Mme Angel​—Se Mmọ Ẹdide

AKWA EDIDEM oro akarade ofụri ererimbot okụt n̄kpọ oro enen̄erede akpa enye idem. Ẹnyan̄a n̄kparawa ita oro ẹketomode ẹdọn̄ ke akwa ikan̄! Anie anyan̄a mmọ? Edidem ke idemesie ọdọhọ n̄kparawa ita oro ẹnyan̄ade ete: “Ẹkọm Abasi [mbufo], emi ọkọdọn̄de angel esie, onyụn̄ anyan̄ade ikọt esie emi ẹbuọtde idem mmọ ye enye.” (Daniel 3:28) Edidem Babylon oro okodude uwem ke se iwakde ibe isua tọsịn iba emi ẹkebede ama okụt ini emi angel akanyan̄ade n̄kparawa emi. Ata ediwak owo ke eset ẹma ẹnịm ke mme angel ẹdu. Ata ediwak owo ẹnịm mfịn ke mme angel ẹdu ẹnyụn̄ ẹkere n̄ko ke se mmọ ẹnamde ẹtụk mmimọ. Mmanie ẹdi mme angel, ndien mmọ ẹkesan̄a didie ẹdidu?

Bible ọdọhọ ke mme angel ẹdi spirit kpa nte Abasi ke idemesie edide Spirit. (Psalm 104:4; John 4:24) Mme angel ẹwak etieti. (Ediyarade 5:11) Ndien kpukpru mmọ ‘ẹdaha uko.’ (Psalm 103:20) Okposụkedi mme angel ẹtiede nte owo sia mmọ ẹnyenede edu ẹnyụn̄ ẹnọde mmọ ifụre ndimek se mmọ ẹyomde ndinam, mmọ ikodụhe uwem kan̄a ke isọn̄ nte mme owo mbemiso ẹkedide mme angel. Ke nditịm ntịn̄, Abasi ama obobot mmọ anyan ini mbemiso okobotde owo—idem mbemiso okobotde isọn̄. Bible ọdọhọ ke ini Abasi ‘ọkọtọn̄ọde ndinam ererimbot, mme ntantaọfiọn̄ usenubọk [oro edi mme angel] ẹma ẹkwọ uyo kiet, kpukpru nditọ Abasi ẹnyụn̄ ẹsio n̄kpo.’ (Job 38:4, 7) Ẹkot mmọ nditọ Abasi sia Abasi okobot mmọ.

Ntak emi Abasi okobotde mme angel? Ndi mme angel ẹnyene ubọk ke mbubehe owo tọn̄ọ ẹkebot owo; ke edidi ntre, didie? Ndi se mmọ ẹnamde ẹtụk nnyịn mfịn? Sia ẹnọde mmọ ifụre ndimek se ẹyomde ndinam, ndi ama odu mme angel oro ẹkemekde nditiene Satan kpa Devil nsọn̄ ibuot nnyụn̄ n̄kabade ndi mme asua Abasi? Bible ọbọrọ mbụme emi nte enende.