Ndi Edida San̄asan̄a Ọbiọn̄ọ Ediwụt Ima Christian?

NDIDI Christian abuana se ikande edikot Bible, edibọn̄ akam, ye edikwọ ikwọ ke Sunday. Enye abuana edinam n̄kpọ nnọ Abasi ye mme owo. Bible ọdọhọ ete: “Ẹyak nnyịn ikûma ke ikọ-inua ye ke edeme, edi yak nnyịn ima ke edinanam ye ke akpanikọ.” (1 John 3:18) Jesus ama enen̄ede ekere aban̄a mbon efen, ndien mme Christian ẹyom ndikpebe enye. Apostle Paul ama esịn udọn̄ ọnọ ekemmọ mme andinịm ke akpanikọ ‘ndiyọhọ kpukpru ini ke utom Ọbọn̄.’ (1 Corinth 15:58) Edi nso idi utom Ọbọn̄? Nte enye abuana ndidomo ndikpụhọde ndutịm ukara ke ufọn mme ubuene ye mbon oro ẹfịkde? Ndi oro ke Jesus akanam?

Okposụkedi ẹkesịnde udọn̄ ẹnọ Jesus ndisịn idem ke mme mbubehe ukara, enye ikenyịmeke. Enye ama esịn ndibọ ukara obio ubọn̄ ofụri ererimbot oro Satan ọkọnọde enye, enye ikonyụn̄ iyakke ẹdụri imọ ẹsịn ke eneni aban̄ade edikpe tax, ndien enye ama efehe ke ini mme owo ẹkeyomde ndinịm enye ke edidem. (Matthew 4:8-10; 22:17-21; John 6:15) Edi, enye ndida san̄asan̄a ikọbiọn̄ọke enye ndinam n̄kpọ ke ufọn mbon efen.

Jesus okowụk ntịn̄enyịn ke se ididade nsinsi ufọn isọk mbon efen. Okposụkedi enye ndikọbọk owo tọsịn ition nnyụn̄ n̄kọk udọn̄ọ ọkọnọde ibat ibat owo un̄wam eke ibio ini, ukpepn̄kpọ esie ama ada nsinsi edidiọn̄ ọsọk ofụri ubonowo. Ẹkediọn̄ọ Jesus nte “andikpep,” idịghe nte andinam ndutịm unọ un̄wam. (Matthew 26:18; Mark 5:35; John 11:28) Enye ọkọdọhọ ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ.”—John 18:37.

Ndisịn Udọn̄ Nnọ Se Ifọnde Ikan Mbre Ukara

Akpanikọ oro Jesus ekekpepde ikedịghe ekikere mbre ukara. Utu ke oro, akpanikọ oro ọkọkọn̄ọ ke Obio Ubọn̄ oro enye edidide Edidem. (Luke 4:43) Obio Ubọn̄ emi edi ukara eke heaven, ndien enye ayada itie kpukpru ukara owo onyụn̄ ada nsinsi emem ọsọk ubonowo. (Isaiah 9:6, 7; 11:9; Daniel 2:44) Ke ntre, enye edi n̄kukụre ata idotenyịn ubonowo. Nte nditan̄a utọ idotenyịn oro kaban̄a ini iso inen̄ekede iwụt ima ikan edisịn udọn̄ nnọ mme owo ndibuọt idem ke mme owo ndida eti ini iso ndi? Bible ọdọhọ ete: “Mbufo ẹkûbuọt idem ye mbọn̄, ẹkûbuọt ye eyen owo, emi edinyan̄a mîdụhe enye ke idem. Ibifịk ọwọrọ enye ke idem, enye afiak ke ntan esie; ke kpasụk usen oro mme uduak esie ẹtak. Ọfọfọn ọnọ owo eke Abasi Jacob edide andin̄wam enye, eke odoride enyịn ye Jehovah Abasi esie.” (Psalm 146:3-5) Ke ntre utu ke ndisio mme mbet esie ndọn̄ ẹkekwọrọ usụn̄ oro ọfọnde akan ndikama ukara, Jesus ekekpep mmọ ndikwọrọ “gospel Ubọn̄ Abasi.”—Matthew 10:6, 7; 24:14.

Ke ntem, emi edi “utom Ọbọn̄” emi ẹkedọn̄de mme ọkwọrọikọ Christian ẹkekwọrọ. Sia oyomde mme andidu ke idak Obio Ubọn̄ Abasi ẹma kiet eken, Obio Ubọn̄ emi oyokụt unen ke ndisio unana mfep ebe ke ndideme inyene ubonowo ukem ukem. (Psalm 72:8, 12, 13) Emi edi eti mbụk ndien ke akpanikọ odot ndikwọrọ enye.

Mfịn, ẹtịm Mme Ntiense Jehovah idem ẹnọ “utom Ọbọn̄” emi ke idụt 235. Nte ekemde ye ewụhọ Jesus, mmọ ẹkpono kpukpru ukara. (Matthew 22:21) Edi mmọ n̄ko ẹnam ikọ oro Jesus eketịn̄de ọnọ mme anditiene enye ete: ‘Mbufo idịghe mbon ererimbot, edi mma mmek mbufo nsio ke ererimbot.’—John 15:19.

Ndusụk mbon oro ẹkesisịnde udọn̄ ẹnọ mbre ukara ẹma ẹnam ukpụhọde ke ẹma ẹketịm ẹkpep Bible. Owo mbre ukara Italy oro ekedide owo N̄ka Catholic, kpa esop oro ufọkabasi akadade usụn̄, ọkọdọhọ ete: “N̄kodụk mbre ukara ye ekikere nte ke owo ekpenyene ndinen̄ede ntịp nsịn ke n̄kọri ukara ye eke n̄kaowo.” Ke enye ama ekesịn n̄wed ọkpọn̄ utom nte ọbọn̄ obio man ọkwọrọ Obio Ubọn̄ Abasi nte kiet ke otu Mme Ntiense Jehovah, enye ama anam an̄wan̄a ntak emi ukeme mbon mbre ukara oro ẹnyenede eti esịt ẹsikpude. “Se inamde ererimbot emi ọdiọk ntem edi koro ndiọi ido ediwak owo ẹkande ukeme oro ibat ibat nti owo ẹsịnde, idịghe koro mbon oro ẹnyenede eti ido uwem idomoke ndinam mme idaha ke n̄kaowo ẹfọn.”

Nditre ndibuana ke mbre ukara man ẹkwọrọ n̄kukụre ata idotenyịn ẹnọ ubonowo ibiọn̄ọke ata mme Christian ndin̄wam mbon efen ke nti usụn̄. Mbon oro mmọ ẹn̄wamde man ẹsụk ibuot ẹnọ Obio Ubọn̄ Abasi ẹkpep ndikpụhọde ndiọi edu, ndikpono odudu ukara, ndifori uwem ubon mmọ, ndinyụn̄ nse inyene ke usụn̄ oro adade ukem ukem. Se ikam idide akpan n̄kpọ ikan edi ke Mme Ntiense Jehovah ẹn̄wam mme owo ndinyene ntotụn̄ọ itie ebuana ye Abasi.

Mme andikwọrọ Obio Ubọn̄ Abasi ẹnam ufọn ẹnọ mme mbọhọidụn̄ mmọ. Edi ke akande oro, mmọ ẹn̄wam mme owo ndikọn̄ mbuọtidem ke ata ukara oro edidade nsinsi emem ọsọk kpukpru mme ama Abasi. Nte utịp edida san̄asan̄a mmọ, mme Christian emi ẹnyene ifụre ndinọ mme owo ata mbịghi n̄kan un̄wam emi odude mfịn.

[Ekebe/Ndise ke page 7]

Nditre Mbre Ukara man N̄kwọrọ Obio Ubọn̄ Abasi

Átila ekekpep ukpepn̄kpọ ido ukpono aban̄ade uwọrọufụn oto mme oku ufọkabasi ke Belém emi odude ke Brazil ke ini enye ekedide ekpri eyeneren. Enye ama ama ndikop nte ke akpatre, ubonowo ọyọbọhọ ukara ufịk, ndien enye ama odụk n̄ka nsọn̄ibuot, emi enye ekekpepde nte ẹkemede ndinam mme owo ẹneni ẹnyụn̄ ẹsọn̄ ibuot ye ukara.

Átila n̄ko ama ama ndida n̄wed oro ẹkenọde enye, Edikpañ Utöñ nö Aqua Andikpep,a n̄kpep n̄kpọ ye nditọwọn̄ oro ẹkedude ke n̄ka oro. N̄wed emi eneme aban̄a eti edu uwem ye edisụk ibuot nnọ ukara. Emi ama anam idem akpa Átila aban̄a ntak emi mbon oro ẹsikpepde ukpepn̄kpọ uwọrọufụn mîtieneke n̄kokon̄ idaha ido uwem Jesus ye ntak oro ndusụk mmọ ẹsifrede mbon oro ẹfịkde ke ini mmọ ẹbọde ukara. Enye ama ọwọrọ ọkpọn̄ n̄ka oro. Nte ini akakade, Mme Ntiense Jehovah ẹma ẹkọn̄ usụn̄ ufọk esie ẹnyụn̄ ẹneme ye enye ẹban̄a Obio Ubọn̄ Abasi. Ibịghike enye ama ekpep Bible onyụn̄ ọfiọk se idide ata usọbọ inọ ukara ufịk ubonowo.

Ke ufan̄ ini oro, Átila ama odụk mbono ubọ ukpep ufọkabasi Catholic kaban̄a ido ukpono ye mbre ukara. Mme andikpep ẹkedọhọ ke ido ukpono ye mbre ukara “ẹdi ukem.” Enye n̄ko ama odụk mbono esop ke Ufọkmbono Obio Ubọn̄. Nso ukpụhọde ke emi ekedi ntem! Akpan n̄kpọ kiet edi nte ke owo ikọn̄wọn̄ke sika, mmịn, m̀mê nditịn̄ ndek ndek ikọ mbubru. Enye ama ebiere nditiene mmọ nnam utom ukwọrọikọ, ndien ikebịghike enye ama ana baptism. Idahaemi enye okụt ntak emi ukpepn̄kpọ uwọrọufụn mîdịghe ata usọbọ inọ mfịna mbon ubuene.

[Ikọ idakisọn̄]

[Mme ndise ke page 6]

Mme Christian ndida san̄asan̄a ibiọn̄ọke mmọ ndin̄wam mbon efen