Eti Edu Uwem Ada Nti Utịp Edi

MMA kiet ye n̄kpri nditọ esie ita ẹma ẹtọn̄ọ ndikpep Bible ye Mme Ntiense Jehovah ke ekpri isuo kiet oro odude ke usụk usụk Japan. Ke ntak emi, mbon oro ẹdụn̄de ke isuo emi odude nsannsan mi, oro mme owo ẹnyụn̄ ẹdude uwem eset ikesisioroke mma emi uyo aba. Enye ọdọhọ ete: “Se ikabiakde mi ikan ekedi ke mmọ ikesisioroke ebe mi ye nditọ mi uyo n̄ko.” Kpa ye oro, mma emi ama ọdọhọ nditọ esie ete: “Nnyịn inyene ndika iso n̄kọm mmọ ke ntak Jehovah.”—Matthew 5:47, 48.

Enye ama esikpep nditọ esie ke ufọk ndifọn ido ye mme mbọhọidụn̄ kpa ye oro mme mbọhọidụn̄ oro mîkesisioroke mmọ uyo. Ke ini mmọ ẹkekade itie unọ idem inemesịt n̄kann̄kụk emi ufiop idịm odude, kpa ebiet emi mmọ ẹsikade kpukpru ini, nditọ emi ẹma ẹsịne ke ubomisọn̄ ẹkpep nte ẹdikọmde mme owo. Ke mmọ ẹma ẹkesịm itie unọ idem inemesịt emi, nditọ emi ẹma ẹsikọm mme owo idara idara ẹte, “Ẹda do-o!” Ubon emi ẹma ẹsika iso ndikọm kpukpru mbon oro mmọ ẹkesobode, okposụkedi mme mbọhọidụn̄ mmọ mîkesisioroke mmọ uyo. Kpa ye oro, mme owo ẹma ẹkụt nti edu nditọ emi.

Ke akpatre, mme mbọhọidụn̄ ẹma ẹtọn̄ọ ndibọrọ mmọ ẹkọm. Ke isua iba ẹma ẹkebe, ekpere ndidi kpukpru owo ke isuo emi ẹma ẹsibọrọ ubon emi ekọm. Mbon isuo emi ẹma ẹnyụn̄ ẹtọn̄ọ nditie ufan ufan ye kpukpru owo, akpan akpan ye mbonubon emi. Udiana andikara obio ama oyom ndinọ nditọ oro enọ ke ukeme oro mmọ ẹkesịnde man ukpụhọde emi odu. Edi eka mmọ ama anam enye ọfiọk ke nditọ imọ ẹkekam ẹnam se mme Christian ẹkpenamde. Ekem, ke ini ẹketemde udomo edinọ utịn̄ikọ ke ofụri isuo oro, eyen mmọ kiet ama etịn̄ nte eka mmimọ ekekpepde mmimọ ndikọm mme owo ufan ufan edide mmọ ẹbọrọ m̀mê ibọrọke. Eyen emi ekemen akpa ke udomo oro, ndien ẹma ẹwet se enye eketịn̄de ẹsịn ke n̄wedmbụk n̄kpọntịbe obio. Mfịn, ubon emi ẹdat esịt ndikụt ke ndidu uwem nte mme Christian ada nti utịp edi. Esinen̄ede emem utom ndibuana eti mbụk ye mbon oro ẹtiede ufan ufan.