Mme Mbụme Ẹtode Mme Andikot

Ndi eyen emi akpade eka ke idịbi eyeset?

N̄wan emi akanam idịbi mîbụn̄ọke ikemeke ndifiọk ubiak emi n̄wan oro idịbi obụn̄ọde okopde. Utọ n̄kpọ emi esinen̄ede abiak mme eka nditọ. Idịbi ama obụn̄ọ mma kiet ikotion, edi nte ini akakade, enye ama ediman nditọ iren iba. Kpa ye oro, enye osụk eteti mme ini oro idịbi okobụn̄ọde enye. Tutu amama, enye idifreke nte nditọ oro ẹkpedade. Ndi mme Christian emi ẹkeme ndidori enyịn ke Abasi ayanam utọ nditọ oro ẹset?

Ke nditịn̄ akpanikọ, nnyịn ifiọkke. Bible itịn̄ke m̀mê nditọ oro ẹmanade obukpo m̀mê mbon oro ẹbụn̄ọde-bụn̄ọ ẹyeset. Edi ndusụk edumbet Bible ẹkeme ndin̄wam nnyịn ke afan̄ emi onyụn̄ ọnọ nnyịn ndọn̄esịt.

Yak ibọrọ mbụme iba emi ẹnyenede n̄kpọ ndinam ye se isụk inemede emi. Akpa, Jehovah ada ke uwem esitọn̄ọ ini ewe—ke ini ẹyomode m̀mê ke eyen ama akamana? Anam iba, didie ke Jehovah ese eyen emi mîmanake kan̄a—nte ata owo m̀mê nte ikpîkpu eboho nsen m̀mê iyịp emi esịnede n̄wan ke idịbi? Mme edumbet Bible ẹnam ifiọk ibọrọ mbụme iba emi.

Ibet Moses owụt ke uwem owo ọtọn̄ọ ke ini emi enye odude ke idịbi eka esie. Didie? Ibet oro owụt ke owo emi owotde eyen esịt idịbi ekpenyene ndikpa. Kop se Ibet Abasi ọkọdọhọde: “Afo edinọ uwem ke uwem.”a (Ex. 21:22, 23, NW) Ke ntre, nsekeyen emi esịnede ke idịbi eka edi odu uwem owo nte afo. Ntak edi oro ata mme Christian mîsision̄oke idịbi sia mmọ ẹfiọk ke Abasi ada usion̄o idịbi nte ata akwa idiọkn̄kpọ.

Edi akpanikọ ke nsekeyen emi mîmanake kan̄a edi odu uwem owo, edi ndi Jehovah enen̄ede ada enye ke n̄kpọ? Ibet Moses ọkọdọhọ ẹwot owo ekededi oro owotde nsekeyen oro mîmanake kan̄a. Emi anam idiọn̄ọ ke eyen esịt idịbi enen̄ede ọsọn̄ urua ke enyịn Abasi. Ke adianade do, ediwak itie N̄wed Abasi en̄wen ẹwụt ke Jehovah ada nsekeyen emi mîmanake kan̄a nte ata owo. Ke uwụtn̄kpọ, spirit Abasi ama ada Edidem David usụn̄ ndidọhọ ete: “Omofụk mi ke idịbi eka mi. . . . Enyịn fo ẹkekụt mi ke mîtịmke inam mi ima; ndien ẹkewet mmọ kpukpru ẹsịn ke n̄wed fo, mmọ ẹsiak mi usen.”—Ps. 139:13-16; Job 31:14, 15.

Jehovah esinyụn̄ okụt nte eyen esịt idịbi anamde n̄kpọ, onyụn̄ ọfiọk se enye edidide ke ini iso. Ke ini Rebekah an̄wan Isaac akasan̄ade ye idịbi, Jehovah ama etịn̄ ntịn̄nnịm ikọ aban̄a amanamba oro ẹken̄wanade ke esịt idịbi esie, oro ọwọrọ ke enye ama okụt nte mmọ ẹnamde n̄kpọ, ye nte oro editụkde ediwak owo ke ini iso.—Gen. 25:22, 23; Rome 9:10-13.

Ọfọn ikere n̄ko iban̄a se iketịbede ke ini Elizabeth akasan̄ade ye idịbi. Gospel Luke ọdọhọ ete: “Nte Elizabeth okopde ekọm Mary, nsekeyen ọfrọ ke idịbi esie; ndien Elizabeth ọyọhọ ye edisana spirit.” (Luke 1:41) Luke ekedi abiausọbọ, ndien enye okokot eyen oro okodude Elizabeth ke idịbi, nsekeyen, kpa se ẹsikotde eyen emi ama akamana. Enye okonyụn̄ okot Jesus emi ẹkenịmde ke usịnudia ufene, nsekeyen.—Luke 2:12, 16; 18:15.

Ke ikerede iban̄a kpukpru emi, ndi n̄kpọ ndomokiet odu ke Bible ndiwụt ke eyen esịt idịbi idịghe owo kan̄a, ke enye oro ama akamana kpọt edi owo? Idụhe. Ndien emi ekem ye se ntaifiọk ẹkpepde mfịn. Ke uwụtn̄kpọ, mmọ ẹdọhọ ke eyen esịt idịbi ẹsikop se itịbede, ndien ke oro esinam enye enyịghede idem. Ntak edi oro eka ye eyen esịt idịbi esie ẹsitiede nte itai ye aban̄.

Uman ekeme ndibuat n̄wan idịbi ini ekededi, idem ke ini eyen mîkemke ọfiọn̄. Yak idọhọ ke n̄wan kiet aman eyen emi mîkemke ọfiọn̄, ndien eyen oro akpa ke usen ifan̄ ẹbede. N̄wan en̄wen asan̄a ye idịbi n̄kem-n̄kem ọfiọn̄, edi aman obukpo eyen. Ndi akpa eyen oro eyeset sia ama akamamana, ke ini enye emi akamanade obukpo mîdisetke?

Ke nditịn̄ ibio ibio, Bible etịn̄ in̄wan̄-in̄wan̄ ete ke uwem ọtọn̄ọ ke ini owo oyomode idịbi, n̄ko ke Jehovah ada eyen esịt idịbi nte ata owo. Emi ekeme ndinam ndusụk owo ẹkere ke ikpanaha ẹdọhọ ke eyen emi obụn̄ọde-bụn̄ọ idisetke. Emi onyụn̄ ekeme ndinam owo ọdọhọ ke edieke utọ eyen oro mîdisetke sia enye mîkamanake kan̄a, oro ọwọrọ ke usion̄o idịbi idiọkke nan̄a, sia kpa mme itie N̄wed Abasi emi ke ẹsida ẹwụt ke usion̄o idịbi ọdiọk.

Ke ini edem, magazine emi ama obụp ndusụk mbụme oro akanamde owo ekere ke anaedi eyen oro obụn̄ọde-bụn̄ọ idisetke. Ke uwụtn̄kpọ, ẹma ẹbụp m̀mê Abasi ayafiak ada eyen oro okobụn̄ọde edisịn ke idịbi eka esie ke Paradise? Nte ededi, ke Otu Ukara ẹma ẹkenam ndụn̄ọde ẹnyụn̄ ẹnen̄ede ẹbọn̄ akam ẹban̄a n̄kpọ emi, mmọ ẹdọhọ ke utọ mbụme emi inyeneke n̄kpọ ndomokiet ndinam ye ediset ke n̄kpa. Jesus ọkọdọhọ ke “Abasi emekeme ndinam kpukpru n̄kpọ.” (Mark 10:27) Se iketịbede inọ Jesus owụt ke ikọ emi edi akpanikọ: Abasi ama osio uwem esie ke heaven edisịn ke idịbi ekpri eyenan̄wan emi mîkọfiọkke erenowo—kpa n̄kpọ emi baba owo kiet mîkemeke ndinam.

Ndi emi ọwọrọ ke kpukpru nditọ oro ẹkemanade obukpo m̀mê mbon oro ẹkebụn̄ọde-bụn̄ọ ẹyeset? Iyom ndifiak ntịn̄ nte ke Bible ibọrọke mbụme emi nnennen nnennen, ntre, owo ndomokiet inyeneke unen ndisọn̄ọ ntịn̄ se enye mîfiọkke. Se inemede emi ekeme ndinam mme owo ẹbụp nsio nsio mbụme. Edi ufọn idụhe owo ndinọ ekikere idemesie. Se nnyịn ifiọkde edi nte ke n̄kpọ emi esịne Jehovah Abasi ke ubọk, kpa Abasi emi awakde mfọn ye mbọm. (Ps. 86:15) Nnyịn imọfiọk ke enen̄ede ọdọn̄ enye ndinam mme owo ẹset. (Job 14:14, 15) Nnyịn imetịm ifiọk n̄ko ke enye esinam se inende kpukpru ini. Enye ayada Eyen esie “abiat mme utom Devil,” onyụn̄ ọkọk kpukpru mfịna oro inyenede ke idiọk ererimbot emi.—1 John 3:8.

[Mme Ikọ Idakisọn̄]

[Ndise ke page 13]

Jehovah ọyọkọk kpukpru mfịna oro isobode