Mfọnn̄kan N̄kpọ Oro Ẹkemede Ndinọ Owo

KE EKPEREDE utịt uwem esie, akanieren apostle John ekewet ete: “Nnyeneke idatesịt eke okponde akan edikop eke n̄kopde nte nditọ mi ẹsasan̄a ke akpanikọ.”—3 John 4.

Anam-akpanikọ apostle oro eketịn̄ aban̄a nditọ esie eke spirit. Nte ededi, ediwak ete ye eka ẹkeme nditịn̄ ukem nte apostle oro. Mmọ ẹmenam utom ọkpọsọn̄ ndibọk nditọ mmọ “ke ntụnọ ye item Ọbọn̄,” ẹnyụn̄ ẹkop inemesịt idahaemi ndikụt nditọ mmọ oro ẹma ẹkekọri ẹkponi ‘ẹsan̄ade ke akpanikọ.’ (Ephesus 6:4) Ke nditịm ntịn̄, owo ndikpep nditọ esie ndisan̄a ke usụn̄ nsinsi uwem edi ndinọ mmọ mfọnn̄kan n̄kpọ oro ẹkemede ndinọ owo. Emi edi koro uten̄e Abasi, emi abuanade edidu uwem nte Jehovah oyomde mme Christian ẹdu, asan̄a ye “un̄wọn̄ọ uwem emi odude ke emi ye eke uwem emi edidide.”—1 Timothy 4:8.

Jehovah, kpa mfọnmma Ete, enen̄ede ama mme ete ye eka oro ẹbakde enye ẹnyụn̄ ẹdomode ọkpọsọn̄ ndinọ nditọ mmọ ukpep ke n̄kan̄ eke spirit. Ke ini nditọ ẹnyịmede ukpep emi, mmọ ẹsinyene akwa idatesịt ke ndidiana kiet ye ete ye eka mmọ ke utuakibuot akpanikọ. Nte utọ nditọ oro ẹkọride ẹsịm ọyọhọ idaha, mmọ isifreke utọ ukpep oro. Esinem ndusụk nditọ nditi akpa ini oro mmọ ẹkenamde n̄kpọ ke Ufọkn̄wed Utom Ukara Abasi.a Mîdịghe mmọ ẹsiti akpa ini oro mmọ ẹkekemede ndikot itien̄wed Bible ke ini mmọ ẹkesan̄ade ye ete m̀mê eka mmọ ke utom ukwọrọikọ eke ufọk ke ufọk. Mmọ ẹkpesasan̄a didie ẹfre ini oro ete ye eka mmọ ẹkekotde N̄wed Mi eke Mme Mbụk Bible m̀mê Edikpañ Utöñ nö Aqua Andikpepb ẹnọ mmọ? Gabriel eti se enye enen̄erede ama: “Ke ini n̄kedide isua inan̄ kpọt, eka mi ama esikwọ ikwọ ọnọ mi kpukpru usen ke ini enye etemde udia. Mmosụk nnen̄ede nti ikwọ Obio Ubọn̄ kiet oro enye ekesikwọde. Ke ukperedem, ikwọ Obio Ubọn̄ oro ama an̄wam mi ndikụt nte utom Jehovah edide akpan n̄kpọ.” Eyedi afo n̄ko emeti inem inem ikwọ oro Gabriel etịn̄de aban̄a. Enye edi ọyọhọ ikwọ 157 ke n̄wedikwọ Sing Praises to Jehovah, ndien ibuotikọ ikwọ oro edi “Worship Jehovah During Youth” (Tuak Ibuot nọ Jehovah ke Ini Uyen).

Ikwọ oro ọtọn̄ọ ntem: “Inua nditọ ẹtoro Abasi;/Ẹmenede uyo ẹtoro Jesus.” Ke akpanikọ, ama odu nditọwọn̄ oro ẹkenyenede mfọniso ndidu ye Jesus, ndien eyedi in̄wan̄-in̄wan̄ ye ifụre ifụre edu mmọ ama adat Jesus esịt. Jesus ama akam ada nditọwọn̄ anam uwụtn̄kpọ nte mbon oro ẹdide se ẹkemede ndinọ ukpep onyụn̄ ọdọhọ mme anditiene enye ẹkpebe mmọ. (Matthew 18:3, 4) Ntre nditọwọn̄ ẹnyene nnennen itie ke utuakibuot Jehovah. Ke akpanikọ, ikọ ikwọ oro aka iso ete: “Ih, nseknditọ ẹkpono Abasi.”

Ebede ke eti edu uwem mmọ—ke ufọk, ke ufọkn̄wed, ye ke mme ebiet en̄wen—ediwak nditọwọn̄ ẹmeda ukpono ẹsọk Abasi ye ubon mmọ. Nso edidiọn̄ ke mmọ ẹbọ ntem ndinyene “mme Christian ete ye eka” oro ẹmade akpanikọ. (Deuteronomy 6:7) Mme ete ye eka oro ẹbakde Abasi ẹsọn̄ọ ẹda ke n̄kan̄ Abasi, kpa ima ima Ete emi ekpepde mme edibotn̄kpọ esie ndisan̄a ke usụn̄ eke mmọ ẹkpesan̄ade. Ndien nso edidiọn̄ ke mme ete ye eka emi ẹbọ ntem! Nte mme ete ye eka ẹnọde nditọ mmọ ukpep, mmọ ẹkop inemesịt didie ntem koro “nditọ ẹkop, man mmọ ẹdat esịt”! (Isaiah 48:17, 18) Angélica, oro anamde utom idahaemi ke ọfis n̄kọk itieutom Mme Ntiense Jehovah ke Mexico, ọdọhọ ete: “Ete ye eka mi ẹma ẹsidomo ukeme kpukpru ini ndida mme edumbet Bible nsịn ke edinam. Oro ama anam ini uyen enen̄ede enem mi. Mma n̄kop inemesịt.”

Mme Christian emi ẹnyịme ke ọfọn afo nditịm n̄kpeme inyene eke spirit fo. Eyedi afo edi uyen oro ẹbọkde ke ubon oro enyenede nti ido Christian. Edieke edide ntre, ikwọ oro eteme fi ete: “Mme Christian uyen, mbufo ẹsana.” Ini eyedi oro ediyomde afo anam ubiere idemfo, ke ntre idahaemi “ẹkpep ndibere ye Jah Jehovah. /Mbufo ẹkûyom uwọrọetop.”

Edieke afo eduede anam uwọrọetop edi akpa ke uwem fo, kpukpru ukpep oro afo ọbọde ẹkeme ndiwọrọ ikpîkpu ndien idotenyịn ini iso fo ekeme ndikpa mfụhọ. Udọn̄ ediwọrọ etop ekeme ndinam afo udụhe aba ke ukpeme. Emi anam ndusụk uyen ẹdụk ndụk ye mbon oro mîdọn̄ke enyịn iban̄a mme idaha Christian, okposụkedi mmọ ẹtiede nte nti owo ẹnyụn̄ ẹyede. Oro edi se iketịbede inọ Tara, akpan owo oro ẹkewụtde ke vidio Young People Ask—How Can I Make Real Friends? Ukem nte Tara, uyen Christian ekededi oro odụkde ndụk ye mbon oro mîdaha utuakibuot akpanikọ ke akpan n̄kpọ eyedi edifiọk nte ke ebebịghi m̀mê awawara “idiọk nsan̄a abiat eti ido,” nte ikwọ oro ọdọhọde. Esida owo ediwak isua ndikọri nti ido, edi ẹkeme ndibiat mmọ ke ediyịp enyịn.

Edi akpanikọ, imemke utom ndidu uwem uten̄e Abasi. Kpa ye oro, nte ikwọ oro akade iso ndidọhọ, “ke nditi Abasi ke uyen fo,/Nam n̄kpọ Jah ke spirit ye ke akpanikọ,” ndien afo eyesịn itiat idakisọn̄ oro edinamde afo okụt ata unen. Ndien “ọyọkọri okop idatesịt.” Afo eyedi edifiọk nte ke sia odude ke idak ima ima ukpeme Jehovah, n̄kpọ ndomokiet ikemeke ndikpan fi ndinam se inende ke enyịn esie. Oro edi usụn̄ ndikabade ndi akwa owo oro ọkọride esịm ọyọhọ idaha onyụn̄ abakde Abasi. Ke akande oro, ndida ufọn oro ọbọde oto ukpep Christian nnam n̄kpọ ọniọn̄ ọniọn̄ ayanam afo “anam esịt Abasi enem.” Nso akwa ukpono ke owo ekeme ndinyene n̄kan emi?—Mme N̄ke 27:11.

Ke ntre, mme uyen, ẹti kpukpru ini ẹte ke ukpep oro mbufo ẹbọde ẹto Jehovah ye mme ete ye eka mbufo oro ẹdide Christian edi ọsọn̄urua n̄kpọ. Akwa ima oro mmọ ẹmade mbufo akpakam onụk mbufo ndinam se inende ke enyịn Jehovah. Ukem nte Jesus Christ ye anam-akpanikọ akparawa Timothy, mbufo ẹyenam Ete mbufo eke heaven ye ete ye eka mbufo eke obụk ẹnem esịt. Ndien edieke mbufo n̄ko ẹdinyenede nditọ, etie nte mbufo ẹyenyịme ye Angélica, oro ikasiakde ke mbemiso, emi ọdọhọde ete: “Edieke ndinyenede eyen, nyesịn ọkpọsọn̄ ukeme ndisịn ima Jehovah ke esịt esie toto ke uyen, man ima emi edi akpan edumbet oro akarade uwem esie.” Ke akpanikọ, mfọnn̄kan n̄kpọ oro ẹkemede ndinọ owo edi ndiwụt enye nnennen usụn̄ oro adade esịm nsinsi uwem!

[Mme Ikọ idakisọn̄]