Mbụme Oro Mme Andikot Ẹbụpde . . .

Nso idi Ufọkmbono Obio Ubọn̄?

▪ Ufọkmbono Obio Ubọn̄ edi ebiet utuakibuot oro Mme Ntiense Jehovah ẹsidade ẹnịm mme edinam ido ukpono mmọ. Ata ediwak Ufọkmbono Obio Ubọn̄ ẹdu ke ofụri ererimbot. Kpukpru urua, se ibede esop Mme Ntiense Jehovah 105,000 ẹsisop idem ke mme ufọkmbono emi.

Kpukpru Ufọkmbono Obio Ubọn̄ ẹnyene akwa ufọkmbono oro ẹsinịmde ukpepn̄kpọ ye utịn̄ikọ Bible. Ata ediwak ufọkmbono ẹnyene mbot utịn̄ikọ, ebiet emi ẹsidade ẹnịm mbono esop. Ufọkmbono Obio Ubọn̄ esiwak ndidụk n̄kpọ nte owo 100 esịm 300. Ufọkmbono Obio Ubọn̄ ekeme n̄ko ndinyene udiana ubet ukpepn̄kpọ kiet m̀mê iba, ọfis, ye ekpri itie ubon n̄wed emi ẹdọn̄de mme n̄wed un̄wam ukpep Bible ye mme n̄wed unam ndụn̄ọde, emi owo ekededi ke esop ekemede ndida nnam ndụn̄ọde.

Edi mme n̄kpọ idiọn̄ọ ido ukpono ye mme mbiet ekededi emi ẹsiwakde ndidu ke ufọkabasi Christendom idụhe ke Ufọkmbono Obio Ubọn̄. Edisana okpokoro idụhe, owo inyụn̄ ibonke mbiet, m̀mê cross. Ntak-a? Mme Ntiense Jehovah ẹnịm ke ndida mme utọ n̄kpọ oro ntuak ibuot ikemke ye ewụhọ Bible oro ọdọhọde “ẹfehe ẹkpọn̄ ukpono ndem.” (1 Corinth 10:14; John 4:24) Ẹnen̄ede ẹbana ediwak ufọkabasi ye mme temple ẹbe ubọk. Edi Ufọkmbono Obio Ubọn̄ iwakke n̄kukọhọ, ndien ẹbọp man ẹda kpukpru ikpehe esie ẹnam n̄kpọ. Se inen̄erede idi akpan n̄kpọ edi ukpep Bible oro ẹdade ufọk oro ẹnọ, idịghe ufọk oro ke idemesie.

Ntak emi ẹkotde enye Ufọkmbono Obio Ubọn̄? Mme mbono esop oro ẹsinịmde ke Ufọkmbono Obio Ubọn̄ ẹnen̄ede ẹban̄a mme ukpepn̄kpọ Bible ye akpan etop Bible emi aban̄ade “obio ubọn̄ Abasi,” oro ekedide ibuotikọ ukwọrọikọ Jesus. (Luke 4:43) Ntre, enyịn̄ oro, Ufọkmbono Obio Ubọn̄, emi ẹketọn̄ọde ndikot ke iduọk isua 1930, odot ye se ẹkebọpde Ufọkmbono Obio Ubọn̄ ẹnọ—emi edide ndimenede utuakibuot akpanikọ, onyụn̄ edi akpan ebiet oro ẹdade ẹkwọrọ “eti mbụk obio ubọn̄.” (Matthew 24:14) Ntem, owo isidaha Ufọkmbono Obio Ubọn̄ inam mme edinam obio m̀mê ndida nnam mbubehe. Ẹda etịbe imaesịt ẹbọp ẹnyụn̄ ẹse ẹban̄a ufọk emi. Owo idehedei ikama usan isan̄a itan̄ etịbe. Utu ke oro, ẹnịm ekebe ke ebiet kiet man owo ekededi oro oyomde ekpetịp okụk.

Ẹda Ufọkmbono Obio Ubọn̄ ẹnam ukem n̄kpọ ke kpukpru ebiet ke ofụri ererimbot, edi ẹbọp mmọ ke utọ ke utọ. Ẹbọp enye ẹtiene orụk n̄kpọ ubọpufọk oro ẹdude ke ebiet oro ẹbọpde enye, idaha eyo, ye ukeme Mme Ntiense Jehovah oro ẹdude ke ebiet oro ẹbọpde. Ẹda kọrikọri, eto, ye itiat ẹbọp ndusụk. Ẹda nnyanyan̄a ẹbọp ndusụk nte efe, ekọn̄ n̄kanya ke ọkọm.

Isenowo ẹkeme ndidụk mbono esop ke Ufọkmbono Obio Ubọn̄ ekededi. (Mme Hebrew 10:25) Ke nditịm ntịn̄, ẹsinịm an̄wan̄wa mbono esop kpukpru urua, emi ẹsinemede ibuotikọ Bible oro ebehede mbon oro ẹsidụkde mbono esop kpukpru ini ye isenowo. Imesịn udọn̄ inọ fi ite aka Ufọkmbono Obio Ubọn̄ edem mbufo.

[Ndise ke page 31]

Malawi, Africa

[Ndise ke page 31]

England, Great Britain