Ndinyene Idotenyịn ke Ererimbot Oro Ọyọhọde ye Mfụhọ

“MME owo ẹnen̄ede ẹnyene odudu ndin̄wam mme owo nnyụn̄ n̄kọk mme mfịna idahaemi akan nte akanam edide.” Bill Clinton, akani adaibuot ukara United States eketịn̄ ikọ emi ke mbono oro ẹkenyenede ke Ottawa ke Canada ke March 2006. Enye ama eberi ete ke mme owo ke ofụri ererimbot ẹma ẹtọn̄ọ ndisin̄wam kiet eken toto ke ini oro akwa mbufịt inyan̄ibom eketịbede ke 2004, onyụn̄ ọdọhọ ke imodori enyịn ite ke oyom mme owo ‘ẹnen̄ede ẹdiana kiet idahaemi ẹkan nte akanam ẹdianade.’

Nte imekeme ndikere ke oto-obot afanikọn̄ ayanam mme owo ẹdiana kiet ẹyom eti ini iso? Nte mme owo ‘ndinen̄ede ndiana kiet ke ofụri ererimbot’ ayanam ẹnyene ata emem ye ifụre oro ebịghide.

Se Inọde Ata Idotenyịn

Se mme owo ẹnamde ke se ibede tọsịn isua itiokiet idahaemi owụt ke mme owo ẹsiwak ndikpu kiet eken. Ntak edi oro N̄wed Abasi oro ẹkedade odudu spirit ẹwet etemede nnyịn ete: “Mbufo ẹkûbuọt idem ye mbọn̄, ẹkûbuọt ye eyen owo, emi edinyan̄a mîdụhe enye ke idem.” (Psalm 146:3) Edieke ibuọtde idem ye n̄ka ererimbot emi, mme n̄kpọ obụkidem emi ẹdụde ke esịt, inyụn̄ inyenede ọkpọsọn̄ udọn̄ uyom ikpọ n̄kpọ ererimbot, emi edida ikosụn̄ọ ke edikpu. Ntak-a? Koro “ererimbot ke ebebe efep ye udọn̄ esie.”—1 John 2:17.

Nte ededi, ke ediwak isua ikie emi ẹbede, ndinen owo ẹdori enyịn ke Abasi nte enye emi mîkemeke ndikpu. Bible okot enye “idotenyịn Israel [eset]” ye “idotenyịn mme ete [Israel],” ndien Bible ọdọn̄ọ ediwak ikọ oro anamde ẹnyene idotenyịn, ibetedem ye mbuọtidem ke enye. (Jeremiah 14:8; 17:13; 50:7) Ke akpanikọ, N̄wed Abasi esịn udọn̄ ọnọ nnyịn ete ‘ibet Jehovah.’—Psalm 27:14.

Mme N̄ke 3:5, 6 eteme nnyịn ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” Afo emekeme ndinen̄ede nnịm mme un̄wọn̄ọ Jehovah Abasi ke akpanikọ, koro enye isikpụhọkede, enye edi se ẹkemede ndiberi edem, enye esinyụn̄ anam se enye etịn̄de. (Malachi 3:6; James 1:17) Enye oyom n̄kpọ enen̄ede ọfọn ye afo, ndien edieke afo akade iso anam se ẹwetde ke Ikọ esie kpa Bible, enye ayada fi usụn̄ ebe mme enyene-ndịk ini emi.—Isaiah 48:17, 18.

Owo oro etienede ndausụn̄ Abasi ke ofụri esịt ekeme ndinyene mbuọtidem ke un̄wọn̄ọ emi: “Kûdịghe, koro ami ndude ye afo: kûnyek idem, koro ami ndide Abasi fo: nyọsọn̄ọ fi idem; nditreke ndinyan̄a fi; nditreke ndimụm fi n̄kama ke edinen ubọk nnasia mi.” (Isaiah 41:10) Ndibọn̄ akam ke ofụri esịt nnyụn̄ ntie n̄kere mme un̄wọn̄ọ emi edi ata n̄kpọ ndọn̄esịt ọnọ kpukpru mbon oro ẹmade Jehovah Abasi, koro emi esin̄wam mmọ ẹyọ n̄kpọsọn̄ idaha ye editịmede esịt.

Kere ban̄a Andrea emi edide kiet ke otu Mme Ntiense Jehovah onyụn̄ edide eka nditọ iba. Enye ọdọhọ ete: “Ndibọn̄ akam nnyụn̄ ntie n̄kere mme un̄wọn̄ọ Jehovah ẹsin̄wam mi ndiyọ ke mme ini mfịna. Ke ini ntide ke Jehovah isikpụhọkede, oro esinen̄ede ọsọn̄ọ mi idem.”

Nen̄ede Dori Enyịn ke Jehovah

Kiet ke otu mme andiwet Psalm ama etịn̄ aban̄a ufọn edinyene idotenyịn ke Jehovah ete: “Mmọ eke ẹmade ido fo ẹnyene ediwak ifụre: mmọ inyụn̄ ikwe n̄kpọ iduọ baba kiet.” (Psalm 119:165) Ndikpep ikọ Abasi ke ofụri esịt ekeme ndinen̄ede nnam ekere aban̄a mme n̄kpọ eke spirit, kpa mme n̄kpọ oro ‘ẹdotde ẹtịm ẹkere, n̄kpọ eke ẹnende, n̄kpọ eke ẹsanade, n̄kpọ eke ẹmade, n̄kpọ eke ẹwọrọde eti etop, n̄kpọ eke eti ido odude ye n̄kpọ eke itoro odude.’ Edieke afo enen̄erede akpan̄ utọn̄ okop, ekpep, enyịme, onyụn̄ ada mme n̄kpọ emi esịn ke edinam, ‘Abasi emem oyodu ye afo.’—Philippi 4:8, 9.

Kop mi se John emi ama akanam n̄kpọ Jehovah ke ediwak isua eketịn̄de: “Man n̄keme ndikpụhọde ekikere mi kaban̄a ini iso, ama oyom nnen̄ede n̄kpụhọde edu uwem ye ekikere mi man n̄keme ndinyene eti itie ebuana ye Abasi oro enyịn mîkwe. Man n̄keme ndinyene utọ itie ebuana emi, akana nnyene udọn̄ ke n̄kpọ eke spirit. Oro ama abuana ndima Abasi, ndikere n̄kpọ ke usụn̄ oro Abasi ekerede, ndikot nnyụn̄ ntie n̄kere Ikọ Abasi oro ẹkedade odudu spirit ẹwet.”

Edieke ọnwọn̄de mbịtmbịt ye ọnọ-uwem mmọn̄ akpanikọ oro odude ke N̄wed Abasi, oro ayanam akan akpakịp ndiọi edinam oro ẹwụtde ke ndutịm usuanetop. N̄ko, edieke adade se ẹtịn̄de ke Bible esịn ke edinam, emi ekeme ndisọn̄ọ mbọbọ ubon fo onyụn̄ osụhọde editịmede esịt. Akan oro, Abasi ọn̄wọn̄ọ ke imọ ‘iyọsọn̄ọ imụm mbon oro ofụri esịt mmọ ẹdude ye imọ ikama.’ (2 Chronicles 16:9) Enye ọyọwọn̄ọde mme n̄kpọ obon ke usụn̄ oro mîdiyakke fi okop ndịk.

Phinehas emi okokụtde ekọn̄ ye akpakịp uwotowo ọkọdọhọ ete: “Mmekpep ndiyak uwem mi nsịn Jehovah ke ubọk. Ndisọn̄ọ nyịre ke mme edumbet Bible anam mi mbọhọ ediwak afanikọn̄.” Edieke enen̄erede ọbuọt idem ye Jehovah, enye ekeme ndin̄wam fi akan mfịna ekededi oro etiede nte owo ikemeke ndikan. (Psalm 18:29) Ekpri eyen oro enen̄erede ekpere ete ye eka esie idem enen̄ede ọbuọt idem ye mmọ onyụn̄ enyene ifụre, idem ke ini enye ọdọn̄ọde m̀mê osobode afanikọn̄. Afo emekeme ndinyene utọ ifụre oro edieke enyịmede ikot oro Jehovah ọnọde fi ete odori enyịn ke imọ.—Psalm 37:34.

Se Inamde Inyene Ata Idotenyịn

Jesus Christ ọkọdọhọ mme anditiene enye ete: “Mbufo ẹnyene ndibọn̄ akam ntem . . . ẹte: ‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’” (Matthew 6:9, 10) Obio Ubọn̄ Heaven—kpa ukara emi Jesus Christ akarade—edi usụn̄ oro Abasi adade owụt ke imọ inyene unen ndikara isọn̄.—Psalm 2:7-12; Daniel 7:13, 14.

Nsio nsio ndịk oro ikopde mfịn ẹnen̄ede ẹwụt ke imoyom Abasi edinyan̄a nnyịn. Edi n̄kpọ inemesịt ndifiọk ke edinyan̄a oro emekpere! Abasi omodori Jesus Christ ke ebekpo nte Edidem Messiah, onyụn̄ ọnọ enye odudu ndiwụt ke Jehovah enyene unen ndikara nnyụn̄ nnam enyịn̄ Esie asana. (Matthew 28:18) Ibịghike, ukara Obio Ubọn̄ ọyọwọn̄ọde enyịn ese isọn̄ man emen kpukpru orụk ndịk ye editịmede esịt efep. Isaiah 9:6 asiak mme n̄kpọ oro ẹnamde Jesus odot nte Andikara oro ekemede ndinam nnyịn ikûkop ndịk. Ke uwụtn̄kpọ, ẹkot enye “Nsinsi Ete,” “Utịbe Ọnọitem,” ye “Ọbọn̄ Emem.”

Kere ban̄a utọ inem inem enyịn̄ oro, “Nsinsi Ete.” Ntre, Jesus enyene ukeme ye odudu—onyụn̄ ọdọn̄ enye—ndinọ mme okopitem ubonowo idotenyịn edidu nsinsi uwem ke isọn̄ ke ntak uwa ufak esie. Emi ọwọrọ ke mmọ ẹyebọhọ idiọkn̄kpọ ye unana mfọnmma oro ẹkedade ẹto Adam, kpa akpa owo oro akanamde idiọk. (Matthew 20:28; Rome 5:12; 6:23) N̄ko, Christ ayada odudu oro Abasi ọnọde enye anam ediwak mbon oro ẹma ekekpan̄a ẹfiak ẹdidu uwem.—John 11:25, 26.

Ke ini Jesus okodude ke isọn̄, enye ama owụt ke imọ idi “Utịbe Ọnọitem.” Jesus ama ọfiọk ndikọk mme mfịna uwem eke usen ke usen sia enye ekenen̄erede ọfiọk Ikọ Abasi ye nte obot owo etiede. Tọn̄ọ ẹkedori Christ ke ebekpo ke heaven, enye aka iso ndidi “Utịbe Ọnọitem,” onyụn̄ edi ata akpan owo emi Jehovah adade etịn̄ ikọ ọnọ ubonowo. Item Jesus oro ẹwetde ke Bible esisịne ifiọk onyụn̄ enen. Ndifiọk nnyụn̄ nnịm mme n̄kpọ emi ke akpanikọ ayan̄wam fi odu uwem oro enyenede iwụk ye unana edikop ndịk.

Isaiah 9:6 okot Jesus n̄ko “Ọbọn̄ Emem.” Ke ntre, Jesus ọyọsọp ndida odudu esie nnen̄ede kpukpru se ikwan̄ade—ke ndutịm ukara, ke ndutịm uforo, ye ke n̄kaowo. Didie? Ebe ke ndinam ubonowo ẹdiana kiet ke idak ukara emem Obio Ubọn̄ Messiah.—Daniel 2:44.

Ke idak ukara Obio Ubọn̄, nsinsi emem oyodu ke ofụri isọn̄. Ntak emi afo ekemede ndinịm emi ke akpanikọ? Isaiah 11:9 ọdọhọ ete: “Mmọ [mme andidu ke idak Obio Ubọn̄] idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ererimbot, kpa nte mmọn̄ ofụkde inyan̄.” Nte ini akade, kpukpru mme andidụn̄ isọn̄ ẹyenyene nnennen ifiọk Abasi ẹnyụn̄ ẹsụk ibuot ẹnọ enye. Ndi inemke fi esịt ndidori enyịn mban̄a utọ ini emi? Edieke edide ntre, kûnam ubịghi; tọn̄ọ ndikọ ọsọn̄urua “ifiọk Jehovah.”

Afo emekeme ndibọ ufọn nto ọnọ-uwem ifiọk Abasi oro ọsọn̄ọde mbuọtidem ebe ke ndidụn̄ọde se Bible enen̄erede ekpep aban̄a mme n̄kpọntịbe eyo nnyịn ye nyayama ini iso oro ẹn̄wọn̄ọde ke Bible. Ke ntre, nnyịn imesịn udọn̄ inọ fi ite ọdọhọ Mme Ntiense Jehovah ke n̄kann̄kụk mbufo ẹdikpep fi Bible ke mfọn. Emi edi usụn̄ oro afo ekemede ndibịn ndịk mfep nnyụn̄ nnyene ata idotenyịn ke ererimbot emi ọyọhọde ye mfụhọ.

[Ekebe/Mme ndise ke page 7]

Se Inamde Inyene Idotenyịn ke Obio Ubọn̄

Ẹnọ Jesus Christ, kpa Edidem Obio Ubọn̄ Abasi, odudu ye unen ndikara ofụri ekondo. (Matthew 28:18) Enye ayanam mme n̄kpọ oro ẹnamde uwem ẹdu ke isọn̄ ẹfiak ẹkedu ke mfọnmma idaha. Enye n̄ko enyene odudu ndisio udọn̄ọ mfep. Mme utịben̄kpọ oro Jesus akanamde ke isọn̄ ekedi ntabinse akpakịp edidiọn̄ oro ẹdidude ke ini enye edikarade nte edidem, ndien emi ayanam enye edi mfọnmma Edidem oro ẹkemede ndiberi edem. Ewe edu Edidem Messiah, emi ẹsiakde ke idak emi ke afo enen̄ede ama?

▪ Edi se ẹkemede ndisan̄a n̄kpere.—Mark 10:13-16.

▪ Owụt eti ibuot inyụn̄ inamke asari.—Mark 10:35-45.

▪ Enyene nsọn̄ọnda onyụn̄ anam n̄kpọ ọnọ owo.—Matthew 4:5-7; Luke 6:19.

▪ Enen onyụn̄ ama unenikpe.—Isaiah 11:3-5; John 5:30; 8:16.

▪ Ekere aban̄a owo onyụn̄ osụhọde idem.—John 13:3-15.

[Ndise ke page 4]

Edikot Bible ye editie n̄kere ekeme ndinam nnyịn idori enyịn ke Jehovah