Mbụk Eyouwem

Ndibọk Nditọ Itiaita ke Usụn̄ Jehovah Ekedi N̄kpọ-Ata ye Idatesịt

NTE JOYCELYN VALENTINE OBỤKDE

Ebe mi ama aka ndinam utom ke idụt en̄wen ke 1989. Enye ọkọdọhọ ke imọ iyesinọ okụk ẹdi ufọk man n̄kpada nse mban̄a nditọ nnyịn itiaita. Ediwak urua ẹma ẹbe edi n̄kokopke baba n̄kpọ kiet nto enye. Ediwak ọfiọn̄ ẹma ẹnyụn̄ ẹbe edi n̄kosụk n̄kopke baba n̄kpọ kiet nto enye. Mma nsisọn̄ọ idemmi esịt nte, ‘Mmọfiọk ke ndondo oro n̄kpọ ọfọnde ke enye eyedi ufọk.’

ENYỊN ama anan mi sia mmen̄kenyeneke okụk ndise mban̄a ubon mi. N̄kenịmke se iketịbede, mma nsitaba idap okoneyo mbụp idemmi nte, ‘Enye akpasasan̄a didie anam ubon esie orụk n̄kpọ eke etiede ntem?’ Ke akpatre, mma ndinịm n̄kpọ oro mmen̄kamaha ndinịm mi, oro edi ke ebe mi ama efehe ọkpọn̄ nnyịn. Tutu mfịn emi, isua 16 ke enye ama ọkọkpọn̄ nnyịn, enye isụk itoho idi. Ke ntak emi, n̄kọbọk nditọ mi ikpọn̄. Emi ikedịghe ifia ubọk kiet, edi ndikụt nte nditọ mi ẹsan̄ade ke usụn̄ Jehovah enen̄ede adat mi esịt. Nte ededi, mbemiso ntịn̄de nte n̄kpọ eketiede ye ubon nnyịn, yak ntịn̄ nnọ fi nte ẹkebọkde mi.

Ndiyom Ndausụn̄ Bible

N̄kamana ke 1938 ke Jamaica, emi odude ke Isuo Caribbean. Okposụkedi Papa mîkenyeneke ufọkabasi emi enye ekesikade, enye akada idemesie nte owo Abasi. Enye ama esidọhọ mi n̄kot n̄wed Psalm nnọ imọ ke okoneyo. Ikebịghike mma n̄keme ndikot ediwak psalm ke ibuot. Mama ekesika ufọkabasi n̄kann̄kụk, ndien enye ama esida mi aka mme mboho ido ukpono ke ini ke ini.

Ẹma ẹsisian nnyịn ke mme mboho oro ke Abasi esida nti owo ọnyọn̄ heaven onyụn̄ ọfọp ndiọi owo ke hell ikan̄ ke nsinsi. Ẹma ẹsisian nnyịn n̄ko ke Jesus edi Abasi ye nte ke enye ama nditọwọn̄. Emi ama afịna mi onyụn̄ anam mi n̄kop ndịk mban̄a Abasi. Mma nsikere nte, ‘Ntak emi Abasi emi amade nnyịn okpotụhọrede owo ke ikan̄?’

Ekikere aban̄ade hell ikan̄ ama esinen̄ede anam mi ndịk. Nte ini akakade, mma nda leta mbọ ukpepn̄kpọ Bible emi Ufọkabasi Seventh-Day Adventist ekenịmde. Mmọ ẹkekpep ke Abasi iditụhọkede ndiọi owo ke nsinsi, edi utu ke oro, ke edifọfọp mmọ ke ikan̄ ẹkabade ntọn̄. Emi ama etie nte esịne ifiọk, mma nnyụn̄ ntọn̄ọ ndisidụk mme mboho ido ukpono mmọ. Edi ukpepn̄kpọ mmọ ikan̄wan̄ake mi, ndien se n̄kekpepde ikanamke mi n̄kpụhọ mme ukwan̄ ekikere oro n̄kenyenede mban̄a eti ido uwem.

Mme owo ẹkesida use nte idiọkn̄kpọ ini oro. Edi ami ye ediwak owo en̄wen ikenịm ke mbon oro ẹsinyenede ebuana ye ediwak owo ẹdi mme anam use. Ntem, nnyịn ikenịm ke eren ye n̄wan emi mîdọhọ ndọ, emi ẹsinyenede ebuana ye kiet eken kpọt inamke idiọkn̄kpọ. (1 Corinth 6:9, 10; Mme Hebrew 13:4) Nte n̄kasan̄ade nnyene nditọ itiokiet edi oro ye unana edidọ ebe.

Ndinam N̄kọri eke Spirit

Ke 1965, Vaslyn Goodison ye Ethel Chambers ẹma ẹdidụn̄ ke obio Bath emi ekedide mbọhọ obio nnyịn. Mmọ ẹkedi mme asiakusụn̄, m̀mê mme asan̄autom uyọhọ ini Mme Ntiense Jehovah, ndien mmọ ẹma ẹnyene nneme usen kiet ye ete mi. Enye ama enyịme mmọ ẹkpep Bible ye imọ. Edieke n̄kodude ke ufọk ke ini mmọ ẹkedide, mmọ ẹma ẹsinyene nneme ye ami n̄ko. Okposụkedi n̄kenen̄erede nnyene eyịghe mban̄a Mme Ntiense Jehovah, mma nnyịme ndikpep Bible ye mmọ man n̄kpowụt ke mmọ inenke.

Mma nsibụp ekese mbụme ke ini ẹkekpepde mi n̄kpọ, ndien Mme Ntiense ẹma ẹsida Bible ẹbọrọ kpukpru mbụme oro. Mmọ ẹma ẹnam mi mfiọk ke mme akpan̄kpa ifiọkke baba n̄kpọ kiet ndien ke mmọ ibọhọ ndutụhọ ke hell. (Ecclesiastes 9:5, 10) Mma n̄kpep n̄ko mban̄a idotenyịn nsinsi uwem ke Paradise isọn̄. (Psalm 37:11, 29; Ediyarade 21:3, 4) Okposụkedi ete mi eketrede ukpepn̄kpọ Bible esie, ami mma ntọn̄ọ ndidụk mbono esop Mme Ntiense Jehovah ke esop n̄kann̄kụk. Nte ẹkesinamde n̄kpọ emem emem ye ke nde ke nde ke mme mbono esop ama anam n̄kpep ekese n̄kpọ mban̄a Jehovah. Mma ndụk mme mbono circuit ye mme mbono district n̄ko, oro edi ikpọ mboho Mme Ntiense Jehovah. Ndikpep Bible ntem ama anam enen̄ede ọdọn̄ mi ndituak ibuot nnọ Jehovah nte enye enyịmede. Nte ededi, n̄kpọ ubiọn̄ọ ama odu.

Ini oro n̄kodụn̄ ye eren oro okobonde ita ke otu nditọ mi itiokiet. Mma n̄kpep ke Bible ke Abasi akpan edinyene ebuana ke owo mîdọhọ ndọ, ndien esịt ama ọtọn̄ọ ndibiom mi. (Mme N̄ke 5:15-20; Galatia 5:19) Nte ima oro n̄kamade Abasi okokponde, ama ọdọn̄ mi ndidu uwem ekekem ye ibet Abasi. Ke akpatre, mma nnam ubiere. Mma nsian nda-ntie mi ke nnyịn inyene ndidọ ndọ mîdịghe nnyịn idianade itie. Okposụkedi nda-ntie mi mîketieneke ikpep se n̄kekpepde, nnyịn ima idọ ndọ ke August 15, 1970, isua ition tọn̄ọ Mme Ntiense oro ẹkenyene nneme ye ami. Mma nna baptism ke December 1970 ndiwụt ke mma nyak idem nnọ Abasi.

Amaedi utom ukwọrọikọ, tutu amama ndifreke akpa usen oro n̄ketienede n̄ka ukwọrọikọ. Idem ama enyek mi, n̄konyụn̄ mfiọkke nte n̄kpọtọn̄ọde nneme Bible. Ke nditịm ntịn̄, esịt ama enem mi ke ini akpa enyeneufọk eketrede nneme nnyịn ke mbuari. Nte ededi, ikebịghike idem ikesinyekke mi aba. Ke mbubịteyo usen oro, esịt ama enem mi koro mma nnyene mbio mbio nneme Bible ye ediwak owo nnyụn̄ nnọ mmọ mme n̄wed ẹkọn̄ọde ke Bible.

Ndinam Ubon Ọsọn̄ Idem ke N̄kan̄ eke Spirit

Etisịm 1977, n̄kedinyene nditọ itiaita. Mma mbiere ndisịn ofụri ukeme man n̄n̄wam ubon mi ẹnam n̄kpọ Jehovah. (Joshua 24:15) Ntre mma nsịn ifịk ndinịm ukpepn̄kpọ Bible ubon ofụri ini. Ke ntak mba, ndusụk ini idap ama esimen mi ke ini eyen mi kiet okokotde ikpehe ekikere uyo ọwọrọ, ndien mmọ ẹkenyene ndidemede mi. Edi mba ikesikpanke nnyịn ndikpep Bible nte ubon.

Mma nsiwak ndibọn̄ akam n̄ko ye nditọ mi. Mma nsikpep mmọ ndibọn̄ akam ke idemmọ nnọ Jehovah ke ndondo oro mmọ ẹkekponide ẹkem. Mma nsikụt nte ke kpukpru mmọ ẹbọn̄ ọkpọkpọ akam mbemiso ẹdede. Mma nsibọn̄ akam ye eyen kiet kiet oro mîkokponke ikem ndibọn̄ akam.

Ke ntọn̄ọ ntọn̄ọ, ebe mi ikesiyakke nda nditọ n̄ka mbono esop. Nte ededi, enye ama okpụhọde ekikere ke ini enye ekerede nte imọ idisede iban̄a nditọ emi ke ini n̄kade mbono esop. Enye ama esima ndiwọrọ an̄wa mbubịteyo n̄kese mme ufan esie, edi ndikere nte idisan̄ade ye nditọ itiaita ama afịna enye! Nte ini akakade, enye ama esikam an̄wam mi etịm nditọ emi idem man ẹkpesan̄a ye ami ẹka Ufọkmbono Obio Ubọn̄.

Ikebịghike ama emehe nditọ emi ndisidụk kpukpru mbono esop nnyụn̄ mbuana ke an̄wan̄wa utom ukwọrọikọ. Ke ini nduọkodudu utịt isua ufọkn̄wed, mmọ ẹma ẹsiwak ndikwọrọ ikọ ọtọkiet ye mme asiakusụn̄, m̀mê mme asan̄autom uyọhọ ini. Emi ama anam nditọ mi ẹnen̄ede ẹma esop ye utom ukwọrọikọ.—Matthew 24:14.

Ini Udomo

Ebe mi ama ọtọn̄ọ ndisika idụt en̄wen n̄kanam utom man ubon nnyịn ekpenyene okụk. Enye ama esikpọn̄ ubon ke anyan ini, edi esidi ufọk ke ini ke ini. Nte ededi, tọn̄ọ enye ọkọkpọn̄ nnyịn ke 1989, enye itoho idi. Nte mma n̄ketetịn̄, ebe mi ndikpọn̄ mi ama anam ibuot oyon̄ mi. Mma nsitua nnyụn̄ mbọn̄ akam ofụri esịt ke okoneyo nnọ Jehovah nyom ndọn̄esịt ye ime, ndien ama etie mi nte ke enye ama eyere akam mi. Mme utọ itie N̄wed Abasi nte Isaiah 54:4 ye 1 Corinth 7:15 ẹma ẹsidọn̄ mi esịt ẹnyụn̄ ẹnọ mi odudu oro n̄koyomde man n̄ka iso ndu uwem. Ke adianade do, mme iman ye mme ufan ke esop Christian ẹma ẹsidọn̄ mi esịt ẹnyụn̄ ẹnọ mi n̄kpọ udu uwem. Mmenen̄ede n̄wụt esịtekọm nnọ Jehovah ye ikọt esie mban̄a un̄wam oro mmọ ẹnọde mi.

Nnyịn ima isobo mme idomo en̄wen. Isan̄ kiet, ẹma ẹsio eyenan̄wan mi kiet ke esop ke ntak ido oro mîkemke ye N̄wed Abasi. Mmenen̄ede mma kpukpru nditọ mi, edi ndisọn̄ọ nda ye esop Jehovah edi akpa. Ntre, ini oro, ami ye nditọ mi eken ima inen̄ede itiene ndausụn̄ Bible aban̄ade nte ẹkpenamde n̄kpọ ye owo oro ẹsiode ẹfep ke esop. (1 Corinth 5:11, 13) Mbon oro mîkọfiọkke ntak emi ikanamde oro ẹma ẹsua ẹnọ nnyịn. Nte ededi, ke ini ẹkefiakde ẹda eyen mi ke esop, ebe esie ama asian mi ke nnyịn ndikọsọn̄ọ nnịm mme edumbet Bible ama enen̄ede otụk imọ esịt. Ebe eyen mi oro ke anam n̄kpọ Jehovah idahaemi ye ubon esie.

Ndiyọ Unana Okụk

Ke ini ebe mi ọkọkpọn̄de nnyịn, n̄kenyeneke akpan n̄kpọ oro n̄kesinamde nnyene okụk, enye ikesinyụn̄ inọhọ nnyịn okụk. Emi ama ekpep nnyịn ndidu mmemmem uwem nnyụn̄ nda mme n̄kpọ eke spirit ke akpan n̄kpọ n̄kan inyene obụkidem. Nditọ mi ẹma ẹtetịm ẹkpere kiet eken nte ẹkekpepde ndima nnyụn̄ n̄n̄wam kiet eken. Ke ini ikpọ nditọ mi ẹketọn̄ọde ndinam utom, mmọ ẹma ẹsin̄wam n̄kpri nditọeka mmọ. Marseree adiaha mi ama an̄wam Nicole ekperedem eyeneka esie an̄wan okụre ufọkn̄wed sekọndri. Ke adianade do, mma ntọn̄ọ ndinyam mme n̄kpọ udia. Ekpri okụk oro n̄kesinyenede ama an̄wam mi nse mban̄a se nnyịn ikoyomde.

Akananam Jehovah ikpọn̄ke nnyịn. Isan̄ kiet, mma nsian eyenete an̄wan kiet ke nnyịn ikenyeneke okụk ndika mbono district. Enye ama ọbọrọ ete: “Sista Val, ndondo oro ẹtọtde mbono, tọn̄ọ ntịmidem! Jehovah ọyọnọ se oyomde.” Mma nnam item esie. Jehovah ama ọnọ se n̄koyomde, enye ke onyụn̄ aka iso ndinọ. Akananam ubon nnyịn ifiakke mbono ke ntak unana okụk.

Ke 1988, ata akamba oyobio ama ọnọmọ Jamaica, ndien nnyịn ima ikpọn̄ ufọk nnyịn ika eti itie. Ke ini oyobio oro okosụhọrede, ami ye akpan mi ima ikpọn̄ ebiet oro ikodude ika ndise ndon ufọk nnyịn. Ke adan̄aemi ikosụk isaride iyom n̄kpọ, mma n̄kụt n̄kpọ oro n̄koyomde ndisio. Oyobio ama afiak abara ke mbuari, edi n̄kosụk mmomụm n̄kpọ oro n̄koyomde ndisio n̄kama. Eyen mi ama ọdọhọ ete: “Mama yak ekebe ndise oro nịm. Ndi afo edi n̄wan Lot?” (Luke 17:31, 32) Ikọ eyen mi oro ama anam enyịn an̄wan̄a mi. Mma nyak ekebe ndise oro edịm ọkọbọn̄de nnịm, nnyịn mbiba inyụn̄ ifehe.

Idem esinyek mi idahaemi mma nti nte n̄kpakatabade uwem mi ke ntak ekebe ndise. Edi esịt esinem mi ke ini n̄kerede mban̄a ikọ eyen mi oro owụtde ke enye ama ekere aban̄a mme n̄kpọ eke spirit. Ukpep a-Bible oro enye ọkọbọde ke esop Christian ama anam enye an̄wam mi mfep ata unọmọ, ye se ikpetiede nte unọmọ eke spirit.

Oyobio oro ama owụri ufọk nnyịn, abiat inyene nnyịn, onyụn̄ anam nnyịn ifụhọ. Ekem nditọete nnyịn ẹma ẹdibehe. Mmọ ẹma ẹsịn udọn̄ ẹnọ nnyịn ẹte ibuọt idem ye Jehovah inyụn̄ isịn ifịk ke utom ukwọrọikọ, ẹnyụn̄ ẹfiak ẹbọp ufọk nnyịn. Ima ima utom n̄waidem emi Mme Ntiense ẹtode Jamaica ye idụt en̄wen ẹkenamde, ama enen̄ede otụk nnyịn esịt.

Ndibem Iso Nyom Jehovah

Ke Melaine udun̄wan mi ama okokụre n̄wed, enye ama odụk utom usiakusụn̄. Ekem ẹma ẹdọhọ enye edinam utom nte asiakusụn̄ ke esop en̄wen, emi ọkọwọrọde ke enye ekenyene ndikpọn̄ utom esie. Okposụkedi utom emi akanamde enye ekeme ndinen̄ede n̄n̄wam ubon nnyịn ke okụk, nnyịn ima inyene mbuọtidem ke Jehovah eyese aban̄a nnyịn edieke kpukpru nnyịn ibemde iso iyom Obio Ubọn̄. (Matthew 6:33) Nte ini akakade, ẹma ẹdọhọ Ewan akpan mi etiene anam utom nte asiakusụn̄. Enye ama esin̄wam ubon nnyịn n̄ko ke okụk, edi nnyịn ima isịn udọn̄ inọ enye ite enyịme ndinam utom usiakusụn̄ ke Jehovah ọyọdiọn̄ enye. Akananam ndọhọke nditọ mi ẹkûtat utom Obio Ubọn̄, ndien akananam nnyịn oro isụhọde ke ufọk ikpaha ubuene. Utu ke oro, nnyịn imenyene akwa idatesịt, ndien ndusụk ini, imesikam in̄wam mbon oro ẹdude ke unana.

Enen̄ede adat mi esịt mfịn ndikụt ke nditọ mi ‘ẹsan̄a ke akpanikọ.’ (3 John 4) Melaine udun̄wan mi esisan̄a ye ebe esie oro edide esenyịn circuit anam utom. Andrea ekpri udun̄wan mi ye ebe esie ẹdi akpan asiakusụn̄, enye esinyụn̄ asan̄a ye ebe esie ke ini ebe esie akade ndise esop nte andida itie esenyịn circuit. Ewan akpan mi edi ebiowo, enye ye n̄wan esie ẹnyụn̄ ẹdi mme akpan asiakusụn̄. Ava-Gay udun̄wan mi en̄wen, anam utom ye ebe esie ke n̄kọk itieutom Mme Ntiense Jehovah ke Jamaica. Jennifer, Genieve, ye Nicole ẹnam utom ye mme ebe mmọ ye nditọ mmọ nte ifịk ifịk mme andibuana ke esop. Marseree odụn̄ ye ami, ndien nnyịn mbiba ibuana idahaemi ye Esop Port Morant. Edidiọn̄ mi ẹwak ekese, koro kpukpru nditọ mi mbitiaita ẹka iso ndituak ibuot nnọ Jehovah.

Ntịmke n̄kop aba nsọn̄idem sia mmodụk idem akwa owo. Okposụkedi ndọn̄ọde ewan̄kọ, ke nnanam utom nte asiakusụn̄. Nte ededi, ini kiet ko, ndisan̄a ke obot obot mbọhọ nnyịn ekedi ata ọkpọsọn̄ n̄kpọ. Ekedi ọkpọsọn̄ n̄kpọ ndiwọrọ an̄wautom. Mma ndomo ndiwat ke enan̄ukwak nnyụn̄ n̄kụt ke oro emem utom akan ndisasan̄a. Ntre, mma mbọ owo enan̄ukwak ndep n̄kpesida n̄ka ukwọrọikọ. Ke ntọn̄ọ ntọn̄ọ, ke ntak ewan̄kọ mi, ikenemke nditọ mi ndikụt nte n̄watde enan̄ukwak. Kpa ye oro, esịt ama enen̄ede enem mmọ ndikụt mi n̄kade iso n̄kwọrọ ikọ nte udọn̄ esịt mi edide.

Esinen̄ede adat mi esịt ndikụt nte mme owo oro n̄kpepde n̄kpọ ẹbọde akpanikọ Bible. Mbọn̄ akam kpukpru ini nte Jehovah akpakam an̄wam kpukpru owo ke ubon mi ẹsọn̄ọ ẹda ẹnam akpanikọ ẹnọ enye ke utịt ini emi ye ke nsinsi nsinsi. Mmọkọm nnyụn̄ ntoro Jehovah, kpa Akwa ‘Andikop akam,’ ke emi enye an̄wamde mi ndikan n̄kpọ-ata edibọk nditọ itiaita ke usụn̄ esie.—Psalm 65:2.

[Ndise ke page 10]

Ami ye nditọ mi, mme nsan̄a ndọ mmọ, ye nditọ nditọ mi

[Ndise ke page 12]

Nsida enan̄ukwak nnam utom ukwọrọikọ idahaemi