“Ẹsan̄a Ẹkpere Abasi, Ndien Enye Ayasan̄a Ekpere Mbufo”
Mbemiso ye ke Ama Ekekpep Bible—Esuene Esuene Ini Edem, Nyayama Ini Iso
“IKỌ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, . . . onyụn̄ enyene ukeme ndidụn̄ọde ekikere ye uduak esịt owo.” (Mme Hebrew 4:12) Ntem ke apostle Paul eketịn̄ aban̄a ọkpọsọn̄ odudu oro etop Abasi enyenede. Ke akpa isua ikie E.N., ẹma ẹnen̄ede ẹkụt ukeme oro etop emi enyenede ndisịm esịt. Kpa ye idiọk odudu eke eyo oro, mbon oro ẹkekabarede ẹdi mme Christian ẹma ẹmen obufa owo ẹsịne.—Rome 1:28, 29; Colossae 3:8-10.
Mfịn ẹkụt n̄ko odudu emi Ikọ Abasi oro ẹwetde ke Bible enyenede ndikpụhọde owo. Ke uwụtn̄kpọ, kere ban̄a se iketịbede inọ Richard, anyan anyan okopidem eren kiet. Sia ekedide owo ọkpọsọn̄ iyatesịt, Richard ama esin̄wana en̄wan ke ini ẹnamde enye esisịt n̄kpọ iyatesịt. Afai ama abiat uwem esie. Richard ama akam odụk n̄ka utopita. Enye ama esịn ifịk ekpep onyụn̄ akabade edi ata otopita ke Westphalia, Germany. Richard ama esin̄wọn̄ mmịn ebe ubọk ama esinyụn̄ awak ndisịn ntịme. Ke kiet ke otu ntịme emi, ẹma ẹwot owo, ndien akayak esisịt ẹkpekesịn Richard ke ufọk-n̄kpọkọbi.
Nso kaban̄a ndọ Richard? Enye eti ete: “Mbemiso ami ye Heike ikekpepde Bible, ekesidi enyene afan̄ esie odụk. Heike ama esibiat ekese ini ye mme ufan esie iban ke adan̄aemi ami n̄kesibiatde ekese ini ke mme edinam ini nduọkodudu mi—akpan akpan utopita, ediwat obukpọk ke awawa, ye edinịm enịm.”
Ke ini Richard ye Heike ẹketọn̄ọde ndikpep Bible ye Mme Ntiense Jehovah, ekikere edinam mme ukpụhọde oro ẹketiede nte se owo mîkemeke ndinam nnyụn̄ ndu uwem ekekem ye mme n̄kokon̄ idaha oro ẹwụtde ke Ikọ Abasi, ẹma ẹtie Richard nte ẹsọn̄ ẹkaha. Nte ededi, nte enye ekedide edifiọk Jehovah Abasi etịm ọfọn, Richard ama ọkọri ọkpọsọn̄ udọn̄ ndinem enye esịt. Richard ama edi edifiọk ke Abasi imaha mbon afai m̀mê mbon oro ẹdade afai ẹnọ idem inemesịt. Richard ama edifiọk nte ke ‘ukpọn̄ Jehovah asasua owo eke amade afai.’—Psalm 11:5.
Akan oro, idotenyịn edidu uwem nsinsi ke paradise isọn̄ ama aduai Richard ye Heike idem. Mmọ ẹma ẹyom ndidu do ọtọkiet! (Isaiah 65:21-23) Ikot oro “ẹsan̄a ẹkpere Abasi, ndien enye ayasan̄a ekpere mbufo” ama enen̄ede otụk Richard. (James 4:8) Enye ama okụt ufọn edinam item eke odudu spirit emi: “Kûfịbe ufụp ye owo afai, kûnyụn̄ umek usụn̄ esie baba kiet. Koro mme ọsọn̄-ibuot ẹdide se Jehovah asuade: edi enye odụk odu ye mbon edinen ido.”—Mme N̄ke 3:31, 32.
Kpa ye oro ekenen̄erede ọdọn̄ enye ndikpụhọde usụn̄ uwem esie, Richard ama edikụt ke imọ ikekemeke ndinam oro ke odudu idem imọ. Enye ama edikụt ufọn edibọn̄ akam nyom un̄wam Abasi. Enye ke ntem ama anam n̄kpọ ke n̄kemuyo ye mme ikọ emi Jesus eketịn̄de ye mme apostle Esie ete: “Ẹbọn̄ akam, mbak mbufo ẹdidụk ke idomo: ukpọn̄ ọsọp ke akpanikọ, edi obụkidem edi mmem-mmem.”—Matthew 26:41.
Ke ama ekekpep nte Abasi esede afai ye iyatesịt, Richard ama edikụt in̄wan̄-in̄wan̄ nte ke Abasi imaha mbuba utopita. Ye un̄wam Jehovah ye nsịnudọn̄ mbon oro ẹkekpepde enye Bible, Richard ama ekịbe ọbọhọ afai. Enye ama etre utopita ye ntịme ama onyụn̄ ebiere ndinam uwem ubon esie ọfọn. Richard, emi idahaemi edide esenyịn emi enyenede ifụre ifụre ido ke kiet ke otu esop Mme Ntiense Jehovah, ọdọhọ ete: “Ndikpep akpanikọ Bible aman̄wam mi ndituak nda n̄kere mbemiso nnamde n̄kpọ.” Enye adian do ete: “Idahaemi edumbet ima ye ukpono ẹda mi usụn̄ ke nte ami nnamde n̄kpọ ye n̄wan mi ye nditọ mi. Nte utịp, ubon nnyịn adiana kiet.”
Ke ndusụk idaha, mbon oro mînyeneke nnennen ntọt ẹsidori Mme Ntiense Jehovah ikọ nte mmọ oro ẹbiatde ubon. Nte ededi, uwụtn̄kpọ mme owo nte Richard owụt ke emi edi nsu. Ke nditịm ntịn̄, akpanikọ Bible ekeme ndisọn̄ọ mbọbọ ubon onyụn̄ ekeme ndinam mbon oro ẹkedude esuene esuene uwem ke ini edem ẹnyene nyayama ini iso.—Jeremiah 29:11.
[Se Ẹwetde ke Ikpọ Abisi ke page 9]
“Idotenyịn paradise isọn̄ ama onụk mi ndinam ukpụhọde”
[Ekebe ke page 9]
Mme Edumbet Bible ke Ẹnam Utom ▸
Bible ekeme ndinyene ọkpọsọn̄ odudu ke uwem mme owo. Se itienede mi ẹdi ndusụk edumbet N̄wed Abasi oro ẹn̄wamde mbon afai ndinam ukpụhọde:
“Owo eke mîsọpke iyatesịt ọfọn akan owo uko: ndien owo eke akande esịt esiemmọ ọfọn akan owo eke adade obio.” (Mme N̄ke 16:32) Iyatesịt oro owo mîkarake edi idiọn̄ọ mmemidem, idịghe odudu.
“Mbufiọk owo iyakke enye ọsọp iyatesịt.” (Mme N̄ke 19:11) Ndinyene ikike ye mbufiọk mban̄a idaha esin̄wam owo ndise mbe ntak anamde ẹn̄wana en̄wan onyụn̄ ekeme ndibiọn̄ọ iyatesịt ndidemede.
‘Kûmamana ye owo ifụtesịt mbak afo edikpep ido esie.’ (Mme N̄ke 22:24, 25) Mme Christian ẹsiwụt eti ibuot ke ndifep ndidụk nsan̄a ye mbon ifụtesịt.