Ndinam Uduak Abasi Mfịn

“[Christ] akakpa aban̄a kpukpru owo man mbon oro ẹdude uwem ẹkûdu aba ẹnọ idemmọ.”—2 CORINTH 5:15.

1. Bụk ifiọkutom emi isụn̄utom kiet ekenyenede ke efakutom esie.

“UBOMISỌN̄ nnyịn ekedi akpa ubomisọn̄ oro mîkedịghe ubomisọn̄ ekọn̄ emi okodụkde esịt esịt obio-in̄wan̄ kiet ke Africa, ke ekọn̄ mbio-obio ama okokụre,” ntem ke isụn̄utom emi ekerede Aaron ọdọhọ.a “Nnyịn ikekemeke ndikop n̄kpọ nto ekpri esop emi odude do, ndien akana ise iban̄a se ikananade nditọete. Nnyịn ima ida udia, ọfọn̄, ye mme n̄wed un̄wam ukpep Bible ọkọrọ ye vidio oro Jehovah’s Witnesses—The Organization Behind the Name isọk mmọ.b Ata ediwak mbon oro ẹnyenede udọn̄ ẹma ẹbụn̄ọ ẹdi ndise vidio emi ke efe obio emi ẹnịmde ukwak ubre vidio ye TV, tutu anam isio vidio emi ikaba. Ini ekededi oro ikosiode, ima isitọn̄ọ ediwak ukpepn̄kpọ Bible. Ke akpanikọ, kpukpru ukeme oro ikesịnde ikatakke-tak.”

2. (a) Ntak emi mme Christian ẹbierede ndida uwem mmọ nnam n̄kpọ Abasi? (b) Mme mbụme ewe ke nnyịn idineme idahaemi?

² Ntak emi Aaron ye mme nsan̄a esie ẹkekade utọ ọkpọsọn̄ isan̄ oro? Edi koro mmọ ẹma ẹyak idemmọ ẹnọ Abasi ẹnyụn̄ ẹyom ndida uwem mmọ nnam n̄kpọ ke n̄kemuyo ye uduak Abasi, ke ntak emi mmọ ẹwụtde esịtekọm ẹban̄a uwa ufak Jesus Christ. Ukem nte mmọ, kpukpru mme Christian oro ẹma ẹkeyak idem ẹnọ Abasi ẹbiere ke ‘ididụhe aba uwem inọ idem mmimọ,’ edi ke idinam kpukpru se ikemede “kaban̄a eti mbụk.” (2 Corinth 5:15; 1 Corinth 9:23) Mmọ ẹfiọk ke ini ẹdisobode ererimbot emi, ofụri okụk ye ikpọ itie oro ẹnyenede ke ererimbot emi idinyeneke ufọn. Ntre edieke uwem ye nsọn̄idem ẹdude, mmọ ẹyom ndida emi nnam n̄kpọ nte ekemde ye uduak Abasi. (Ecclesiastes 12:1) Didie ke ikeme ndinam emi? M̀mọ̀n̄ ke ikeme ndinyene nsịnudọn̄ ye ukeme oro oyomde man inam ntre? Ndien mme ifet ewe ẹbererede ẹnọ nnyịn ndinam utom?

Ndikaiso Nnam Nti Usio-Ukot

3. Nso idi mme akpan usio-ukot oro ẹbuanade ke ndinam uduak Abasi?

³ Ata mme Christian ẹsinam uduak Abasi ke ofụri eyouwem mmọ. Ẹsiwak nditọn̄ọ ye mme utọ akpan usio-ukot nte edisịn enyịn̄ ke Ufọkn̄wed Utom Ukara Abasi, edikot Bible ke usen ke usen, edibuana ke utom ukwọrọikọ, ye edinam n̄kọri n̄kesịm edina baptism. Nte inamde n̄kọri, nnyịn inyene nditi ikọ apostle Paul emi: “Tie kere mme n̄kpọ emi; sịn idem ke mmọ ofụri ofụri, man kpukpru owo ẹkpekụt n̄kọri fo.” (1 Timothy 4:15) Utọ n̄kọri oro idịghe ndida ubọn̄ nnọ idem, edi owụt ke imebiere ndinam uduak Abasi ke ofụri esịt. Ndimek orụk uwem oro owụt ke imayak Abasi ada nnyịn usụn̄ ke kpukpru n̄kpọ ke uwem, ndien ndausụn̄ esie enen̄ede ọfọn akan eke nnyịn.—Psalm 32:8.

4. Didie ke ikeme nditre nditịmede esịt nte mîdotke?

⁴ Nte ededi, eyịghe m̀mê editịmede esịt ekeme ndibiọn̄ọ owo ndinam n̄kọri ke utom Abasi. (Ecclesiastes 11:4) Ntem, mbemiso nnyịn ikemede ndikop idatesịt ndinam n̄kpọ nnọ Abasi ye mbon en̄wen, ekeme ndiyom ibem iso itre nditịmede esịt. Ke uwụtn̄kpọ, Erik okoyom ndinam utom ke efakutom oro ẹsemde usem en̄wen. Edi enye ama ekere ete: ‘Ndi nyekeme ndibuak idem ye nditọete do? Ndi nyama nditọete do? Ndi mmọ ẹyema mi?’ Enye ọdọhọ ete: “Ke akpatre, mma ndikụt ke ama ọfọn n̄kere mban̄a nditọete akan ndikere mban̄a idemmi. Mma mbiere nditre nditịmede esịt, nnyụn̄ nnam n̄waidem ke se ededi oro n̄kemede ndinam. Mma mbọn̄ akam nyom un̄wam nnyụn̄ ndaha n̄ka. Idahaemi, mmenen̄ede n̄kop inem utom mi do.” (Rome 4:20) Ih, adan̄a nte iwade idem inam n̄kpọ inọ Abasi ye mbon en̄wen, ntre ke idikop idatesịt ye uyụhọ.

5. Ntak emi oyomde itịn̄ enyịn inam ndutịm nte inamde uduak Abasi? Nọ uwụtn̄kpọ.

⁵ Man inam uduak Abasi uforo uforo, oyom itịn̄ enyịn inam ndutịm nnyịn n̄ko. Nnyịn iyefep ndidụk ekese isọn emi ekemede ndinam nnyịn idụk ufụn inọ editịm n̄kpọ emi, oro ekemede ndibiọn̄ọ nnyịn ndinam n̄kpọ Abasi. Bible eti nnyịn ete: “Owo eke ọbuọtde onyụn̄ edi ofụn owo eke ọnọde.” (Mme N̄ke 22:7) Ndibuọt idem ye Jehovah nnyụn̄ nnịm mme n̄kpọ eke spirit akpa ẹyen̄wam nnyịn ise n̄kpọ nte enende. Ke uwụtn̄kpọ, Guoming ye nditọeka esie iban iba ẹdụn̄ ye eka mmọ ke ebiet emi okụk ufọk enen̄erede ọsọn̄ urua, emi mîsinyụn̄ imemke ndinyene akpan utom. Sia mmọ ẹsifamde-fam n̄kpọ, mmọ ẹsinyene se mmọ ẹyomde, idem ke ini mîdịghe kpukpru mmọ ẹnyene utom. Guoming ọdọhọ ete: “Ndusụk ini, idịghe kpukpru nnyịn isibọ okụkọfiọn̄. Edi isụk ikaka iso ke utom usiakusụn̄ nnyịn inyụn̄ inen̄ede ise iban̄a eka nnyịn. Esịt enem nnyịn etieti sia eka nnyịn mîyomke nnyịn ikpọn̄ utom uyọhọ ini man inam enye odu ọkpọmiọk ọkpọmiọk uwem.”—2 Corinth 12:14; Mme Hebrew 13:5.

6. Ewe uwụtn̄kpọ owụt nte ikemede ndidu uwem ekekem ye uduak Abasi?

⁶ Edieke edide afo emenen̄ede esịn idem ke mme n̄kpọ ererimbot—edide mbubehe okụk m̀mê n̄kpọ en̄wen—ekeme ndiyom anam ikpọ ukpụhọde man enịm uduak Abasi akpa. Owo isinamke mme utọ ukpụhọde oro inikiet inikiet, ndien edieke anamde ndudue ke ntọn̄ọ ntọn̄ọ, kûkere ke udukemeke. Kere ban̄a Koichi emi ekesibiatde ekese ini ke unọ idem inemesịt. Koichi ama ekpep Bible ke ini enye ekedide uyen, edi mbre vidio ama adia enye idem ke ediwak isua. Usen kiet Koichi ama etịn̄ ikọ ye idemesie ete: ‘Nso ke nnanam emi? Mmebe isua 30 idahaemi edi nnamke n̄kpọ ndomokiet oro ọwọrọde usụn̄!’ Koichi ama afiak ọtọn̄ọ ndikpep Bible onyụn̄ ọbọ un̄wam oro esop ọkọnọde. Enye ikakpaha mba okposụkedi oro enye akanamde ukpụhọde nsịtnsịt. Ọkpọsọn̄ akam ye un̄wam nditọete ẹma ẹn̄wam enye akan mbumehe esie ke akpatre. (Luke 11:9) Koichi anam utom idahaemi nte asan̄autom unamutom, onyụn̄ okop inemesịt ndinam ntre.

Kpep Ndiwụt Eti Ibuot

7. Ntak emi oyomde iwụt eti ibuot ke nte inamde utom Abasi?

⁷ Odot isịn ofụri ukeme inam uduak Abasi. Nnyịn ikpedehedei inam n̄kpọ ufep ufep m̀mê ndisịn ifem ke ndinam uduak Abasi. (Mme Hebrew 6:11, 12) Kpa ye oro, Jehovah iyomke nnyịn inam utom tutu ikpa mba ofụri ofụri. Ndisụk idem nnyịme ke nnyịn ikemeke ndinam utom Abasi ke ukeme idem nnyịn ọnọ Abasi ubọn̄ onyụn̄ owụt ke nnyịn imenyene eti ibuot. (1 Peter 4:11) Jehovah ọn̄wọn̄ọ ke iyọnọ nnyịn ukeme oro iyomde man inam uduak imọ, edi inaha inam ibe ukeme nnyịn, ke ndidomo ndinam mme n̄kpọ oro enye mîyomke ito nnyịn. (2 Corinth 4:7) Man ika iso inam n̄kpọ Abasi ye unana edikpa mba, oyom idiomi nte idade odudu nnyịn inam n̄kpọ.

8. Nso iketịbe ke ini ekpri Christian kiet okodomode ndinọ Jehovah ye ererimbot ofụri ukeme esie, ndien nso ukpụhọde ke enye akanam?

⁸ Ke uwụtn̄kpọ, Ji Hye emi odụn̄de ke Edem Usiahautịn Asia, ama anam utom isua iba ke ebiet emi adade ini esie etieti ke adan̄aemi akanamde utom usiakusụn̄. Enye ọdọhọ ete: “N̄kodomo ndinọ Jehovah ye ererimbot ofụri ukeme mi, edi n̄keside idap hour ition kpọt okoneyo. Ke akpatre, n̄kenyeneke aba ukeme ndikpep akpanikọ, n̄konyụn̄ n̄kopke aba idatesịt ke mme n̄kpọ eke spirit.” Ji Hye ama oyom utom oro mîdidaha aba ini esie ntre man akpanam n̄kpọ Jehovah ke ‘ofụri esịt, ke ofụri ukpọn̄, ke ofụri ekikere, ye ke ofụri ukeme’ esie. (Mark 12:30) Enye ọdọhọ ete: “Kpa ye oro ubon nnyịn ẹkeyomde mi n̄n̄wana ekese okụk, mma ndomo ndinịm uduak Abasi akpa. Nsụk ndadia okụk oro ekemde ndidep mme utọ akpan n̄kpọ nte ediye ọfọn̄. Ndien nso inem nte edide idap nyụhọ! Mmokop idatesịt ke utom usiakusụn̄ mi, mmonyụn̄ nnen̄ede n̄kop idem ke n̄kan̄ eke spirit. Ntak edi koro mme mbumek ererimbot emi ifịnake mi aba.”—Ecclesiastes 4:6; Matthew 6:24, 28-30.

9. Didie ke ukeme oro isịnde ekeme nditụk mme owo ke an̄wautom?

⁹ Idịghe kpukpru owo ẹdikeme ndinam n̄kpọ Abasi nte mme ọkwọrọikọ uyọhọ ini. Edieke afo ọyọde usọn̄, unana nsọn̄idem, m̀mê mme mfịna eken, fiọk ete ke Jehovah enen̄ede adat esịt aban̄a nsọn̄ọnda fo ye se ededi utom ofụri esịt oro afo anamde. (Luke 21:2, 3) Mmọdo, ọkpọkọm ukeme oro isịnde ikponke, baba owo nnyịn kiet ikpedehedei ida utịp oro enye ekemede ndinyene ke idem mbon en̄wen nte ekpri n̄kpọ. Ke uwụtn̄kpọ, yak idọhọ ke idụhe owo oro enyenede udọn̄ ke etop nnyịn ke ufọk ifan̄ oro iwahade. Idem ke mme ufọk oro owo mîkeberekede usụn̄, ke ima ikọnyọn̄, mme enyene-ufọk ẹkeme ndibiat ini ẹtịn̄ ẹban̄a edidi nnyịn! Nnyịn idorike enyịn ke kpukpru owo oro ẹkopde eti mbụk ẹyebọ akpanikọ, edi ndusụk owo ẹyebọ. (Matthew 13:19-23) Ndusụk owo ẹkeme ndibọ ke ini mme idaha ererimbot m̀mê mme idaha mmọ ke uwem ẹkpụhọrede. Ke idaha ekededi, edieke inamde ofụri se ikemede ke utom ukwọrọikọ, nnyịn inam utom Abasi. Nnyịn “idi nsan̄autom Abasi.”—1 Corinth 3:9.

10. Nso ifet ke kpukpru owo ke esop ẹnyene?

¹⁰ Ke adianade do, kpukpru nnyịn imekeme ndin̄wam mbonubon nnyịn ye nditọete nnyịn. (Galatia 6:10) Eti uwụtn̄kpọ nnyịn ekeme ndinen̄ede ntụk mbon en̄wen ke anyan ini. (Ecclesiastes 11:1, 6) Ke ini mbiowo ye mme asan̄autom unamutom ẹsịnde ifịk ẹnam utom mmọ, mmọ ẹn̄wam esop ẹsọn̄ idem ke n̄kan̄ eke spirit ẹnyụn̄ ẹsọn̄ọ ẹda, ndien emi esinam ẹnam n̄kọri ke utom Abasi. Ẹn̄wọn̄ọ ẹnọ nnyịn ke edieke inyenede “ekese ndinam ke utom Ọbọn̄,” ke utom nnyịn “idịghe ikpîkpu.”—1 Corinth 15:58.

Ndinam Uduak Abasi nte Ubọkọkọ

11. Mme ifet ewe ke ikeme ndinyene ke ẹsiode eke esop n̄kann̄kụk ẹfep?

¹¹ Nnyịn imama uwem sia idide mme Christian, inyụn̄ iyom ndinọ Abasi ubọn̄ ke kpukpru n̄kpọ oro inamde. (1 Corinth 10:31) Ke ini isọn̄ọde ida isịn idem ikwọrọ eti mbụk Obio Ubọn̄ inyụn̄ ikpepde mme owo ẹnam kpukpru n̄kpọ oro Jesus eketemede, nnyịn iyenyene ediwak nti usụn̄ oro ọnọde idatesịt ndinam n̄kpọ Abasi. (Matthew 24:14; 28:19, 20) Ke ẹsiode ndinam utom ye esop n̄kann̄kụk ẹfep, nnyịn imekeme ndinam utom ke ebiet emi udọn̄ okponde, edide ke efakutom en̄wen, ke usem en̄wen, m̀mê ke idụt en̄wen. Ẹkeme ndikot mbiowo ye mme asan̄autom unamutom oro ẹdotde, emi mîdọhọ kan̄a ndọ ẹdidụk Ufọkn̄wed Unọ Mme Asan̄autom Ukpep, ndien ekem ẹka ẹkenam utom ke esop oro ẹyomde mme Christian oro ẹkọride ẹsịm ọyọhọ idaha, ke idụt mmọ m̀mê ke esenidụt. Ebe ye n̄wan emi ẹnamde utom uyọhọ ini ẹkeme ndidot ndika Ufọkn̄wed Gilead nnyụn̄ n̄kanam utom ke esenidụt. Ẹnyụn̄ ẹyoyom mme owo kpukpru ini ndinam utom ke Bethel ye ke ndibọp nnyụn̄ n̄kama mme itie utuakibuot ye mme n̄kọk itieutom.

12, 13. (a) Didie ke afo ekeme ndibiere m̀mê ewe ifetutom ke ekpemek? (b) Nọ uwụtn̄kpọ nte mbufiọk oro ẹnyenede ke utom kiet ekemede ndin̄wam ke utom en̄wen.

¹² Ewe ifetutom ke afo akpanyanade ebịne? Nte asan̄autom Jehovah emi ama akayak idem ọnọ, yom ndausụn̄ Jehovah ye eke esop esie kpukpru ini. “Eti spirit” esie ayan̄wam fi anam nnennen ubiere. (Nehemiah 9:20) Utom kiet esiwak ndida nsịm en̄wen, ndien mbufiọk ye usọ oro enyenede ke orụk utom kiet ekeme ndin̄wam fi ke utom en̄wen ke ini iso.

¹³ Ke uwụtn̄kpọ, Dennis ye Jenny n̄wan esie ẹsin̄wam kpukpru ini ke utom edibọp Ufọkmbono Obio Ubọn̄. Ke ọkpọsọn̄ oyobio ama ọkọnọmọ edem usiahautịn United States, mmọ ẹma ẹnọ idemmọ ndinam utom unọ un̄wam. Dennis ọdọhọ ete: “Ndida usọ oro nnyịn ikenyenede ke ndibọp Ufọkmbono Obio Ubọn̄ n̄n̄wam nditọete nnyịn ọnọ nnyịn akwa idatesịt. Esịtekọm oro mbon oro ẹken̄wamde ẹwụtde enen̄ede edi akwa n̄kpọ inemesịt. Ata ediwak otu eken, emi mîdịghe Mme Ntiense, oro ẹnamde utom unọ un̄wam inyeneke akpan n̄kpọ oro ẹnamde. Edi Mme Ntiense Jehovah ẹmedọdiọn̄ mîdịghe ẹfiak ẹbọp se ikande ufọkidụn̄ 5,300 ye ediwak Ufọkmbono Obio Ubọn̄. Mme owo ẹkụt emi, ndien idahaemi ẹnen̄ede ẹnyene udọn̄ ke etop nnyịn.”

14. Nso ke afo ekeme ndinam edieke ọdọn̄de fi ndinam utom uyọhọ ini?

¹⁴ Nte afo emekeme ndinam uduak Abasi ke ndimek utom uyọhọ ini nte ubọkọkọ fo? Ke anamde ntre, afo ọyọbọ ediwak edidiọn̄. Edieke idaha fo mîyakke anam oro idahaemi, ekeme ndiyom anam ukpụhọde. Bọn̄ akam nte Nehemiah ọkọbọn̄de ke ini enye okoyomde ndinam ata akpan utom, ete: “Mbọk, O ọbọn̄, . . . nam owo fo okụt unen.” (Nehemiah 1:11) Ekem, nyene mbuọtidem ke ‘enye emi okopde akam’ nyụn̄ nam n̄kpọ ekekem ye akam fo. (Psalm 65:2) Man Jehovah ọdiọn̄ ukeme oro afo esịnde ndinam n̄kpọ esie ọyọhọ ọyọhọ, afo ke idemfo enyene ndibem iso nsịn ukeme oro. Ke ndondo oro ebierede nditọn̄ọ utom uyọhọ ini, sọn̄ọ yịre ke ubiere fo. Nte ini akade, afo eyenen̄ede enyene mbufiọk, ndien idatesịt fo oyokpon.

Uwem Oro Enen̄erede Enyene Uduak

15. (a) Didie ke ikeme ndibọ ufọn nto ndinyene nneme ye mbon oro ẹsan̄ade utom Abasi ke anyan ini nnyụn̄ n̄kot mbụk eyouwem mmọ? (b) Siak mbụk eyouwem oro esịnde udọn̄ ọnọ fi akan.

¹⁵ Mme utịp ewe ke afo ekeme ndinyene ke ndinam uduak Abasi? Nyene nneme ye mbon oro ẹma ẹkesan̄a utom Jehovah ẹbịghi, akpan akpan mbon oro ẹma ẹkenam utom uyọhọ ini ke ediwak isua. Nso uwem oro ọnọde uyụhọ onyụn̄ enyenede uduak ke emi edi ntem! (Mme N̄ke 10:22) Mmọ ẹyesian fi ke akananam Jehovah ikpụhu ndin̄wam mmimọ inyene se inen̄erede iyom m̀mê se ikande oro, idem ke ini oro n̄kpọ ẹnen̄erede ẹsọn̄. (Philippi 4:11-13) Ọtọn̄ọde ke 1955 esịm 1961, ẹma ẹmịn̄ ediwak mbụk eyouwem oro ẹban̄ade mbon oro ẹkenamde akpanikọ ẹnọ Abasi ke ibuotikọ oro “Ndibịne Se Idide Uduak Mi ke Uwem” ke Enyọn̄-Ukpeme (Ikọmbakara). Toto ke ini oro, ẹmemịn̄ ata ediwak mbụk eyouwem en̄wen. Mbụk emi kiet kiet esiwụt edu nsịnifịk ye idatesịt emi etide nnyịn nsịnifịk ye idatesịt oro ẹkụtde ke n̄wed Utom ke Bible. Ndikot mme utọ inem inem mbụk oro ayanam fi ọdọhọ ete, ‘Orụk uwem oro ke nyom ndidu!’

16. Nso inam uwem Christian enyene uduak onyụn̄ ọnọ inemesịt?

¹⁶ Aaron oro ikasiakde ke ntọn̄ọ ọdọhọ ete: “Ke Africa, mma nsikụt n̄kparawa owo emi ẹkeyode ẹyom uduak uwem. Ata ediwak ikekwe. Edi amaedi nnyịn, ke inam uduak Abasi ke ndikwọrọ eti mbụk Obio Ubọn̄, ndien nnyịn imodu uwem oro aduaide owo idem onyụn̄ enyenede uduak. Nnyịn imokụt ke idem nnyịn ke inemesịt okpon ke ndinọnọ akan ke ndibọbọ.”—Utom 20:35.

17. Ntak emi anade inam uduak Abasi idahaemi?

¹⁷ Nso kaban̄a fi? Ewe uduak ke afo oyom? Edieke afo mûnyeneke akpan utịtmbuba eke spirit, mme n̄kpọ eken ẹyeda ofụri ini ye ukeme fo. Ufọn ndibiat ọsọn̄urua uwem ke mme n̄kpọ oro ererimbot Satan adade nte ata akpan n̄kpọ? Ke n̄kpet n̄kpet ini iso emi “akwa ukụt” edisiahade, inyene ye ikpọ itie ke ererimbot emi idinyeneke ufọn. Se idinyenede ufọn edidi itie ebuana nnyịn ye Jehovah. Nnyịn idinem esịt didie ntem ke ikanam n̄kpọ inọ Abasi ye mbon en̄wen inyụn̄ ida uwem nnyịn inam uduak Abasi ọyọhọ ọyọhọ!—Matthew 24:21; Ediyarade 7:14, 15.

[Mme Ikọ idakisọn̄]

Nte Afo Emekeme Ndinam An̄wan̄a?

• Jehovah ese utom oro inamde inọ enye didie?

• Didie ke ndinam nti usio-ukot nnyụn̄ n̄wụt eti ibuot ẹn̄wam nnyịn inam n̄kpọ inọ Abasi ye mbon en̄wen?

• Mme ifet ewe ẹbererede ẹnọ nnyịn ndinam utom?

• Didie ke ikeme ndidu uwem oro enen̄erede enyene uduak idahaemi?

[Mme ndise ke page 23]

Oyom iwụt eti ibuot man ika iso inam n̄kpọ Jehovah ke ofụri ukpọn̄

[Mme ndise ke page 24]

Utom Abasi edi ke utọ ke utọ