4 Tre Ndinyene Eyịghe
“Afo owo ekpri mbuọtidem, ntak emi eyịkde?”—Matthew 14:31.
NSO IDI MFỊNA? Mbet Jesus ẹma ẹsikam ẹnyene eyịghe ndusụk ini. (Matthew 14:30; Luke 24:36-39; John 20:24, 25) Ke akpanikọ, Bible ada unana mbuọtidem nte “idiọkn̄kpọ eke ẹyịrede nnyịn” ke idem. (Hebrew 12:1) Apostle Paul ekewet ete: “Idịghe kpukpru owo ẹnyene mbuọtidem.” (2 Thessalonica 3:2) Emi iwọrọke ke ndusụk owo ikemeke ndinyene mbuọtidem. Edi, ediwak owo inamke n̄kpọ man ẹnyene edu emi. Abasi ọyọdiọn̄ mbon oro ẹsịnde ukeme man ẹnyene mbuọtidem.
DIDIE KE AFO EKEME NDIKAN MFỊNA EMI? Fiọk mme n̄kpọ oro ẹsinamde enyene eyịghe. Ke uwụtn̄kpọ, Thomas mbet Jesus ikenịmke ke ẹma ẹnam Jesus eset, okposụkedi emi mme mbet eken ẹkedọhọde ke mmimọ ima ikụt Jesus. Thomas okoyom n̄kpọ oro edinamde enye enịm. Nso ke Jesus akanam? Enye ama ọnọ Thomas uyarade oro akanamde enye enen̄ede enyene mbuọtidem.—John 20:24-29.
Jehovah Abasi ada Bible ọnọ nnyịn ibọrọ mme n̄kpọ oro ẹkemede ndinam inyene eyịghe. Ke uwụtn̄kpọ, ediwak owo inyeneke mbuọtidem ke Abasi koro mmọ ẹtịn̄de ikọ mîdịghe ẹnamde n̄kpọ ndiwụt ke Abasi edi ntak ekọn̄, afai, ye ndutụhọ oro ẹsịmde ubonowo. Nso ke Bible etịn̄ aban̄a n̄kpọ emi?
Idịghe Abasi akara ererimbot emi. Jesus ọkọdọhọ ke Satan, kpa spirit oro enyịn mîkwe edi “andikara ererimbot emi.” (John 14:30) Satan ama ọdọhọ ke iyọnọ Jesus kpukpru Obio Ubọn̄ ererimbot edieke enye atuakde ibuot ini kiet kpọt ọnọ imọ. Enye ọkọdọhọ ete: “Nyọnọ fi ofụri odudu emi ye ubọn̄ mmọ, koro ẹma ẹyak enye ẹnọ mi, nnyụn̄ nda enye nnọ owo eke mmade.” Jesus ikọdọhọke ke Satan ikemeke ndinam se enye ọkọdọhọde oro. Utu ke oro, Enye ọkọdọhọ ete: “Ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’” (Luke 4:5-8) Owo ikpenyeneke ndiduọhọ Abasi mban̄a nditụhọ ererimbot, edi ẹkpeduọhọ Satan ye ukara owo.—Ediyarade 12:9, 12.
Jehovah Abasi eyetre kpukpru n̄kpọ oro ẹnamde ndutụhọ odu ke mîbịghike. Enye aduak nditọn̄ọ Obio Ubọn̄, m̀mê ukara, man Christ Jesus Eyen esie akara ubonowo. (Matthew 6:9, 10; 1 Corinth 15:20-28) Ke ẹkwọrọ eti mbụk Obio Ubọn̄ idahaemi ke ofụri ererimbot man ẹsu ntịn̄nnịm ikọ Bible. (Matthew 24:14) Ke mîbịghike, Obio Ubọn̄ emi oyosobo kpukpru mbon oro ẹbiọn̄ọde enye, oyonyụn̄ etre n̄kpọ ekededi oro adade ndutụhọ ọsọk ubonowo.—Daniel 2:44; Matthew 25:31-33, 46; Ediyarade 21:3, 4.
NSO IDI UTỊP? Mbon oro ẹnyenede eyịghe ẹtie nte oyobio emi “kpukpru ofụm ukpepn̄kpọ, eke abian̄a owo” ẹmende ẹyo. (Ephesus 4:14; 2 Peter 2:1) Edi mbon oro ẹnyenede ibọrọ mbụme mmọ ẹkeme ‘ndisọn̄ọ nda ke mbuọtidem.’—1 Corinth 16:13.
Mme Ntiense Jehovah oro ẹsiode n̄wed emi ẹyema ndin̄wam fi enyene ibọrọ mbụme oro esinamde fi enyene eyịghe. Mmọ ẹkot fi edibuana ye mmimọ odụn̄ọde mme ukpepn̄kpọ mmimọ. Afo eyenen̄ede ọsọn̄ọ mbuọtidem fo ye Abasi edieke anamde ntre.
Edieke oyomde ntọt efen efen, se ibuot 8, “Nso Idi Obio Ubọn̄ Abasi?,” ye ibuot 11, “Ntak Emi Abasi Ayakde Ndutụhọ Odu-o?,” ke n̄wed oro Nso ke Bible Enen̄ede Ekpep?a
[Ikọ Idakisọn̄]
a Mme Ntiense Jehovah ẹsio.
[Ndise ke page 9]
Mbon oro ẹnyenede ibọrọ mbụme mmọ ẹnyene n̄kpọ oro ọsọn̄ọde mbuọtidem mmọ