Bible Okpụhọde Mme Owo

Nso ikpanam eyen Mexico emi ekedide owo idiọk n̄ka oro ẹkotde N̄kpri Satan akabade edi anam-akpanikọ akparawa oro mîdaha mbre isịn ke utom? Ntak emi n̄wan Japan emi ekedide ata anam-mbubehe etrede ndikọ inyene, ndien ukpụhọde emi etie enye didie ke idem? Nso ikpanam owo Russia emi ekesibotde n̄kpọekọn̄ oro edide n̄kpọmbet etre utọ idiọk mbubehe oro ekesenede enye mi? Kop se mmọ ẹtịn̄de.

ENYỊN̄: ADRIAN PEREZ

ISUA EMANA: 30

IDỤT: MEXICO

UTỌ OWO EMI ENYE EKEDIDE: OWO IDIỌK N̄KA

NTE N̄KESIDUDE UWEM: Ubon nnyịn ẹma ẹwọrọ ẹkedụn̄ ke Ecatepec de Morelos ke Mexico ke ini n̄kedide isua 13. Ini oro, ndiọi nditọwọn̄ oro ẹkesiduọde obom, mme abak ibak, ye mme ada n̄kpọsọn̄ ibọk ẹkeyọyọhọ obio oro. Ikebịghike, mma ntọn̄ọ ndisin̄wọn̄ mmịn mbe ubọk, mbak ibak, nnyụn̄ ndu oburobụt uwem.

Nte ini akakade, nnyịn ima ifiak inyọn̄ ika San Vicente oro n̄kamanade. Nte ededi, mme owo ẹma ẹsinen̄ede ẹda n̄kpọsọn̄ ibọk do. Ima isikụt mme uyen ẹkpan̄ade ẹbono ke efak. Mma ndụk idiọk n̄ka oro ẹkotde N̄kpri Satan. Ima isiyịp n̄kpọ inyụn̄ ida n̄kpọsọn̄ ibọk. Ediwak ini, n̄kọfiọkke nte n̄kesisan̄ade n̄kesịm ufọk, mma nsinyụn̄ nsụhọ ke efak ndusụk ini. Ẹma ẹkọbi ndusụk ufan mi ke ntak uyịpinọ ye uwotowo.

Kpa ye kpukpru emi, mma nnịm ke Abasi do. Mma nsitiene mbuana ke akpan edinam Ufọkabasi Catholic man esịt okûnen̄ede obiom mi. Ke ẹma ẹkesuana, kpukpru nnyịn oro ikabuanade ke edinam ufọkabasi emi, esịnede owo oro akanamde nte idi Christ, ima isikpa mmịn.

NTE BIBLE OKOKPỤHỌREDE UWEM MI: Mma ntọn̄ọ ndikpep Bible ye Mme Ntiense Jehovah ke ini n̄kekperede ndisịm isua 20. Mma mfiọk ke uwem mi ikọwọrọke n̄kpọ ye nte ke n̄kpọ idifọnke ye ami edieke n̄kade iso ndu utọ uwem emi. Se idude ke Galatia 6:8 ama enen̄ede otụk mi. Itien̄wed oro ọdọhọ ete: “Koro owo eke ọtọde ọnọ obụkidem ọyọdọk mbiara oto obụkidem, edi owo emi ọtọde ọnọ spirit ọyọdọk nsinsi uwem oto spirit.” Itie N̄wed Abasi emi ama anam mfiọk ke ana n̄kpụhọde edieke nyomde n̄kpọ ọfọn ye ami ke ini iso.

Nte n̄kekpepde Bible, mma ntọn̄ọ ndifiọk ke Jehovah edi odu-uwem Abasi emi enyenede udọn̄ ke idem mi, ye nte ke enye enyịme ndifen mme idiọkn̄kpọ oro n̄kesinamde. Se iketịbede inọ mi ama anam mfiọk ke Abasi esikop onyụn̄ ọbọrọ akam.

Ikememke utom ndikpụhọ usụn̄ uwem mi. Ama ọsọn̄ mi ndikpọn̄ idiọk n̄ka oro. N̄kesikemeke ndidụk ndusụk efak okposụkedi mmen̄kodụhe aba ke idiọk n̄ka oro. Mma nsidịbe ndusụk ini mbak n̄kani ufan ẹdikụt mi ẹnyụn̄ ẹfiak ẹdụri mi ẹsịn ke oburobụt uwem.

Edi ke ini n̄kọtọn̄ọde ndidụk mbono esop Mme Ntiense Jehovah ke Ufọkmbono Obio Ubọn̄ mmọ, mma n̄kụt ke mmọ ẹdara owo ẹnyụn̄ ẹma ima. Ama enen̄ede enem mi ndikụt ke mmọ ẹnyene ọkpọsọn̄ mbuọtidem ẹnyụn̄ ẹnam se mmọ ẹsikpepde. Se n̄kokụtde mi ekedi ata isio ye se n̄kesikụtde ke ini n̄kodude ye n̄ka N̄kpri Satan.

UFỌN ORO MBỌDE: Esịm isua duop tọn̄ọ n̄kana baptism nte kiet ke otu Mme Ntiense Jehovah. Mmenen̄ede nsịn ukeme nnam se Bible ekpepde. Ndien emi anam nnyene ukpono ke ubon nnyịn. Mmọ ẹkụt ke mmenen̄ede nsịn idem nnam utom idahaemi, ndien mmesinyụn̄ n̄n̄wam mmọ ke okụk. Eka mi ama ọtọn̄ọ ndikpep Bible, ndien enye edi kiet ke otu Mme Ntiense Jehovah idahaemi. Ete mi ke okpụhọrede usụn̄ uwem esie n̄ko. Okposụkedi ediwak owo ke ubon nnyịn mîdịghe Mme Ntiense Jehovah, ke ini mmọ ẹkụtde nte uwem mi okpụhọrede, emi anam mmọ ẹnịm ke Bible ekeme ndikpụhọde owo.

ENYỊN̄: YAYOI NAGATANI

ISUA EMANA: 50

IDỤT: JAPAN

UTỌ OWO EMI ENYE EKEDIDE: ATA ANAM-MBUBEHE

NTE N̄KESIDUDE UWEM: N̄kokpon ke ekpri obio emi mme owo ẹsitiede ufan ufan. Ete mi ama enyene akamba ufọkurua onyụn̄ enyene nditọufọk duop. Ufọk nnyịn ama ekpere ufọkurua oro, ntre kpa ye oro ete ye eka mi mîkesiwakke ndidu ke ufọk, n̄kokopke ndobo.

Nnyịn ikedi iban ita ndien ami n̄kedi adiaha, ntre ẹma ẹnọ mi ukpep toto ke uyen ndise mban̄a mbubehe ubon nnyịn. Mma mbak ndọ ebe. Ebe mi ama ọkpọn̄ utom ban̄k editiene anam mbubehe ubon nnyịn. Ima inyene nditọ ita. Eka mi ekesise aban̄a nditọ emi onyụn̄ anam mme utom eken ke ufọk, ke adan̄aemi n̄kesidude ke ufọkurua nnyịn ọtọn̄ọde ke usenubọk tutu eyo okụt. Kpa ye ofụri emi, ikosụk inyenyene ini inọ idem nnyịn nte ubon.

Urua ama ọdiọk ke idụt oro tutu mbubehe nnyịn ọtọn̄ọ ndiduọ. Ntre nnyịn ima ibiere ndisiak obufa ufọkurua ke mbenusụn̄ man isinyam mme n̄kpọ ubọpufọk. Ke ayakde usen kiet mbemiso ẹtọn̄ọde ndutịm edibọp obufa ufọkurua oro, ete mi oro akadade iso ke mbubehe oro ama ọdọn̄ọ akpauben̄. Enye ikekemeke aba nditịn̄ ikọ, ntre ofụri mbiomo obufa ufọkurua oro okodoro mi ke ibuot. Ebe mi ekesise aban̄a akani ufọkurua. Nnyịn ikesinyeneke aba ini.

Nnyịn ima isinen̄ede inyam n̄kpọ ke obufa ufọkurua nnyịn emi. Kpukpru emi ẹma ẹnam mi nnen̄ede n̄kop inemesịt, mma nsinyụn̄ ntaba idap nnam mbubehe. Kpa ye oro n̄kenen̄erede mma nditọ mi, n̄kukụre se ikodụkde mi ibuot ekedi mbubehe. N̄kesinyeneke ini ndomokiet ndineme nneme ye ebe mi, ndien ima isifan̄a mfan̄a etieti ini ekededi oro inemede nneme. Iwakke okoneyo oro mmen̄kesisan̄ake ye mme ufan ye mbon oro n̄kesinamde mbubehe kiet n̄ka un̄wọn̄ n̄kpọ man mfre uwa. N̄kukụre se ikodụkde mi ibuot ekedi mbubehe, un̄wọn̄ n̄kpọ, ye idap. Mma nnen̄ede nnyene okụk edi n̄kokopke inemesịt ndomo esisịt, ndien n̄kọfiọkke ntak.

NTE BIBLE OKOKPỤHỌREDE UWEM MI: Ke ini n̄kọtọn̄ọde ndikpep Bible ye Mme Ntiense Jehovah, itie N̄wed Abasi ita ẹma ẹnen̄ede ẹtụk mi. Mma ntua ke ini n̄kọfiọkde se Matthew 5:3 ọwọrọde. Enye ọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit, koro obio ubọn̄ heaven enyenede mmọ.” Kpa ye oro n̄kadade okụk mbre nsa, mbon oro ikesisan̄ade ntre inam mbubehe ẹkesinyụn̄ ẹkponode mi, itien̄wed emi ama anam mfiọk ntak emi mmen̄kesikopke inemesịt. Mma ndifiọk ke n̄kukụre se idinọde mi ata inemesịt edi edinam n̄kpọ Abasi.

Ini oro, n̄kpọ ama enen̄ede ọsọn̄ ke Japan, ndien mma n̄kụt 1 Timothy 6:9 osude mbon oro ikesisan̄ade ntre inam mbubehe ke idem. Itien̄wed oro ọdọhọ ete: “Mbon oro ẹbierede ndinyene inyene ẹduọ ẹdụk idomo ye ekpọ ye ediwak ndisịme ye idiọk udọn̄, emi ẹdụride mme owo ẹsịn ke nsobo ye nditaha.” Eketie nte Jesus eketịn̄ se idude ke Matthew 6:24 ọnọ mi. Enye ọdọhọ ke ‘nnyịn ikemeke ndidụk ufụn nnọ Abasi ye Inyene,’ ntre mma mbiere ndinam ukpụhọde.

Mma ndifiọk ke n̄kesehe mban̄a ete ye eka mi, ebe mi, ye nditọ mi. Mma nnyụn̄ n̄kụt ke mma ntọn̄ọ ndinyene ndiọi edu. Mma n̄kohode idem nnyụn̄ nnana ime. Mma nsinyụn̄ nsọp iyatesịt. Akpa, n̄kekere ke ndikemeke ndidi Christian. Nte ededi, mma nnen̄ede mma nditọ mi, ndien ke ini nnamde n̄kpọ ye ubon mi nte Bible etemede, nditọ mi ẹma ẹsisụk ibuot. Mma nsidu ekese ini ye mmọ nsinyụn̄ nda mmọ n̄ka mme mbono esop Christian.

UFỌN ORO MBỌDE: Ndifiọk uduak uwem, n̄kpono Abasi, nnyụn̄ ndu uwem oro enemde enye esịt, ọnọ mi ata idatesịt ye uyụhọ. Ndụkke aba ufụn nnọ utom, mmenyene ini idahaemi ndidu ye ubon mi, ndien emi anam mmọ ẹfiak ẹkpono mi.

Eka mi ama ọtọn̄ọ ndikpep Bible onyụn̄ akabade edi Christian ke ini okokụtde nte Bible anamde n̄kabade obufa owo. Esịt enem mi nte ke ete mi ye ebe mi ibiọn̄ọke nnyịn. Mmenen̄ede n̄kpere nditọ mi idem, ndien nnyịn imenen̄ede ikop inemesịt idahaemi.

ENYỊN̄: MIKHAIL ZUYEV

ISUA EMANA: 51

IDỤT: RUSSIA

UTỌ OWO ORO ENYE EKEDIDE: OBOT N̄KPỌEKỌN̄ ORO EDIDE N̄KPỌMBET

NTE N̄KESIDUDE UWEM: Ami ndi eyen obio Krasnogorsk, kpa ediye obio emi esịnede ke ufọt ikpọ akai; Akpa Moscow onyụn̄ ewet aka usụk usụk obio emi.

Mma nsima en̄wan nnyụn̄ nsida n̄kpọekọn̄ mbre mbre ke ini n̄kedide eyenọwọn̄. Mma nsibiat ekese ini nsịn̄ede idem man nnyene odudu. Mma nsinyụn̄ nnam n̄kpọmbet—oro edi, ikan̄, mme n̄kpọekọn̄ eken, ye afaka. Nte ini akakade, emi ama akabade ubọkọkọ mi. Mma nnen̄ede mbat ibuot nnyụn̄ mforo etieti nto edinyam n̄kpọekọn̄ emi nnọ mme abiatibet.

NTE BIBLE OKOKPỤHỌREDE UWEM MI: Mma nsobo ye Mme Ntiense Jehovah ke ntọn̄ọ ntọn̄ọ iduọk isua 1990, edi n̄kada mmọ didie didie. N̄kekere ke mmọ ẹsibụp owo mbụme ẹkaha.

Usen kiet, owo mmọ kiet ama okot Rome 14:12 ọnọ mi. Itien̄wed oro ọdọhọ ete: “Owo nnyịn kiet kiet ayanam ibat aban̄a idemesie ọnọ Abasi.” Mma n̄kere m̀mê nso ke ndisian Abasi. Itie N̄wed Abasi emi ama anam n̄kpep se Abasi oyomde oto mi.

Mma nsịn idem nnam se Bible etemede ke Colossae 3:5-10 ete: “Ẹwot mme ndido idem mbufo emi ẹdude ke isọn̄ kaban̄a use, mbubiam ido, ọkpọsọn̄ udọn̄ idan̄, udọn̄ oro ekemede ndinọ unan, ye edisịn esịt ke n̄kpọ owo, emi edide ukpono ndem. Ke ntak n̄kpọ emi iyatesịt Abasi ke edi. . . . Ẹsion̄o kpukpru iyatesịt, ifụtesịt, idiọkn̄kpọ, ikọ isụn̄i, ye mbubiam ikọ ke inua mbufo ẹfep. Ẹkûsu nsu ẹnọ kiet eken. Ẹsio akani owo ye mme edinam esie ẹduọk, ẹnyụn̄ ẹmen obufa owo ẹsịne.”

Ikememke utom ndinam kpukpru ukpụhọde emi. Mme abiatibet oro n̄kesinyamde n̄kpọekọn̄ nnọ ẹma ẹsinọ mi okụk ẹte nnọ mmimọ n̄kpọekọn̄, ndien ikesinyụn̄ imemke utom ndimụm idem n̄kama ke ini mme owo ẹsọn̄ọde mi enyịn. Kpa ye oro, mma mbiat kpukpru n̄kpọekọn̄ mi. Ke ini n̄kọfiọkde adan̄a ima oro Abasi ye Christ ẹmade mi, ama ọdọn̄ mi ndima mmọ n̄ko. Mma n̄ka iso n̄kpep Bible, ndụk mme mbono esop, nnyụn̄ mbọn̄ akam mben̄e Abasi an̄wam mi.

UFỌN ORO MBỌDE: Ukeme oro nsịnde ọkọrọ ye un̄wam oro nditọete ẹnọde mi ẹmenam ntọn̄ọ ndidu eti uwem. Enen̄ede enem mi ndifiọk ke Jehovah Abasi ekere aban̄a nnyịn owo kiet kiet, idem ye mbon oro ẹma ẹkekpan̄a. (Utom 24:15) Mmenen̄ede mma nte Mme Ntiense Jehovah ẹnamde akpanikọ. Onyụn̄ enem mi ndikụt nte mmọ ẹnen̄erede ẹma mi ẹnyụn̄ ẹsọn̄ọde ẹda ẹnam n̄kpọ Abasi.

Ke akpa, ndusụk mbonubon nnyịn ye mme ufan ikoyomke ndi Ntiense. Edi mmọ ẹsikere ke akam ọfọn ami ndidụk ido ukpono akan ndidi abiatibet. Esịt enem mi sia mmenyamke aba n̄kpọekọn̄, edi ndisịn idem nnam mme owo ẹfiọk Abasi emem.

[Ndise ke page 27]

Mma nsitiene mbuana ke edinam Ufọkabasi Catholic man esịt okûnen̄ede obiom mi

[Ndise ke page 28]

Mma nnyene okụk etieti, edi n̄kokopke inemesịt ndomo esisịt