Ukpepn̄kpọ Aban̄ade Ntan̄idem ye Nsụhọdeidem
SE IKETỊBEDE inọ Edidem David owụt ukpụhọde oro odude ke ufọt ata nsụhọdeidem ye ntan̄idem. N̄kpọ emi eketịbe ke David ama akakan Jerusalem onyụn̄ anam enye ibuot obio ukara esie. David akada Jehovah nte ata Edidem Israel, ntre enye ama anam ndutịm man ẹmen ekebe ediomi, emi okowụtde ke Abasi odu do, ẹdi Jerusalem. David akada edinam emi nte ata akpan n̄kpọ, anamde enye adat esịt ke iso kpukpru owo, nte enye etienede mme oku oro ẹkebiomde Ekebe oro. Mme andidụn̄ Jerusalem ẹma ẹkụt edidem mmọ enekde “unek ke ofụri odudu esie.”—1 Chronicles 15:15, 16, 29; 2 Samuel 6:11-16.
Nte ededi, Michal n̄wan David iketieneke idara. Enye eketie ke window ese, ndien utu ke ndidat esịt mban̄a nte David adade usụn̄ ke ndinọ Jehovah ubọn̄, enye akakam “ese enye ke ndek ke esịt esie.” (2 Samuel 6:16) Ntak emi Michal akanamde n̄kpọ ntem? Etie nte enye ekenen̄ede ekere aban̄a akwa idaha esie nte eyen Saul, akpa edidem Israel, ndien idahaemi, enye edi n̄wan ọyọhọ edidem Israel iba. Enyene ndidi enye ekekere ke ebe imọ, emi ekedide edidem, ikpokosụhọkede idem ntre isan̄a ye mme usụhọde owo inyụn̄ itiene mmọ idara. Edu iseri emi ama owụt idem ke nte enye ọkọkọmde David ke ini David ọkọnyọn̄de edi. Enye ama osụk David uyo ete: “N̄kọm edidem Israel akanam ubọn̄ mfịn, emi okofụhọrede idemesie mfịn ke iso ifịn iban ikọt esie, kpa nte kiet ke otu mme oburobụt owo ofụhọrede idemesie ke an̄wa!”—2 Samuel 6:20.
Didie ke David ọkọbọrọ nsụkuyo emi? David ama asua ọnọ enye ete ke Jehovah ama esịn Saul ete esie, akabade emek imọ. David ama adian do ete: “Nyonyụn̄ nsụk ntie ndek-ndek n̄kan emi, nnyụn̄ n̄kpri ke enyịn mi: edi ama edi ifịn iban oro afo ọdọhọde, mmọ ẹyekpono mi.”—2 Samuel 6:21, 22.
Ih, David ama ebiere ndika iso nsụhọde idem nnam n̄kpọ Jehovah. Edu emi anam nnyịn ikụt ntak emi Jehovah okokotde David “owo emi ekemde esịt ye ami.” (Utom 13:22; 1 Samuel 13:14) Ke akpanikọ, David ekekpebe mfọnn̄kan uwụtn̄kpọ nsụhọdeidem—kpa eke Jehovah Abasi. Enen̄ede enem ndifiọk ke ikọ oro David akadade ọbọrọ Michal, ete ‘nyonyụn̄ n̄kpri,’ oto ikọ Hebrew oro ẹsidade ẹwụt nte Abasi esinamde n̄kpọ ye ubonowo. Okposụkedi Jehovah edide n̄kon̄n̄kan owo ke ekondo, Psalm 113:6, 7 ọdọhọ ke enye “osụhọrede [ke n̄kokon̄ idaha esie m̀mê ọkpọn̄ uku esie man anam n̄kpọ ye ata usụhọde owo] ese n̄kpọ ke enyọn̄ ye ke [isọn̄]. Enye osio mme ubuene ke ntan emen, onyụn̄ ada eyen unana ke ifụm enịm ke enyọn̄.”
Sia Jehovah osụhọrede idem, an̄wan̄a ndien ntak emi enye asuade “n̄kokidem.” (Mme N̄ke 6:16, 17) Michal ndikatan̄ idem nnyụn̄ nsọn̄ enyịn ye enye emi Abasi ekemekde nte edidem, ama anam Abasi iyakke enye aman eyen ọnọ David. Enye akakpa ada. Nso akpan n̄kpọ ke emi ekpep nnyịn ntem! Kpukpru mbon oro ẹyomde mfọn Abasi ẹnyene ndinam item emi: “Ẹnam n̄kpọ ke nsụhọdeidem ye kiet eken, koro Abasi ọbọbiọn̄ọ mbon ntan̄idem, edi enye ọnọ mbon nsụhọdeidem mfọnido oro owo mîdotke.”—1 Peter 5:5.