Bible Okpụhọde Mme Owo

N̄WAN kiet ke Russia emi ọbọkde nditọ ikpọn̄ okonyụn̄ enyenede mbumehe n̄kpọsọn̄ ibọk akasan̄a didie etre mbumehe esie onyụn̄ enen̄ede ama nditọ esie? Eren kiet ke Kyoto, Japan, emi mîkenyeneke ufọk, akasan̄a didie enyene ukeme ye uko ndikan mmeme oro akanamde enye edi ubuene? Nso ikanam owo Australia emi ekesikpemede enan̄ etre ndin̄wọn̄ n̄kpọ mbe ubọk? Kop se mmọ ẹtịn̄de mi.

“Mma n̄kpep ke ami nnyene ndise mban̄a idemmi.”​—NELLY BAYMATOVA

ISUA EMANA: 45

IDỤT EMI NTODE: RUSSIA

UTỌ OWO EMI N̄KEDIDE: ADA N̄KPỌSỌN̄ IBỌK

NTE N̄KESIDUDE UWEM: Ẹkebọk mi ke Vladikavkaz, ibuot obio ukara North Ossetia (emi ẹkotde Alania idahaemi). Ubon nnyịn ẹma ẹnyene n̄kpọ esisịt. Edi kpa ye oro ikenyenede n̄kpọ, n̄kokopke inemesịt. Mma n̄wọwọrọ ndọ ikaba ke ini n̄kedide isua 34. Mma nnyene mbumehe edida n̄kpọsọn̄ ibọk ke isua duop, ndien emi ama anam ẹnịm mi ke ufọkibọk utịm ikaba. Okposụkedi oro n̄kenyenede nditọ iba, n̄kọdọn̄ke enyịn mban̄a mmọ ini oro, n̄konyụn̄ n̄kpereke mme ufan m̀mê mbonubon nnyịn idem.

Eka mi ama akabade edi kiet ke otu Mme Ntiense Jehovah, ndien mma nsiwak ndikop enye atuade onyụn̄ ọbọn̄de akam ọnọ Jehovah ete an̄wam mi. Mma nsikere nte: ‘Mama ifiọkke n̄kpọ! Jehovah edisan̄a didie in̄wam mi?’ Mma ndomo nditre n̄kpọsọn̄ ibọk. Edi n̄kekemeke. Isan̄ kiet, n̄kadaha n̄kpọsọn̄ ibọk ke usen iba. Ekem mma mbiere ndiwọrọ ke ufọk, ntre mma mfrọ ke window n̄wọrọ sia mmen̄kekemeke ndikere n̄kpọ ọfọn. Edi n̄kodu ke ufọkenyọn̄. Ndito do ndiduọ ama obụn̄ mi ubọk ye ukot onyụn̄ ọnọ mi unan ke edem. N̄kekemeke ndidaha nda ke se ibede ọfiọn̄ kiet.

Eka mi ama ese aban̄a mi inyụn̄ itọkke mi ke ofụri ini oro. Enye ama ọfiọk ke nsikemeke ndimụm idem n̄kama nnyụn̄ n̄kere n̄kpọ ọfọn. Kpa ye oro, enye ama esibon Awake!a ekpere bed mi. Mma nsikot mmọ kpukpru, ndien mmọ ẹma ẹsinem etieti ẹnyụn̄ ẹkpep owo n̄kpọ. Ekem mma mbiere ndikpep Bible ye Mme Ntiense.

NTE BIBLE OKOKPỤHỌREDE UWEM MI: N̄kpọ kiet oro Bible ekekpepde mi ekedi ndinam se akpanade nnam. Mma n̄kpep ke utu ke ndidori enyịn eka mi ndise mban̄a mi, ke edi utom mi ndin̄wana okụk nda nse mban̄a idemmi ye nditọ mi. Ke mma n̄kodu uwem nte mmama mbịghi ntre, ama ọsọn̄ mi ndiyom akpan utom nnam.

Item oro ẹnọde ke Deuteronomy 6:5-7, emi ọdọhọde mme ete ye eka ẹkpep nditọ mmọ n̄kpọ ẹban̄a Abasi ama enen̄ede an̄wam mi. Mma ndifiọk ke nyanam ibat nnọ Abasi mban̄a nte n̄kamade nditọ mi. Emi ama anam ntọn̄ọ ndidu ye mmọ nnyụn̄ ntọn̄ọ ndinen̄ede mma mmọ.

Mma nnen̄ede n̄kọm Jehovah ke ntak emi enye akanamde mi n̄kpep akpanikọ mban̄a enye. Ntre, mma nyak idem nnọ enye nnyụn̄ nna baptism nte kiet ke otu Mme Ntiense Jehovah.

UFỌN ORO MBỌDE: Mma mfiak ntọn̄ọ nditie ke emem ye eka mi sia mma n̄kpep ndisụk esịt. Ami ye nditọ mi n̄ko imenen̄ede ikpere kiet eken idem.

Sia nsuade ndiọi n̄kpọ, nnyeneke aba ediwak mfịna oro usụn̄ uwem mi ekesinamde nnyene. Mmenen̄ede n̄kop inemesịt idahaemi ndin̄wam mme owo ẹdikpep akpanikọ ẹban̄a edima Abasi nnyịn, Jehovah.

“Nda ke ẹma ẹnyan̄a uwem mi.”​—MINORU TAKEDA

ISUA EMANA: 54

IDỤT ORO NTODE: JAPAN

UTỌ OWO EMI N̄KEDIDE: N̄KESIDỤN̄ KE EFAK

NTE N̄KESIDUDE UWEM: Ete ye eka ete mi ẹkebọk mi ke Yamaguchi. Akananam n̄kwe eka mi. Eka ete mi ama akpa ke ini n̄kedide isua 19, ndien mma n̄ka iso ndụn̄ ye ete mi. Ami n̄kesinam utom utemudia, ndien ẹma ẹda ete mi n̄ko ke usiakifia utemudia. Nnyịn ikesinam utom nsio nsio ini, ntre nnyịn ikesiwakke ndikụt kiet eken. Mma ntọn̄ọ ndisinam utom enen̄ede ebịghi nnyụn̄ ntiene mme ufan mi n̄n̄wọn̄ n̄kpọ.

Nte ini akakade, utom mi ama efek mi. Mma ntọhọ ye eteutom mi nnyụn̄ ntọn̄ọ ndinen̄ede n̄n̄wọn̄ n̄kpọ. Ke ini n̄kekperede ndisịm isua 30, mma n̄kpọn̄ ufọk n̄ka ebiet en̄wen. Ke ini okụk okokụrede mi ke ubọk, mma ntọn̄ọ ndinam utom ke pachinko (itie mbre mfọniso). Mma nsobo n̄kaiferi kiet nnyụn̄ ndọ enye. Edi ndọ nnyịn ama asuana ke isua iba ye ubak kpọt ẹma ẹkebe.

Mma n̄kop mfụhọ n̄konyụn̄ nnyeneke iwụk ndien mma nnen̄ede n̄kama isọn. Mma mfehe mme akpak-isọn n̄kodụn̄ ke obio nnyịn esisịt ini ye ete mi, edi mma nsu nsu nnọ enye ndien emi ama abiat itie ebuana nnyịn. Mma nda okụk ke ufọk esie nnyụn̄ ntre mbre mfọniso ke esisịt ini. Ke akpatre, mma n̄kabade ọkpọikpọi ubuene nnyụn̄ ndụn̄ ke itiembehe tren mbịghi. Mma n̄wọrọ n̄ka Hakata, ekem n̄wọrọ n̄ka Himeji, ndien ke akpatre n̄wọrọ n̄ka Kyoto. Mma ndụn̄ ke efak ke isua ifan̄.

NTE BIBLE OKOKPỤHỌREDE UWEM MI: Ke 1999, n̄ketie ke itie unọ idem inemesịt emi ekperede Akpa Kamogawa ke Kyoto ke ini iban iba ẹkesan̄ade ẹbịne mi. Kiet ke otu mmọ ama obụp mi ete, “Ndi afo akpama ndikpep Bible?” Mma nnyịme. Mme Christian oro ẹkọride ẹsịm ọyọhọ idaha ke esop Mme Ntiense Jehovah do ẹma ẹkpep Bible ye ami ẹnyụn̄ ẹn̄wam mi n̄kụt ufọn edida mme edumbet esie nsịn ke edinam. Mmọ ẹma ẹdọhọ ẹte ndomo ndiyom utom ye ebietidụn̄. Man nnem mmọ esịt, mma n̄ka itieutom ifan̄, edi ke akpa n̄kenen̄ekede nsịn idem. Edi nte ini akakade, mma mbọn̄ akam nyom un̄wam nnyụn̄ nnen̄ede ndomo ndiyom utom, ndien ke akpatre mma nnyene utom.

Akam n̄ko ama an̄wam mi n̄kan ọkpọsọn̄ idomo. Mbon oro n̄kakamade isọn, oro n̄kefehede n̄kpọn̄, ẹma ẹdimụm mi ẹnyụn̄ ẹdọhọ n̄kpe mmimọ okụk mmimọ. Esịt ama enen̄ede etịmede mi. Nte n̄kosụk n̄kotde Bible ke usen ke usen mma n̄kụt Isaiah 41:10. Abasi ọkọn̄wọn̄ọ ọnọ mme anam-akpanikọ asan̄autom esie ke ufan̄ikọ oro ete: “Nditreke ndinyan̄a fi.” Un̄wọn̄ọ oro ama ọnọ mi odudu ye uko. Mma nnen̄ede nsịn ifịk ndien ke akpatre mma n̄kpe ofụri isọn mi. Mma ndot ndina baptism nte kiet ke otu Mme Ntiense Jehovah ke 2000.

UFỌN ORO MBỌDE: Se n̄kekpepde ke Bible ama anam mi mfiak ntie ke emem ye ete mi, enye ama onyụn̄ efen ndudue mi. Esịt ama enen̄ede enem enye ke ntak emi n̄kekpepde ndida mme edumbet Bible ndu uwem. Nda ke ami ndida mme edumbet Bible nsịn ke edinam akanyan̄a uwem mi.

Ke adianade do, mmanam utom nda nse mban̄a idemmi. (Ephesus 4:28; 2 Thessalonica 3:12) Mmonyụn̄ nnyene ata mme ufan ke esop Mme Ntiense Jehovah. (Mark 10:29, 20) Mmenen̄ede n̄kọm Jehovah ke se enye ekpepde mi.

“Ikememke Mi Utom Ndikpụhọde.”​—DAVID HUDSON

ISUA EMANA: 72

IDỤT ORO NTODE: AUSTRALIA

UTỌ OWO EMI N̄KEDIDE: ỌN̄WỌN̄-N̄KPỌ OWO

NTE N̄KESIDUDE UWEM: Ami n̄kedi ọyọhọ eyen 11 nnọ ete ye eka mi, emi ẹkekerede Willie ye Lucy. Nnyịn ikodụn̄ ke obio mme amanaisọn̄ Australia emi ekerede Aurukun, emi odude ke ata edere edere Queensland. Ẹkesiak obio Aurukun ke ediye mben Akpa Archer onyụn̄ ekpere Inyan̄. Ete ye eka mi ẹma ẹkpep nnyịn utop ye ukọiyak man inyene se idiade. Ini oro, ibet ukara ama akpan nnyịn mme amanaisọn̄ Australia ndikama okụk ke idemmọ, owo ikonyụn̄ iyakke nnyịn idụn̄ ke ebiet en̄wen, ke mîbọhọke ebiet oro ẹkenọde nnyịn.

Ete ye eka mi ẹma ẹnam kpukpru se mmọ ẹkekemede man ẹkpep mi nti edu uwem ẹnyụn̄ ẹkpep kpukpru nnyịn ndikpono ikpọ owo ke obio nnyụn̄ mbuana se ededi oro nnyịn inyenede. Emi ama anam isida kpukpru ikpọ owo nte mme ete ye eka nnyịn ye nte nditọeka ete ye eka nnyịn.

Ete mi ama akpa ke ini n̄kedide isua itiaba, ndien nnyịn ima iwọrọ ikodụn̄ ke obio mme amanaisọn̄ Australia ke Mapoon, emi edide n̄kpọ nte kilomita 150 ọtọn̄ọde ke edere Aurukun. Ke ini n̄kedide isua 12, mma ntọn̄ọ ndikpeme enan̄, nnyụn̄ nnam utom nte ekpeme enan̄ ke ediwak itie ubọk enan̄ tutu esịm ini emi n̄kekperede ndisịm isua 50. Uwem ikememke. Mma nsin̄wọn̄ n̄kpọ etieti ndien ndien. Emi ama anam mfịna ye nsọn̄ọn̄kpọ esịm mi.

Isan̄ kiet emi n̄kọn̄wọn̄de n̄kpọ mbe ubọk, mma nten̄ n̄wọrọ ke ufọkisen n̄kodụk iso ubomisọn̄ emi akawatde ata usọp usọp. Mma ndu isua iba ke ufọkibọk unam ukpụhọde ye ke itie unuak owo idem—ndien n̄kekemeke aba ndikpeme enan̄.

NTE BIBLE OKOKPỤHỌREDE UWEM MI: Ke ini emi n̄kodude ke itie unam ukpụhọde, n̄wan kiet emi ekedide ufan mi ama ada Enyọn̄-Ukpeme ye Awake! ọsọk mi man n̄kpokot. Edi n̄kekemeke ndikot n̄wed ọfọn sia mmen̄kenen̄ekede n̄ka n̄wed. Ekem, usen kiet emi eyo ekenen̄erede ofiop, ete kiet emi ekedide isua 83 ama edi ebịne mi. Mma ndọhọ enye edibọ mbịtmbịt mmọn̄ ọn̄wọn̄. Enye ama ọnọ mi mme n̄wed un̄wam ukpep Bible onyụn̄ ọdọhọ m̀mê n̄kpama imọ ifiak idi idinam se ẹwetde an̄wan̄a mi. Nte ini akakade, mma ntọn̄ọ ndikpep Bible ye enye kpukpru ini. Mma ndikụt ke oyom n̄kpụhọde edu mi ye usụn̄ uwem mi edieke nyomde ndinem Abasi esịt.

Ikememke mi utom ndikpụhọde. Edi ke ntak emi eka mi ekekpepde mi ndikpono ikpọ owo, mma nnen̄ede n̄kpono akanieren oro ekekpepde mi Bible nnyụn̄ nnen̄ede mma ifiọk Abasi emi enye ekekpepde mi. Kpa ye oro, mma mmen̄e ndiyak idem mi nnọ Abasi. N̄kekere ke ana mbemiso ndiọn̄ọ kpukpru n̄kpọ ke Bible.

Edi nsan̄autom mi ama enen̄ede mi. Enye ekedi kiet ke otu Mme Ntiense Jehovah, ndien enye ama owụt mi se idude ke Colossae 1:9, 10. Itien̄wed oro ọdọhọ ke ana ika iso ‘ikọri ke nnennen ifiọk Abasi.’ Nsan̄autom mi ama anam mi mfiọk ke idụhe ini emi nditrede ndikpep mbufa n̄kpọ, ntre ke ikpanaha ntre ndiyak idem mi nnọ Abasi sia mmemfiọkke kpukpru n̄kpọ.

Ama enen̄ede enem mi ke ini n̄kọtọn̄ọde ndibuana ye Mme Ntiense Jehovah. Mma n̄kụt nte mme owo emi ẹtode kpukpru ebiet ẹdianade kiet ẹtuak ibuot ẹnọ Abasi. Edidianakiet emi ama anam mi nnen̄ede nnịm ke mmokụt ido ukpono akpanikọ, ntre mma nna baptism nte kiet ke otu Mme Ntiense Jehovah ke 1985.

UFỌN ORO MBỌDE: Mmọfiọk ndikot n̄wed ọfọn, ndien idahaemi mmesibiat ediwak hour kpukpru urua n̄kpep mme owo nte ẹkotde n̄wed nnyụn̄ n̄kpep mmọ Bible. Ke adianade do, n̄wan oro akadade Enyọn̄-Ukpeme ye Awake! ọsọk mi do ama etiene ekpep n̄kpọ ye Mme Ntiense, ana baptism, ndien enye edi edima n̄wan mi idahaemi. Nnyịn imenen̄ede ikop idatesịt ndidiana kiet n̄n̄wam mme owo ke mme obio amanaisọn̄ Australia ẹkpep n̄kpọ ẹban̄a Jehovah Abasi.

[Ikọ Idakisọn̄]

[Se ẹwetde ke ikpọ abisi ke page 21]

Ami ye n̄wan mi imenen̄ede ikop idatesịt ndin̄wam mme owo ke obio mme amanaisọn̄ Australia ẹkpep n̄kpọ ẹban̄a Abasi