Kpep Nditọ Fo

Ntak Emi Jesus Mîkadahake Iwiwa

ẸSIAN Jesus ke Lazarus edima ufan esie ọdọn̄ọ etieti. Isụn̄utom emi Mary ye Martha, nditọeka Lazarus, ẹkedọn̄de, ada etop emi editobo Jesus. Isụn̄utom emi okoto Bethany, emi Lazarus ye nditọeka esie ẹkedụn̄de. Mary ye Martha ẹnịm ke Jesus ekeme ndinam idem ọsọn̄ eyeneka mmimọ, okposụkedi emi mmọ ẹdụn̄de oyom usụn̄ ke edem Akpa Jordan oko. Mmọ ẹfiọk ke enye ama anam idem ọsọn̄ mbon oro ẹkedude nsannsan.—Matthew 8:5-13; John 11:1-3.

Ke ini isụn̄utom esịmde Jesus onyụn̄ otobode enye idiọk etop emi, Jesus inamke n̄kpọ ndomokiet iban̄a oro. Bible ọdọhọ ete: “Enye aka iso odu usen iba ke ebiet emi enye okodude.” (John 11:6) Ndi ọmọfiọk ntak emi Jesus mîkadahake iwiwa ikan̄wam Lazarus?—a Ẹyak ineme emi.

Jesus ọfiọk ke udọn̄ọ oro owot Lazarus. Ntre, enye ọdọhọ mme apostle esie ete: “Ẹyak nnyịn ifiak ika ke Judea.” Mmọ ẹfan̄a ẹte: “Ikam ibịghike mbon Judea ẹkeyom nditọn̄ọ fi ke itiat, ndien nte afo ọmọn̄ afiak aka do?” Jesus ọbọrọ ete: “Lazarus ufan nnyịn aka ndiduọk odudu, edi ami mmọn̄ nnam isan̄ n̄ka do man n̄kedemede enye ke idap.”

Mme apostle ẹbọrọ enye ẹte: “Ọbọn̄, edieke edide enye aka ndiduọk odudu, enye oyokop nsọn̄idem.” Jesus ọdọhọ mmọ idahaemi ete: “Lazarus ama akpa.” Ekem enye etịn̄ n̄kpọ oro anade edi ama akpa mmọ idem, ete: “Mmadara ke ntak mbufo koro mmen̄kodụhe do . . . Edi ẹyak nnyịn ika ibịne enye.”

Thomas etịn̄ uko uko ete: ‘Ẹyak nnyịn ika, man nnyịn ikakpa ye Jesus.’ Thomas ọfiọk ke mme asua ẹyefiak ẹyom ndiwot Jesus, ndien ke ẹkeme ndiwot mme apostle n̄ko. Kpa ye oro kpukpru mmọ ẹtiene enye ẹka. Ke n̄kpọ nte usen iba ẹma ẹkebe, mmọ ẹsịm Bethany, obio mme Lazarus. Obio emi edi n̄kpọ nte kilomita ita ọtọn̄ọde ke Jerusalem.—John 11:7-18.

Ndi ọmọfiọk ntak emi Jesus ekenemde esịt ke emi enye mîkọsọpke idisịm?— Ọfọn, Jesus ama anam mbon en̄wen ẹset, edi ekedi mmọ ẹsụk ẹkpakpa hour ifan̄ Jesus anam mmọ ẹset. (Luke 7:11-17, 22; 8:49-56) Edi okpo Lazarus odu ke udi ke ediwak usen. Owo ndomokiet ikemeke ndineni ke enye enen̄ede akpa!

Ke ini Martha eyeneka Lazarus okopde ke Jesus ekpere Bethany, enye efehe aka ndisobo ye enye. Enye ọdọhọ enye ete: “Ọbọn̄, edieke afo okpokodude mi eyeneka mi ikpakakpaha.” Edi Jesus ọn̄wọn̄ọ ọnọ enye ete: “Eyeneka fo eyeset.” Martha efehe aka ufọk akasian Mary eyeneka esie ke ndịbe ete: “Andikpep mmọmi, ke onyụn̄ okot fi.”

Mary adaha inikiet inikiet man okosobo ye Jesus. Edi otuowo ẹkere ke enye aka udi, ntre mmọ ẹtiene enye. Ke ini Jesus okụtde nte Mary ye otuowo emi ẹsan̄ade ye enye ẹtuade, enye n̄ko “atua eyet.” Ibịghike, kpukpru mmọ ẹsịm udi, emi ẹdade akamba itiat ẹkịbi. Jesus ọnọ uyo ete: “Ẹkpat itiat ẹsio.” Edi Martha afan̄a ete: “Ọbọn̄, anaedi enye etebe ke emi, koro usen inan̄ edi emi.”

Mme owo ẹkop uyo Jesus ẹnyụn̄ ẹkpat itiat ẹsio. Ekem enye ọbọn̄ akam, ọkọm Abasi ke odudu oro enye ọfiọkde ke Abasi ọmọn̄ ọnọ imọ ida inam Lazarus eset. Jesus “ofiori ke ọkpọsọn̄ uyo ete: ‘Lazarus, wọrọ di!’” Ndien Lazarus ọwọrọ edi “ye ọfọn̄ emi ẹkedade ẹbọp enye.” Ntre Jesus owụk ete: “Ẹtat enye ẹnyụn̄ ẹyak enye ọnyọn̄.”—John 11:19-44.

Ndi ọmọfiọk ndien ntak emi Jesus mîkadahake iwiwa?— Enye ama ọfiọk ke ndibet ayanam imọ inen̄ede inọ ikọ ntiense iban̄a Ete imọ, Jehovah. Ndien sia enye ekemekde mfọnn̄kan ini, ediwak owo ẹma ẹbuọt idem ye enye ẹnyụn̄ ẹbuọt idem ye Abasi. (John 11:45) Ndi omokụt se nnyịn ikemede ndikpep nto Jesus?—

Afo n̄ko emekeme ndimek eti ini nda nnọ ikọ ntiense mban̄a mme utịbe utịbe n̄kpọ oro Abasi anamde ye se enye edinamde ke ini iso. Afo emekeme ndineme ye nditọ ufọkn̄wed mbufo m̀mê mme andikpep mban̄a mme n̄kpọ emi. Idem ke ini andikpep osụk ekpepde n̄kpọ, ndusụk mme uyen ẹmeda ifet emi ẹtịn̄ ẹban̄a ikpọ edidiọn̄ oro Obio Ubọn̄ Abasi edidade isọk ubonowo. Edi akpanikọ ke afo ukemeke ndinam akpan̄kpa eset, edi afo emekeme ndin̄wam mbon en̄wen ẹfiọk Abasi emi ekemede, edinyụn̄ anamde mme owo nnyịn ẹfiak ẹdidu uwem.

[Ikọ Idakisọn̄]

MBỤME:

▪ Ntak emi Jesus mîkadahake iwiwa ikan̄wam Lazarus?

▪ Ntak emi Thomas ọkọdọhọde ete: ‘Ẹyak nnyịn ika, man nnyịn ikakpa ye Jesus’?

▪ Jesus akasan̄a didie ekeme ndinam Lazarus eset?

▪ Nso ke afo ekeme ndinam man owụt ke emekpep n̄kpọ oto Jesus?