Ndi Ẹkeme Ndinam Usọrọ Ndem Akabade Usọrọ Mme Christian?

Ndi Ẹkeme Ndinam Usọrọ Ndem Akabade Usọrọ Mme Christian?

ẸMA ẹnen̄ede ẹneni ke ini Christmas eke 2004 ke Italy ẹban̄a m̀mê odot ẹdia Christmas m̀mê idotke. Ndusụk mme etubom ufọkn̄wed ye mme andikpep ẹkedọhọ ke akpana ẹtehede ube mîdịghe ẹtre nditetịn̄ n̄kpọ mban̄a edinam ido ukpono ekededi oro aban̄ade Christmas. Mmọ ẹketịn̄ emi ke ufọn ediwak nditọ ufọkn̄wed oro mîdịghe mbon Catholic m̀mê Protestant. Nte ededi, mme andikpep eken ye mbon en̄wen ẹma ẹdọhọ ẹsinam mme edinam emi ẹnyụn̄ ẹyak enye aka iso.

Edi ke ẹsiode mme eneni emi ẹfep, ediwak edinam Christmas emi ẹkesan̄a didie ẹdidu? Nte eneni emi akasan̄ade ekpere utịt, n̄wedmbụk n̄kpọntịbe obio ukara Pope ama ewet ndusụk inem inem ikọ aban̄a se ẹkekụtde.

N̄wedmbụk n̄kpọntịbe Catholic oro eketịn̄ ntem aban̄a usenọfiọn̄ oro ẹsinịmde usọrọ Christmas: “Mbụk Rome, edinam ubatowo oro ẹkenamde ini oro, ye ndụn̄ọde oro ẹkenamde ke ediwak isua ikie oro ẹketienede isiakke ata usenọfiọn̄ emi Jesus akamanade . . . Kpukpru owo ẹfiọk ke Ufọkabasi Rome ẹkemek December 25 ke ọyọhọ isua ikie inan̄. Ẹkesida usen emi ẹkpono abasi Utịn ke ini Rome ekesituakde ibuot ọnọ ndem . . . Okposụkedi emi Ibet Constantine ama ekenyenyịme Ido Ukpono Christ ke Rome, mme owo ke kpukpru ebiet, akpan akpan mbonekọn̄, ẹkesụk ẹkeke n̄ke . . . abasi Utịn. Mme usọrọ oro ẹtịn̄de ẹban̄a ke enyọn̄ emi, oro ẹkesidiade ke December 25, ẹkenen̄ede ẹto ido obio. Emi ama anam Ufọkabasi Rome ẹda December 25 nte akpan usen Ido Ukpono Christ, ẹnyụn̄ ẹda Jesus Christ, kpa ata Utịn Edinen Ikpe, ẹkpụhọ ye abasi Utịn, ẹnyụn̄ ẹmek usen oro ndida ndia usọrọ usen emana esie.”

Nso kaban̄a eto Christmas emi mbon Catholic ẹsikamade idahaemi?

Ibuotikọ oro ke n̄wedmbụk n̄kpọntịbe Catholic owụt ke ini eset oro, ẹkesida ediwak eto oro ikọn̄ mîsiken̄eke, utọ nte enye oro ẹkotde “holly, butcher’s broom, laurel ye mme n̄kọk eto ofụm nte mfọni m̀mê mme eto oro ẹkemede ndikpan udọn̄ọ.” Enye adian do ete: “Ke Mbubịteyo December 24, ẹma ẹsida ọwọrọetop mbụk oro aban̄ade Eto ke Paradise isọn̄ ẹti Adam ye Eve . . . Eto oro akpana edi eto apple, edi sia enye mîsidụhe ke ini ọkpọsọn̄ etuep, ẹma ẹsidori eto ofụm ke n̄kpoto ẹnyụn̄ ẹda mfri apple ẹyịre ke mme n̄kọk esie, mîdịghe man ẹwụt nte ẹdinyan̄ade ubonowo ke ini iso, ẹma ẹsinam mfefere uyo emi enyenede san̄asan̄a mbiet ndida mban̄a Udia Ọbọn̄ man owụt ke Jesus etiene odu do, ẹnyụn̄ ẹbon mme swid ye mme enọ nditọwọn̄.” Nso iketịbe ke ini oro ama ekebe?

Ke ini n̄wedmbụk n̄kpọntịbe obio ukara Pope oro eketịn̄de ke ẹketọn̄ọ ndikama eto Christmas ke Germany ke ọyọhọ isua ikie 16, enye ọkọdọhọ ete: “Italy ekedi kiet ke otu mme akpatre idụt oro ẹkenyịmede ndikama eto Christmas; ntak kiet ekedi emi ẹkedọhọde ke mbon Protestant ẹsikama eto emi ndien ke akpana ẹda se iketịbede ke ufọkudia ufene [oro edi, ndise Emana Jesus] ẹkpụhọ ye enye.” Pope Paul VI “ọkọtọn̄ọ ndisinịm akwa eto Christmas [ke An̄wa Obio ke St. Peter’s ke Rome]” n̄kpere ndise Emana Jesus.

Ndi ekere ke enen adaiso ido ukpono ndidọhọ ke mme edinam ye idiọn̄ọ emi ẹkedide n̄kpọ mme okpono ndem ke eset ẹnyene ebuana ye Ido Ukpono Christ? N̄wed Abasi eteme ata mme Christian se idide nnennen n̄kpọ ke ndibụp ete: “Nso ebuana ke edinen ido ye ubiatibet ẹnyene? Mîdịghe nso ebuana ke un̄wana enyene ye ekịm?”—2 Corinth 6:14-17.

[Mme ndise ke page 8, 9]

Eto Christmas (page enye eken) ye ndise Emana Jesus ke Vatican

[Ebiet Ẹdade N̄kpọ Ẹto]

[Ndise ke page 9]

Abasi utịn

[Ebiet Ẹdade N̄kpọ Ẹto]

Museum Wiesbaden