San̄a Kpere Abasi

Ekpemerọn̄ Oro Ekerede Aban̄a

Matthew 18:12-14

‘NDI Abasi ekere aban̄a mi?’ Edieke edide akanam afo omobụp utọ mbụme emi, mbon en̄wen ẹsibụp n̄ko. Ediwak nnyịn imosobo nsọn̄ọn̄kpọ ye afanikọn̄, ndien ndusụk ini imekeme ndikere m̀mê Andibot akaka ekondo emi akam ọfiọk m̀mê utọ owo nte nnyịn imodu. Oyom nnyịn ifiọk ibọrọ mbụme emi, Ndi Jehovah Abasi ekere aban̄a nnyịn owo kiet kiet? Ke ini Jesus emi ọfiọkde Jehovah ọfọn akan okodude ke isọn̄, enye ama ọnọ uwụtn̄kpọ oro ọbọrọde mbụme emi ke ata edinem usụn̄.

Jesus eketịn̄ ntem ke ini ọnọde uwụtn̄kpọ aban̄ade ekpemerọn̄: “Edieke owo kiet enyenede erọn̄ ikie ndien kiet ke otu mmọ osop usụn̄, nte enye idikpọn̄ke anan̄-ye-efịtenan̄ ke enyọn̄ obot inyụn̄ idaha ikoyom kiet emi osopde usụn̄ do? Ndien edieke enye okụtde, ke akpanikọ ke ndọhọ mbufo nte, enye adara enye akan anan̄-ye-efịtenan̄ emi mîkosopke usụn̄. Kpasụk ntre Ete mi emi odude ke heaven iyomke kiet ke otu n̄kpri owo emi atak.” (Matthew 18:12-14) Ẹyak ise nte Jesus owụtde ke Jehovah ekere aban̄a mme andituak ibuot nnọ Enye kiet kiet.

Ekpemerọn̄ oro ama ekere aban̄a erọn̄ esie kiet kiet. Edieke erọn̄ kiet osopde, enye ama ọfiọk enye oro okosopde. Enye ama ada enyịn̄ oro enye ọkọnọde erọn̄ kiet kiet ọfiọk erọn̄ oro. (John 10:3) Ekpemerọn̄ ikesidehe idap tutu enye okụt erọn̄ oro okosopde. Enye ndikọkpọn̄ erọn̄ 99 eken man okoyom kiet oro okosopde ikọwọrọke ke enye ikekereke iban̄a erọn̄ 99 oro. Mme ekpemerọn̄ ẹma ẹsiwak ndidu ọtọkiet ẹnyụn̄ ẹyak mme erọn̄ mmọ ẹbuaha ọtọkiet.a Ntem, ekpemerọn̄ oro akakade ndiyom erọn̄ oro okosopde ekeme ndikpọn̄ mme erọn̄ esie oro ẹsụhọde ọnọ ekemmọ ekpemerọn̄ man enye ese enyịn. Ke ama okokụt erọn̄ oro okosopde do, ekpemerọn̄ oro ama enem esịt etieti sia n̄kpọ mînamke erọn̄ esie. Enye ama emen erọn̄ oro okosopde mi odori ke afara onyụn̄ emen ekesịn ke otu erọn̄ eken.—Luke 15:5, 6.

Jesus ama abuan uwụtn̄kpọ emi ke ndidọhọ ke Abasi “iyomke kiet ke otu n̄kpri owo emi atak.” Jesus ama ebem iso odụri mme mbet esie utọn̄ ete ẹkûnam “kiet ke otu n̄kpri owo eke ẹbuọtde idem ye” imọ atuak ukot ọduọ. (Matthew 18:6) Nso ndien ke uwụtn̄kpọ Jesus ekpep nnyịn aban̄a Jehovah? Ekpep nnyịn nte ke Jehovah edi Ekpemerọn̄ oro enen̄erede ekere aban̄a erọn̄ esie kiet kiet, esịnede “n̄kpri owo”—kpa mbon oro ẹtiede nte ke iwọrọke n̄kpọ ke ererimbot. Ke akpanikọ, owo kiet kiet oro atuakde ibuot ọnọ Abasi edi n̄kpọuto onyụn̄ ọsọn̄ urua ke enyịn esie.

Edieke afo oyomde nditịm mfiọk ke imọsọn̄ urua ke enyịn Abasi, kpep n̄kpọ efen efen ban̄a Akwa Ekpemerọn̄, kpa Jehovah Abasi, nyụn̄ kpep nte ekemede ndisan̄a n̄kpere enye. Ke ndinam ntem, afo eyenyene ukem nsọn̄ọ oro apostle Peter ekenyenede, emi akadade utọn̄ esie okop uwụtn̄kpọ Jesus aban̄ade erọn̄ oro okosopde. Peter ama ewet ke ukperedem ete: “[Ẹtop] kpukpru editịmede esịt mbufo ẹdori [Abasi] ke idem, koro enye ekerede aban̄a mbufo.”—1 Peter 5:7.

[Ikọ Idakisọn̄]