha ndituak ibuot nnọ Jehovah ekeme nditie nte iyakke fi enyene ifụre oro afo ekpenyenede. Edi akpanikọ nte ke ndidu uwem nte ekemde ye mme edumbet Bible oyom ndusụk udomo n̄waidem. Nte ededi, ke akpatre, se ededi oro Abasi oyomde oto fi edidi ke ufọn fo. (Psalm 1:1-3) Ke adianade do, Jehovah okụt ukeme fo onyụn̄ owụt esịtekọm aban̄a edinam akpanikọ fo. Ke akpanikọ, Paul ama ewet ete ke Jehovah “edi Andinọ mmọ emi ẹyomde Enye utịp.” (Mme Hebrew 11:6) Jehovah oyoyom ifet ndinam emi. Edinen prọfet kiet ke Israel eset ọkọdọhọ ete: “Enyịn Jehovah [ẹsasan̄a] ke ofụri ererimbot, ete isọn̄ọ imụm mmọ eke ofụri esịt mmọ ẹdude ye enye ikama.”—2 Chronicles 16:9.
5. (a) Nso idi kiet ke otu mfọnn̄kan usụn̄ oro afo ekemede ndiwụt ke ofụri esịt imọ odu ye Jehovah? (b) Ntak nditịn̄ nnọ mbon en̄wen mban̄a se afo enịmde ke akpanikọ ekemede nditie nte ọkpọsọn̄ n̄kpọ?
5 Kiet ke otu mfọnn̄kan usụn̄ oro afo ekemede ndiwụt ke ofụri esịt fo odu ye Jehovah edi nditịn̄ mban̄a enye nnọ mbon en̄wen. Nte akanam afo emenyene ifet ndineme se afo enịmde ke akpanikọ ye ndusụk nsan̄a ufọkn̄wed fo? Ke akpa, ekeme nditie nte ke udûnyeneke uko unam emi, ndien ndikekere mban̄a emi ekeme ndinam fi okop ekpri ndịk. Afo emekeme ndibụp, ‘nso edieke mmọ ẹsakde mi?’ ‘Nso edieke mmọ ẹkerede ke ido ukpono mi etie esen esen?’ Jesus ama enyịme ete ke idịghe kpukpru owo ẹdikpan̄ utọn̄ ke etop Obio Ubọn̄. (John 15:20) Nte ededi, emi iwọrọke ite ke ẹyesak fi kpukpru ini. Ke edide isio, ediwak Ntiense ẹdide uyen ẹmekụt mbon emi ẹnọde n̄kpan̄utọn̄ ndien mme ubọkn̄ka mmọ ẹsinen̄ede ẹkpono mmọ ke mmọ ndisọn̄ọ nda nnọ se mmọ ẹnịmde ke akpanikọ.
“Jehovah Ayan̄wam Fi”
6, 7. (a) Didie ke n̄kaiferi isua 17 ekekeme ndinọ mme nsan̄a ubet ukpepn̄kpọ esie ikọ ntiense? (b) Nso ke afo ekpep oto ifiọkutom Jennifer?
6 Edi didie ke afo ekeme ndida uko ntịn̄ mban̄a se afo enịmde ke akpanikọ? Ntak mûbiereke nditịn̄ akpanikọ nnyụn̄ ntie in̄wan̄-in̄wan̄ ke ini mme owo ẹbụpde fi ẹban̄a ido ukpono fo? Kere ban̄a ifiọkutom Jennifer emi edide isua 17. Enye ọdọhọ ete: “N̄kadia udia uwemeyo ke ufọkn̄wed. Nditọiban oro ẹketiede ke okpokoro ye ami ẹma ẹtọn̄ọ ndineme mban̄a ido ukpono, ndien kiet ke otu nditọiban oro ama obụp m̀mê ewe ido ukpono ke ami ndụk.” Nte Jennifer ama okop nyekidem ndinọ ibọrọ? Enye enyịme ete: “Ih mma n̄kop, koro n̄ketịmke mfiọk nte mmọ ẹdinamde n̄kpọ ẹban̄a ibọrọ mi.” Ntre nso ke Jennifer akanam? Enye aka iso ete: “Mma ndọhọ nditọiban oro ke ndi kiet ke otu Mme Ntiense Jehovah. Ke akpa, mmọ ẹma ẹkop n̄kpaidem. Nte an̄wan̄ade, mmọ ẹkekere ke Mme Ntiense Jehovah ẹdi esen esen mme owo. Emi ama onụk mmọ ndibụp mi mme mbụme, ndien mma n̄keme ndinen̄ede ndusụk ukwan̄ ekikere oro mmọ ẹkenyenede. Idem ke usen oro ebede, ndusụk ke otu nditọiban oro ẹma ẹsidi ẹdibụp mi mbụme ke ini ke ini.”
7 Nte Jennifer ama atua n̄kpọfiọk ndikada ifet oro ntịn̄ mban̄a mme edinịm ke akpanikọ esie? Baba-o! Enye ọdọhọ ete: “Mma nnen̄ede n̄kop inemesịt mban̄a emi ke ini udia uwemeyo ama ekebe. Idahaemi nditọiban oro ẹnyene ekikere oro ọfọnde akan ẹban̄a mbon emi Mme Ntiense Jehovah ẹnen̄erede ẹdi.” Item Jennifer idahaemi ana in̄wan̄-in̄wan̄: “Edieke ọsọn̄de fi ndinọ mme nsan̄a ubet ukpepn̄kpọ m̀mê mme andikpep fo ikọ ntiense, bọn̄ ibio ibio akam. Jehovah ayan̄wam fi. Afo oyokop idatesịt nte ke ama ada ifet oro ekebererede anam n̄kpọ nte ọfọnde ke ndinọ ikọ ntiense.”—1 Peter 3:15.
8. (a) Didie ke akam akan̄wam Nehemiah ke ini enye okosobode idaha oro enye mîkodorike enyịn? (b) Mme idaha ewe ke ufọkn̄wed ẹkeme ndiyom afo ọbọn̄ ibio ibio akam ke ndopuyo ọnọ Jehovah?
8 Tịm fiọk ete ke Jennifer eteme ete ‘ọbọn̄ ibio ibio akam’ ọnọ Jehovah ke ini ifet ebererede afo ndinọ ikọ ntiense mban̄a se afo enịmde ke akpanikọ. Emi edi ukem ukem se Nehemiah, andikama cup Artaxerxes edidem Persia, akanamde ke ini enye okosobode idaha oro enye mîkodorike enyịn. Nehemiah ama ofụhọ koro enye okokopde aban̄a idiọk idaha mme Jew okonyụn̄ okopde ke ibibene ye inuaotop Jerusalem ẹma ẹwụre. Edidem ama okụt ke etie nte Nehemiah odu ke editịmede esịt, ntre enye ama obụp Nehemiah se ikedide ntak. Mbemiso ọnọde ibọrọ, Nehemiah ama ọbọn̄ akam oyom ndausụn̄. Ekem enye uko uko ama eben̄e ete ẹyak imọ ika Jerusalem man ikan̄wam ke ndifiak mbọp obio oro ama ọkọduọ do. Artaxerxes ama enyịme eben̄e Nehemiah. (Nehemiah 2:1-8) Nso ke afo ekpep oto emi? Edieke idem enyekde fi ke ini ifet ebererede afo ndinọ ikọ ntiense mban̄a se afo enịmde ke akpanikọ, kûtre ndibọn̄ akam ke ndopuyo. Peter ekewet ete: “Ẹtop kpukpru ọkpọsọn̄ ekikere eke ẹtịmerede mbufo esịt ẹduọk ẹdori [Jehovah], koro Enye ke ekere mbufo.”—1 Peter 5:7; Psalm 55:22.
“Ẹben̄e Idem Ndibọrọ”
9. Didie ke Leah emi edide isua 13 ekekeme ndinịm n̄wed oro N̄kparawa Owo Ẹbụp, idem 23?
9 Kere ban̄a ifiọkutom efen. Leah, emi edide isua 13, okokot n̄wed oro Mme Mbụme N̄kparawa Owo Ẹbụpde—Mme Ibọrọ Ẹnyenede Ufọna ke ufọkn̄wed ke ini udia uwemeyo. Enye ọdọhọ ete: “Mbon en̄wen ke ẹkese mi, ndien ke mîbịghike otuowo ẹma ẹkanade mi ẹkụk. Mmọ ẹma ẹtọn̄ọ ndibụp se n̄wed oro aban̄ade.” Etisịm utịt usen oro, nditọiban inan̄ ẹma ẹbọ Leah n̄wed oro N̄kparawa Owo Ẹbụp idem kiet kiet. Ikebịghike nditọiban emi ẹma ẹbuana n̄wed oro ye mbon en̄wen, ndien mbon emi n̄ko ẹma ẹyom n̄wed emi eke mmọ. Ke urua ifan̄ oro ẹketienede, Leah ama enịm n̄wed oro N̄kparawa Owo Ẹbụp idem 23 ọnọ mme nsan̄a ufọkn̄wed esie ye mme ufan mmọ. Nte ama emem Leah nditịn̄ ikọ ke ini mbon en̄wen ke akpa ini ẹkebụpde ẹban̄a n̄wed emi enye okokotde? Ke akpanikọ ikememke! Enye enyịme ete: “Ke akpa, idem ama enyek mi. Nte ededi, mma mbọn̄ akam, ndien mma mfiọk ke Jehovah odu ye ami.”
10, 11. Didie ke ekpri eyenan̄wan Israel ekekeme ndin̄wam akwa owoekọn̄ Syria ndikpep mban̄a Jehovah, ndien mme ukpụhọde ewe ke enye akanam ke oro ebede?
10 Ifiọkutom Leah ekeme ndinam fi eti ukem idaha emi ekpri eyenan̄wan Israel, emi ẹkedade ẹka ntan̄mfep ke Syria, okosobode. Naaman, akwa owoekọn̄ Syria, ama ọdọn̄ọ akpamfia. Ekeme ndidi n̄wan esie ọkọtọn̄ọ nneme emi akanamde ekpri eyenan̄wan emi etịn̄ aban̄a se enye enịmde ke akpanikọ. Enye ọkọdọhọ ete: “Ete mi akpakam odu ke iso prophet emi odude ke Samaria! enye akpanam ndien akpa-mfia okụre enye.”—2 Ndidem 5:1-3.
11 Nte utịp uko ekpri eyenan̄wan emi, Naaman ama edi edifiọk “nte ke baba Abasi ndomokiet idụhe ke ofụri ererimbot, ke mîbọhọke ke Israel.” Enye ama akam ebiere ete ke imọ “[idiwaha] aba edifọp uwa ye uwa ekọm inọ Abasi efen, ke mîbọhọke Jehovah.” (2 Ndidem 5:15, 17) Ke akpanikọ, Jehovah ama ọdiọn̄ uko ekpri eyenan̄wan oro. Enye ekeme, ndien ayanam ntre ye mme uyen mfịn. Leah ama okụt nte oro edide akpanikọ. Nte ini akakade, ndusụk nsan̄a ufọkn̄wed esie ẹma ẹka ẹbịne enye ẹkedọhọ ke n̄wed oro N̄kparawa Owo Ẹbụp an̄wam mmimọ ke edu uwem mmimọ. Leah ọdọhọ ete: “Mma n̄kop idatesịt, koro mma mfiọk nte ke mma n̄n̄wam mbon en̄wen ndikpep n̄kpọ efen efen mban̄a Jehovah nnyụn̄ n̄kpụhọde uwem mmọ.”
12. Didie ke afo ekeme ndinyene uko nditịn̄ mban̄a se afo enịmde ke akpanikọ?
12 Afo emekeme ndinyene ifiọkutom ebietde eke Jennifer ye Leah. Tiene item Peter, oro enye ekewetde ete ke kpukpru ini afo nte Christian ekpenyene ‘ndiben̄e idem ndibọrọ kpukpru owo eke ẹdibụpde [fi] ntak idotenyịn emi [afo] enyenede; edi ekpeme ndibọrọ ke sụn̄-sụn̄ ido ye ke ido uten̄e.’ (1 Peter 3:15) Didie ke afo ekeme ndinam oro? Kpebe uwụtn̄kpọ mme Christian akpa isua ikie oro ẹkebọn̄de akam ẹnọ Jehovah ẹte an̄wam mmimọ ikwọrọ ikọ “ke ofụri uko.” (Utom 4:29) Ekem nyene uko nditịn̄ nnọ mbon en̄wen mban̄a se afo enịmde ke akpanikọ. Idem ekeme ndikpa fi mban̄a utịp emi afo enyenede. Akan oro, afo ayanam esịt Jehovah adat.
Mme Vidio ye Mme Utom Ufọkn̄wed
13. Mme ifet ewe ke ndusụk mme uyen ẹkeda ndinọ ikọ ntiense? (Se mme ekebe oro ẹdude ke page 20 ye 21.)
13 Ediwak uyen ẹmeda mme vidio ẹnam se mmọ ẹnịmde ke akpanikọ an̄wan̄a mme nsan̄a ufọkn̄wed m̀mê mme andikpep mmọ. Ke ndusụk idaha, mme utom ufọkn̄wed oro ẹkenọde mmọ ẹma ẹnọ ifet n̄ko nditoro Jehovah. Ke uwụtn̄kpọ, ẹma ẹnọ nditọiren iba ẹdide isua 15 ẹnyụn̄ ẹdide Mme Ntiense Jehovah, utom ufọkn̄wed ke ukpepn̄kpọ mbụkeset ererimbot, ndiwet mban̄a kiet ke otu ido ukpono ererimbot. Mmọ mbiba ẹma ẹdiana kiet ẹwet ẹban̄a Mme Ntiense Jehovah, ẹdade n̄kpọ ẹto n̄wed oro Jehovah’s Witnesses—Proclaimers of God’s Kingdom.b Ẹma ẹnọ mmọ ifet n̄ko nditịn̄ ikọ ke minit ition. Ke oro ebede, andikpep ye nditọ ufọkn̄wed ẹma ẹnyene ata ediwak mbụme emi akanamde nditọiren oro ẹka iso ke nneme mmọ ye otu nditọ ukpepn̄kpọ oro ke minit 20 efen. Ediwak urua ke oro ebede, mme nsan̄a ubet ukpepn̄kpọ mmọ ẹma ẹka iso ndibụp mbụme mban̄a Mme Ntiense Jehovah!
14, 15. (a) Ntak emi ndịk owo edide afia? (b) Ntak emi afo ekpenyenede uko ndibuana se afo enịmde ke akpanikọ ye mbon en̄wen?
14 Nte mme ifiọkutom oro ẹnemede ke enyọn̄ emi ẹwụtde, afo emekeme ndinyene ikpọ edidiọn̄ ke nditịn̄ nnọ mbon en̄wen mban̄a se afo enịmde ke akpanikọ nte kiet ke otu Mme Ntiense Jehovah. Kûyak ndịk owo anam fi ataba akwa ifet ye idatesịt eke edin̄wam mbon en̄wen ẹdi ẹdidiọn̄ọ Jehovah. Bible ọdọhọ ete: “Uten̄e owo ọkọk afia enịm: edi ẹda owo eke ọbuọtde idem esie ye Jehovah ẹmenede enye ẹnịm ke enyọn̄.”—Mme N̄ke 29:25.
15 Nte uyen Christian, ti ete ke afo emenyene n̄kpọ oro mme ubọkn̄ka fo ẹnen̄erede ẹyom—mfọnn̄kan usụn̄ uwem idahaemi ye un̄wọn̄ọ nsinsi uwem ke ini iso. (1 Timothy 4:8) Nte enemde, ke United States—oro afo ekemede ndikere ke mme owo do inyeneke udọn̄ mîdịghe ẹtak ke ndikere n̄kpọ ererimbot—ndụn̄ọde kiet ama owụt ete ke nsụhọde n̄kaha mbahade iba ke otu mme uyen ẹda ido ukpono ke akpan n̄kpọ, ndien mbahade kiet ke itie ita ẹdọhọ ẹte ke mme edinịm ke akpanikọ ido ukpono ‘ẹtụk uwem mmimọ ẹkan.’ Eyedi idaha emi edi ukem ke ediwak ikpehe en̄wen ke ererimbot. Do, ekeme ndidi mme ubọkn̄ka fo ke ufọkn̄wed ẹyekop idatesịt ndikpan̄ utọn̄ nnọ se afo enyenede nditịn̄ mban̄a Bible.
Nte Uyen, San̄a Kpere Jehovah
16. Ke ẹsiode editịn̄ mban̄a enye nnọ mbon en̄wen ẹfep, nso ibuana ke ndidat Jehovah esịt?
16 Nte ededi, ndinam esịt Jehovah adat abuana se ikande sụk editịn̄ mban̄a enye. Oyom afo n̄ko odu uwem ekekem ye mme idaha esie. Apostle John ekewet ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.” (1 John 5:3) Afo oyokụt nte emi edide akpanikọ edieke afo asan̄ade ekpere Jehovah. Didie ke afo ekeme ndinam oro?
17. Didie ke afo ekeme ndisan̄a n̄kpere Jehovah?
17 Da ini kot Bible ye mme n̄wed ẹkọn̄ọde ke Bible. Adan̄a nte afo ekpepde aban̄a Jehovah, ntre ke edimem fi ndisụk ibuọt nnọ enye nnyụn̄ ntịn̄ mban̄a enye nnọ mbon en̄wen. Jesus ọkọdọhọ ete: “Eti owo osion̄o se ifọnde ke nti n̄kpọ eke enye okobonde ke esịt esie; koro oto ke uyọhọ esịt ndien inua etịn̄.” (Luke 6:45) Ntre, dọn̄ nti n̄kpọ yọhọ esịt fo. Ntak mûnịmke mme utịtmbuba ke afan̄ emi? Iso-ọfọn̄ afo emekeme ndinam n̄kọri ke nte etịmde idem ọnọ mme mbono esop ke urua emi edide. Utịtmbuba fo efen ekeme ndidi ndibuana ke ndinọ mbio mbio ibọrọ ofụri esịt. Nte ededi, edi akpan n̄kpọ n̄ko afo ndida se ekpepde nsịn ke edinam.—Philippi 4:9.
18. Afo ekeme ndinyene mbuọtidem ke nso, idem ọkpọkọm osobode ndusụk ubiọn̄ọ?
18 Mme edidiọn̄ ẹtode edinam n̄kpọ Jehovah ẹsibịghi—ih, ẹsidi ke nsinsi. Edi akpanikọ, ke ini ke ini afo emekeme ndisobo ndusụk ubiọn̄ọ m̀mê nsahi koro edide kiet ke otu Mme Ntiense Jehovah. Edi kere ban̄a Moses. Bible ọdọhọ ke “enye [ama owụk] enyịn ese utịp eke ẹdinọde enye.” (Mme Hebrew 11:24-26) Afo nde emekeme ndinyene mbuọtidem nte ke Jehovah ọyọnọ fi utịp ke mme ukeme oro afo esịnde ndikpep nnyụn̄ ntịn̄ mban̄a enye. Ke akpanikọ, enye ‘idifreke utom fo ye ima enyịn̄ Esie eke afo owụtde.’—Mme Hebrew 6:10.
[Mme Ikọ idakisọn̄]
a Mme Ntiense Jehovah ẹsio.
b Mme Ntiense Jehovah ẹsio.
Nte Afo Emeti?
• Ntak emi afo enịmde ke Jehovah owụt esịtekọm aban̄a utom fo?
• Mme usụn̄ ewe ndida nnọ ikọ ntiense ke ufọkn̄wed ke ndusụk owo ẹkekụt nte ẹnyenede uforo?
• Didie ke afo ekeme ndinyene uko ndinọ mme nsan̄a ubet ukpepn̄kpọ fo ikọ ntiense?
• Didie ke afo ekeme ndisan̄a n̄kpere Jehovah?
[Ekebe/Mme ndise ke page 20]
Ata N̄kpri Nditọ Ẹsikam Ẹtoro Jehovah!
N̄kpri nditọ oro mîkam isịmke isua 13 ẹsinọ ikọ ntiense ke ufọkn̄wed. Kere ban̄a mme ifiọkutom emi.
Amber emi edide isua 10 onyụn̄ odude ke ọyọhọ isua ition ke ufọkn̄wed okokot n̄wed aban̄ade en̄wan oro mbon Nazi ẹkedade ẹtiene mme Jew ke ọyọhọ Ekọn̄ Ererimbot II. Amber ama ebiere ndida vidio oro Purple Triangles nsọk andikpep esie. Andikpep emi ama okop n̄kpaidem ndifiọk nte ke ẹma ẹkọbọ Mme Ntiense Jehovah n̄ko ke idak ukara Nazi. Andikpep emi ama owụt ofụri otu nditọ ufọkn̄wed vidio emi.
Ke edide isua 8 ke emana, Alexa ama ewet leta ọnọ mme nsan̄a ubet ukpepn̄kpọ esie, anamde an̄wan̄a ntak emi enye mîkemeke nditiene mmọ ndia usọrọ Christmas. Leta oro ama enen̄ede otụk andikpep esie tutu enye anam Alexa okot leta oro uyo ọwọrọ ọnọ mme nsan̄a ubet ukpepn̄kpọ esie ye otu nditọ ukpepn̄kpọ iba efen! Ke oyomde ndiberi leta oro Alexa ama ọdọhọ ete: “Ẹkpep mi ndiwụt ukpono nnọ mbon en̄wen oro mme edinịm ke akpanikọ mmọ ẹkpụhọrede ye okịm, ndien ami mmọkọm mbufo nte ẹwụtde ukpono ẹnọ ubiere mi nditre ndidia Christmas.”
Esisịt ini ke ama ọkọtọn̄ọ akpa isua ke ufọkn̄wed, Eric ama ada N̄wed Mi eke Mme Mbụk Bible aka ufọkn̄wed onyụn̄ eben̄e andikpep esie ete ayak imọ iwụt mme nsan̄a ubet ukpepn̄kpọ imọ n̄wed emi. Andikpep esie ama ọdọhọ ete: “Mmenyene ekikere emi ọfọnde akan oro. Ntak mûkotke mbụk kiet unọ otu nditọ ukpepn̄kpọ?” Eric ama anam ntre. Ke oro ebede, enye ama ọdọhọ kpukpru mbon oro ẹyomde idem n̄wed oro kiet ẹmenede ubọk. Owo 18—esịnede andikpep esie—ẹma ẹnam ntre! Eric ọdọhọ ke idahaemi imọ imenyene san̄asan̄a efakutom ndinọ ikọ ntiense.
Whitney emi edide isua 9 owụt esịtekọm aban̄a ediye uduot ekpri n̄wed oro Mme Ntiense Jehovah ye Ubọ Ukpep.c Enye ọdọhọ ete: “Eka mi esinọ mme andikpep mi n̄wed emi kpukpru isua, edi isua emi n̄kanam emi ke idemmi. Ke ntak ediye uduot ekpri n̄wed oro, andikpep mi ama emek mi nte ‘mfọnn̄kan eyen ufọkn̄wed eke urua oro.’”
[Ikọ idakisọn̄]
c Mme Ntiense Jehovah ẹsion̄o kpukpru n̄wed oro ẹsiakde mi.
[Ekebe/Mme ndise ke page 21]
Mme Idaha Oro Ndusụk Owo Ẹdade Ẹtịn̄ Ẹban̄a Se Mmọ Ẹnịmde ke Akpanikọ
Ke ini ẹnọde utom ufọkn̄wed, ndusụk ẹsimek ibuotikọ oro ediyakde mmọ ẹnọ ikọ ntiense
Ediwak uyen ẹsinọ andikpep mmọ vidio m̀mê n̄wed oro enyenede n̄kpọ ndinam ye ibuot nneme oro ẹnemede ye otu nditọ ukpepn̄kpọ
Mme uyen en̄wen ẹsika ẹbịne ndusụk uyen ke ini mmọ ẹkotde Bible m̀mê n̄wed oro ọkọn̄ọde ke Bible ke ini nduọkodudu ẹkebụp mme mbụme
[Ndise ke page 18]
Mbon oro ẹnyenede mbufiọk ẹkeme ndin̄wam ndikpep mme uyen ndinam n̄kpọ Jehovah