Ima Ikan ke Esopikpe Europe Oro Esede Aban̄a Unen Owo
KE JANUARY 11, 2007, Mme Ntiense Jehovah ẹma ẹkan ke ikpe oro mmọ ẹkenyenede ye idụt Russia ke Esopikpe Mbon Europe Oro Esede Aban̄a Unen Owo, oro odude ke Strasbourg ke France. Ubiere oro ama ọsọn̄ọ ke Mme Ntiense Jehovah ẹnyene unen ndituak ibuot ifụre ifụre n̄ko ke akpana ẹsikpan̄ utọn̄ ẹnọ mmọ mbemiso ẹbierede ikpe mmọ. Ẹyak ineme se ikanamde ẹda ikpe emi ẹka esop.
Ata ediwak owo oro ẹbuanade ke esop Mme Ntiense Jehovah ke obio Chelyabinsk ke Russia, ẹdi inan. Mmọ ẹma ẹbọ ubet kiet ke ufọkn̄wed ukpep ubọkutom ke ukpeokụk ẹsida ẹnịm mbono esop. Ke Sunday, April 16, 2000, mma kiet emi edide Isụn̄utom ke N̄ka Oro Esede Aban̄a Unen Owo ke ikpehe oro ama asan̄a ye ikpọ owo bodisi iba ye owo kiet emi ekesịnede ata ọfọn̄ akasuan mbono esop nditọete oro. Ẹketre mboho oro ke ntak emi mma oro akasuade mmọ, okonyụn̄ osude nsu ete ke ibet inyịmeke mmọ ẹnịm mbono esop ye unana edibọ unyịme nto ukara. Ọtọn̄ọde ke May 1, 2000, owo ikenyịmeke aba ndinọ mmọ itie oro ẹda ẹnịm mbono esop.
Mme Ntiense Jehovah ẹma ẹketọt n̄kpọ oro ẹnọ owo ukara obio Chelyabinsk, edi ufọn ikodụhe. Ibet Russia ye N̄ka Oro Esede Aban̄a Unen ye Ifụre Owo ẹnyịme ke owo enyene ifụre ido ukpono ye unen edisop idem ọtọkiet. Ntre ẹma ẹsịn ikpe ke esop ayaraiwat, ekem ẹsion̄o ikpe oro ẹka esop enyọn̄. Mbemiso oro, ke July 30, 1999, akwa esopikpe ẹma ẹbiere ke ini ẹkekpede ikpe en̄wen ẹte ke “Ibet Russia kaban̄a ifụre ekikere ye mboho ido ukpono ọdọhọ ke ikọ oro ‘ye unana ubiọn̄ọ’ ọwọrọ ke owo iyomke ẹbọbọ unyịme ẹto ukara mbemiso ẹnamde edinam ido ukpono ke ebiet oro ẹkedepde [ndida nnịm ufọkabasi].” (Mmọ ẹsịn ubak ọsọbọ-inan̄.) Kpa ye oro, ẹma ẹbiat ikpe emi ẹfep ke esop ayaraiwat ye esop enyọn̄.
Ke December 17, 2001, ẹma ẹda ikpe oro ẹka Esop Mbon Europe Oro Esede Aban̄a Unen Owo. Ẹma ẹkpe ikpe emi ke September 9, 2004. Ndusụk ikọ emi Esop eketịn̄de ndinọ akpatre ubiereikpe oro ẹdi emi:
“Esop emi okụt ke ẹma ẹtịmede ifụre utuakibuot mme okot-ikpe emi, sia ke 16 April 2000, mbon Ukara ẹma ẹnam mboho mmọ asuana uken̄.”
“Ibet inyịmeke ẹtịmede mboho ido ukpono emi ẹnịmde ke okụre emi mmọ ẹkekpede okụk ẹbọ ndisida nnịm mboho mmọ.”
“[Esop emi] okụt ke Akwa Esopikpe Russia esibiere kpukpru ini ete ke inaha ido ukpono ẹbọbọ odudu m̀mê unyịme ẹto ukara mbemiso mmọ ẹnịmde mboho mmọ.”
“Ke ntre, Isụn̄utom oro ye ikọt esie ẹma ẹbiat Ọyọhọ Ibet 9 [aban̄ade ifụre ido ukpono] ke n̄wedibet N̄ka Oro Esede Aban̄a Unen ye Ifụre Owo ke ndiketịmerede mboho mme okot-ikpe emi ke 16 April 2000.”
“Esop emi edikụt ke mme esop eken ikanamke se akpanade mmọ ẹnam . . . ndiwụt ke ima ikpe ikpe emi nte enende. Mmọ . . . ẹbiat Ọyọhọ Ibet 6 [oro akpande owo ndikwan̄ ikpe] ke n̄wedibet N̄ka Oro Esede Aban̄a Unen ye Ifụre Owo.”
Mme Ntiense Jehovah ẹkọm Abasi ke ndikanam mmọ ẹkan ke ikpe oro ke Esopikpe Mbon Europe Oro Esede Aban̄a Unen Owo. (Psalm 98:1) Utịp ubiereikpe emi editara adan̄a didie? Joseph K. Grieboski, etieibuot ke Itieutom Oro Esede Aban̄a Ido Ukpono ye Mbubehe Mme Owo ọdọhọ ete: “Ata akpan ubiere en̄wen edi emi, oro otụkde ifụre ido ukpono ofụri Europe, sia ubiere emi ayanam ẹkpono unen ido ukpono ke kpukpru obio emi ẹsịnede ke idak Esopikpe Mbon Europe Oro Esede Aban̄a Unen Owo.”