Nsu 6: Abasi Enyịme Ẹda Ndisọi N̄kpọ ye Mme Mbiet Ẹtuak Ibuot
Nsu emi ọkọtọn̄ọ didie? “Akpa mme Christian ikesidaha ndisọi mbiet ituak ibuot. . . . Ẹkedọhọ ke se ikanamde ẹnyịme ẹda mme mbiet ẹtuak ibuot ke ufọkabasi ke n̄kpọ nte isua 1,700 ye 1,600 emi ẹkebede ekedi ke emi ama anam Ido Ukpono Christ an̄wan̄a mme ọkọi akan ndikop ukwọrọikọ nnyụn̄ n̄kot n̄wed.”—Cyclopedia of Biblical, Theological, and Ecclesiastical Literature, emi McClintock ye Strong ẹwetde, Eboho 4, page 503 ye 504.
Bible ọdọhọ didie? “Kûnam edisọi n̄kpọ unọ idem fo, kûnyụn̄ unam mbiet baba n̄kpọ kiet eke odude ke heaven ke enyọn̄, ye eke odude ke isọn̄ ke idak, ye eke odude ke mmọn̄ ke idak isọn̄; kûnụhọ unọ mmọ, kûnyụn̄ unam n̄kpọ mmọ.” (Exodus 20:4, 5) Apostle John ama ewet leta ọnọ akpa mme Christian ete: “N̄kpri nditọ, ẹkpeme idem ke ndem.”—1 John 5:21.
Ndi ndisọi mbiet ẹnyụn̄ ẹdi n̄kpọ oro ẹn̄wamde owo asan̄a ekpere onyụn̄ okpono se mmọ ẹdade ẹban̄a, nte mme ufọkabasi ẹdọhọde? The Encyclopedia of Religion ọdọhọ ete: “Ke akpa, etie nte akpan ntak oro ẹkebonde ndisọi mbiet ekedi man ẹda ẹkpep mme owo n̄kpọ ẹnyụn̄ ẹda nte n̄kpọ mbana; ntak kiet emi ẹkesinọde edi oro. Edi ikebịghike, ẹma ẹtọn̄ọ ndituak ibuot nnọ mmọ. Ekenen̄ede edi ntre ye mme mbiet emi ẹkekabarede ẹdi akpan ikpehe utuakibuot mme ufọkabasi Orthodox ke Edem Usiahautịn.” Edi, prọfet Isaiah ama obụp nnennen mbụme emi ete: “Mbufo ẹdida Abasi ẹdomo ye anie? Nso mbiet esie ke mbufo ẹkeme ndinam?”—Isaiah 40:18, The New Jerusalem Bible.
Men mme ufan̄ikọ Bible emi domo: Isaiah 44:13-19; Utom 10:25, 26; 17:29; 2 Corinth 5:7
AKPANIKỌ:
Abasi inyịmeke ẹda ndisọi n̄kpọ ye mme mbiet ẹtuak ibuot
KPỌN̄ NSU, SỌN̄Ọ MỤM AKPANIKỌ KAMA
Nso ke ikpetịn̄ iban̄a ibio ibio ndụn̄ọde oro inamde iban̄a mme nsu emi ediwak ufọkabasi ẹsụk ẹkpepde mi? Mme “nsunsu mbụk emi ẹdade mbufiọk ẹtịbi” mi ikemeke nditie nte akpanikọ Bible emi esin̄wan̄ade onyụn̄ ọdọn̄de owo esịt.—2 Peter 1:16.
Ke ntre, tat esịt da se ẹkpepde fi domo ye se Ikọ Abasi—kpa n̄wed akpanikọ —ọdọhọde. (John 17:17) Ama anam emi, un̄wọn̄ọ emi oyosu ọnọ fi: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:32.
[Ebiet Ẹdade Ndise Ẹto ke page 9]
Pictorial Archive (Near Eastern History) Est.