Ẹkûyak N̄kpọ Ekededi Ọwọn̄ọde Mbufo Ekikere ke ‘Usen Eti Mbụk’ Emi
MME ọdọn̄ọ akpamfia inan̄ ẹkere se ikpanamde. Owo ndomokiet inọhọ mmọ enọ ke inua-otop obio. Mbonekọn̄ Syria ẹkan Samaria ẹkụk, iyakke n̄kpọ ndomokiet ebe odụk obio man mbon Samaria ẹkọn̄ọ mfan̄, mîdịghe ẹkpa biọn̄. Emi anam uwem ọsọn̄ etieti. N̄kpọ ọsọn̄ tutu mme owo ẹtọn̄ọ ndita owo.—2 Ndi. 6:24-29.
Mme ọdọn̄ọ akpamfia oro ẹdọhọ kiet eken ẹte: ‘Ntak emi nnyịn mîkaha nna-ekọn̄ mbon Syria? Mmọ ẹkpenyụn̄ ẹwot nnyịn, inyeneke se itakde nnyịn sia biọn̄ ọmọn̄ akam owot nnyịn mi.’ Mmọ ẹtọn̄ọ isan̄ ke eyo ama okofụk owo idem ẹkesịm nna-ekọn̄, edi ikwe owo ndomokiet. Mbon ukpeme ikonyụn̄ idụhe ke mîbọhọke mme horse ye ass oro ẹtebede ke urụk. Mmọ ẹdụk ẹse esịt tent, ikwe owo ndomokiet, edi udia ye mmịn do barasuene. Ntre, nditọ mbon ẹtọn̄ọ ndin̄wam idem. Sese, mmọ ẹda ẹkụt ediwak gold, sidibe, ọfọn̄, ye mme ọsọn̄urua n̄kpọ eken, ẹnyụn̄ ẹtan̄ ẹkedịp. Ekem ẹfiak ẹditan̄ efen. Owo ndomokiet ikodụhe ke ofụri nna-ekọn̄ oro. Jehovah ama anam mbonekọn̄ Syria ẹkop uyom akamba udịmekọn̄. Ntre mmọ ẹfen̄e ẹkpọn̄ kpukpru n̄kpọ sia ẹkerede ke ẹmọn̄ ẹdiwot mmimọ.
Mme ọdọn̄ọ akpamfia oro ẹtan̄ mme n̄kpọ emi ẹkedịp. Edi esịt ọtọn̄ọ ndifịna mmọ ke ini ẹtide ke nditọ obio mmọ ke ẹkpa biọn̄ ko ke Samaria. Mmọ ẹneme ke otu idemmọ ẹte: ‘Nnyịn inamke se inende. Mfịn edi usen ikọ idatesịt m̀mê usen eti mbụk!’ Ntre, mmọ ẹsọsọp ẹfen̄e ẹkesuan eti mbụk emi ke Samaria.—2 Ndi. 7:1-11.
Nnyịn n̄ko idu uwem ke ini emi ẹkemede ndikot “usen eti mbụk.” Jesus ama etịn̄ se ididide akpan ikpehe kiet ke “idiọn̄ọ . . . utịt editịm n̄kpọ emi” ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matt. 24:3, 14) Didie ke oro okpotụk nnyịn?
Udọn̄ Idem Nnyịn Ekeme Ndinam Esịt Nnyịn Akabade Odobi
Idatesịt ama anam mme ọdọn̄ọ akpamfia oro ẹfre nditọ edem mmọ ke esisịt ini. Se ikebehede mmọ ekedi nditan̄ n̄kpọ n̄kedịp. Ndi ukem n̄kpọ oro ekeme nditịbe nnọ nnyịn mfịn? Akan̄ edi kiet ke otu n̄kpọ oro anamde idiọn̄ọ ke idu ke utịt ini. (Luke 21:7, 11) Jesus ọkọdọhọ mbet esie ete: “Ẹnọ ntịn̄enyịn ke idem mbufo mbak uyụhọ udia ye ọkpọsọn̄ un̄wọn̄ mmịn ye editịmede esịt uwem emi ẹdinam esịt mbufo ẹkabade ẹdobi.” (Luke 21:34) Ana nnyịn emi idide Christian idu ke ukpeme mbak ekikere uwem emi edinam ifre ke idu ke “usen eti mbụk.”
Christian kiet emi ekerede Blessing ikayakke udọn̄ idemesie anam esịt esie odobi. Eyenete an̄wan emi ekedi asiakusụn̄ ke ofụri ini oro enye akakade n̄wed, ekem ọdọ owo Bethel, onyụn̄ etiene ebe esie akanam utom ke Bethel Benin. Enye ọdọhọ ete: “Ami nsinam ufọk asana, ndien mmenen̄ede mma utom emi.” Esịt esinen̄ede enem Blessing ke ini etide ofụri isua 12 oro enye adade anam utom uyọhọ ini, onyụn̄ owụkde ekikere esie ke “usen eti mbụk” emi idude mi.
Ẹkpeme Idem ye Mme N̄kpọ Oro Adiade Owo Ini
Jesus ọkọdọhọ ke ini okosiode mbet 70 ọdọn̄ ete ẹkekwọrọ ikọ, ete: “Ke akpanikọ, idọk okpon, edi mme anamutom iwakke. Ke ntre ẹben̄e Andinyene idọk ẹte enye osion̄o mme anamutom ọdọn̄ ẹdi ke idọk esie.” (Luke 10:2) Ediwak n̄kpọ-in̄wan̄ ẹkeme nditak ke ini idọk edieke ọtọin̄wan̄ abiatde ini. Kpasụk ntre, mme owo ẹkeme nditak edieke nnyịn mîkwọrọke ikọ. Jesus ama ọdọhọ n̄ko ete: “Ẹkûnyụn̄ ẹkọm owo ke usụn̄.” (Luke 10:4) Akpasarade ikọ oro ẹkabarede “ẹkọm” ekeme ndiwọrọ n̄kpọ n̄kan ikpîkpu edidọhọ “mmọkọm-o” m̀mê “ẹtie do-o.” Enye ekeme n̄ko ndiwọrọ edifat owo ye anyan nneme oro mme ufan ẹsinyenede ke ini ẹkụtde kiet eken. Ntem, Jesus ọkọdọhọ mme mbet esie ẹkûbiat ini, m̀mê ndida nnam n̄kpọ oro edibiatde mmọ ini. Mmọ ẹkenyene etop oro anade ẹtobo mme owo usọp usọp.
Kere ban̄a ini oro isibiatde inam mme n̄kpọ oro ẹsiwọn̄ọrede owo ekikere ọkpọn̄ akpan n̄kpọ. Idụhe se ibiatde owo ini nte ekebe ndise ke ediwak isua idahaemi. Nso kaban̄a kọmputa ye urụk ukopikọ oro ẹkamade-kama ẹsan̄a? Ndụn̄ọde oro ẹkenamde ye ikpọ owo 1,000 ke Britain owụt “ke ata ediwak owo ke Britain ẹkeme ndibiat n̄kpọ nte hour kiet ye ubak ke usen ẹneme nneme ye owo ke ata ata urụk ukopikọ, abiat hour kiet ye minit 2 ke urụk ukopikọ oro ẹkamade-kama ẹsan̄a, abiat hour kiet ye minit 15 ọnọ mme owo etop ke urụk ukopikọ ye ke kọmputa. Edieke atan̄de kpukpru emi adian ke ọfiọn̄ kiet, oyokụt ke ini oro owo kiet abiatde anam kpukpru emi akam akan hour oro asiakusụn̄ unọ un̄wam iba ẹsinọde ke ọfiọn̄! Afo esinam okwo didie?
Ernst Seliger ye Hildegard n̄wan esie ẹma ẹsikpeme nte ẹbiatde ini mmọ. Mmọ ẹma ẹdu ke itienna ekikere Nazi ye ke ufọk-n̄kpọkọbi mbon Communist ẹbe isua 40. Ke ẹma ẹkesana mmọ ẹyak, mmọ ẹma ẹnam utom usiakusụn̄ ke ofụri eyo uwem mmọ mi ke isọn̄.
Ediwak owo ẹma ndidu uwem nte ebe ye n̄wan emi. Ekeme ndidi mmọ ẹma ẹsiwet ẹnyụn̄ ẹsikot mme leta. Edi utom Jehovah ekedi ata akpan n̄kpọ ke uwem mmọ.
Edi akpanikọ ke kpukpru nnyịn imesima ndinyene nneme ye mbon oro imade, ndien idiọkke ndinam oro. Akpana isimemek se iyomde ndinam ke usen ke usen, inyụn̄ ikpeme mbak n̄kpọ ekededi edidia ini oro ikpadade ikwọrọ eti mbụk.
Ẹkwọrọ Eti Mbụk Ọyọhọ Ọyọhọ
Edi n̄kpọ inemesịt ndidu uwem ke “usen eti mbụk” emi. Ikpanaha iyak n̄kpọ ekededi ọwọn̄ọde nnyịn ekikere nte mme ọdọn̄ọ akpamfia oro ẹkeyakde. Ti ke mmọ ẹma ẹdifiọk ke ‘se mmimọ ikanamde ikọfọnke.’ Ke ntre, ifọnke iyak udọn̄ idem nnyịn m̀mê mme n̄kpọ oro ẹsibiatde owo ini ada ini oro ikpadade ibuana ọyọhọ ọyọhọ ke utom ukwọrọikọ.
Nnyịn imenyene eti uwụtn̄kpọ oro ikpekpebede. Ke Paul ama ọkọkwọrọ ikọ ke isua 20, enye ama etie ekere utom emi onyụn̄ ewet ete: “Mmọkwọrọ eti mbụk emi aban̄ade Christ ọyọhọ ọyọhọ.” (Rome 15:19) Paul ikayakke n̄kpọ ndomokiet anam ifịk esie etek. Ẹyak ikpebe ifịk oro enye ekenyenede nte ikwọrọde eti mbụk Obio Ubọn̄ Abasi ke “usen eti mbụk” emi.
[Ndise ke page 28]
Blessing ikayakke udọn̄ idemesie akpan enye ndinam utom uyọhọ ini
[Ndise ke page 29]
Brọda ye Sista Seliger ẹma ẹsikpeme nte ẹbiatde ini mmọ