Nso ke Nditọwọn̄ Ẹkpekpep?
“Abasi ọkọnọ odudu spirit ẹda ẹwet ofụri N̄wed Abasi, ndien enye ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido.”—2 TIMOTHY 3:16.
OYOM nditọwọn̄ ẹkpep n̄kpọ ẹban̄a Abasi. Edi m̀mọ̀n̄ ke mmọ ẹkeme ndikpep n̄kpọ emi? Ke Bible, kpa n̄wed emi ẹnen̄erede ẹkpono.
Bible etie nte leta emi Abasi ewetde. Ke leta emi ke Abasi etịn̄ mme edu esie onyụn̄ owụt nnyịn nditọ esie—n̄kpri ye ikpọ—ikpodude uwem. Se ndusụk n̄kpọ oro Bible ekpepde mi, ye mme n̄kpọ oro idem nditọwọn̄ ẹkemede ndikpep nto emi.
Nso ke Abasi oyom nnyịn ifiọk iban̄a enye?
◼ Se Bible ekpepde: “Afo, emi enyịn̄ fo edide Jehovah, Afo ikpọn̄ edi Ata Edikon̄ ke ofụri isọn̄.”—Psalm 83:18.
Se emi ekpepde nnyịn: Abasi edi ata owo emi onyụn̄ enyenede enyịn̄.
◼ Se Bible ekpepde: “Jehovah odụn̄ọrede kpukpru esịt, enye onyụn̄ ọfiọk kpukpru ekikere esịt owo. Edieke afo oyomde enye, enye ayayak fi okụt enye.”—1 Chronicle 28:9.
Se emi ekpepde nnyịn: Jehovah Abasi ekere aban̄a kpukpru owo, kpa ye nditọwọn̄. (Psalm 10:14; 146:9) Enye oyom nnyịn ifiọk n̄kpọ iban̄a imọ.
◼ Se Bible ekpepde: “Ẹkûtụhọde . . . eyenakpa. Edieke afo edededei otụhọde enye, ndien edieke enye esemede okot mi, nditreke ndikop eseme esie.”—Exodus 22:22-24.
Se emi ekpepde nnyịn: Jehovah esikop akam mme owo, kpa ye eke nditọwọn̄. Nnyịn imekeme ndibọn̄ akam nnọ Abasi kpukpru ini, itịn̄ ofụri se isịnede nnyịn ke esịt ye nte etiede nnyịn ke idem.
◼ Se Bible ekpepde: “Mmọ ẹdomo Abasi ediwak ini, ẹnyụn̄ ẹnam Edisana Abasi Israel okop ubiak.”—Psalm 78:41.
Se emi ekpepde nnyịn: Nte nnyịn isitịn̄de ikọ inyụn̄ inamde n̄kpọ ẹsitụk Jehovah, ntre ana inen̄ede ikpeme se itịn̄de inyụn̄ inamde.
Didie ke isinam n̄kpọ ye mbon emi mîtoho edem nnyịn?
◼ Se Bible ekpepde: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.
Se emi ekpepde nnyịn: Ikpanaha isari owo ndomokiet ke ntak emi enye mîtoho edem nnyịn mînyụn̄ itiehe nte nnyịn, koro Abasi enyenyịme kpukpru owo.
◼ Se Bible ekpepde: “Ẹben̄e idem kpukpru ini ndibọrọ owo ekededi eke obụpde mbufo ntak idotenyịn emi mbufo ẹnyenede, edi ẹnam emi ke ifụre ifụre ido ye ntotụn̄ọ ukpono.”—1 Peter 3:15.
Se emi ekpepde nnyịn: Kûneme n̄kpọ aban̄ade ido ukpono ikọ ikọ, neme enye ata ifụre ifụre. Ikpenyene ndinyụn̄ n̄kpono mbon emi mîdịghe mbon ido ukpono nnyịn.
Didie ke ikpanam n̄kpọ ye mbonubon nnyịn?
◼ Se Bible ekpepde: “Mbufo nditọ, ẹkop uyo ẹnọ mme ete ye eka mbufo ke kpukpru n̄kpọ, koro emi etịmde enem Ọbọn̄ esịt.”—Colossae 3:20.
Se emi ekpepde nnyịn: Nditọ emi ẹkopde item ẹwụt ke imama ete ye eka mmimọ inyụn̄ iyom ndinem Abasi esịt.
◼ Se Bible ekpepde: “Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye owo. Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.”—Colossae 3:13.
Se emi ekpepde nnyịn: Ediwak owo, kpa ye mbonubon nnyịn, ẹsinam se ibiakde nnyịn ndusụk ini. Edi ana ifen inọ mmọ edieke iyomde Abasi efen mme idiọkn̄kpọ nnyịn.—Matthew 6:14, 15.
Ntak emi ikpetịn̄de akpanikọ inyụn̄ ifọn ido?
◼ Se Bible ekpepde: “[Ẹduọn̄ọ] nsu, yak owo mbufo kiet kiet etịn̄ akpanikọ ọnọ mbọhọidụn̄ esie.”—Ephesus 4:25.
Se emi ekpepde nnyịn: Nnyịn isikpebe Abasi ke ini itịn̄de akpanikọ, ndien emi esinam esịt enem enye. Edi edieke nsu emehede nnyịn, ọwọrọ ikabade itie nte asua Abasi, oro edi, Devil emi edide “ete nsu.”—John 8:44; Titus 1:2.
◼ Se Bible ekpepde: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.”—Matthew 7:12.
Se emi ekpepde nnyịn: Akpana isifọn ido inyụn̄ ikere iban̄a nte etiede mbonubon nnyịn ke idem kpa ye mbon en̄wen nde. Mme owo ẹyefọn ido ye nnyịn edieke ifọnde ido ye mmọ.—1 Peter 3:8; Luke 6:38.
Mme n̄kpọ oro inemede mi ẹwụt ke Bible ekeme ndikpep nditọwọn̄ ndiwụt esịtekọm, ndikpono owo, nnyụn̄ ntua owo mbọm. Edi anie ekpekpep nditọwọn̄ mme n̄kpọ emi?