Etịbe Oro Enemde Abasi Esịt
MBỤK emi inemke. Ọbọn̄ an̄wan Athaliah ama owot mme owo onyụn̄ ada n̄kari ọbọ ebekpo ubọn̄ Judah enyene. Enye ama ọtọn̄ọ ndikara Judah, sia ekekerede ke imowot kpukpru nditọ ufọk ubọn̄ oro ẹkenyenede unen ndikara. Ọbọn̄ an̄wan Jehosheba, kpa n̄wan emi ekenen̄erede ama Jehovah ye Ibet Esie, ama adaha uko uko ekemen Jehoash, eyen ufọk ubọn̄ emi ekedide nsekeyen, ekedịp. Jehosheba ye Jehoiada ebe esie, kpa Akamba Oku, ẹma ẹdịp Jehoash ke ufọk mmọ ke okụre temple ke ofụri isua itiokiet.—2 Ndidem 11:1-3.
Ke Jehoash ama ekesịm isua itiaba, Jehoiada Akamba Oku ama eben̄e idem ndiyari enye ntinya nnyụn̄ ndorode ọbọn̄ an̄wan oro ekeyịpde-yịp ebekpo ubọn̄. Jehoiada ama osio eyeneren emi ke itie udịbe onyụn̄ ayari enye ntinya nte enye oro enyenede unen ndikara. Mme ekpeme ufọk edidem ẹma ẹsio Athaliah, idiọk ọbọn̄ an̄wan oro ẹduọk ke an̄wa temple, ẹwot enye; ndien emi ama enem mme owo onyụn̄ ofụre mmọ ke idem. Ke ndinam ntem, Jehoiada ye Jehosheba ẹma ẹtịp ekese ẹsịn ke ndinam utuakibuot akpanikọ afiak ọtọn̄ọ ke Judah. Ke edide akpan n̄kpọ akan, mmọ ẹma ẹtịp ẹsịn ke ndinam udịm ufọk ubọn̄ David emi Messiah ekenyenede ndiwọrọ nto, aka iso.—2 Ndidem 11:4—12:1.
Obufa edidem emi ekenyene n̄ko ndinam n̄kpọ oro edinemde Abasi esịt. Ufọk Jehovah ama enen̄ede abiara. Ọkpọsọn̄ idiọk udọn̄ oro Athaliah ekenyenede ndida ikpọn̄ n̄kara Judah ikayakke ẹse temple enyịn aba, onyụn̄ anam mme owo ẹwo temple. Ntre, Jehoash ama ebiere ke esịt esie ndidiọn̄ nnyụn̄ mfiak mbon mme n̄kpọ temple ke itie. Ye unana ubiatini, enye ama ọnọ uyo ete ẹtịp okụk oro ẹdidade ẹdiọn̄ ufọk Jehovah. Enye ọkọdọhọ ete: “Ofụri silver emi ẹkam ẹdade ẹsọk ufọk Jehovah, kpa silver mmọ eke ẹbatde, ye silver ufak owo nte ẹkọmde ẹnọ enye, ye ofụri silver eke odụkde owo ke esịt ndida nsọk ufọk Jehovah, yak mme oku ẹbọ mme ọdiọn̄ọ mmọ ke idem mmọ: yak mmọ ẹnyụn̄ ẹdiọn̄ n̄wụre ufọk, ke kpukpru ebiet emi mmọ ẹkụtde nte owụrede.”—2 Ndidem 12:4, 5.
Mme owo ẹma ẹtịp etịbe ke unyịmesịt. Nte ededi, mme oku ikadaha ofụri esịt inam utom edidiọn̄ temple oro ẹkedọn̄de mmọ. Ntre, edidem ama ebiere ndinam utom oro ke idemesie onyụn̄ ọnọ uyo ete ẹsịn kpukpru etịbe ke san̄asan̄a ekebe. Enye ama ọdọhọ Jehoiada ese aban̄a oro, ndien mbụk oro ọdọhọ ete: “Ekem Jehoiada oku ada ekebe kiet, etịbi odudu ke okukịp esie, onyụn̄ ada enye ọdiọk ke n̄kan̄ itie-uwa, ke nnasia nte owo odụkde ke ufọk Jehovah: ndien mme oku eke ẹkpemede usụn̄ ẹmen kpukpru silver eke ẹdade ẹsọk ufọk Jehovah ẹsịn do. Edikem adan̄aemi mmọ ẹkụtde ẹte ke silver awak ke ekebe oro, andiwet n̄wed edidem ye akamba oku ẹdọk, ẹkeda enye ẹbọp ke ekpat, ẹnyụn̄ ẹbat silver oro mmọ ẹkụtde ke ufọk Jehovah. Ndien mmọ ẹda silver oro mmọ ẹdomode, ẹsịn ke ubọk mme anam-utom emi ẹsede n̄kpọ ufọk Jehovah; ndien mmọ ẹsio enye ẹnọ mme [anamusọ eto], ye mme [ọbọpufọk], eke ẹnamde ufọk Jehovah, ye mme ọbọp-ibibene, ye mme ọsọi-itiat, man ẹnyụn̄ ẹdep eto ye edisọi itiat eke ẹdade ẹdiọn̄ n̄wụre ufọk Jehovah, ye ke kpukpru se mmọ ẹsiode ẹban̄a ufọk, ẹte ẹdiọn̄ enye.”—2 Ndidem 12:9-12.
Mme owo ẹketịp etịbe ke ofụri esịt. Ẹma ẹfiak ẹdiọn̄ ufọk oro ẹsidade ẹtuak ibuot ẹnọ Jehovah, man ẹka iso ẹtuak ibuot ẹnọ enye ke usụn̄ oro enyenede uku. Ntre, ẹma ẹda kpukpru okụk oro ẹketịpde ẹnam n̄kpọ nte odotde. Edidem Jehoash ama okụt ete ke ẹnam oro!
Mfịn, esop Jehovah oro ẹkụtde ke enyịn enen̄ede okụt ete ke ẹda kpukpru okụk oro ẹtịpde ẹnam n̄kpọ nte odotde man ẹmenede utuakibuot Jehovah ke enyọn̄, ndien ata mme Christian ẹsitịp n̄kpọ ke ofụri esịt nte Israel eset ẹketịpde. Eyedi afo ama etiene etịp etịbe man ẹda ẹnam utom Obio Ubọn̄ ke isua utom oko. Yak ise ndusụk usụn̄ oro ẹkedade etịbe fo ẹnam n̄kpọ.
MME N̄WED YE MME VIDIO ORO ẸSIODE
Ẹma ẹmịn̄ mme n̄wed ẹnyụn̄ ẹsio mme vidio ẹtienede mi ẹnọ ẹsuan ẹnyụn̄ ẹda ẹkpep mme owo n̄kpọ ke ofụri ererimbot:
• Ikpọ n̄wed: 47,490,247
• N̄kpri n̄wed: 6,834,740
• Ndiye uduot n̄kpri n̄wed: 167,854,462
• Mme n̄wed usenọfiọn̄: 5,405,955
• Magazine: 1,179,266,348
• Tract: 440,995,740
• Vidio: 3,168,611
Ẹsimịn̄ mme n̄wed ke Africa, Edem Edere, Ufọt Ufọt, ye Edem Usụk America, Asia, Europe, ye mme idụt oro ẹdude ke isuo Pacific—kpukpru ẹdi idụt 19.
“Ami n̄kere Katelyn May. Ndi isua itiaita. Mmenyene $28 (n̄kpọ nte ₦3,720.64), mbọk ẹbọ okụk emi ẹda ẹdian ẹdep ukwak umịn̄n̄wed. Ami ekpri eyenete mbufo an̄wan, Katelyn.”
“Nnyịn ima isop idem nte ubon ineme iban̄a mbufa ukwak umịn̄n̄wed emi. Nditọ nnyịn, emi ẹdide isua 11 ye isua 9 ẹma ẹbiere ndisio okụk ekpatọfọn̄ mmọ nnọ etịbe mmọ. Esịt enem nnyịn ndinọ etịbe nnyịn ye eke nditọ nnyịn ẹsọk mbufo.”
MME UFỌK ORO ẸBỌPDE
Mme Ntiense Jehovah ẹkebọp mme ufọk oro ẹsiakde ke idak mi ndida nnam n̄kpọ Abasi:
• Mme Ufọkmbono Obio Ubọn̄ ke mme idụt oro mîtịmke inyene okụk: 2,180
• Mme Ufọk Mbono: 15
• Mme n̄kọk itieutom: 10
• Mme anamutom unyịmesịt ke utom uyọhọ ini oro ẹbọpde n̄kpọ ke ofụri ererimbot: 2,342
“Utịturua emi ke ikodụk akpa mbono esop ke obufa Ufọkmbono Obio Ubọn̄ nnyịn. Esịt enen̄ede enem nnyịn ndinyene eti itie ndisop idem ntoro Ete nnyịn, Jehovah Abasi. Nnyịn imọkọm Jehovah inyụn̄ ikọm mbufo ke ndibọp ediwak Ufọkmbono Obio Ubọn̄ nnọ nnyịn. Ke akpanikọ, Ufọkmbono Obio Ubọn̄ nnyịn ọnọ mbọhọ nnyịn uku.”—Chile.
“Nditọete ẹnen̄ede ẹwụt esịtekọm ẹban̄a un̄wam oro esop Jehovah ọnọde. Tutu esịm mfịn emi, nnyịn isụk itetịn̄ iban̄a inem inem itie ebuana oro ikenyenede ye mbon oro ẹkebọpde Ufọkmbono Obio Ubọn̄.”—Moldova.
“Ke ndondo emi ke ami ye n̄wan mi ikadia usọrọ ndọ nnyịn eke ọyọhọ isua 35. Nnyịn ikosụk ikere se ikpọnọde kiet eken ke usen usọrọ oro, ndien nnyịn ima ibiere nditiene nnọ Jehovah ye esop esie n̄kpọ, koro mîkpedịghe Jehovah ye esop esie, ekeme ndidi ndọ nnyịn akpakabiara. Mbọk ẹda okụk oro isịnde mi ẹbọp Ufọkmbono Obio Ubọn̄ ke mme idụt oro mîtịmke inyene okụk.”
“Ibịghike n̄kọbọ n̄kpọ-akpa, ndien sia se nyomde ye se inanade mi mîwakke, nyom mbufo ẹda okụk oro nsịnde mi ẹbọp mme Ufọkmbono Obio Ubọn̄ oro ẹnen̄erede ẹnana ke ediwak idụt.”
UN̄WAM ẸNỌDE MBON ORO AFANIKỌN̄ ESỊMDE
Afanikọn̄ esitịbe ke mbuari ke mme akpatre usen emi. Ediwak Mme Ntiense Jehovah ẹsitịp okụk efen efen man ẹkpeda ẹn̄wam nditọete mmọ ke mme ebiet oro afanikọn̄ etịbede. Mbọk ẹti ẹte ke etịbe oro ẹtịpde man ẹda ẹn̄wam mbon oro afanikọn̄ esịmde edi ubak utom oro inamde ke ofụri ererimbot. Ndusụk ebiet oro Mme Ntiense Jehovah ẹken̄wamde mbon oro afanikọn̄ ekesịmde ẹdi emi:
• Africa
• Asia
• N̄kan̄ Caribbean
• Mme Isuo Pacific
“Ami ye ebe mi imenen̄ede ikọm mbufo iban̄a n̄kpọ ẹkenọde ẹda ẹn̄wam nnyịn ke ini oyobio akabiatde ọkọm ufọk nnyịn. Emi ama an̄wam nnyịn ifiak idori ọkọm ufọk nnyịn. Esịt enen̄ede enem nnyịn ke emi mbufo ẹken̄wamde nnyịn usọp usọp.”
“Ami n̄kere Connor, nnyụn̄ ndi isua 11. Ama ọdọn̄ mi ndinọ un̄wam ke ini n̄kokụtde se iketịbede ke ini akwa unyekisọn̄ akanamde akpa adaha ke ofụri ikpehe Inyan̄ibom India owot ediwak tọsịn owo. Mmenịm ke se nnọde emi ayan̄wam nditọete mi.”
MME ASAN̄AUTOM ORO ẸNAMDE SAN̄ASAN̄A UTOM UYỌHỌ INI
Ediwak Christian ẹnam utom uyọhọ ini nte mme ọkwọrọ ikọ m̀mê mme anamutom Bethel. Ndusụk mbon unyịmesịt oro ẹnamde utom uyọhọ ini, oro ẹdade etịbe imaesịt ẹn̄wam, ẹdi:
• Mme isụn̄utom: 2,635
• Mme esenyịn oro ẹsan̄ade-san̄a: 5,325
• Mbon Bethel: 20,092
“Sia mmen̄kemeke ndidi ndinam utom ke Bethel idahaemi, mbọk ẹbọ etịbe emi ye ufiop ufiop ima mi. Mma n̄kpon, nyedi ndinam utom ọkpọsọn̄ ke Bethel.”—Eyeneren isua ition.
Nditat Utom Unọ Ukpep Bible
Jesus Christ ọkọdọhọ mme anditiene enye ete “ẹkenam mme owo ke kpukpru idụt ẹdi mbet.” (Matthew 28:19) Ke ndinam uyo Jesus, Mme Ntiense Jehovah ke ẹsịn idem ẹkwọrọ ikọ ẹnyụn̄ ẹkpep mme owo etop Bible ke idụt 235. Mmọ ẹmịn̄ ẹnyụn̄ ẹsuan mme n̄wed Bible ke usem 413.
Ke akpanikọ, ini oro Christian adade ekpep mme owo n̄kpọ aban̄a Abasi ye uduak Esie edi akakan etịbe oro enye ekemede nditịp. Mme Ntiense Jehovah ẹnen̄ede ẹda ini ye odudu mmọ ẹn̄wam mbọhọidụn̄ mmọ. Mmọ ẹsitat ubọk ẹtịp okụk n̄ko ndien kpukpru se mmọ ẹtịpde, edide okụk m̀mê mme n̄kpọ efen ẹn̄wam ndinam ẹfiọk enyịn̄ ye uduak Jehovah ke ofụri isọn̄. Jehovah akpakam aka iso ọdiọn̄ ukeme oro ẹsịnde mi ndin̄wam mbon en̄wen ẹkpep ekese n̄kpọ ẹban̄a enye. (Mme N̄ke 19:17) Ndinyịme ndinọ utọ un̄wam oro enem Jehovah esịt!—Mme Hebrew 13:15, 16.
[Ekebe ke page 28-30]
Mme Usụn̄ Emi Ndusụk Owo Ẹmekde Ndinọ Enọ
MME ETỊBE KABAN̄A UTOM OFỤRI ERERIMBOT
Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke mme ekebe etịbe oro ẹdiande idiọn̄ọ emi: “Contributions for the Worldwide Work—Matthew 24:14.”
Ke ọfiọn̄ kiet kiet, mme esop ẹsinọ okụk emi aka n̄kọk itieutom Mme Ntiense Jehovah emi esede aban̄a idụt mmọ. Emekeme ndinọ okụk imaesịt nnennen ẹsọk n̄kọk itieutom oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.
ENỌ EMI ẸDIOMIDE-DIOMI
Ke adianade ye edinọ okụk nte enọ, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ emi ẹsịne:
Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.
Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.
Inyene ye Mbubehe: Ẹkeme ndinọ Watch Tower inyene ye mbubehe nte ata enọ.
Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte ata enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower. ▸
Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.
Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.
Kaban̄a ntọt efen efen, afo emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi mîdịghe emekeme ndinyene nneme ye n̄kọk itieutom Mme Ntiense Jehovah emi esede aban̄a idụt mbufo.
Jehovah’s Witnesses
P.M.B. 1090,
Benin City 300001,
Edo State, Nigeria
Telephone: (234) 01-3204850-4
Ebiet Ẹdade Ndise Ẹto ke page 27]
Vidio Faithful: Stalin: U.S. Army photo