Ẹsịn Udọn̄ Ẹnọ Mme Andikụre Ukpep Gilead Nditịn̄ “Ata N̄kpọsọn̄ Utom”
NDIYE owo 6,635 emi ẹtode idụt 52 ẹkedu ke edinam ukụre ukpep ọyọhọ otu 115 eke Ufọkn̄wed Enyọn̄-Ukpeme Ukpep Bible eke Gilead oro ẹkenịmde ke September 13, 2003.
Mmọ ẹma ẹkop ikọ nsịnudọn̄ oro ọkọn̄ọde ke Bible emi ẹkenọde nditọ ufọkn̄wed 48 ẹte ẹtịn̄ “ata n̄kpọsọn̄ utom Abasi” ẹnọ mme owo oro ẹdụn̄de ke idụt 17. (Utom 2:11) Oro edi ebiet emi mme andikụre ukpep emi ẹdinamde utom isụn̄utom mmọ idahaemi.
Ke ntọn̄ọikọ esie, Stephen Lett, owo Otu Ukara eke Mme Ntiense Jehovah emi okonyụn̄ edide etieibuot okpokoro edinam ukụre ukpep oro, ama eti nditọ ufọkn̄wed oro ete: “Ke ini mbufo ẹdikade utom isụn̄utom mbufo, inamke n̄kpọ m̀mê m̀mọ̀n̄ ke mbufo ẹdinam utom, m̀mê nso ke mbufo ẹdisobo, mmọ emi ẹdude ye mbufo ẹwak ẹkan mme asua mbufo.” Ke adade Udiana Ndidem ibuot 6 etịn̄ ikọ, Brọda Lett ama eti nditọ ufọkn̄wed oro ete ke mmọ ẹkpenyene ndiberi edem ke un̄wam Jehovah Abasi ye eke akwa udịm angel nte mmọ ẹnamde ẹdiọn̄ọ “ata n̄kpọsọn̄ utom Abasi.” (2 Ndidem 6:15, 16) Mme Christian akpa isua ikie ẹma ẹsobo ubiọn̄ọ, mme owo ikonyụn̄ inyeneke udọn̄ ke utom ukwọrọikọ ye unọ ukpep mmọ, mfịn n̄ko mme Christian ẹdide isụn̄utom ẹsobo mme ukem n̄kpọ oro. Nte ededi, mmọ ẹkeme ndiberi edem ke un̄wam oro otode heaven ọkọrọ ye eke esop Jehovah eke isọn̄.—Psalm 34:7; Matthew 24:45.
Ẹtịn̄ “Ata N̄kpọsọn̄ Utom Abasi”
Ke etieibuot okpokoro ama ọkọnọ utịn̄ikọ ediberede, Harold Corkern, andibuana ke Kọmiti N̄kọk Itieutom United States, ama etịn̄ ikọ ke ibuotikọ emi, “Ata Idotenyịn—Se Inamde Owo Anam Utom Idatesịt Oro Okụtde Unen.” Brọda Corkern ama owụt nte ke idotenyịn oro mîsụhu ekeme ndida nsịm edikpu, nte Mme N̄ke 13:12 owụtde. Nte ededi, mme owo ẹsiwak ndikụt edikpu ke ini idotenyịn oro mîdịghe ata idotenyịn akpade mfụhọ. Oyom mbon oro ẹkụrede ukpep mi ẹnyene ekikere oro adade ukem ukem ẹban̄a idem mmọ ye mbon en̄wen. Mmọ ẹkpenyene ndidori enyịn ndinam ndudue, edi ikpanaha emi anam mmọ ẹnen̄ede ẹkop mfụhọ nte mmọ ẹdomode ndin̄wam mbon en̄wen ẹfiọk “ata n̄kpọsọn̄ utom Abasi.” Brọda Corkern ama esịn udọn̄ ọnọ mbufa isụn̄utom emi ndiberi edem ke Jehovah, “Andinọ mmọ emi ẹyomde Enye utịp.”—Mme Hebrew 11:6.
Owo efen ke ndutịm oro ekedi Daniel Sydlik, owo Otu Ukara, emi eketịn̄de ikọ ke ibuotikọ emi “Idotenyịn Christian—Nso ke Enye Edi?” Enye ọkọdọhọ ete: “Idotenyịn edi eti ido oro Christian ekpenyenede. Enye edi edinen idaha oro anamde owo enyene nnennen itie ebuana ye Abasi. Owo oro mîdịghe Christian ikemeke ndinyene utọ idotenyịn oro nnyịn inyenede.” Brọda Sydlik ama aka iso nditịn̄ mban̄a nsio nsio ikpehe idotenyịn Christian oro ẹn̄wamde owo ndika iso nnyene idotenyịn kpa ye mme mfịna uwem. “Idotenyịn ekeme ndinam nnyịn ika iso idu uwem ye obufa ifịk ye idara idara edu.” Idotenyịn Christian an̄wam enye ndikụt Jehovah nte Abasi uduak nnyụn̄ n̄kop idatesịt ke ndinam n̄kpọ esie.—Rome 12:12.
Wallace Liverance, esịn-owo-enyịn̄ ke Ufọkn̄wed Gilead, ama esịn udọn̄ ọnọ nditọ ufọkn̄wed oro ete ẹka iso “Ẹsan̄a ke Spirit.” (Galatia 5:16) Enye ama owụt nte Baruch, ewetn̄wed Jeremiah, ekekperede nditre ndisan̄a ke spirit. Ke idaha kiet, Baruch ama akpa mba onyụn̄ ọtọn̄ọ ndiyom ikpọ n̄kpọ ke idemesie. (Jeremiah 45:3, 5) Ekem Brọda Liverance ama owụt nte ke ndusụk owo ẹma ẹtre nditiene Jesus ẹnyụn̄ ẹsịn akpanikọ eke spirit, emi edide ata akpan n̄kpọ kaban̄a edinyan̄a. Ntak ekedi koro se Jesus ekekpepde ikan̄wan̄ake mmọ, mmọ ẹkenyụn̄ ẹkụtde edikpu sia owo mîkosụhu idotenyịn obụkidem mmọ ke ebe oro. (John 6:26, 27, 51, 66) Nso ke mme isụn̄utom, emi utom mmọ edide ndiwọn̄ọde ntịn̄enyịn mme owo n̄wụt Andibot ye uduak esie, ẹkeme ndikpep nto mme mbụk emi? Ẹma ẹsịn udọn̄ ẹnọ nditọ ufọkn̄wed emi nditre ndikere mban̄a edinyene ikpọ itie, ediyom mme owo ẹdiọn̄ọ mmimọ, m̀mê edida utom ukara Abasi nyom ọkpọkpọ udori.
“Ndi Afo Edidi Andinọnọ m̀mê Andibọbọ?” ekedi mbụme oro Mark Noumair, andikpep ke Gilead, okobụpde. Utịn̄ikọ esie ọkọkọn̄ọ ke Judges 5:2, ebiet emi ẹketorode nditọ Israel ke mmọ ndikenyịme ndidụk udịmekọn̄ Barak ye unana ibụk. Ẹma ẹtoro nditọ ufọkn̄wed Gilead ke edu mmọ ndiyere ikot Akwa Barak, kpa Jesus Christ, ke ndinen̄ede nsịn idem ke ekọn̄ eke spirit. Akpana mbonekọn̄ Christ ẹnyene udọn̄ ke ndinyene unyịme enye emi ekesịnde mmọ enyịn̄ ke n̄wed. Brọda Noumair ama eti nditọ ufọkn̄wed oro ete: “Ke ini nnyịn itọn̄ọde ndikere mban̄a edinem idem nnyịn esịt, nnyịn imetre ndin̄wana ye asua. . . . Utom isụn̄utom idịghe man ese aban̄a idem fo. Enye enyene n̄kpọ ndinam ye Jehovah, itie edikara esie, ye edinam uduak esie. Nnyịn inamke utom nte mme isụn̄utom koro iyomde Jehovah anam nnyịn ikop inemesịt, nnyịn inam n̄kpọ esie koro imade enye.”—2 Timothy 2:4.
Ekem Lawrence Bowen, andikpep ke Gilead ama ada usụn̄ ke ikpehe oro ibuotikọ ekedide “Da Akpanikọ Fo Dianade Mmọ Nịm Nọ Idem Fo.” (John 17:17) Enye ama owụt nte ke nditọ ufọkn̄wed ọyọhọ otu 115 ẹdi mme asan̄autom Abasi oro ẹdian̄arede ẹnim. Ke ini ẹkedude ke ufọkn̄wed, mmọ n̄ko ẹma ẹbuana ke an̄wautom, ẹyomde mbon oro ẹmade akpanikọ. Ukem nte Jesus ye mme akpa mbet esie, nditọ ufọkn̄wed oro iketịn̄ke n̄kpọ ke ‘ke uyo idem mmọ.’ (John 12:49, 50) Mmọ ẹma ẹsịn ifịk ndisuan ọnọ-uwem ikọ akpanikọ eke odudu spirit. Mme ifiọkutom nditọ ufọkn̄wed oro ẹkefiakde ẹnam ẹwụt ye mbon oro ẹkebụkde-bụk ẹma ẹwụt ọkpọsọn̄ odudu oro Bible ekenyenede ke idem mbon oro mmọ ẹkesobode.
Item ye Ifiọkutom Ẹnọ Nsịnudọn̄
Anthony Pérez ye Anthony Griffin, mme andibuana ke Itieutom Utịmutom ke n̄kọk itieutom United States, ẹma ẹnam ndụn̄ọde ye mme andibuana ke Kọmiti N̄kọk Itieutom ẹtode nsio nsio idụt ke ererimbot. Iren emi ẹma ẹneme ẹban̄a mme n̄kpọ-ata oro mbufa isụn̄utom ẹsisobode ẹnyụn̄ ẹnọ nti item oro ẹkọn̄ọde ke ọkpọkpọ ifiọk n̄kpọntịbe. Ndusụk n̄kpọ-ata oro ẹsịne mme ukpụhọde ke ido edinam, ufiop eyo ke ofụri isua, m̀mê idaha ido ukpono ye eke ukaraidem oro edide isio ye se nditọ ufọkn̄wed oro ẹmehede. Nso ikeme ndin̄wam mbufa isụn̄utom emi ndiyọ mbufa idaha mmọ? Ima oro mmọ ẹmade Jehovah ye mme owo, editre ndise edem, ye edinyene ime. Owo kiet oro abuanade ke Kọmiti N̄kọk Itieutom ama ọdọhọ ete: “Mme owo oro ẹdude ke efakutom nnyịn ẹma ẹdụn̄ do ke ata ediwak isua ikie mbemiso nnyịn. Ke akpanikọ nnyịn imekeme ndidu do inyụn̄ ikpụhọde ida ekekem ye mme idaha. Kpukpru ini oro nnyịn isobode mme mfịna, nnyịn isida emi nte mme ifet ndinen̄ede edu nnyịn. Ana mbufo ẹberi edem ke akam ye ke spirit Jehovah, ẹnyụn̄ ẹkụt nte ikọ Jesus emi edide akpanikọ: ‘Ami ndodu ye mbufo.’”—Matthew 28:20.
Samuel Herd, owo Otu Ukara, ama ada ndutịm emi edisịm utịt ye ibuotikọ esie emi, “Ẹka Iso Nditịn̄ Mban̄a Ata N̄kpọsọn̄ Utom Abasi.” Edin̄wan̄a edisana spirit nduọk ke usen Pentecost 33 E.N. ama ọnọ mme mbet Jesus odudu nditịn̄ mban̄a “ata n̄kpọsọn̄ utom Abasi.” Nso ikeme ndin̄wam mbufa isụn̄utom mfịn nditịn̄ mban̄a Obio Ubọn̄ Abasi ye ukem ifịk oro? Kpa edisana spirit. Brọda Herd ama esịn udọn̄ ọnọ nditọ ufọkn̄wed oro ẹkụrede ukpep mi ‘ndinyene ifiopesịt ke spirit,’ ndikop nduaidem mban̄a utom mmọ, idehede ifre ukpep oro ẹnọde mmọ. (Rome 12:11) Brọda Herd ama ọdọhọ ete: “Bible edi ata ọkpọsọn̄ utom Abasi. Ẹkûdede ẹda ufọn oro enye enyenede ke ekpri n̄kpọ. Etop esie enyene uwem. Enye esikịm abahade ukpọn̄ ye spirit ye ikek ye ndia. Ẹda enye ẹnen̄ede uwem mbufo. Ẹyak enye okpụhọde usụn̄ nte mbufo ẹkerede n̄kpo. Ẹkpeme ukeme ukere n̄kpọ mbufo ebe ke ndikpep, ndikot ndinyụn̄ ntie n̄kere N̄wed Abasi . . . Ẹnam edi uduak ye ubiere mbufo ndida ukpep oro mbufo ẹbọde ke Gilead n̄ka iso ntịn̄ mban̄a ‘ata n̄kpọsọn̄ utom Abasi.’”
Ke ẹma ẹkekot mme etop ekọm ẹtode ofụri ererimbot ẹnyụn̄ ẹdeme n̄weditoro, kiet ke otu mme andikụre ukpep ama okot leta oro nditọ ufọkn̄wed oro ẹkewetde ndiwụt esịtekọm mban̄a ukpep oro mmọ ẹkebọde ke Gilead. Ekem Brọda Lett ama ada idara idara edinam emi edisịm utịt ke nditịn̄ mban̄a 2 Chronicles 32:7 ye Deuteronomy 20:1, 4. Ke emende akpatre utịn̄ikọ esie akabuan ye ntọn̄ọikọ esie, enye ama eberi ete: “Ntre, ndima mme andikụre ukpep, nte mbufo ẹdinyọn̄de, nte ẹdisan̄ade ẹka ndin̄wana ekọn̄ eke spirit emi ke obufa efakutom mbufo, ẹti ẹte ke Jehovah ayasan̄a ye mbufo. Ẹkûdede ẹfre ẹte ke mmọ oro ẹdude ye mbufo ẹwak ẹkan mme asua mbufo.”
[Ekebe ke page 25]
IDAHA OTU
Ibat idụt ẹtode: 7
Ibat idụt ẹnọde ẹka: 17
Ibat nditọ ufọkn̄wed: 48
Isua emana ke ẹbaharede ukem ukem: 33.7
Isua ẹdude ke akpanikọ ke ẹbaharede ukem ukem: 17.8
Isua ẹdude ke utom uyọhọ ini ke ẹbaharede ukem ukem: 13.5
[Ndise ke page 26]
Ọyọhọ Otu 115 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.