Nso ke Afo Ada nte Edikụt Unen?

NDUSỤK owo ẹkeda Jesse Livermore nte akwa anam mbubehe oro okokụtde unen sia enye ama enen̄ede ọdiọn̄ọ ndinam nti ubiere ke itie mbubehe United States oro ẹkotde Wall Street. Ke ntak emi, enye ama enen̄ede oforo. Enye ekesisịne kot oro ọwọrọde etop akan, odụn̄ ke akaka ufọk oro enyenede ubet 29, onyụn̄ awat ata ọsọn̄urua ubomisọn̄ oro ẹkotde Rolls-Royce.

Davida okonyụn̄ oyom ndiforo ntre. Enye ekedi udiana esenyịn ke ufọkutom mmọ, ndien ẹma ẹyom ndimenede enye itie nte esenyịn ke n̄kọk itieutom oro. Enye ama ama uforo ye uwọrọiso. Nte ededi, David ama esịn n̄wed ọkpọn̄ utom. David ọkọdọhọ ete: “Mmọfiọk ke tutu amama ndinyeneke aba utọ akwa itie oro.” Ndi emekere ke David ama anam ndudue?

Ediwak owo ẹkere ke man owo okụt unen, ana enye oforo, ọwọrọ etop, m̀mê edi ọwọrọiso owo. Edi, idịghe kpukpru ini ke mbon oro ẹnyenede inyene obụkidem ẹsikop uyụhọ ẹnyụn̄ ẹnyene uduak ke uwem. Anaedi se iketịbede inọ Ete Livermore edi oro. Kpa ye akpakịp inyene esie, uwem esie ọkọyọhọ ye iduọesịt, afanikọn̄, ye mfụhọ. Enye ama okop ọkpọsọn̄ mfụhọ, ndọ esie ikọwọrọke usụn̄, ndien nditọ esie ikamaha enye. Ke akpatre, ke ama akataba ekese inyene esie, Ete Livermore ama aka eketie ke itie un̄wọn̄ mmịn ke uwouwo ufọkisen kiet eseme ntakurua esie. Enye ama ọdọhọ ẹnọ imọ n̄kpọ in̄wọn̄, ekem enye osio ediye n̄wed uwetn̄kpọ esie oro ẹdade ikpa ẹsịn edem, ewet akpatre ikọ ọnọ n̄wan esie. Ke ama ọkọn̄wọn̄ mmịn esie ama, enye ama odụk n̄kịmn̄kịm ubet kiet osio ikan̄ otop idem owot.

Okposụkedi edide akpanikọ ke odu ediwak n̄kpọ oro ẹkemede ndinam owo owot idem, se iketịbede inọ Ete Livermore owụt ke ikọ Bible emi enen: “Mbon oro ẹbierede ndinyene inyene . . . ẹkịm ofụri idem mmọ ẹnọ ediwak unan.”—1 Timothy 6:9, 10.

Okûdi mbon oro ẹdade inyene, idaha, m̀mê uwọrọiso nte n̄kpọ ndiwụt ke owo okụt unen ẹnam ata akamba ndudue? Ndi emekere ke afo ke idemfo omokụt unen? Ntak ekerede ntre? Nso ke afo ada ebiere ke owo okụt unen? Nso ke afo ada nte edikụt unen? Ibuotikọ oro etienede eyeneme item oro an̄wamde ata ediwak owo ẹkụt unen. Ẹyak ise nte afo n̄ko ekemede ndikụt unen.

[Ikọ idakisọn̄]