Se Ikpepde Ito Jesus

Iban̄a nte Ikpanamde N̄kpọ ye Mme Owo

Ntak emi ikpọfọnde ido?

Nte afo emesifọn ido idem ke ini mme owo ẹsọn̄de ido ye afo? Edieke iyomde ndikpebe Jesus, ana ifọn ido idem ye mbon oro ẹsuade nnyịn. Jesus ọkọdọhọ ete: “Edieke mbufo ẹmade mmọ eke ẹmade mbufo, nso itoro ke mbufo ẹnyene? Koro kpa mme anamidiọk ẹmama mmọ eke ẹmade mmọ. . . . Ke edide isio, ẹka iso ẹma mme asua mbufo . . . , mbufo ẹyenyụn̄ ẹdi nditọ Ata Edikon̄, koro enye ọfọnde ido ye mme anana-esịtekọm ye mme idiọkowo.”—Luke 6:32-36; 10:25-37.

Ntak emi ikpefende inọ owo?

Nnyịn imesiyom Abasi efen nnyịn ke ini inamde ndudue. Jesus ama ekpep ke odot ibọn̄ akam idọhọ Abasi efen ọnọ nnyịn. (Matthew 6:12) Nte ededi, Jesus ọkọdọhọ n̄ko ke Abasi edifen nnyịn n̄kukụre edieke nnyịn ifende mbon en̄wen. Enye ọkọdọhọ ete: “Edieke mbufo ẹfende ẹnọ mme owo ke mme idiọkn̄kpọ mmọ, Ete mbufo eke heaven eyefen n̄ko ọnọ mbufo; edi edieke mbufo mîfenke inọ mme owo ke mme idiọkn̄kpọ mmọ, Ete mbufo idinyụn̄ ifenke inọ mbufo ke mme idiọkn̄kpọ mbufo.”—Matthew 6:14, 15.

Nso ke owo kiet kiet akpanam man inemesịt odu ke ubon?

Okposụkedi Jesus mîkọdọhọ ndọ, nnyịn imekeme ndikpep ekese nto enye ke se ẹkpenamde man inemesịt odu ke ubon. Enye ama enịm uwụtn̄kpọ ọnọ nnyịn ndikpebe ke ikọ ye ke edinam. Kere ban̄a akpan usụn̄ ita emi:

1. Ana ebe ama n̄wan esie nte idemesie. Jesus ama enịm uwụtn̄kpọ ọnọ mme ebe. Enye ọkọdọhọ mme mbet esie ete: “Mmọnọ mbufo obufa ibet, nte mbufo ẹma kiet eken; kpa nte n̄kamade mbufo.” (John 13:34) Bible ọdọhọ mme ebe ẹma iban mmọ. Enye ete: “Mme ebe, ẹka iso ẹma iban mbufo, kpa nte Christ n̄ko akamade esop onyụn̄ ayakde idemesie ọnọ ke ibuot esie . . . Ntem ke mme ebe ẹkpema iban mmọ nte idem mmọ. Owo eke amade n̄wan esie ama idemesie, koro akananam baba owo kiet isuaha obụkidem esie; edi ọbọbọk onyụn̄ ekpeme enye, kpa nte Christ n̄ko anamde ye esop.”—Ephesus 5:25, 28, 29.

2. Ana ebe ye n̄wan ẹnam akpanikọ ẹnọ kiet eken. Ndinyene ebuana idan̄ ye owo emi mîdịghe n̄wan m̀mê ebe fo edi idiọkn̄kpọ ke iso Abasi, ndien emi esibiat ubon. Jesus ọkọdọhọ ete: “Nte mbufo ikokotke ite . . . ‘Ke ntak emi owo ọyọkpọn̄ ete ye eka esie onyụn̄ akadiana ye n̄wan esie, ndien mmọ mbiba ẹyekabade ẹdi obụk kiet’? Ntre mmọ idịghe aba owo iba, edi ẹdi obụk kiet. Ke ntre, se Abasi ama akadian yak baba owo kiet okûdianade. . . . Ndọhọ mbufo nte owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen esịn efịbe.”—Matthew 19:4-9.

3. Ana nditọwọn̄ ẹsụk ibuot ẹnọ ete ye eka mmọ. Ke ini Jesus ekedide eyenọwọn̄, enye ama osụk ibuot ọnọ ete ye eka esie okposụkedi emi enye ekedide mfọnmma owo, ete ye eka esie ẹkenyụn̄ ẹdide mme anana-mfọnmma. Bible ọdọhọ ke ini Jesus ekedide isua 12, ke ‘enye ama asan̄a ye ete ye eka esie osụhọde edi ke Nazareth, onyụn̄ aka iso osụk ibuot ọnọ mmọ.’—Luke 2:51; Ephesus 6:1-3.

Ntak emi ikpadade mme item emi isịn ke edinam?

Jesus ọkọdọhọ mme mbet esie ete: “Edieke mbufo ẹfiọkde mme n̄kpọ emi [oro edi se ikekpepde mmọ] inemesịt edidi eke mbufo edieke ẹnamde mmọ.” (John 13:17) Man idi ata Christian, ana inam n̄kpọ ye mme owo nte Jesus eketemede. Enye ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:35.

Edieke oyomde ntọt efen efen, se ibuot 14 ke n̄wed Nso ke Bible Enen̄ede Ekpep?a

[Ịkọ Idakisọn̄]

[Ndise ke page 16, 17]

N̄ke Jesus aban̄ade idiọk udọ ekpep nnyịn ke ọfọn ndifọn ido nnyụn̄ mfen nnọ owo.—Luke 15:11-32

[Ndise ke page 17]

Ana ebe ye n̄wan ẹnam akpanikọ ẹnọ kiet eken