Mmọ Ikopke Aba Ndịk Iban̄a Utịt

KE UTỊT UTỊT iduọk isua 1970, Gary ye Karen ẹma ẹdinịm ke utịt ererimbot ekpere. Ntre, mmọ ẹma ẹwọrọ ke akwa obio ẹkedụn̄ ke obio-in̄wan̄ ẹnyụn̄ ẹbiere ndinam kpukpru n̄kpọ oro mmọ ẹyomde ke idemmọ. Mmọ ẹkeyom ndibọhọ.

Mmọ ẹma ẹdep mme n̄wed, ẹbọ ukpep ẹnyụn̄ ẹdụk mme mbono nneme, ẹnyụn̄ ẹnyene nneme ye adan̄a ediwak owo nte ẹkekeme man ẹnyene usọ oro mmọ ẹkeyomde. Mmọ ẹma ẹto in̄wan̄esa ye mbio mbio eto mfri 50. Mmọ ẹma ẹtan̄ n̄kpasịp ye mme n̄kpọutom ẹbon. Mmọ ẹma ẹkpep nte ẹtọde ẹnyụn̄ ẹtịmde udia ẹbon. Ufan kiet ama ekpep mmọ nte ẹbakde ẹnyụn̄ ẹn̄wande unam. Karen ama ekpep ndifiọk mme eto ye orụn̄ ke akai man mmọ ẹkpeta edieke udia mmọ okụrede. Gary ama ekpep nte ẹsiode aranikan̄ ke ibokpot, anam mfiọk man ada ifia abara ikan̄, onyụn̄ ọbọp ufọk oro ọdọn̄ọde kpukpru se mmọ ẹyomde.

Karen ọdọhọ ete: “Nte n̄kpọ ẹkediọkde ini oro ke ererimbot ama anam n̄kere ke ntatenyịn ọmọn̄ ebe efep.” Gary ọdọhọ ete: “Mma ntiene n̄kparawa eken ndụk n̄ka oro okodomode nditre asari eke orụk, Ekọn̄ Vietnam, ye n̄wo. Edi ikebịghike idotenyịn mi ama akpa mfụhọ. Eketie mi nte ke ubonowo ẹyesobo idemmọ.”

Gary ọdọhọ ete: “Okoneyo usen kiet, mma nnyene ifet, ntre mma mmen Bible n̄kot tọn̄ọ ke Matthew tutu ke Ediyarade. Mma mfiak n̄kot okoneyo inan̄ oro ẹketienede. Ke usenubọk ọyọhọ usen ition, mma ndọhọ Karen nte: ‘Nnyịn idu uwem ke mme akpatre usen. Abasi ọmọn̄ anam n̄kpọ ke mîbịghike man anam isọn̄ asana. Ana iyom mbon oro ẹdibọhọde.’” Gary ye Karen ẹma ẹtọn̄ọ ndika nsio nsio ido ukpono n̄koyom mbon oro ẹyomde nditịm idem mben̄e utịt.

Ikebịghike kiet ke otu Mme Ntiense Jehovah ama edi ufọk mmọ onyụn̄ editọn̄ọ ukpepn̄kpọ Bible ye mmọ. Karen ọdọhọ ete: “Esịt ama enen̄ede enem mi sia ẹma ẹnen̄ede ẹnam N̄wed Abasi an̄wan̄a mi. Ofụri emi, n̄koyom ndinen̄ede mfiọk n̄kpọ mban̄a utịt ini, ndien ke akpatre mma ndifiọk. Mma ndinyene ata idotenyịn mban̄a ini iso. Edi se ikakam ifọnde ikan oro edi ke mma ntọn̄ọ ndinam ufan ye Ete mi eke heaven, kpa Andibot emi onyụn̄ edide Abasi ekondo.”

Gary ọdọhọ ete: “Uwem mi ama enen̄ede enyene se ọwọrọde. Ke ndondo oro n̄kọtọn̄ọde ndikpep Bible, n̄kekemeke nditre. Mma n̄kot ntịn̄nnịm ikọ Bible, ndụn̄ọde mme uyarade oro ẹwụtde ke enye oyosu, nnyụn̄ nnen̄ede nnịm ke Abasi ọmọn̄ ọsọp anam n̄kpọ. Mma n̄kere nte, ‘Mme owo ikpeben̄eke idem inọ afanikọn̄, edi ẹkpeben̄e ẹnọ uwem oro Abasi aduakde ọnọ nnyịn.’” Gary ye Karen ẹma ẹdinyene idotenyịn ẹban̄a ini iso. Utu ke nditịmede esịt mban̄a utịt ererimbot, mmọ ẹma ẹdinyene mbuọtidem ke Abasi eyetre mme mfịna oro ẹnọmọde ubonowo onyụn̄ anam isọn̄ afiak edi Paradise.

Nso ke Gary ye Karen ẹnam idahaemi, ke se ikande isua 25 ẹma ẹkebe? Karen ọdọhọ ete: “Ndọdiọn̄ mma Jehovah Abasi nnyụn̄ ndọdiọn̄ nnyene mbuọtidem ke enye, ndien ke ndomo ndin̄wam mbon en̄wen ẹnam ntre n̄ko. Ami ye ebe mi imọnọ kiet eken ibetedem inyụn̄ inam ubon nnyịn adiana kiet ẹka iso ẹtuak ibuot ẹnọ Abasi. Nnyịn ika iso ndinam n̄kpọ ke nde ke nde inyụn̄ idomo ndidu mmemmem uwem man ikpowụk ntịn̄enyịn ke idem mbon en̄wen ye ke se inanade mmọ.”

Gary adian do ete: “Mmesibọn̄ akam kpukpru ini nte Obio Ubọn̄ Abasi edi edisio ata ediwak owo ke mfịna. Ini ekededi oro n̄kwọrọde eti mbụk Obio Ubọn̄ nnọ mme owo, mmesibọn̄ akam nte n̄kpakam nnọ ke nsụhọde n̄kaha owo kiet idotenyịn Bible. Jehovah ọmọfọn ido eyere akam oro ke se ibede isua 25 idahaemi. Ami ye n̄wan mi imenen̄ede inịm ke Jehovah ọmọn̄ enen̄ede okpụhọde n̄kpọ ke isọn̄, edi nnyịn ikopke aba ndịk iban̄a utịt.”—Matthew 6:9, 10; 2 Peter 3:11, 12.

[Ndise ke page 9]

Gary ye Karen idahaemi ẹma ndin̄wam mbon en̄wen ẹnyene idotenyịn emi etop Bible ọnọde