Ka Iso Nam N̄kpọ Abasi ke Ini Esede Aban̄a Owo Fo Emi Ọdọn̄ọde

KIM emi edide eyenete nnyịn an̄wan ama enyene ata idiọk udọn̄ọ ke ọkpọ asakedem.a Nte ẹkesụk ẹsede enye idem, ẹma ẹkụt ke enye enyene kansa n̄ko. Ebe esie Steve ọdọhọ ete: “Ke ẹma ẹkesiak enye idem ẹsio idiọk udọn̄ọ ọkpọ asakedem oro, ẹma ẹtọn̄ọ ndinọ enye usọbọ kansa. Usọbọ emi ama anam idem enen̄ede emem enye. Ndien enye ikekemeke aba ndisan̄a ọfọn.”

Kere nte eketiede Steve ke idem ke ini idiọk udọn̄ọ emi okotụhọrede edima an̄wan esie. Ekeme ndidi owo fo n̄ko ọdọn̄ọ uyịre uyịre udọn̄ọ m̀mê ọsọn̄. (Eccl. 12:1-7) Ke edide ntre, ọmọfiọk ke man ekeme ndise mban̄a enye, ke ana ese aban̄a idem fo n̄ko. Edieke mûsọn̄ke idem ke n̄kan̄ eke spirit, emi ekeme ndinam okop editịmede esịt onyụn̄ anam idem emem fi, ndien udukemeke aba ndise mban̄a enye. Nso ke akpanam man aka iso anam n̄kpọ Abasi nte osụk esede aban̄a owo fo emi idem mîsọn̄ke m̀mê enye emi ọsọn̄de? Ndi odu se mbon en̄wen ke esop ẹkpenamde man ẹn̄wam owo emi idem mîsọn̄ke?

Didie ke Ikeme Ndida Ukem Ukem?

Man aka iso ọsọn̄ idem ke n̄kan̄ eke spirit ye ke n̄kan̄ eke obụk nte osụk esede aban̄a owo fo emi idem mîsọn̄ke, ana okpụhọ ndutịm fo onyụn̄ ọdiọn̄ọ ini emi akpanamde n̄kpọ ye se akpanamde. Mme N̄ke 11:2 ọdọhọ ke “eti ibuot odu ye mme osụk idem.” Emi ọwọrọ ke ana idiọn̄ọ se ikemede ndinam ye se nnyịn mîkemeke ndinam. Oyom odụn̄ọde ndutịm fo onyụn̄ ọfiọk se ekemede ndinam mbak udukam unam n̄kpọ ukpa.

Steve ama owụt ke imenyene ọniọn̄ inyụn̄ ifiọk ukeme imọ. Enye ama afiak etie ekere se enye esinamde. Enye ekedi owo utom mbakara, edi anam-ndutịm otu mbiowo, ye esenyịn utom ke esop mmọ ke Ireland, onyụn̄ esịne ke Kọmiti Unyene Nneme ye Mbon Ufọkibọk. Steve ọdọhọ ete: “Akanam n̄wan mi idọhọke ke mme n̄kpọ emi iyakke nse imọ enyịn. Edi mma mfiọk ke mmanam n̄kpọ awak akaha.” Nso ke enye akanam? Enye ọdọhọ ete: “Ke mma n̄kọbọn̄ akam nnyụn̄ ntie n̄kere n̄kpọ emi, mma ndọhọ ẹmek ebiowo en̄wen edi anam-ndutịm otu mbiowo. N̄kosụk ndedi ebiowo, edi ndiyak ndusụk ifetutom nnọ mbon en̄wen ama anam n̄keme ndinen̄ede nse n̄wan mi enyịn.”

Nte ini akakade, idem ama edisọn̄ n̄wan esie. Mmọ ẹma ẹfiak ẹdụn̄ọde idaha mmọ, n̄wan esie onyụn̄ ebere ye enye, anam enye afiak ekeme ndise mban̄a ifetutom oro enye ekenyenede akpa. Steve ọdọhọ ete: “Imekpep ndinam se ededi oro idem ayakde inam. Mmenen̄ede n̄kọm Jehovah ke enye ndin̄wam nnyịn, nnyụn̄ n̄kọm n̄wan mi ke ndibere ye ami ke ofụri esịt kpa ye ndiọkidem esie.”

Kop mi n̄ko se iketịbede inọ Jerry emi edide esenyịn circuit, ye Maria an̄wan esie. Akana mmọ ẹtre ndinam se mmọ ẹkeduakde man ẹkeme ndise mban̄a ete ye eka mmọ emi ẹma ẹkesọn̄. Maria ọdọhọ ete: “Ami ye ebe mi ikoyom ndika n̄kanam utom isụn̄utom ke idụt en̄wen. Edi ebe mi edi n̄kukụre eyen oro eka ye ete esie ẹnyenede. Ntre, ima ibiere ndika iso ndu ke Ireland man ise iban̄a mmọ. Emi ama anam ikeme ndise ete esie enyịn ke ufọkibọk mbemiso enye akakpade. Idahaemi imesinyene nneme ye eka esie kpukpru usen inyụn̄ in̄wam enye ini ekededi oro enye oyomde nnyịn. Esop emi enye odude ẹnen̄ede ẹn̄wam, ndien emi anam ikeme ndika iso nnam utom circuit.”

Nte Mbon En̄wen Ẹkpen̄wamde

Ke ini apostle Paul eketịn̄de aban̄a se ẹkpenamde ẹnọ n̄kani iban emi ẹdide mme ebeakpa ke esop, enye ọkọdọhọ ke “owo ekededi [oro] mîtịmke n̄kpọ inọ ikọt esie, akpan akpan mbonufọk esie, . . . akan̄ mbuọtidem onyụn̄ ọdiọk akan owo eke mînịmke ke akpanikọ.” Onyụn̄ ọdọhọ mme Christian ke edieke mmọ ẹyomde ndinam se “[inende] Abasi ke enyịn,” ke ana mmọ ẹse ẹban̄a mme ete, mme eka, mme ete ete, ye mme eka eka mmọ. (1 Tim. 5:4, 8) Edi akpana mbon eken ke esop ẹtiene ẹn̄wam n̄ko.

Yak itịn̄ n̄ko iban̄a Hakan ye Inger, n̄wan ye ebe emi ẹma ẹkesọn̄ ke Sweden. Hakan ọdọhọ ete: “Eketie nte ibuot ọmọn̄ ebe nnyịn ke ini ẹkedọhọde ke n̄wan mi enyene kansa. N̄wan mi ikedịghe owo udọn̄ọ. Idahaemi isika ufọkibọk kpukpru usen, ndien usọbọ emi ẹnọde enye esimem enye idem etieti. Enye inyụn̄ ikaha ebiet ndomokiet, ndien ana nsidu ye enye nnyụn̄ nse mban̄a enye.” Didie ke esop mmọ ẹken̄wam mmọ?

Mbiowo ẹma ẹnam ndutịm man Hakan ye n̄wan esie ẹkeme nditie ke ufọk n̄kop se ẹnamde ke mbono esop ke urụk ukopikọ mmọ. Nditọete ẹma ẹsinyụn̄ ẹka ẹkese mmọ, ẹkot mmọ ke urụk ukopikọ, ẹwet mmọ leta, ẹnyụn̄ ẹnọ mmọ kad. Hakan ọdọhọ ete: “Ima ikụt ke Jehovah ye nditọete nnyịn do ye nnyịn. Emi ama enen̄ede ọnọ nnyịn odudu ndika iso nnam n̄kpọ Abasi. Idem ama edisọn̄ n̄wan mi, ndien imesidụk kpukpru mbono esop ke Ufọkmbono Obio Ubọn̄.” Edieke nditọete ẹnamde se ededi oro mmọ ẹkemede man ẹn̄wam mbon oro idem mîsọn̄ke ye n̄kani owo ke mme esop mmọ, mmọ ẹwụt ke idi ‘ufan emi amade ufan kpukpru ini. Ke inyụn̄ idi eyen-eka emi amanade ọnọ ini nnan-enyịn.’—N̄ke 17:17.

Jehovah Ama Se Anamde

Ndise mban̄a owo udọn̄ọ idịghe ifiak ubọk kiet. Edi Edidem David ọkọdọhọ ke “owo ekededi emi ekerede aban̄a usụhọde owo [m̀mê owo oro idem mîsọn̄ke] okop inemesịt.”—Ps. 41:1, NW.

Owo akpasasan̄a didie okop inemesịt ndise mban̄a owo udọn̄ọ m̀mê owo emi n̄kpọ ọdiọkde? Mme N̄ke 19:17 ọdọhọ ke “atua-ubuene-mbọm ọbuọt Jehovah n̄kpọ: ndien [ke Jehovah] ọyọnọ enye usiene utom esie.” Jehovah Abasi esinen̄ede ekere aban̄a mme anam-akpanikọ asan̄autom esie emi ẹdọn̄ọde, onyụn̄ enen̄ede ọdiọn̄ mbon oro ẹn̄wamde mmọ. David ọkọkwọ ke psalm esie kiet ete: “Jehovah oyomụm [owo emi esin̄wamde owo udọn̄ọ m̀mê owo ukụt,] akama ke bed mmem-idem: [onyụn̄ okpụhọde] ofụri mbri esie ke udọn̄ọ esie.” (Ps. 41:3) Imenen̄ede inịm ke Jehovah iditreke ndinyan̄a owo emi esin̄wamde owo edieke n̄kpọ onyụn̄ anamde enye.

Enem ndifiọk ke Jehovah Abasi esikụt onyụn̄ ama ukeme oro isịnde ndin̄wam owo nnyịn oro ọdọn̄ọde. Kpa ye emi utọ n̄waidem emi esinen̄erede esịne utom, Bible ọdọhọ ke “Abasi enen̄ede enem esịt aban̄a mme utọ uwa oro.”—Heb. 13:16

[Ikọ Idakisọn̄]

[Ndise ke page 18]

Ka iso nam n̄kpọ Abasi nyụn̄ yak mbon en̄wen ẹn̄wam fi