Mbụme Oro Mme Andikot Ẹbụpde

Ntak Emi Mme Ntiense Jehovah Mîsidaha Ndisọi Mbiet Ituak Ibuot?

Ke ofụri ererimbot, mbon Hindu, mbon Buddha, mbon Catholic, ye mbon Ufọkabasi Orthodox ẹda edisọi mbiet m̀mê editara mbiet nte ata akpan n̄kpọ ke utuakibuot mmọ. Ke ndusụk ebiet mi ke Africa, mme owo ẹsituak ibuot ẹnọ se ẹdade eto ẹsọi m̀mê itiat emi ẹdọhọde ke abasi m̀mê spirit abasi odu do.

Edi Mme Ntiense Jehovah isidaha edisọi mbiet m̀mê editara mbiet ekededi ituak ibuot. Edieke afo akade ebiet utuakibuot mmọ, emi ẹkotde Ufọkmbono Obio Ubọn̄, afo udukwe editara mbiet inua-okot ndisana owo m̀mê mbiet Jesus m̀mê eke Mary.a Ntak-a? Kop se Bible etịn̄de aban̄a n̄kpọ emi.

Nso ke Abasi Ọkọdọhọ Nditọ Israel Ẹnam?

Ke Jehovah Abasi ama akafak nditọ Israel osio ke Egypt, enye ama ọnọ mmọ in̄wan̄-in̄wan̄ ndausụn̄ aban̄a nte enye okoyomde ẹtuak ibuot ẹnọ imọ. Udiana inua-okot Mbet Duop ọdọhọ ete: “Kûnam edisọi n̄kpọ unọ idem fo, kûnyụn̄ unam mbiet baba n̄kpọ kiet eke odude ke heaven ke enyọn̄, ye eke odude ke isọn̄ ke idak, ye eke odude ke mmọn̄ ke idak isọn̄; kûnụhọ unọ mmọ, kûnyụn̄ unam n̄kpọ mmọ: koro ami Jehovah Abasi fo ndi Abasi ufụp.”—Exodus 20:4, 5.

Ata akpa ini oro Abasi ọkọnọde Moses mme ewụhọ emi, nditọ Israel ẹkenam eyen enan̄ o-gold, emi etiede nte mmọ ẹkekpebe nditọ Egypt oro ẹkesituakde ibuot ẹnọ mme unam. Mmọ ikadaha enyịn̄ abasi Egypt isio mbiet oro. Utu ke oro, mmọ ẹkebuan enye ye utuakibuot Jehovah. (Exodus 32:5, 6) Nso ke Abasi akanam? Iyatesịt Jehovah ama asak nte ikan̄ ye mbon oro ẹketuakde ibuot ẹnọ mbiet oro, Moses onyụn̄ emen mbiet oro ọfọp.—Exodus 32:9, 10, 19, 20.

Nte ini akakade, Jehovah Abasi ama anam ọyọhọ ibet iba oro enen̄ede an̄wan̄a. Jehovah ama ada Moses eti nditọ Israel ete ke inaha mmọ ẹnam “edisọi mbiet n̄kpọ ekededi ẹnọ idem [mmọ], eke ebietde eren m̀mê n̄wan, mbiet unam ekededi eke odude ke isọn̄, ye mbiet inuen mba ekededi eke efede ke ikpa-enyọn̄, mbiet n̄kpọ ekededi eke ọnyọnide ke isọn̄, ye mbiet iyak ekededi eke odude ke mmọn̄ ke idak isọn̄.” (Deuteronomy 4:15-18) Ana in̄wan̄-in̄wan̄ ke nditọ Israel ikenyeneke ndida orụk mbiet ekededi ntuak ibuot nnọ Abasi.

Edi nte ini akakade, nditọ Israel ẹma ẹduọ ẹnyịne ke ukpono ndem. Jehovah ama ọnọ mme prọfet ete ẹdụri mmọ utọn̄ ẹban̄a ufen oro Enye okoyomde ndimia mmọ ke ntak ukpono ndem, man enen̄ede mmọ. (Jeremiah 19:3-5; Amos 2:8) Ata ediwak owo ke idụt Israel ikanamke item emi Abasi ọkọnọde. Mmọdo, Jehovah ama ayak mbon Babylon ẹsobo Jerusalem ẹnyụn̄ ẹda idụt oro ẹka ntan̄mfep ke isua 607 M.E.N.—2 Chronicles 36:20, 21; Jeremiah 25:11, 12.

Nso ke Mme Christian Akpa Isua Ikie Ẹkenịm ke Akpanikọ?

Ke ini mbon oro mîdịghe mme Jew ẹkekabarede ẹdi mme Christian ke akpa isua ikie, mmọ ikakaha iso ida ndisọi mbiet ituak ibuot inọ Abasi. Kop se Demetrius, odom silver emi ekesidomde mme mbiet emi ẹkesidade ẹtuak ibuot ke Ephesus, eketịn̄de aban̄a ukwọrọikọ apostle Paul: “Mme ete, mbufo ẹmetịm ẹfiọk ẹte uforo nnyịn oto ke mbubehe emi. N̄ko, mbufo ẹmekụt ẹnyụn̄ ẹkop ẹte idịghe ke Ephesus ikpọn̄ edi ekpere ndidi ke ofụri n̄kann̄kụk Asia ke Paul emi anam ata ediwak owo ẹnịm ke akpanikọ onyụn̄ anam mmọ ẹwọn̄ọde ẹnyene ekikere en̄wen, ọdọhọde ete mme abasi eke ẹdade ubọk ẹnam idịghe abasi.”—Utom 19:25, 26.

Ikọ Paul ke idem esiemmọ ọsọn̄ọ edori ikọ Demetrius emi. Ke ini Paul eketịn̄de ikọ ọnọ mbon Greece ke Athens, enye ọkọdọhọ ete: “Nnyịn ikpekereke ite Abasi ebiet gold m̀mê silver m̀mê itiat, nte n̄kpọ eke ẹdade usọ ye ekikere owo ẹbot. Ke akpanikọ, Abasi ofụmi utọ ini unana ifiọk oro, edi ke emi enye ọdọhọ ubonowo ete kpukpru mmọ ke kpukpru ebiet ẹkabade esịt.” (Utom 17:29, 30) Paul ama ewet leta ọnọ ẹsọk mbon Thessalonica aban̄a n̄kpọ emi onyụn̄ otoro mmọ ete: “Mbufo [ẹma ẹkpọn̄] ndem mbufo ẹwọn̄ọde ẹtiene Abasi.”—1 Thessalonica 1:9.

Idịghe Paul ikpọn̄ okodụri mme Christian utọn̄ aban̄a edida ndisọi mbiet ntuak ibuot, apostle John n̄ko ama etiene odụri. John ama ọsọn̄ọ asian mmọ ke utịt akpa isua ikie ete: “Ẹkpeme idem ke ndem.”—1 John 5:21.

Mme Ntiense Jehovah ẹnịm in̄wan̄-in̄wan̄ ibet Abasi oro akpande edida orụk ndisọi mbiet ekededi ntuak ibuot nnọ Abasi. Mmọ ẹnịm se Jehovah Abasi etịn̄de, ke ini enye ọdọhọde ete: “Ami ndi Jehovah; enyịn̄ mi edi oro: ndinyụn̄ nnọhọ owo efen ubọn̄ mi, nnọhọ ndisọi mbiet itoro mi.”—Isaiah 42:8.

[Ikọ Idakisọn̄]

[Se ẹwetde ke ikpọ abisi ke page 31]

“Ami ndi Jehovah; enyịn̄ mi edi oro: ndinyụn̄ nnọhọ owo efen ubọn̄ mi, nnọhọ ndisọi mbiet itoro mi.”—Isaiah 42:8