Kpep N̄kpọ To Ikọ Abasi

Didie ke Afo Ekeme Ndisan̄a N̄kpere Abasi?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ndi Abasi esikop kpukpru akam?

Jehovah oyom kpukpru owo ẹbọn̄ akam man ẹkpere imọ. (Psalm 65:2) Edi idịghe kpukpru akam ke enye esikop. Ke uwụtn̄kpọ, Abasi ikokopke akam nditọ Israel ke ini mmọ ẹkekọbọde ke idiọkn̄kpọ. (Isaiah 1:15) N̄ko, Abasi isikopke akam owo emi ofiomode n̄wan esie. (1 Peter 3:7) Edi, Abasi esikop akam idiọkowo emi akabarede esịt.—Kot 2 Chronicle 33:9-13.

2. Didie ke ikpọbọn̄ akam?

Ndikeme ndibọn̄ akam nnọ Abasi edi ata akwa n̄kpọ onyụn̄ edi kiet ke otu usụn̄ emi ituakde ibuot inọ Abasi. Ntre, ikpenyene ndibọn̄ akam nnọ Jehovah kpọt. (Matthew 4:10; 6:9) Sia nnyịn idide mme anana-mfọnmma owo, nnyịn ikpenyene ndibọn̄ akam ke enyịn̄ Jesus koro enye edi n̄kukụre “usụn̄” emi Abasi emekde ọnọ nnyịn. (John 14:6) Jehovah iyomke nnyịn imomụm akam idọn̄ ke ibuot isikama itịn̄ ifiak itịn̄ mîdịghe iwewet akam, edi oyom akam nnyịn oto nnyịn esịt.—Kot Matthew 6:7; Philippi 4:6, 7.

Andibot esikop akam emi ẹbọn̄de ke esịt. (1 Samuel 1:12, 13) Enye ọdọhọ ibọn̄ akam kpukpru ini, mbemiso idụkde idap, ke ini idemerede, ke ini udia, ye ke mme ini afanikọn̄.—Kot Psalm 55:22; Matthew 15:36.

3. Ntak emi mme Christian ẹsisopde idem?

Imemke utom ndisan̄a n̄kpere Abasi sia nnyịn idu ke otu mbon emi mîbuọtke idem ye enye, ẹsinyụn̄ ẹdade un̄wọn̄ọ esie ndinam emem odu ke isọn̄ ẹnam mbubru. (2 Timothy 3:1, 4; 2 Peter 3:3, 13) Ntre oyom isisop idem ye nditọete nnyịn sia emi ayanam isịn udọn̄ inọ kiet eken.—Kot Mme Hebrew 10:24, 25.

Ndinam ufan ye mbon emi ẹmade Abasi ayanam ekeme ndisan̄a n̄kpere Abasi. Edieke esidụkde mbono esop Mme Ntiense Jehovah, mbuọtidem mmọ ekeme ndisọn̄ọ fi idem.—Kot Rome 1:11, 12.

4. Didie ke afo ekeme ndisan̄a n̄kpere Abasi?

Afo edikeme ndisan̄a n̄kpere Jehovah edieke esitiede ekere se ekpepde ke Bible. Bọn̄ akam tie kere mme n̄kpọ emi enye anamde, ndausụn̄ emi enye ọnọde ye mme un̄wọn̄ọ esie. Emi ayanam enen̄ede owụt esịtekọm aban̄a ima ye ọniọn̄ Abasi.—Kot Joshua 1:8; Psalm 1:1-3.

Afo edikeme ndisan̄a n̄kpere Abasi n̄kukụre edieke ọbuọtde idem ye enye. Edi mbuọtidem etie nte n̄kpọ emi oyomde ẹbọbọk. Ana afo aka iso ọbọk mbuọtidem fo ke nditie n̄kere se inamde enịm se ekpepde ke akpanikọ.—Kot 1 Thessalonica 5:21; Mme Hebrew 11:1, 6.

5. Nso ufọn ke edidia edieke asan̄ade ekpere Abasi?

Jehovah esikpeme mbon oro ẹmade enye. Enye esikpeme mmọ osio ke n̄kpọ ekededi emi akpabiatde mbuọtidem ye idotenyịn oro mmọ ẹnyenede ndidu uwem ke nsinsi. (Psalm 91:1, 2, 7-10) Enye odụri nnyịn utọn̄ ete ifep ndidu utọ uwem emi ekemede ndinam ikûkop inemesịt ikûnyụn̄ ukop nsọn̄idem. Orụk uwem emi Jehovah ekpepde nnyịn ndidu edi mfọnn̄kan.—Kot Psalm 73:27, 28; James 4:4, 8.

Edieke oyomde ndifiọk n̄kpọ en̄wen, se ibuot 17 ke n̄wed Nso Ke Bible Enen̄ede Ekpep?, emi Mme Ntiense Jehovah ẹsiode.