Ẹbiọn̄ọ Spirit Ererimbot Emi Akade-Ka Iso Ndikpụhọde
“Nnyịn ikọbọhọ spirit ererimbot emi, edi ikọbọ spirit emi otode Abasi.”—1 Corinth 2:12.
1. Ke mme usụn̄ ewe ke ẹkebian̄a Eve?
“URỤKIKỌT akabian̄a mi.” (Genesis 3:13) Eve, akpa an̄wan, akada ikọ ifan̄ oro odomo nditịn̄ ntak oro enye ọkọsọn̄de ibuot ye Jehovah Abasi. Se enye eketịn̄de ekedi akpanikọ, okposụkedi emi mîkowụtke ke idiọk edinam esie ama enen. Ke ukperedem, ẹma ẹnọ apostle Paul odudu spirit ndiwet: “[Eve] ke ẹkebian̄a.” (1 Timothy 2:14) Ẹma ẹbian̄a enye ndinịm nte ke nsọn̄ibuot—edidia mfri eto oro ẹkekpande—ọyọfọn ye enye, anamde enye etie nte Abasi. Enye ikọfiọkke n̄ko owo oro akabian̄ade enye. Enye ikọfiọkke ke Satan kpa Devil akada urụkikọt oro etịn̄ ikọ.—Genesis 3:1-6.
2. (a) Didie ke Satan abian̄a mme owo mfịn? (b) Nso idi “spirit ererimbot,” ndien mme mbụme ewe ke nnyịn idikere iban̄a idahaemi?
2 Satan amaka iso ndibian̄a mme owo toto ke eyo Adam ye Eve. Ke akpanikọ, enye edi “andibian̄a ofụri ererimbot.” (Ediyarade 12:9) Mme n̄kari esie ikpụhọkede. Okposụkedi enye mîdaha aba ata ata urụkikọt, enye aka iso ndidịp owo emi enye edide. Satan ada mme ikpehe unọ idem inemesịt, ndutịm usuanetop, ye mme usụn̄ efen, abian̄a mme owo ndinịm nte ke mmimọ iyomke inyụn̄ ibọhọ ufọn ito ima ima ndausụn̄ Abasi. Ukeme oro Devil esịnde ndibian̄a abian̄a amanam mme owo ke kpukpru ebiet ẹsọn̄ ibuot ẹbiat ibet ye mme edumbet Bible. Bible okot emi “spirit ererimbot.” (1 Corinth 2:12) Spirit emi enen̄ede akara edinịm ke akpanikọ, ido, ye uwem mbon oro mîdiọn̄ọke Abasi. Didie ke ẹwụt spirit emi, ndien didie ke nnyịn ikeme ndibiọn̄ọ mbiara odudu esie? Ẹyak nnyịn ise.
Idaha Ido Uwem ke Osụhọrede
3. Ntak emi “spirit ererimbot” enen̄erede owụt idem mfịn-e?
3 “Spirit ererimbot” enen̄ede owụt idem mfịn. (2 Timothy 3:1-5) Eyedi afo omokụt ke idaha ido uwem ke osụhọrede. N̄wed Abasi anam ntak emi edide ntre an̄wan̄a. Ke ẹma ẹkewụk Obio Ubọn̄ Abasi ke 1914, ekọn̄ ama asiaha ke heaven. Ẹma ẹkan Satan ye mme angel esie oro ẹdide mme demon ẹnyụn̄ ẹsion̄o mmọ ẹduọn̄ọ ke isọn̄. Ye akwa ifụtesịt, Satan esịn ofụri ukeme ndibian̄a ofụri ererimbot. (Ediyarade 12:1-9, 12, 17) Enye odomo ke kpukpru usụn̄ man ‘edieke ekemede, akpada ndimek ikọt Abasi awaha ọkpọn̄ usụn̄.’ (Matthew 24:24) Nte ikọt Abasi, nnyịn idi iso en̄wan esie. Enye odomo ndibiat nsọn̄idem eke spirit nnyịn man nnyịn itaba mfọn Jehovah ye idotenyịn nsinsi uwem.
4. Didie ke mme asan̄autom Jehovah ẹse Bible, ndien didie ke mbon ererimbot ẹse enye?
4 Satan odomo ndibiat Bible, kpa ọsọn̄urua n̄wed oro ekpepde nnyịn aban̄a ima ima Andibot nnyịn. Mme asan̄autom Jehovah ẹma ẹnyụn̄ ẹda Bible ke ọsọn̄urua n̄kpọ. Nnyịn imọdiọn̄ọ ke enye edi Ikọ Abasi eke odudu spirit, idịghe ikọ owo. (1 Thessalonica 2:13; 2 Timothy 3:16) Nte ededi, ererimbot Satan iyomke nnyịn ikere ntre. Ke uwụtn̄kpọ, ebeiso ikọ ke n̄wed kiet oro an̄wanade ye Bible ọdọhọ ete: “Idụhe n̄kpọ ndomokiet oro anamde Bible edi ‘edisana,’ enye inyụn̄ idịghe ‘ikọ Abasi.’ Idịghe ndisana owo oro Abasi ọkọnọde odudu spirit ẹkewet enye, edi edi mme oku oro ẹkeyomde uwọrọiso.” Mbon oro ẹnịmde mme utọ ekikere emi ke akpanikọ ẹkeme ndisọsọp nduọ ke afia edikere nte ke mmimọ imekeme ndikpono Abasi ke usụn̄ ekededi oro mmimọ imade—m̀mê ndikam ntre ndikpono enye.—Mme N̄ke 14:12.
5. (a) Nso ke ewetn̄wed kiet eketịn̄ aban̄a mme ido ukpono oro ẹsikamade Bible? (b) Didie ke mme ọsọ ekikere ererimbot ẹkpụhọde ye se Bible etịn̄de? (Buan ekebe oro odude ke page oro etienede.)
5 An̄wan̄wa ye ndedịbe en̄wan oro ẹn̄wanade ye Bible, ọkọrọ ye mbubịk ido ukpono mbon oro ẹdọhọde nte inọde enye ibetedem, ẹsụn̄ọ ke usua ido ukpono oro ọkọride-kọri, esịnede ido ukpono oro ẹsikamade Bible. Ke ẹda ndutịm usuanetop ye ifiọkn̄wed ẹn̄wana ye ido ukpono. Ewetn̄wed kiet ọdọhọ ete: “Ekikere Ido Ukpono Mme Jew ye eke Ido Ukpono Christ oro ẹtịmde ẹmehe ifọnke. Ke mfọnn̄kan idaha ẹda enye nte akani ido; ke ndiọkn̄kan idaha, ẹda enye nte ekikere eset emi ọbiọn̄ọde-biọn̄ọ n̄kọri ifiọkn̄wed ye ifiọk ntaifiọk. Ke mme isua ndondo emi, edisịn oro ẹsịnde enye ke ndek ọmọkọri ekesịm nsahi ye ata ata usua.” Usua emi esitọn̄ọ oto mme owo oro mînịmke ke Abasi odu, emi “[ẹkabarede] ẹkere ikpîkpu ekikere.”—Rome 1:20-22.
6. Nso ekikere ke ererimbot enyene aban̄a mme ido idan̄ oro Abasi obiomde ikpe?
6 Ke ntre, idịghe n̄kpọ n̄kpaidem ndikụt nte mme owo ẹnen̄erede ẹfụmi mme idaha Abasi ẹban̄ade ido uwem. Ke uwụtn̄kpọ, Bible ọdọhọ ke idan̄ ukemuduot edi “se mîdotke.” (Rome 1:26, 27) Enye n̄ko ọdọhọ ke mme anam use ye mme esịn efịbe ididaha Obio Ubọn̄ Abasi inyene. (1 Corinth 6:9) Kpa ye oro, ke ediwak idụt, ẹmenyịme ẹnyụn̄ ẹtoro mme oburobụt ido idan̄ emi ke mme n̄wed, magazine, ikwọ, ndise senima, ye mme edinam TV. Ẹse mbon oro ẹtịn̄de ikọ ndiwụt ke mme utọ edinam emi ifọnke nte mbon oro mînyeneke in̄wan̄-in̄wan̄ esịt, mme okụt ndudue, ye mbon oro mîfiọkke ntatenyịn. Utu ke ndise mme idaha Abasi nte se iwụtde ima ima edikere mban̄a, ererimbot ese mmọ nte se ibiọn̄ọde ọkpọkpọ ifụre ye uyụhọ.—Mme N̄ke 17:15; Jude 4.
7. Mme mbụme ewe ke nnyịn ikpobụp idem nnyịn?
7 Ke ererimbot oro ọdiọn̄de-diọn̄ ọbiọn̄ọ Abasi mi, owụt ifiọk ndikere mban̄a mme edu ye ido uwem nnyịn. Ke ini ke ini, oyom nnyịn ida akam ofụri esịt idụn̄ọde idem nnyịn man ikụt ite ke nnyịn ifiọrọke sụn̄sụn̄ ikpọn̄ mme ekikere ye idaha Jehovah. Ke uwụtn̄kpọ, nnyịn imekeme ndibụp idem nnyịn, ‘Nte mmesikop inem mme n̄kpọ oro n̄kpekesịnde ke mme isua emi ẹkebede? Nte mmenen̄ede nnyịme mme edinam oro Abasi obiomde ikpe? Nte mmenyene ntụhọ editre ndida mme n̄kpọ eke spirit ke akpan n̄kpọ nte n̄kesidade ke akpa? Nte usụn̄ uwem mi owụt ke ami mmenịm mme n̄kpọ Obio Ubọn̄ akpa?’ (Matthew 6:33) Mme utọ ndụn̄ọde oro ẹyen̄wam nnyịn ndibiọn̄ọ spirit ererimbot.
‘Kûfiọrọ Ukpọn̄ Usụn̄’
8. Didie ke owo ekeme ndifiọrọ n̄kpọn̄ Jehovah?
8 Apostle Paul ekewet ọnọ ekemmọ mme Christian ete: “Ikpetịm ikpan̄ utọn̄ ikan inọ mme n̄kpọ emi ikokopde, mbak nnyịn idifiọrọ ikpọn̄ mmọ.” (Mme Hebrew 2:1) Nsụn̄ikan̄ oro ọfiọrọde ọkpọn̄ usụn̄ isisịmke ebiet oro enye akade. Edieke etubom nsụn̄ikan̄ mîkereke iban̄a ofụm ye usọpmmọn̄, nsụn̄ikan̄ esie ekeme ndifiọrọ mbe esụk onyụn̄ akabak ke mbenesụk oro ọyọhọde ye itiat. Ukem ntre, edieke nnyịn mîtịn̄ke enyịn ke ọsọn̄urua akpanikọ Ikọ Abasi, nnyịn imekeme ndifiọrọ mmemmem mmemmem n̄kpọn̄ Jehovah, inyụn̄ iwụre ke n̄kan̄ eke spirit. Ekeme ndidi nnyịn idisịnke akpanikọ ofụri ofụri mbemiso ikụtde utọ ntakurua oro. Ke akpanikọ, ediwak owo isikoho-koi isịn Jehovah ke mbuari. Ke ediwak idaha, mmọ ẹsiwọn̄ọde nsịtnsịt ẹbịne mme n̄kpọ oro ẹsiwọn̄ọrede ntịn̄enyịn mmọ ẹkpọn̄ edikpan̄ utọn̄ nnọ Ikọ Abasi. Ekpere ndidi mmọ ẹsiduọ ẹdụk idiọkn̄kpọ ye unana edifiọk. Ukem nte etubom nsụn̄ikan̄ oro idap ama ekemen, mme utọ owo oro isidemekede tutu ini ebe akaha.
9. Ke mme usụn̄ ewe ke Jehovah ọkọdiọn̄ Solomon?
9 Kere ban̄a usụn̄ uwem Solomon. Jehovah ama ọnọ enye itie edidem ke Israel. Abasi ama enyịme Solomon ọbọp temple onyụn̄ ọnọ enye ndausụn̄ ndiwet ndusụk ikpehe Bible. Jehovah ama etịn̄ ikọ ye enye ikaba onyụn̄ ọnọ enye inyene, emem emem ukara, onyụn̄ anam enye ọwọrọ etop. Ke akande kpukpru, Jehovah ama ọnọ Solomon akwa ọniọn̄. Bible ọdọhọ ete: “Abasi ọnọ Solomon eti ibuot ye asian eti-eti, ye ọniọn̄ esịt, nte ntan emi odude ke mben inyan̄. Ifiọk Solomon onyụn̄ awak akan ifiọk kpukpru nditọ edem usiaha-utịn, ye ofụri ifiọk Egypt.” (1 Ndidem 4:21, 29, 30; 11:9) Ke akpanikọ, owo ekeme ndikere, edieke edide ama odu owo oro ekekemede ndisọn̄ọ nda nnam akpanikọ nnọ Abasi, owo oro ekedi Solomon. Edi, Solomon ama ọfiọrọ odụk usụn̄ mfiakedem. Didie ke oro eketịbe?
10. Ewe item ke Solomon okokpu ndinam, ndien nso ikedi utịp?
10 Solomon ama enen̄ede ọfiọk Ibet Abasi. Nte eyịghe mîdụhe, enye ama enyene akpan udọn̄ ke mme item oro ẹkenọde mbon oro ẹkekabarede ẹdi ndidem ke Israel. Kiet ke otu item oro ọkọdọhọ ete: “[Edidem] okûnyụn̄ ọdọ ediwak iban, mbak esịt esie edikabade.” (Deuteronomy 17:14, 17) Kpa ye in̄wan̄-in̄wan̄ item oro, Solomon ama ọdọ iban ikie itiaba onyụn̄ enyene iban esa ikie ita. Ediwak ke otu iban emi ẹkesikpono isen abasi. Nnyịn ifiọkke ntak emi Solomon ọkọdọde utọ uwak iban oro, inyụn̄ ifiọkke nte enye okodomode ndiwụt ke ndinam ntre ama enen. Se nnyịn ifiọkde edi nte ke enye ama okpu nditiene in̄wan̄-in̄wan̄ ndausụn̄ oro Abasi ọkọnọde. Utịp ekedi ukem ukem nte Jehovah ọkọdọhọde. Nnyịn ikot ite: “Iban [Solomon] ẹyụt enye esịt, ẹsịn enye akabade etiene abasi efen.” (1 Ndidem 11:3, 4) Nsịtnsịt, ifiọk oro Abasi ọkọnọde enye ama akpa mmọn̄. Enye ama ọfiọrọ ọkpọn̄ usụn̄. Nte ini akakade, udọn̄ Solomon ndinem esịt isen abasi emi iban esie ẹkekponode ama owot udọn̄ oro enye ekenyenede ndikop uyo Abasi nnyụn̄ nnem enye esịt. Nso n̄kpọ mmọn̄eyet ke emi ekedi ntem, koro edi Solomon ke mbemiso ekewet mme ikọ emi: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”—Mme N̄ke 27:11.
Spirit Ererimbot Okop Odudu
11. Didie ke se nnyịn idade ibọk esịt nnyịn otụk ekikere nnyịn?
11 Uwụtn̄kpọ Solomon ekpep nnyịn nte ke edi n̄kpọndịk ndikere ke mme odudu ererimbot idifịnake nnyịn ke ntak oro ima ikọfiọk akpanikọ. Kpa nte ata udia ekemede ndinam nnyịn ikọri, ntre n̄ko ke edi ye se nnyịn idade ibọk esịt nnyịn. Se nnyịn idade ibọk esịt nnyịn otụk ekikere ye edu nnyịn. Ke ẹfiọkde emi, mme ufọkutom ẹsibiat ediwak biliọn dollar kpukpru isua ndisuan etop n̄kpọ oro mmọ ẹnamde. Mme etop n̄kpọurua oro ẹkụtde unen ẹsida mme ikọ nneminua ye ndise ẹdemede udọn̄ mme andidep. Mme asuanetop n̄kpọurua ẹfiọk n̄ko ẹte ke ndikụt mme etop mmọ ini kiet m̀mê ikaba kpọt idinụkke mme andidep ẹsọp ẹdep mme n̄kpọ emi nte akpanade ẹdep. Edi, ndikụt mme etop emi ndien ndien esiwak ndinam mme andidep ẹma n̄kpọurua emi. Usuanetop n̄kpọurua esinyene ufọn—ke mîkpedịghe ntre, owo ndomokiet ikpenyịmeke ndisịn okụk ke enye. Enye enyene ọkpọsọn̄ odudu ke ekikere ye ke edu mme owo.
12. (a) Didie ke Satan akara ekikere mme owo? (b) Nso iwụt ke ẹkeme ndikara ekikere mme Christian?
12 Ukem nte asuanetop n̄kpọurua, Satan esisịn udọn̄ ọnọ mme ekikere esie ebe ke ndinam mmọ ẹye, ọfiọkde ete ke nte ini akade imọ imekeme ndinam mme owo ẹkere n̄kpọ nte imọ ikerede. Ebede ke mme edinam unọ idem inemesịt ye mme usụn̄ en̄wen, Satan abian̄a mme owo ndinịm nte ke eti edi idiọk ye nte ke idiọk edi eti. (Isaiah 5:20) Ata mme Christian ẹmekam ẹduọ ke afia nsunsu etop Satan. Bible odụri owo utọn̄ ete: “Edi Spirit enen̄ede ọdọhọ ete, ke ukperedem ini owo ẹyefiak edem ẹkpọn̄ mbuọtidem, ẹnyụn̄ ẹkpan̄ utọn̄ ẹnọ mme spirit abian̄a ye ukpep-n̄kpọ mme demon, emi mbon nsu, eke esịt mmọ odorode ufiọn, ẹdade mbubịk ẹkpep.”—1 Timothy 4:1, 2; Jeremiah 6:15.
13. Nso idi ndiọi nsan̄a, ndien didie ke mme nsan̄a nnyịn ẹtụk nnyịn?
13 Idụhe owo nnyịn ndomokiet oro spirit ererimbot mîkemeke ndibe. Ofụm ye ukot mmọn̄ editịm n̄kpọ Satan ẹkop odudu. Bible eteme nnyịn ọniọn̄ ọniọn̄ ete: “Ẹkûbian̄a idem mbufo ke n̄kpọ emi. Idiọk nsan̄a ababiat eti ido.” (1 Corinth 15:33) Idiọk nsan̄a ekeme ndibuana n̄kpọ ekededi m̀mê owo ekededi—idem ke esịt esop—oro owụtde spirit ererimbot. Edieke nnyịn ikpekerede ite ke idiọk nsan̄a ikemeke ndinọ nnyịn unan, nte nnyịn ikpebiereke ukem ntre nte ke nti nsan̄a ikemeke ndin̄wam nnyịn? Oro akpakwan̄a didie ntem! Bible anam n̄kpọ emi enen̄ede an̄wan̄a ke ini enye ọdọhọde ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.”—Mme N̄ke 13:20.
14. Ke mme usụn̄ ewe ke nnyịn ikeme ndibiọn̄ọ spirit ererimbot emi?
14 Man ibiọn̄ọ spirit ererimbot, ana nnyịn isan̄a ye mme enyene-ibuot owo—mbon oro ẹnamde n̄kpọ Jehovah. Ana nnyịn ida mme n̄kpọ oro ẹnamde ikọri ke mbuọtidem ibọk ekikere nnyịn. Apostle Paul ekewet ete: “N̄kpọ ekededi eke ẹdide akpanikọ, ye n̄kpọ ekededi eke ẹnyenede ukpono, ye n̄kpọ ekededi eke ẹnende, ye n̄kpọ ekededi eke ẹdide edisana, ye n̄kpọ ekededi eke odotde ẹte ẹma, ye n̄kpọ ekededi eke ọwọrọde eti etop; edieke eti ido odude ke n̄kpọ, edieke itoro onyụn̄ odude, ẹkere n̄kpọ oro.” (Philippi 4:8) Nte mme owo oro ẹnyenede ifụre ndibiere n̄kpọ nnọ idem, nnyịn imekeme ndimek se ikerede. Nnyịn ikpakam ika iso imek ndikere mme n̄kpọ oro ẹdụride nnyịn ẹkpere Jehovah kpukpru ini.
Spirit Abasi Okop Odudu Akan
15. Didie ke mme Christian ke Corinth eset ẹkekpụhọde ẹkpọn̄ mbon eken ke obio oro?
15 Ke mîbietke mbon oro spirit ererimbot emi otụnde usụn̄, edisana spirit Abasi ada mme Christian akpanikọ usụn̄. Paul ekewet ọnọ ẹsọk esop ke Corinth ete: “Nnyịn ikọbọhọ spirit ererimbot emi, edi ikọbọ spirit emi otode Abasi, man oto do nnyịn ikpọfiọk mme n̄kpọ eke Abasi ọnọde nnyịn ke mfọn.” (1 Corinth 2:12) Corinth eset ekedi obio emi ọyọhọde ye spirit ererimbot. Ata ediwak mbon Corinth ẹma ẹdu oburobụt uwem tutu ikọ oro “ndikabade ndi owo Corinth” ama akabade ọwọrọ “ndinam oburobụt ido.” Satan ama anam ikike mme owo okịm. Nte utịp, mmọ ikọfiọkke n̄kpọ ndomokiet iban̄a ata Abasi. (2 Corinth 4:4) Edi, ebede ke edisana spirit esie, Jehovah ama atat ndusụk mbon Corinth enyịn, anamde mmọ ẹkeme ndinyene ifiọk akpanikọ. Spirit Abasi ama an̄wam mmọ ndinam ikpọ ukpụhọde ke uwem man ẹkpekeme ndinyene unyịme ye edidiọn̄ esie. (1 Corinth 6:9-11) Okposụkedi spirit ererimbot okokopde odudu, spirit Jehovah okokop odudu akan.
16. Didie ke nnyịn ikeme ndibọ nnyụn̄ n̄ka iso nnyene spirit Abasi?
16 Ntre n̄ko ke edi mfịn. Edisana spirit Jehovah edi akakan odudu ke ofụri ekondo, ndien Enye esiyak enye ke ntatubọk ọnọ mmọ oro ẹben̄ede ke mbuọtidem. (Luke 11:13) Nte ededi, man inyene spirit Abasi, ana nnyịn inam se ikande edibiọn̄ọ spirit ererimbot. Ana nnyịn n̄ko ikpep inyụn̄ ida Ikọ Abasi isịn ke edinam ke uwem nnyịn kpukpru ini man otodo spirit nnyịn—ekikere nnyịn—odu ke n̄kemuyo ye ekikere Esie. Edieke inamde oro, Jehovah ọyọsọn̄ọ nnyịn idem ndin̄wana ye n̄kari ekededi oro Satan ekemede ndida mbiat nsọn̄idem eke spirit nnyịn.
17. Ke mme usụn̄ ewe ke ikeme ndinyene ndọn̄esịt nto se iketịbede inọ Lot?
17 Okposụkedi mme Christian mîdịghe eke ererimbot, mmọ ẹdu ke ererimbot. (John 17:11, 16) Owo nnyịn ndomokiet ikemeke ndifep spirit ererimbot ofụri ofụri, koro nnyịn imekeme ndinam utom m̀mê idem ndidụn̄ ye mbon oro mîmaha Abasi m̀mê mme usụn̄ esie. Nte esitie nnyịn ke idem nte eketiede Lot, oro ‘okofụhọde’ aban̄a, idem okụtde ndutụhọ ke ntak mbukpo ido mbon Sodom, emi enye okodụn̄de ke otu mmọ? (2 Peter 2:7, 8) Ke edide ntre, nnyịn imekeme ndikop ndọn̄esịt. Jehovah ama ekpeme onyụn̄ anyan̄a Lot, ndien Enye ekeme ndinam ukem oro nnọ nnyịn. Edima Ete nnyịn okụt onyụn̄ ọfiọk mme idaha nnyịn, ndien enye ekeme ndinọ nnyịn un̄wam ye ukeme oro nnyịn iyomde man ikeme ndimụm idaha eke spirit nnyịn n̄kama. (Psalm 33:18, 19) Edieke nnyịn iberide edem ke enye, ibuọtde idem ye enye, inyụn̄ isemede ikot enye, enye ayan̄wam nnyịn ibiọn̄ọ spirit ererimbot, inamke n̄kpọ m̀mê idaha oro nnyịn isobode ẹsọn̄ adan̄a didie.—Isaiah 41:10.
18. Ntak emi nnyịn ikpadade itie ebuana nnyịn ye Jehovah ke ọsọn̄urua n̄kpọ?
18 Nte ikọt Jehovah, ẹnọ nnyịn ifiọk akpanikọ ke ererimbot oro adian̄arede ọkpọn̄ Abasi, emi Satan otụnde usụn̄. Nnyịn ke ntem imenyene inemesịt ye emem oro ererimbot mînyeneke. (Isaiah 57:20, 21; Galatia 5:22) Nnyịn imama utịbe utịbe idotenyịn nsinsi uwem ke Paradise, ebiet oro spirit n̄kpakpa ererimbot emi mîdidụhe aba. Ntre, ẹyak nnyịn ida ọsọn̄urua itie ebuana nnyịn ye Jehovah ke akpan n̄kpọ inyụn̄ idu ke ukpeme man ifep ndifiọrọ ke n̄kan̄ eke spirit ke usụn̄ ekededi. Ẹyak nnyịn itetịm isan̄a ikpere Jehovah, ndien enye ayan̄wam nnyịn ndibiọn̄ọ spirit ererimbot.—James 4:7, 8.
Nte Afo Emekeme Ndinam An̄wan̄a?
• Ke mme usụn̄ ewe ke Satan abian̄a onyụn̄ otụn mme owo usụn̄?
• Didie ke nnyịn ikeme ndifep ndifiọrọ n̄kpọn̄ Jehovah?
• Nso iwụt ke spirit ererimbot okop odudu?
• Didie ke nnyịn ikeme ndibọ nnyụn̄ n̄ka iso nnyene spirit Abasi?
[Ekebe ke page 11]
NTE ỌNIỌN̄ ERERIMBOT OKPỤHỌREDE YE ỌNIỌN̄ ABASI
Akpanikọ enyene adan̄a—mme owo ẹnam akpanikọ idemmọ.
“Ikọ [Abasi] edi akpanikọ.”—John 17:17.
Man ebiere se ifọnde ye se idiọkde, buọt idem ke mme ekikere fo.
“Esịt abian̄a akan kpukpru n̄kpọ, onyụn̄ abiara fap.”—Jeremiah 17:9.
Nnam se amade.
“Owo eke asan̄ade inyụn̄ ikemeke ndinen̄ede ikpat esiemmọ.”—Jeremiah 10:23.
Imọ edi ukpọhọde inemesịt.
“Ima okụk edi orụn̄ kpukpru orụk idiọkn̄kpọ.”—1 Timothy 6:10, NW.
[Ndise ke page 10]
Solomon ama ọfiọrọ ọkpọn̄ utuakibuot akpanikọ onyụn̄ ọwọn̄ọde ebịne mme nsunsu abasi
[Ndise ke page 12]
Ukem nte asuanetop n̄kpọurua, Satan esịn udọn̄ ọnọ spirit ererimbot. Nte afo ọmọbiọn̄ọ enye?