Nte Ẹkpekpepde Nditọwọn̄ N̄kpọ Ẹban̄a Abasi—Ewe Usụn̄ Ọfọn Akan?

“Yak mme ikọ emi ami ntemede fi mfịn emi ẹdu fi ke esịt; afo onyụn̄ enyene ndidọdiọn̄ n̄kpep eyen fo mme ikọ emi nnyụn̄ ntịn̄ mban̄a mmọ ke ini afo etiede ke ufọk fo ye ke ini afo asan̄ade ke usụn̄ ye ke ini afo anade-na ye ke ini afo adahade ada.”​—DEUTERONOMY 6:6, 7.

NDINỌ nditọ ukpep ekeme nditie mme ete ye eka ndusụk ini nte n̄kpọ emi mmọ mîkemeke ndinam. Ke ini mmọ ẹyomde ndifiọk nte ikpasan̄ade ikpep nditọ n̄kpọ, akpakịp nsio nsio item oro mme owo ẹnọde mfịn ẹsinen̄ede ẹtịmede mmọ. Mme iman ye mme ufan ẹsiwak ndisọsọp nnọ ekikere mmọ. Mme n̄wed, mme magazine, ye nsio nsio ikpehe ke Intanet ẹsinọ nsio nsio ekikere emi ẹtuahade ye kiet eken.

Edi Bible eteme ete ye eka se ẹkpekpepde ye nte ẹkpepde nditọ n̄kpọ. Itie N̄wed Abasi oro ẹsiakde ke enyọn̄ emi etịn̄ ke ana mme ete ye eka ẹyom ifet ke usen ke usen ẹkpep nditọ mmọ n̄kpọ ẹban̄a Abasi. Iyom ndineme item Bible inan̄ emi ẹn̄wamde ata ediwak ete ye eka ẹkpep nditọ mmọ n̄kpọ ẹban̄a Abasi.

1. Da mme n̄kpọ oro Abasi okobotde kpep mmọ n̄kpọ. Apostle Paul ekewet ete: “Ẹtịm ẹkụt mme edu [Abasi] oro enyịn mîkwe, oro edi, nsinsi odudu esie ye idaha esie nte Abasi.” (Rome 1:20) Mme ete ye eka ẹkeme ndiwụt nditọ mmọ mme n̄kpọ emi Abasi okobotde ẹnyụn̄ ẹtịn̄ ẹnọ mmọ nsio nsio edu Abasi emi mme n̄kpọ emi ẹwụtde, ndien emi ayanam nditọ emi ẹfiọk ke Abasi do, n̄ko ke mmimọ imekeme ndinam ufan ye enye.

Nte Jesus ekesikpepde mme mbet esie n̄kpọ edi oro. Ke uwụtn̄kpọ, enye ọkọdọhọ mmọ ete: “Ẹtịm ẹse mme inuen enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke n̄kpọ ibon ke ubet ubonn̄kpọ; edi Ete mbufo eke heaven ọbọk mmọ. Nte mbufo isọn̄ke urua ikan mmọ?” (Matthew 6:26) Jesus okowụt mmọ ke Jehovah enyene ima ye mbọm. Edi idịghe n̄kukụre se enye akanamde edi oro. Enye ama anam mmọ ẹkụt nte Abasi esiwụtde nditọ esie mme edu emi.

Enyene-ọniọn̄ Edidem Solomon ama etịn̄ aban̄a utọ ọniọn̄ emi Abasi ọnọde mme iyọn̄, onyụn̄ ada ata n̄kpri edibotn̄kpọ emi ekpep ata akpan n̄kpọ. Enye ekewet ete: “O ifu, ka bịne iyọn̄; kese usụn̄ esie nyụn̄ nyene ọniọn̄. Okposụkedi enye mînyeneke etubom, esenyịn m̀mê andikara, enye etịm udia esie ke ndaeyo; atan̄ udia esie obon ke ini idọk.” (Mme N̄ke 6:6-8) Ata eti usụn̄ edi emi ndiwụt adan̄a nte ọfọnde ndinịm nti utịtmbuba nnyụn̄ nda odudu emi Abasi ọnọde nnyịn nsịm mmọ.

Mme ete ye eka ẹkeme ndikpebe Jesus ye Solomon edieke mmọ ẹnamde emi: (1) Ẹbụp nditọ mmọ m̀mê ewe eto ye unam ke mmọ ẹma ẹkan. (2) Ẹnen̄ede ẹkpep n̄kpọ ẹban̄a mme eto ye unam emi. (3) Ẹda emi ẹkpep n̄kpọ ẹban̄a Abasi.

2. Kpebe nte Jesus ekesinamde n̄kpọ ye mbon emi enye ekekpepde n̄kpọ. Ke otu kpukpru owo emi akanam ẹdude uwem, Jesus ekenyene n̄kpọ akan nditịn̄. Enye ikadaha ofụri ini esie itịn̄ ikọ ikọ, edi ama esiwak ndibụp mbụme, sia ekesiyom ndidiọn̄ọ ekikere mbon emi enye ekpepde n̄kpọ ye nte mmọ ẹsede n̄kpọ. (Matthew 17:24, 25; Mark 8:27-29) Ntre n̄ko ke edi ye mme ete ye eka, mmọ ẹnyene ekese nditịn̄ nnyụn̄ n̄kpep nditọ mmọ. Edi edieke mmọ ẹyomde ukpep emi mmọ ẹnọde nditọ mmọ ọfọn, ana mmọ ẹkpebe Jesus, ẹyak nditọ mmọ ẹnyene ifụre nditịn̄ ekikere mmọ.

Edi nso ke mme ete ye eka ẹkpenam edieke nditọ mmọ ẹsọn̄de ibuot mîdịghe mîsọpke inam se ẹkpepde mmọ? Ẹyak ise nte Jesus akanamde n̄kpọ ye mme apostle esie. Mme apostle Jesus ẹma ẹsifan̄a mfan̄a ke otu idemmọ ndusụk ini, inyụn̄ isọpke ikpep ndisụhọde idem. Edi Jesus ama enyene ime ye mmọ onyụn̄ esiti mmọ ediwak ini ke ọfọn ndisụhọde idem. (Mark 9:33, 34; Luke 9:46-48; 22:24, 25) Mme ete ye eka oro ẹkpebede Jesus ẹyenyene ime ẹnen̄ede nditọ mmọ ediwak ini, tutu ekem ini emi nditọ emi ẹnamde se ẹkpepde mmọ.

3. Nanam se ekpepde. Ọkpọfọn mme ete ye eka ẹnam item emi apostle Paul ọkọnọde mme Christian ke Rome. Enye ọkọdọhọ mmọ ete: “Afo emi ekpepde owo efen, nte emekpep idemfo? Afo emi ọkwọrọde ete, ‘Kûyịp inọ,’ nte afo emeyịp inọ?”​—Rome 2:21.

Item emi ke enyenyene ufọn mfịn koro nditọ ẹsisọp ndikpebe se mme ete ye eka mmọ ẹnamde ẹkan se mmọ ẹtịn̄de. Ke nditịm ntịn̄, nditọwọn̄ ẹsisọp ndikop item mme ete ye eka emi ẹsinamde se mmọ ẹdọhọde nditọ mmọ ẹnam.

4. Tọn̄ọ ke nsek. Timothy emi ekesisan̄ade ye Paul anam utom isụn̄utom ama ọwọrọ eti etop ke obio mmọ. (Utom 16:1, 2) N̄kpọ kiet emi akanamde enye ọwọrọ eti etop edi ke ẹma ẹkpep enye “ndisana uwetn̄kpọ” toto ke nsek. Eka Timothy ye eka eka esie ẹma ẹsikot N̄wed Abasi ẹnọ Timothy ẹnyụn̄ ẹn̄wam enye etie ekere akpanikọ N̄wed Abasi.​—2 Timothy 1:5; 3:14, 15.

Ebiet Emi Ekemede Ndibọ Un̄wam

Mme Ntiense Jehovah ẹsion̄o ediwak n̄wed emi mme ete ye eka ẹkemede ndida n̄kpep nditọ mmọ n̄kpọ mban̄a Abasi. Ẹwet ndusụk n̄wed emi ẹnọ nditọwọn̄, ẹnyụn̄ ẹwet ndusụk man ẹn̄wam mme ete ye eka ye nditọ mmọ emi ẹdide n̄kparawa ẹsineme nneme in̄wan̄-in̄wan̄.a

Edi ọyọfọn mme ete ye eka ẹbem iso ẹdiọn̄ọ ibọrọ n̄kpọsọn̄ mbụme oro nditọ ẹsibụpde mbemiso mmọ ẹkemede ndikpep mmọ n̄kpọ mban̄a Abasi. Ke uwụtn̄kpọ, ọkpọbọrọ didie mme mbụme emi: Ntak emi Abasi ayakde ndutụhọ odu? Nso idi uduak Abasi kaban̄a isọn̄? Mme akpan̄kpa ẹdu m̀mọ̀n̄? Mme Ntiense Jehovah ẹyekop inemesịt ndin̄wam fi ọdiọn̄ọ ibọrọ mbụme emi ye mme ibọrọ mbụme en̄wen, man afo ye ubon fo ẹkeme ndisan̄a n̄kpere Abasi.​—James 4:8.

[Ikọ Idakisọn̄]