Mbụme Oro Mme Andikot Ẹbụpde
Adam Akasan̄a Didie Anam Idiọkn̄kpọ Edieke Enye Ekedide Mfọnmma?
Adam ama ekeme ndinam idiọkn̄kpọ sia Abasi ama ọnọ enye ifụre ndimek se enye amade. Emi iwọrọke ke Adam ikedịghe mfọnmma owo. Ke nditịm ntịn̄, Abasi ikpọn̄ ọfọn ama ke kpukpru usụn̄. (Deuteronomy 32:3, 4; Psalm 18:30; Mark 10:18) Owo m̀mê n̄kpọ en̄wen ekededi ikemeke ndifọn mma ofụri ofụri. Ke uwụtn̄kpọ, ekeme ndida ikwa nsịbe unam edifọn edifọn, edi ndi emekeme ndida enye mfobo efere? Ẹkeme ndidọhọ ke n̄kpọ ọfọn ama etiene se ẹdade enye ẹnam.
Ntre, ntak emi Abasi okobotde Adam? Abasi okoyom Adam obon nditọ emi ẹnyenede ifiọk ẹnyụn̄ ẹnyenede ifụre ndimek se mmọ ẹmade. Mbon oro ẹmade Abasi ye mme usụn̄ esie ẹyewụt emi ke ndimek ndinịm mbet esie. Mmọdo, Abasi ikobotke-bot nsụkibuot isịn owo ke idem, edi akana owo ebiere ke idemesie ndisụk ibuot nnọ Abasi. (Deuteronomy 10:12, 13; 30:19, 20) Ntem, edieke Abasi okpokobotde Adam ke usụn̄ oro enye mîdikemeke ndibiere se enye akpamade ndinam, oro ọkpọwọrọ ke owo ikobotke enye ọfọn ama. Bible ọdọhọ ke Adam ekemek ndida ifụre oro Abasi ọkọnọde enye ntiene n̄wan esie mbiat ibet oro Abasi ọkọnọde aban̄a “eto ifiọk, eti ye idiọk.”—Genesis 2:17; 3:1-6.
Bet kan̄a ise, ndi ntak emi Abasi mîketịmke ibot Adam akanam enye okûkeme ndinam eti ubiere m̀mê ndikan idomo? Mbemiso Adam ọkọsọn̄de ibuot, Jehovah Abasi ama odụn̄ọde kpukpru se enye okobotde ke isọn̄, esịnede Adam ye Eve, onyụn̄ okụt ke kpukpru n̄kpọ ẹma “ẹfọn eti eti.” (Genesis 1:31) Ntem, idịghe usụn̄ emi Abasi okobotde Adam akanam enye anam idiọkn̄kpọ, enye ekemek ndinam idiọkn̄kpọ ke idemesie. (Genesis 3:17-19) Adam ikayakke ima oro enye amade Abasi ye ndinen edumbet esie ẹnam enye osụk ibuot ọnọ Abasi ikpọn̄-ikpọn̄.
Ti n̄ko ete ke Jesus ekedi mfọnmma owo ukem nte Adam ke ini enye okodude ke isọn̄. Edi sia edide Jesus ikpọn̄ ke edisana spirit akanam ẹyomo, ntre enye ikadaha mmeme emi esinamde idomo akan owo ubọk imana. (Luke 1:30, 31; 2:21; 3:23, 38) Jesus ama ebiere ke idemesie ndisọn̄ọ nda ye Ete esie kpa ye n̄kpọsọn̄ idomo. Adam enyene nduduọhọ sia enye ama ada ifụre oro Abasi ọkọnọde enye emek ndibiat ewụhọ Jehovah.
Edi ntak emi Adam ekemekde nditụt utọn̄ ye Abasi? Ndi enye ekekere ke emi ayanam n̄kpọ enen̄ede ọfọn ye imọ? Ihih, koro apostle Paul ekewet ete ke “idịghe Adam ke ẹkebian̄a.” (1 Timothy 2:14) Nte ededi, Adam ama emek nditiene n̄wan esie ndia mfri eto oro ẹkekpande. Ama enen̄ede ọdọn̄ enye ndinem n̄wan esie esịt akan ndikop uyo nnọ Enye emi okobotde enye. Ke akpanikọ, ke ini n̄wan esie ọkọnọde enye mfri eto oro ẹkekpande, akpakana enye ekere nte nsọn̄ibuot esie editụkde itie ebuana esie ye Abasi. Sia ima oro Adam akamade Abasi mîkọsọn̄ke ikem, enye ama ọbọ n̄wan esie mfri eto oro adia.
Adam ama anam idiọkn̄kpọ mbemiso obonde nditọ, ntre kpukpru nditọ esie ẹkemana nte mme anana-mfọnmma. Kpa ye oro, nnyịn imenyene ifụre ndimek se imade ukem nte Adam ekenyenede. Nnyịn ikpakam imek nditie n̄kere mban̄a eti ido Jehovah inyụn̄ inen̄ede ima Abasi nnyịn emi odotde nnyịn isụk ibuot inọ inyụn̄ ituak ibuot inọ.—Psalm 63:6; Matthew 22:36, 37.